Ka Nupepa Kuokoa, Volume III, Number 48, 26 November 1864 — Ia Z. P. Poliala. [ARTICLE]

Ia Z. P. Poliala.

Auhea oe e Poliaia. he wahi ninau pokole ka'u ia oe ; no ko'u heluhelu ana iloko oka Nupepa Kuokoa. lHe eha mau ano Hoomana i komo mai i keia Aupuni ma Hawaii nei, oia hoi keia: 1. O ka Hoomana Kiristiano Kalavina. 2. O ka Hoomana Kiristiano Katolika. 3. O ka Hoomana Moremona. 4. O ka Hoomana Enelani. A ke ninau aku nei au ia oe e Poliala, mai hea mai kela mau Hoomana? Ua kukulu anei o lesu Kristo ia lakou a pau. A ke ninau hou aku nei au ia oe, mai hea mai keia mau Hoomana, Kalavina, Katolika, Moremona, ame Enelani? Mai ia Iesu Kristo mai anei? E oluolu mai anei oe e Poliala, Kahinalua, a me Hoku no hoi, a me ka poe naauao e ae no hoi, ua makemake au e hai mai, i ka hiki pololei ana o keia hoomana hou i kukuluia ma Peleula, ina he hoomana oiaio keia, makemake au e komo malaila. 1. Owai la kona kumu ? Na Iesu Kristo no anei i kukulu ? 2. Ehia la ona mau makahiki? E hai mai oukou me ka pololei loa. Owau no R. Holohonua.