Ka Nupepa Kuokoa, Volume III, Number 49, 3 December 1864 — Page 1
KA
NUPEPA KUOKOA
Ke Kilohana Pookela no ka Lahui Hawaii.
BUKE III. HELU 49. HONOLULU, DEKEMABA 3,1864. NA HELU A PAU 158.
" KA NUPEPA KUOKOA."
HOOPUKA MAU IA MA HONOLULU
I kela Poaono keia Poaono.
$2.00 no ka makahiki, ME KA HOOKAA MUA MAI.
NA OLELO HOOLAHA — aole i oi mamua o 10 laina no ka hoopuka hookahi ana, $1.00 ; alua komo ana, he $1.50 ; hookahi malama, $2.00. E uku mua ia mai ke dala o na olelo hoolaha a pau e hoounaia mai ana e pai.
KANIKAU — he hapalua dala ka uku no ka aoao hookahi o ka pepa leta, oia hoi 4 keneta no ka lalani hookahi — penei : he 25 lalani. $1.00 ; 50 lalani, $2.00 ; a pela'ku.
KA UKU NO NA OLELO HOOLAHA — ka uku pepa, a me ka uku o ka Kanikau, e haawiia no ma ka lima o na Luna o ke Kuokoa, a i oleia e hookomo mai no ma ka leta, a hoouna mai i ka Luna Pai.
O NA UKU PEPA A PAU E HOOKAA MUA MAI NO — aole e kauia ka inoa o kekahi haole a kanaka maoli paha, ma ka inoa o ka poe lawe pepa ke ole e hookaa e mai mamua. E pono ke hiipoiia keia mau rula, no ka mea, he emi no ka auhau no keia nupepa. H. M. WINI, (Luna Pai.)
KA " NUPEPA KUOKOA."
Is published in Honolulu
EVERY SATURDAY, $2.00 per annum...........in advance,
ADVERTISEMENTS not exceeding 10 lines, inserted once for $1.00 ; twice for $1.50 ; and $2.00 for one month ; all advertisements must be paid for in advance.
KANIKAUS will be charged 1.00 per page, or 4 cts. a line. PAYMENTS FOR ADVERTISEMENTS, Subscriptions or Kanikaus, may be paid to any of the Agents of the Kuokoa, or may be enclosed in a letter to the Publisher. ALL SUBSCRIPTIONS must be PREPAID. No names, either of foreigners or natives, will be inserted on the subscription list, until fully paid for. This rule must be strictly adhered to, on account of the low subscription price.
H M. WHITNEY.
Publisher.
Volume I and II of the KUOKOA, bound, for sale, $3.50 each.
Persons having complete sets of the above, can have them exchanged for bound Volumes, by paying $2.00 each.
Kumumanao.
PEHEA LA'UANEI E NUI HOU MAI
AI O HAWAII, NO KA MEA HOI,
UA UUKU IA.
E KA NUPEPA KUOKOA E ; Aloha oe : He manaolana ko'u naau e noho nei, a he iini nui hoi kuu poo e hoohelelei iho i na paka ua kikilihuna materia ike oia Puniu, iloko iho o kuu kino nui palahalaha, a nana hoi i hoonioni ae i ke anailiwai like o kuu hapa pulima akau ; e hooma-u iho i kahi huihuini o kuu maka-eila gula, i ka wai hauliuli lipolipo eleele o ka inika ko-lu, a e kahakaha kino ae hoi i keia mau hua e kau nei. " Pehea la'uanei e nui hou mai ai o Hawaii nei, no ka mea hoi, ua uuku ia ? "
E nana iki kakou i ka nui a me ka uuku o Hawaii nei, ka Pae Aina hoi i olelo ia e ka poe naauao. " Ua hoea ia mai mailoko mai o ka moana, a o na ahi Pele ka ke kumu i ike ia'i keia Pae Moku." A ke ku mai la hoi ka moolelo a kanaka Hawaii a kiekie, a hoolei iho la, me ka i iho. " Ua hana maoli ia no keia Pae Aina e Wakea ma laua o Papanuihanaumoku, me ko laua mau lima iho."
Hele a hiki pono pela, alaila, heaha ia hoi ke ano o Wakea ma e kohu like ai i Moowini wale ka manao ana, a me ka noonoo ana hoi a ke kanaka haku moolelo ano like me keia Mookuauhau o Hawaii nei ; nolaila hoi, e waiho wale kakou i ka manao o ka poe kahiko o Hawaii nei pela, no ka mea hoi, aole paha ia he mea ku i ka oiaio ke hana maoli ia keia Pae Moku e ko Wakea ma mau lima iho.
Nolaila, o ka nui o keia Pae Moku o Hawaii nei, he umi noia a me kumamamalua, ma ka helu a ka haole, a ma ka helu hoi a ka Hawaii, he ekolu mau wahi kauna wale iho no, a eia lakou a pau e ku ana ma kau wahi hapaiki o ka moana nui Pakifika, kekahi hoi o na moana nui e hoopuni ana i ka ilihualala o ka honua. A penei no na palena o kona ku ana. Ma ka Latitu Akau 18o 54', a hiki aku i ka 22 0 17', a ma ka Lonitu komohana hoi 154 0 54', a hiki aku i ka 163 0 52'. E nana ma ka Hoike no ka Poepoe. Aoao 39 no ka Pae Moku o Hawaii.
Aina paha pela iho la ka nui a me na palena hoi o kana ku ana, alaila, auhea la hoi kahi e hiki ai ia'u ke hoonui ae, a ke hoemi iho hoi a uuku ia ai e Ha-waii ? Aole loa, no ka mea hoi, o ka ke Akua hana wale iho no ia, o ka hoonui ae a me ka hoimi iho a pela'ku, mamuli o kona manao ana he pono, a mamuli hoi o kona ike kupaianaha mai ka mau loa mai, no ka mea hoi, e loa he paula, he kiekie hoi me ka hohonu kona ike, e like la me ka haiki ana mai a Ioba, kela kanaka pono kina ole.
A penei kana ! E loaa anei ia oe ka ke Akua ma ka noonoo ana ? E loaa pololei loa anei ia oe ka Mea Mana ? Ua kiekie ia e like me ka Lani, heaha kau e hana'i ? Ua oi hoi kona hohonu i ko ka po, a keaha ka e ike ai ? Ua oi kona loa mamua o ko Honua, a o ka laula hoi imua o ko ke kai. E nana'ku kakou e na hoa ma Ioba 11 : 7 - 9.
A ina pela ea, o ke Akua wale no ka mea hiki i ka hana ana i na mea a pau loa, aole e ae, alaila, aole a'u wahi e kamakamailio hou aku ai no ka aina, no ka mea hoi, na ke Akua i haawi mai ; a nana no e hoonui ae, a e hoouuku iho paha, e like la me ka nui loa o kona lokomaikai ; aka hoi e kamailio aku ana nae au u nui no ka lahuikanaka a kakou e emi nei i keia manawa. " A pehea la auanei ia e nui hou ai a mahuahua loa'ku, no ka mea hoi, ua uuku ia?"
Auhea oukou e na makamaka o'u e noho ana mai Hawaii a hiki loa'ku i Niihau. He elua mau.mea nui iloko o keia Haawina, na mea hoi a kakou e nana pu mai ai e ke kulike me ke Kumumanao i haawi ia mai maluna iho o kuu poo. (1.) O ka nui o ka Lahui. (2) A o ka emi ana hoi o ka Lahui a uuku i keia manawa. A iloko o keia mau haina nui elua, ua hoea mai na mana eha i ka mua ; a ekolu hoi mana i ka haina elua, a malalo iho nei hoi e ike ai kakou i na wehewehe ana he loihi, no ka nui a me ka uuku o keia Lahui.
1. Aole i emi iho keia Lahui kanaka a uuku mamuli o ka uuku o ka Aina, a me ka nele hoi i na kahua kupono ole kahi a ka Hawaii e uwaa'ku ai i ka aina mamahakea, i loaa'i ke ola nona iho.
No ka mea hoi ; ua nui ka aina, a ua palahalaha hoi na kulakula mai o a o. E nana'ku ana kakou i na kuahiwi lipolipo e waiho kahela mai ana, i hele wale hoi a " Luuluu po i ke ala a ke kupukupu," i na Kualono, i na Kualapa hauliuli, na oawa momona hoi, i noke wale ia e na kulu wai kehau anu o ka po a ukele wale, o na papu, o na kulakula, o na aalu, o na aualaloi no hoi, o na kuakua me na paeli, o na hakuone hoi me na poalima, a pela'ku, a eia lakou nei a pau e waiho wale ana i keia manawa.
A pehea la, ua pau anei ia oe e Hawaii i ka mahi ia nou iho ? A ke ulu nei anei na mea kanu maluna iho o kou kihapai e Hawaii ? A ke ai nei anei oe a me kou ohana i ka hua oia mea, a kuai paha, a loaa mai a hoouhi iho paa ke olohelohe o kaoiwi ? Aole loa, aka hoi ; ua ulu paapu hou ka mamahakea o keia mau wahi mahi me ka manao palaualelo o ka Hawaii, a i ae he pilikia i ka uuku o ka aina, ka pilikia ka hoi ka hana ole. A he kakaikahi wale iho no o na Hawaii e noho hana ana, aka hoi, o ka hapanui o lakou, aia no iloko o kahi pupupu hale kahi i kikii ai ke alo iluna, a hookahi paha hana he hoohonehone me kahi puali hoa, e u nonoke ai me na kaunu a ka makemake, a pehea no la e pomaikai ai oe e Hawaii.
E nana iki paha kakou i keia : hele kekahi kanaka i ka mahiai ma kulakula paha, a ma kona kihapai no hoi, i ka mahi uala paha, a mahi kalo paha, aka hoi, iliki e mai la ka la i kona wela ana, me ka ahai pu mai hoi i na hunahuna makalii hoeha ili o kona ikaika ana, a pa iho i ke poo o ua wahi mahiai nei, a i kahi iwi kikala paha, kahehe, kanono lua kela me he pai io nui la, a o ke kani iho la noia o ke " ke," me ka olelo iho. " Ke ! he keu ka hoi keia a kahi la wela nui wale, aohe hoi pela nehinei la ; o ke kapakeu iho la noia e kapakeu ai." A o ke ku ae la noia a haalele i ka o-o, a o ka hoi aku la noia a kahi pupupu hale ona, kikii ke alo iluna, kani ke oli, a nonolo kahi puka-ihu, po ae ana ka la, a pela'ku u pau ke anahulu, a heaha la ka mea loaa ? Kahahana ! o kae mai hoi o ua loaa, ahu ka niuniu.
A liuliu iki paha ka noho ana, a kani ana ka hokio a Kilauea, o ka hala iho la no ia i Oahu, (a iwa loa aku he wa ulu moku hoi keia,) a i Oahu nei no la a-a, waiho ana na iwi o kamahele i Kaea.
A pehea no la 'uanei oe e nui hou ai e Hawaii, no ka mea hoi, ua aea oe, ua palaualelo oe, aole hoi i hana e like la me ke kauoha. O na mea a pau i loaa ai i kou lima e hana'i, hana'ku me ka ikaika, no ka mea hoi, ma ka luakupapau kahi au e hele aku nei, aole hana ilaila, aole noonoo, aol ike, aole naauao, a aole loa no. Kekahuna 9 : 10, a ua olelo ia no hoi, o ka lahui kanaka a mau lahui kanaka paha i hooikaika nui ma ka hana e nui auanei ia lahui kanaka.
Eia hoi ; aia ma ka palapala hoike a Mr. Kapena Kuke i kona ike mua ana i keia lahui kanaka, ua olelo ia he eha haneri tausani (400,000) ka haina kanaka o keia lahui, kaele no ua kanaka Hawaii la ke oiaio ia hoike ana.
A i ka nana ana aku he oiaio maoli no ia hoike ana a Mr. Kapena Kuke, no ka mea hoi, o na kahua hale a ia poe pukukui iho ai iloko o na kuaua huihui a koekoe hoi o ka noho ana pegana, e i ae la ke waiho wale mai nei, aohe kanaka o luna, a he kahua hehi ia na na holoholona o keia kau, a o na mahinaai hoi a ia poe i uwaa'i me na o-o laau wale iho no, a i ae no la ke ahu wale mai nei no, aohe mea nana e mahi : a hookahi no poe nana e kalai mai nei ke one o Hawaii o na ilikeokeo o Mareka, ka poe hoi i hele wale a ulakolako iloko o na mea dala, o ka noho ana waiwai, kai hele hoi a aaki paa, ma ke kulana o ka noho ana hanohano me na 'Lii o ke Aupuni.
A i mea hoi e ikeia ai ka oiaio o keia manao ana pela, pono no ke nana'ku i na kahua mahiai ko a ka poe Hui, kahi hoi e ku nei na Hale wiliko ma Koloa, Lihue, ame Hanalei, ma ka mokupuni o Kauai. A aia hoi ma Waikapu, he kula ponoa o Kaluapuhi i mahiia mai nei e J. M. Alexaneder (Opio,) kela kula papa-a la hoi a ka bipi i hehi ai, aole i mahiia mamua'ku e ka Hawaii, no ka wai ole, aka, heaha la ia i ka ilikeokeo o Mareka, ame ke ahua lepo ula'ku hoi o Puuohala, e kiei aku la i ke kualapa one o Poliala, ma ka apana o Wailuku, a o ke kula aa hoi o Waiehu, ame Waihee a eia hoi ma Lahaina, Lahainaluna, Ulupalakua, Makawao, Haliimaile, ame Hana, ma ka mokupuni o Maui, a aia hoi ma ka mokupuni o Hawaii nui o Keawe. A ahea la oe ala ae e Hawaii e moe nei, o ka noho hoiloli wale iho no ka a koo-u na hapapulima, a e hana aku mamuli o kou ano kanaka makua ? Aia anei a pau aku ka aina i na haole, alaila, ku ae oe ma ke ano kamalii a uwe iho no ? Hilahila ino ka alala wale iho no me ka iniki oleia mai, kai no hoi i ku ka uwe i ka eha. Hokai no hoi ka hoa kamalii la he alala wale, ua holo mua no la hoi ia mele, " Pela no ka hoa kamalii la, he uwe wale — ea."
A ke uwe oe e Hawaii i ka pau ana o ka aina i ka haole, no ka mea hoi, ua noho kaua-i-ka-na-na oe malalo iho o na kukuna o ka la, a hookahi mea i koe ia oe ea, o ka honi hoomau i ka mea a ka Ilipehu, " he hoa-a," ke ko koolua hoi o ka pilikia, o ka hune, o ka ilikole, o ka puhikole, o ka aea haukae, o ka aihue, o ka makilo, o ka mahaoi, ke noi wale, a me ke kuewa wale ana hoi maluna iho o ka ili o ka honua, a pela'ku ; a ina paha pela, alaila, pehea no auanei oe e nui hou ae ai e Hawaii, no ka mea, aohe paa ou a paa i ka aina, a hala ae paha 'uanei na kauna makahiki i koe elima, a o ka pau loa aku no ia o ka aina i na haole, a he haole wale mai no kanaka o ka aina, no ka mea, pupupu wale a lehulehu e pii ae nei a oi ae maluna ou e Hawaii, no ka mea hoi, ua hanau mai kau wahi keiki e Hawaii me he mea o-a kukui la ka helelei wale iho no.
A kani iho la ka lakou la namu haole, a lohe ole aku la kakou ka Hawaii, a eia ka ka haole namu la ia oe, " Aohe ou wahi kuleana iki e ke kanaka Hawaii, a aohe no hoi ou wahi lihi o keia aina, no ka mea hoi, ua pau loa ia makou i ke kuaiia, lepo oe, e ku oe a hele loa pela iloko o ke kai e noho ai, a i ole ia, i ka nahelehele mauna lapalapa paha, a iloko paha o ka poopoo pohaku." Auwe hoi ! aloha ino oe e Hawaii, ka hooleina ae me he o-a aina ole la ke kau-oia i o a ia nei, aohe ka hoi a na kupuna, ame na makua hoi, ua hala e aku la i ka make, a ua ike ole lakou i na haukawewe mai a ka haole o keia noho ana'ku. Aloha no paha oe e Hawaii, ke one hanau hoi o kamalii Hawaii, i ka pau ana o ka io, ame ka iwi, ame ka lepo i na haole, no ka mea hoi, ke ike nei kakou i keia wa, o na oihana hohonu ame ka uku kiekie, a malaila oe e uneune liiliiia mai ai e ka Hawaii a kau ae iluna me he ao la e puhiia ana e ka makani, no ka mea, e nana ae oe e Hawaii ma ka mokupuni o Niihau, a pela aku no paha auanei e ume liiliiia'i a pau loa, a ina e pau loa keia mau mokupuni mai Hawaii a Kauai, a mahea e loaa mai ai ke gula ame dala, ua pau loa ka aina i na haole, a o ke ko no ia o ka olelo a Davida Malo, " Aia kahi noho o keia lahui i ka nahelehele."
Eia hoi, o ka nui o na wahi kanaka o Hawaii nei i keia manawa, he kanahiku tausani (70,000 wale no ka nui a oi aku, pela kuu ike ana, ke ole nae ia he ike lalau, a ina pela ea, kumakena no hoi ua mea he uuku loa, a heaha la ia mau wahi kanaka, i ka huina o na koa pio a kekahi koa hiwahiwa o ka akau Shereiden, he opala lehua paha, he mea puhipuhi na ka makani o kuu aina.
Ea, pehea no la uanei oe e nui hou ai e Hawaii la a mahuahua loa'ku, no ka mea hoi, he kanahiku tausani mau wahi kanaka wale no, he namu ia la na ka haole, " pikanele." He keu a ka nele loa, aohe ka nele a nele, hookahi no ka hoi ka u-u naaupo a ka Hebera, oneanea ka aina. Kahehe-e, he manao mai la uanei kahi a ka make e nau e Hawaii kahi hakina a hookoe iho, ole, ahu mokaki iho na iwi iluna iho no o ko hokua e Hawaii, a na ka ihu ia o ka palau a ka haole o neia mau la aku e eku mai, a e kokope aku, ke-ke ai na iwi o Hawaii i ka la, a i ae he hoomakaulii aina ka haole, a he huhu hoi ka haole, e ole hoi ko lakou ia hoomakaulii aina ; malaila ka hoi e loaa mai ai ke gula ame ke dala, i like pu ke ano me ka mea e noho aupuni ana ma na aupuni a pau o ka honua.
Penei kakou e ike ai i kona emi ana. E hoolawe ia 70,000 ka huina kanaka i keia kau, (a e waiho aku i ka oi) noloko mai o 400,000 ka huina kanaka o na kau i hala'ku la, alaila, he 330,000 ka huina kanaka i pau i ka make, a ke moe nei lakou a pau iloko o ka hale kauoha ole he luakupapau ; ka hooilina mau hoi o ko ke Akua hale uhane, he kino lepo, e like me kana kauoha ia Abamu ma na kupuna kahiko o ke ao nei, penei : " Me ka hou o kou maka oe e ai ai oe i ka ai, a hiki i ka wa e hoi hou aku ai i ka lepo, no ka mea hoi, mailaila oe i lawe ia mai ai, he lepo no oe, a e hoi hou aku no oe i ka lepo," Kin. 3 : 19.
Nolaila hoi ; ua aneane palima ka nui o na mea ola i keia manawa, i like loa'i hoi me ka huina o na make i hala e aku la i ke ala polikua a Kane ma laua o Kanaloa.
Alaila, ninau iho oe e Hawaii penei : " E hia la na makahiki i koe, alaila loaa'e keia mau hua" (Pupuhi kai o Ukoa.) Hookahi kanakeu paha me ka pakeo, a puehu aku, a o ka pau no ia, no ka mea hoi, ua puehu ko hulu e Hawaii ; aia la ke puhipuhi ia mai la e kamalii paani o Kau, e kupono ana i kahi i pana ia, " Kau i palahemo." Auwe ! lealea ino aku la ia paani, oia nae hoi, na kamalii no la hoi ia paani, " Kohikohi kupeleleu ! kohikohi kupeleleu !l! Nowai ka lima i hawahawa ?!!! " A paele ae la * ka lepo ka lima o kekahi keiki ea, a, hu ae la ka a-ka a ke anaina kamalii paani. Aloha no paha oe e Hawaii. 2. Aole i emi iho keia Lahuikanaka a uuku, me ke ao ole ia ana mai. O ke kanaha keia o na makahiki a me kumamaha o ka noho hanai ia ana ou e Hawaii, a, o ka nuku ana no hoi, o na niho ka i hele a kuilena, mau no ka ukiki, a kuakahi a kualua a kuakolu paha hoi kekahi poe, oia uukulii no, a ke alakai lima a alakai leo nei no hoi na makua pupu elemakule ia oe e Hawaii me ke aloha no, aole loa akahi i haalele mai i ke ao ana ia oe e ke keiki, o na poo ka i hele a kuakea i ke oho-hina, a o na lima hoi kekahi i hele a nakunaku i ka haalulu, aka, mau no nae ka malama ana i ke keiki hoi a lakou i hiipoi nui ai i kona mau la opiopio ; kii aku no, apo aku no, a hoihoi mai no hoi i kona poli, aka, ke ku mai nei na keiki a pesu, a o-e, a nanahu, a Iniki, a hakaka pu no hoi me ka makua.
He keu a ke keiki aloha ole i kona mau makua palupalu, he pilikia, a piikaualala aku ana he mau makua okoa, na makua malihini hoi o keia kau iho nei i kuapapa nui ai ka aina i ka pono, oia nae hoi, a momona la hoi Iesuluna, keehi iho la ia.
He mea mau no keia i na keiki i hoohanohano ia a i hookamalani ia hoi, aia a puipui ae na aoao o kekahi mea, alaila, e ike ole iho auanei i ka poe liilii o ka holoholo pu ana, a he ona aku la ko ia la hoa e kohu like ai, a, pilipili aina ole kahi luaui makua, ka mea nana'ku ia, e umia kahiko ia iho no ka hoi la, ina ua pio ka oe ahi, a pau hoi ka oe hookano ana.
Nolaila hoi, aole paha oe i nuku la e Hawaii no ke ao ole ia, aka, no ka pakela hookali maoli no, no ka mea hoi, ua olelo ia e Solomona pene : E hoolohe oe i ke ao ana a kou makuukane ka mea nana mai oe, aole hoi e hoowahawaha i ka luahine ana o kou luaui makuahine. Solomona 23 : 22, he kauoha keia e pili ana i na mea ano makua a pau, a ua kahea ia mai hoi na mea a pau e ano keiki ana, e hoolohe ia lakou,
Aole na'u wale iho no keia olelo, " ua hanai ia oe e Hawaii a momona." Aka hoi, ke hooia mai nei ka moolelo o kou ao ia ana, a me kahi i ao ia'i, a me ka manawa hoi i ao ia'i, no ka mea, ke ku kehakeha mai la na Halekula, a me na Halekula liilii iho a puni oe e Hawaii, aole ia he kumu no ke kanalua ana, e ku ia'i hoi ka manao o ka hoomaloka, a me ka ai-a hoopale Akua, a i iho, aohe i ao ia o Hawaii. Pela ka ike'na aku i ka ua hoeha ili, i na pali o Waiehu.
E nana aku ia Lahainaluna, ka mapuna wai huihui au i auau ai e Hawaii a maemae, a oukou hoi e uhauha nei i ka laki o ka makua, a i iho oe nau kau loaa e na keiki haalele makua, nau io. Ua piha ka aina me keia inoa kaulana Lahainaluna, a aole auanei ia e hiolo mai keia hanauna'ku a i ka hanauna pau ole paha, wahi a'u, no ka mea hoi, ua lulu ia keia anoano ma ka puuwai o ka Hawaii a ua kanu ia hoi a paa ma kahi huini o ka hoomana Kristiano Kalevina, a ke ula wena mai ma ko Nuuhiwa Pae Aina a aia hoi ma Maikonisia kekahi anoano o keia Kulanui.
A pela no hoi kekahi kula no na keiki haole ma Kapunahou, ke kula hanai ma Hilo, a ke kula hui hoi ma Waioli a'u i pupuu ai i ka hau anu o Kaukaopua, ke kula hoi o ka aoao Katorika Roma ma Ahuimanu, a me na kula iho he lehulehu wale a puni ka aina, a ke hoike mai nei keia mau mea a pau loa, i ka hoailona o kau ao ia ana, a o ka mea hoole mai i keia, hele loa oe pela. wahi a'u, no ka mea hoi, aohe i ku ia hoohalahala i ka oiaio.
O na palapala heluhelu wale o kela ano keia ano, kekahi hoailona noia o kou ao ia ana e Hawaii, e pai buke ia a hoolaha ia'ku ma kela kihi a ma keia kihi o ka aina, me ka uku kekahi a me ka uku ole ia hoi kekahi, a me na nupepa hoi i pai ia i kela a me keia makahiki i mea hoonaauao mai, a i mea hoi e ike ia'i ke ano a me ka noho ana o kekahi lahui kanaka a mau lahui kanaka paha, ma kekahi aupuni a mau aupuni hoi a i ole keia mau mea a pau, alaila, he like noia me ka aina e noho aua iloko o ka pouli a me ka poeleele, a iloko hoi o ka noho ana hupo me Waawaaikinaaupo, a he hoike ana malaelae hoi ia o ka aina ao ole ia, e like la me kekahi o na Mokupuni pegana o ke kai e ahu mai nei, aole i loaa nui mai malaila he mau buke ao mai e like la me oe e Hawaii.
A no keaha la ka ukuuku ana ? No ka hea ole ia'ku anei, malia e hiamoe ana no ke kai o ko Haku ? Oia ana hoi ha. E Hawaii e, e ala oe ! E Hawaii e, ala'e oe !! E Hawaii e, o ka moe no ka kau aia ka Hokuloa ia ilunu lilo !!! E ala'e hoi paha oe e mahi i ka aina, no ka mea hoi, he nui okoa no kahi i koe. Ka'aha'aha, o ka hoololohe a ka mea nui la, ke ole ia ka ne ana'e.
3. Aole i emi iho keia Lahuikanaka a uuku, no ka ike ole ana i ke Akua oiaio a me kana olelo.
Ua piha ka aina me ka ike ana i ke Akua oiaio a me kana olelo, ia Iehova Sabaota a me kana keiki hiwahiwa o Iesu Kristo, mai Hawaii a hiki loa'ku i Niihau, no ka mea hoi ; aia ma ka lima o na'Lii a me na ilikole pupupu hale ole nei mea he Baibala, a ke heluhelu ia nei oia mai Kinohi a Hoikeana, ma na Luakini, a ma na halehalawai no hoi, a ma ka ohana no hoi kekahi i kela la a i keia la a puni ka makahiki.
Pela kuu ike ana ma Wailuku, ka okana aina a'u i holoholo mau ai iloko o na makahiki elua i hala'e nei, a pela no hoi ma Makawao, a me na wahi e aku paha a'u i ike ole ai e heluhelu mau ia'na, a heaha la ka mea i koe ? Ke olelo oiaio nei au, o ka Lahuikanaka a mau Lahuikanaka paha i ike lea i ke Akua oiaio, a malama hoi i kona pono uhane, heluhelu i kana olelo, makau i ka hewa, a hookaokoa hoi ia mea ino loa i ukiuki ia, alaila, e nui auanei ia Lahuikanaka, a like paha ka pupupu me na mamo a Aberahama a ke Akua i haawi hoopomaikai mai ai nana, mamuli o ka nui o kona lokomaikai. A e mahuahua mau aku auanei kona pii ana, a i ke awakea loa, me he La la hoi i kona pii ana'e e kiekie, a pela iho la no ka pii ana o ka Lahuikaeaka malama i ke Akua a me kana pono.
Nolaila hoi, e nana iki kakou i kekahi mau haipule o Hawaii nei, o Kaahumanu I, he luahine haipule keia i kona mau la, aole i manao nui ma kona ano alii iho a hookiekie ae, a hana'ku la hoi e like me ke ano mau o na 'Lii, aole loa, aka hoi ; hoohaahaa iho la kela iaia iho, a ae aku la hoi i ka launa pu ana, a i ka haipule pu ana hoi me ka Hu makaainana luahine ; ma na mea o ka uhane, a hiki wale aku i kona la i moe lani ai iloko iho o ka hale anuanu a Kane ma laua o Kanaloa, he luakupapau. No ka mea hoi, na keia Aliiwahine i hoopakele ae ia Mr. Rikeke i ka waha nanahu o ka eneni, kai apuapu okoa mai hoi e pio na ka make ; aka, ma ka nui aloha o ke Aliiwahine, a mamuli hoi o ke akamai o Davida Malo, ke kanaka noiau, a kuhikuhi puuone hoi o ka wa naaupo, ua hoopakele ia mai o Mr. Rikeke i ka make kino ana. He nui no na haipule i ike i ke Akua oiaio a i malama hoi i kana pono, oia o Batimea, Puaaiki, Hoapili kane me Hoapili wahine, Timoteo, Keaweiwi, o Davida Malo no hoi, a me ka Mea Kiekie Kaahumanu I, a pela'ku paha.
Aole i pau.