Ka Nupepa Kuokoa, Volume IV, Number 6, 9 February 1865 — Page 2

Page PDF (1.59 MB)

Ka Nupepa Kuokoa.

Ka Nupepa Kuokoa.
HONOLULU, FEBERUARI 9, 1865.

Maui me na mea o Maui.

                I ke ahiahi o ka Poakahi, la 9 o Dekemaba, makahiki 1864, holo aku la makou i kahi e ku ana o Kilauea makai o Ainahou. A ma ia ahiahi o makou kekahi iwaena o ka lehulehu, e lulumi ana maluna o ka moku Mahu, me ka manao e holo i Maui, aina o ka palaoa a me na ko momona, aina hoi o na kula kaulana me na mauna hauliuli, kahi kaulana o Haleakala. Pau ka haunaele ana maluna o ka moku no kekahi poe i ona, pau ka lululima ana me na makamaka e noho ana i Oahu, hoi ka poe e noho ana, a noho hoi ka poe e hele ana ; alaila hoomaka ka niniu ana o ka huila a naue aku la makou ma ke ala hele moana. Nani wale ka maikai o na helehelena o ka aina, ke nana ia mai luna'ku o ka moku ma ke awa o Honolulu ! Mauka aku o ke Kulanakauhale, kau lalani mai la na kuahiwi uliuli mai ka lae o Makapuu a hiki aku ilalo o Waialua, me he iwi kuamoo la no Oahu ! Ma ka aoao akau waiho mai la o Kapalama, Kalihi, Moanalua a haule aku i Ewa. Alaila kiwi ae la ka uina i ke komohana a loaa na lae oioi o Waianae, aina punahele a ka la. Mauka ae waiho mai la na papu akea o Ewa, Halemano me Wahiawa, me na kaukani holoholona. Ma ka aoao hema, e ku mai ana o Puowaina, me he pola nui la no kona poepoe me ka poopoo o waena, me kona mau pukuniahi e kiai ana i ke kulanakauhale o Honolulu. Malalo ae moe aku la ke Kula a hiki aku i na wahi kauhale o Makiki me Kapunahou a loaa aku o Manoa, Kamoiliili me Waikiki. A ma ka aoao ma nae o Waikiki noho mai la o Leahi me he liona opiopio la e moe ana, o kona hope iuka, a o kona poo makai, me he mea la e kiei ana i na keiki o ke kai. Mauka pono iho o Honolulu, wehe mai la o Nuuanu i kona mau nani a pau loa. Luaole hoi ka nani o na helehelena o keia keiki kane o ka ohana moku Hawaii ! Oahu, aina a Kakuhihewa, aloha wale oe ! Maikai oe, ka hanau ekolu o na Moku a Kamehameha ! Kina ole kou mau helehelena, keiki nana i hookama ke Kulanakauhale Alii o Hawaii !

MAUI.

                Loaa iho la makou i ke kakahiaka e holo ana i na ale o Pailolo, ma ke kowa mawaena o Lanai me Molokai. Kau koke mai la na pali kiekie o Maui Komohana, e kikoo ana na piko i ka lani. Aia hoi ma o o Maui Hikina, ku mai la o Haleakala, aohe ohu, aohe ao maluna ona. A i ka puka ana ae o ka la, hinuhinu kona poo, me he alii hanohano la i wehe ae i kona papale-kapu keokeo, a aloha kakahiaka i ko ke ao a pau. Mamua pono o makou, na Maui elua ; ma ka Hema o Lanai ; a ma ka Akau kahi Molokai e kiai ana ia Oahu me Maui. Ma ka Hema loa hoi, hauliuli mai la na kuahiwi o Hawaii ma ka ili o ka moana, me he makuakane nui la no na moku a Kamehameha i hoohui ai i ohana hookahi. A ia makou i i ike ai i keia mau nani a pau, hauoli ko makou manao, a mahalo ka naau i ka Makua Nui nana i haawi keia Pae aina maikai no ko Hawaii me ko lakou poe mamo : E lilo ana anei keia hooilina maikai i na malihini ? E kau ana anei ka hae o ko na aina e ma ke one kapu o Puowaina ? Ina e hoowahaha a kiola o Hawaii i kona hooilina mai ke Akua mai, alaila e lilo kona pono ia hai. Aka, ina e paa o Hawaii i kona mau pono a pau loa, ina e hilinai oia maluna o ka makua nana i haawi ia mau pono, a hoolohe i kana kauoha, aohe kumu e nele ai. E ke Akua, e hoopaa a e hoopomaikai ia Hawaii.

LAHAINA ME WAILUKU.

                I ka hora ehiku ku makou i Lahaina, kulanakauhale o ka lai o Lele. Malaila makou i hookipa oluoluia ai a pau ka aina kakahiaka. Maikai o Lahaina i keia wa i ka paa i ke ko. Elua wili ko malaila, a he nui no ka hana a ua mau wili la. Ekolu halepule ma Lahaina i keia wa, Hoolepope, Pope, a me ke Katolika Enelani. Mauka a maluna iho o Lahaina aia o Lahainaluna kahi o ke Kula Nui o keia pae aina. O kekahi o na kanaka maikai loa a me kekahi o na kanaka ino loa, no loko ae no oia kula. Aole nae no ke kula ka hewa o na kanaka ino. Aloha aku la makou i na hoa Kumu o na makahiki i hala, me na haumana hoi a makou i noho pu ai. Aole nae e hiki ia makou ke holo aku e ike, no ka mea, e holo ana makou maluna o ke Kilauea ke holo ia. I ka hora 12 o ke awakea, kahea maila ka moku ia makou e hoi aku i ona la. E makaukau ana ia e holo. He mau hora wale no a ku makou i Kamaalaea, a mai laila aku holo makou maluna o le kaa a hiki i Wailuku. Malaila makou i hookipa maikaiia'i a ao ka po. He aina maikai loa o Wailuku. Aole no hoi o kana mai o ka ulu o ke ko malaila. A ke komo nuiia nei na aina o na Wai-eha e ka poe imi waiwai ma ka mahi ko ana.
            Ma Wailuku ke Kulahanai kaikamahine o na makahiki i hala, a ke manao nei makou ua kuhihewa nui na makua o ia kula i ka hoopau ana ia kumu pomaikai o na kaikamahine a kakou. Maanei no hoi ke Kula Kahunapule a Rev. W. P. Alekanedero.
            Ua hookuuia kekahi mau haumana, a ke noho Kahuna nei lakou no kekahi mau ekalesia a kakou. Ke noho la kekahi poe haumana i keia wa, aohe i pau ko lakou manawa, a ua makaukau no hoi kekahi mau mea e hoomaka i ka hana ano. Maikai o Wailuku, maikai ko laila poe a me ka lakou mau hana a makou i ike ai.

MAKAWAO.

                Mai Wailuku aku holo makou i Makawao, a hiki makou ilaila iloko o na hora eha. He aina ko o Makawao. He poe kamaaina hookipa maikai no hoi ko laila. Malaila kekahi kula hanai no na kaikamahine malalo o ka hooponopono ana o Rev. J. P. Gerina. Ua komo makou e nana i ke Kula, a ua hele makou e ike i na keena noho o na haumana, ua ike makou i ka lakou hana, a he maikai ka makou e hoike nei no ia Kula.
Hookahi pule ko makou nanea lealea ana i Makawao, a hala ka Sabati ia makou ilaila. Hele makou i ke Sabati i ka Halepule a Rev. J. S. Gerina. Aole he nui loa na kanaka, he anaina maikai nae. He nui ka poe opiopio, a he anaina hoolohe maikai i ka olelo. Kakaikahi na anaina kanaka a makou i ike ai e haka pono ana i ka haiao e like me ia anaina.
            A noa ka Sabati, i ka Poakahi kau makou maluna o ka moku kialua o Maliko, oia o Helene, a holo mai i Oahu. Elua po a elua ao ka luli wale ana maluna o ke kai, a i ke ahiahi poeleele o ka Poakolu, ku ana makou i ka uwapo ma Honolulu. Hoi i ka malu o ia laau o ke Kulanakauhale kiawe. Pela i pau ai keia wahi huakai hele i Maui.

No ka Raiki !

                Ina he mau loi ko kekahi poe, aohe waiwai i oi ae ka pomaikai e loaa ana ia lakou mamua o ka raiki. Aohe nui o ka lilo, a he maopopo wale no ke kanu ana. Aneane 10 paona hua no ka eka. E hana i ka loi e like me ka hana ana no ke kalo, e hehi i ka loi, e hana a palahalaha, alaila, kanu i na hua ma kekahi kihi o ua loi la, me ka wai i hookahi inihi maluna'e o ua mau hua la, a mailoko ae olaila e ulu ae ai na raiki hou. Ina ua 8 iniha a 10 iniha paha ka loihi e kanu hou, me ka hookaawale i ke kanu i 6 iniha, a i 8 paha. He hiki i na wahine a me na kamalii ke hana i keia hana. E hukihuki a pau i na nahelehele e ulu ae ana, a e hoomanao i ka hoopiha mau i ka wai, aole nae ka nui loa, oia hoi ka uhi ana o ka wai maluna o ka raiki. O ka mea keia e make ai na mea kanu. Ina e lenalena ae ka lau, alaila, hoomaka ka raiki e oo. Alaila, hooku i ka wai i maloo ai ka loi. I ka wa e oo ai, ooki i ka raiki. Mai oki mamua o ke oo ana, o poho auanei, a uuku hoi kahi mea e loaa mai. E waiho a oo pono, alaila, ho-o iloko o ka pahu, me ka waiho malie a hala na pule elua ; mai kaulai i ka la, e hoohulihuli nae i kela manawa keia manawa. Mai hao koke iloko o na eke, o wela auanei. E loaa no na pauna eha tausani iloko o ka eke hookahi. He mahuahua kahi loaa no na pauna hua he umi, a he iki hoi kahi hana. Ke makemake nui loa ia nei ka raiki, aole e nele ana ke kuai ia. E oo no ka raiki i na la he 120, a i ole ia, he 140 paha, mai ka manawa e kanuia'i ka hua, a he loaa hikiwawe no hoi ia no ka luhi ana, emoole loa mamua ae o na mea au e makemake ana e hooulu. E loaa no na hua raiki ma ka ninau ana aku ia Prendergast, Ka Luna Wai.

HUNAHUNA MEA HOU O HAWAII NEI.

                A Moi.— E hauoli paha na Pae moku o Hawaii ke lohe aku i ka oluolu maikai o ke ola o ko lakou Moi, a eia oia ma kona Hale Alii ma Honolulu kahi i hoomaha ai i keia mau la.
            Ke hoomaka nei makou i ke pai ana i ke Kanawai Hou, e like me ka mea i hooholo ai i ka Aha Kau Kanawai i hala iho nei. E olioli paha na hoa o makou e lawe ana i ke Kuokoa ke ike iho.
            NO KA AUHAU.— Ke hoomaka nei ka Luna Auhau o Honolulu e hoopii no ka poe i hookaa ole i ko lakou auhau Lono wale. Ua oleloia e kuai kudala ia ana ka waiwai o L. Haalelea i ka Poakolu ae nei, aka ua hiki aku o Aukina a ua hoopauia ke kudala ana. Aia ka a maopopo ka nui o ka aie o Haale-
lea.
            KA HUA O KA AWA.— Oiai e hoi mai ana kekahi mai ka "aina mai o lalo kai ula i ka lepo;" ua alalai ia aku ia e kekahi kanaka i poluluhi na ike kanaka i ka awa, a ua kau ae la ua kanaka nei maluna o kekahi puu pohaku, me ke noi aku i hookahi dala e haawi mai, a me ka olelo pu aku no hoi ina aole e haawi mai, nou ia i ka pohaku.
            Ina no keia e hana mau ai kekahi kanaka, kau wale ka lia i ke kaha o Ewa !
            HE KEIKI HOOKAMA NA KA " AHAHUI KEIKI Misionari."— Ma ka Poaono iho nei ua halawai ae ka " Ahahui keiki Misionari." Ma kahi o Kauka (G. P. Judd;) a iloko o ka halawai ana, ua heluhelu ia mai kekahi palapala i kakauia e H. Kaaea, a e mahalo ana no hoi i ka Hui, me ka ae ana no hoi iaia iho, i elele no lakou, a ua hooholo ae no hoi ka Hui, na lakou e malama i kona ola, a e hiipoi hoi iaia me he keiki la. Ina e loaa ia makou kau wahi kaawale o na kolamu o ka pepa i keia pule aku, e hoolaha aku no makou ia mea.
            NO KE KAMA ALII WAHINE.— Ua hoomamaia'e ko makou mau puuwai kaumaha no ko makou ike ana aku i ke Kama Alii Wahine, e honi hoomau ana i ka makani oluolu. Ke holo mau nei oia maluna a ke kaa i na aluna ahiahi a me na liula a pau.
            NO KA MOI WAHINE.— Ua poloaiia mai makou e kekahi o ko makou mau hoa iu o ka la, a o ke konane mahina ; e holo ana ka ko kakou Moi Wahine i Enelani, a mai laila aku paha a Parisa i Farani, ke kulanakauhale nona na mea iini o ka puuwai, a o na mea anoi hoi a ka maka. E holo pu ana me ia ka mea Hanohano D. Kalakaua, a me ka mea Hanohano Hapakini (C. G. Hopkins) i mau hoa ukali. E ike ana paha lakou i na ale kulailua o ka moana lipolipo, ina kinohinohi o ke alo alii o Vitoria, i na makani kipuupuu o Ainahau, a me na huikau kupinai o na huina alanui o ke kulanakauhale alii o Ladana. Aloha wale ko lakou au ana aku i ke kai uliuli haalipo o ka Moana Pakipika. " E ola ke 'Lii i ke Akua."
            PAKELE MAI PAU I KA MANO :— Ua lohe mai makou, aia ka he mau waa makai o Waikiki — kai i ka lawaia, ia lakou e lawaia ana, aiahoi, ua hoea mai he mano nui, a ua nahu ia kekahi waa a puka ma kuamoo o ka waa, a pau ia, holo hou ua mano nei a malalo o ka lua o ka waa, a hapai ia iluna o kona kua, a ia wa ua haule kekahi kanaka iloko o ke kai, aole nae i poino ia. Auwe ! Auwe !! mai make oe, i pakele paha i ke aloha o ke Akua.
            NO KE PAI ANA I KE KII O KA MOI WAHINE.— I ka Poaono iho nei, oia ka la 4 o Feberuari, ua holo ae ka Moi Wahine, a me L. Kamakaeha ma ke kaa, ma ka Hale Pai Kii. Ua lono mai makou, aohe kupono o ke kii i paiia o laua. O ke pai hope loa ana paha keia o kona kii ma kona one hanau, a hoi aku i ka olu o Belekane, o
" Maleka i ka hoa la lilo,
Haaheo i ka ili o ke kai."
            NO KA MOKU KIALUA GEN. KALANI.— Ua lohe mai makou, e kuaiia ana kekahi wahi moku maikai nona ka inoa o Genela Kalani, i kapaia'ku mahope o ka inoa o ka Alihikaua nui o ka puali koa o ka Akau. Ina oukou e makemake e ike pono, e hele no oukou e ninau i ke kahumoku.
            NO KA PEPEHI ANA I KA UKU LIO :— A i makemake kekahi e pepehi i ka ukulio, alaila penei ka hana, e hoopaa i na wawae hope ma ke kumu o ka laau me ke kaulahao a paa, alaila hele aku a mamua haikaika aku.
            KA AHAOLELO.— Aole e paiia ka Helu 6 o ka Moolelo o ka Ahaolelo i keia pule, no ka pilikia o ka mea nana e kakau nei ia mea.
            OHUOHU KILAUEA.— Ohuohu o Kilauea i ka ohua i keia holo ana'ku nei, hele kela a haaheo i ka ili o ke kai.
            KA MALIHINI O EBONA.— I nehinei ua holo aku ko kakou hoahanau o Kano (Snow) i ka " mokupuni o Kauai." I keia mau pule i kunewa ae nei, ua hai oia i ka moolelo o ka lakou mau hana ana ma ia mau mokupuni o ka pouli, a ua hoohauoli ia no ka naau o ka poe i lohe. I holo aku nei ia i ka hookahuna ana ia Helekunihi, a keia pule ae holo aku o Lowela Kamika no ia mea hookahi no. Nani wale ko laua ike ana aku i ka anapanapa mai o ke one o Alio, a i ka nua hoi o ke kalukalu o ka paa !
            NO KA HOLO ANA O EMALAINA I KAU :— I ka poakahi i hala ae nei, ua holo aku oia me ka nui no o na ohua. O kekahi o kona mau ohua he mau kaikamahine, maka palupalu, i kupeleia, a hoopunaheleia, e ko lakou mau makua maikai ; a o ke kumu o ko lakou laweia ana i Kau, malaila lakou e noho ai, ma ke kula kaikamahine a O. H. Gulika, ma Waiohinu e aoia ai ma na mea naauao o keia noho ana, a no kela ao aku.
            A ke lana nei ko makou manao, e lilo ana lakou i mau makuahine no ka Lahui Hawaii, ma keia hope aku, a malie hoi o olu io ma o lakou la keia lahui, alaila ola mau ka inoa " Aupuni Hawaii." A e lilo ana lakou i mau " Iwa," e kikaha ana i na pali Koolau.
            HE WAHI MOKU MANUA BERITANIA:— Ua ku mai kekahi wahi kialu Beritania, Kapena Hanehama (Hanham,) eha ona mau pu, i ka poaono iho nei, oia ka la 28. O keia Kapena ianei no ia mamua i ka wa o Lo Keoki (Lord George Paulett,) i huki hookano ae ai i ka Hae Beritania iluna o ka pahuhae kapu a Kamehameha III. He pikimana (midshipman) wale no nae ia ia manawa, i keia wa, ua loaa iaia ka inoa hanohano, he Kapena. Ua haalele nae ia i kana hana, i holo mai nei ia e hooluolu iaia iho a me kana wahine, a e hele makaikai ana no ia ma na wahi pana o Hawaii nei. Mai nei aku a Tahiti, a holo aku paha i Nu Holani, a me na wahi kaulana e ae o ka honua nei. Ua au mai kona wahi moku uuku i na ale kulailua o ka Atelanika, ke kai hawanawana o ke Kaiwaenahonua, a me na pilikia ku pinai o ka Lae Hao, me na kai uliuli lipolipo o ka Pakipika. Pehea la ka manao o Kapena Hanehama i kona hiki ana mai i anei, a me kona ike ana iho, ua ano hou ka aina a lakou i lawe pio ai ? E hoi aku no ia me ka lulu lima mai i ke one ana i keehi mua ai.
            KAKAUOLELO O KA HALE LETA.— Ia makou i hookomo aku ai i ka makou mau leta, ua hoopahaohao ia makou ma ka halawai ana aku, aole hoi me ka maka pihoihoi o ke Kakauolelo mua i maa i ko makou mau maka, a he Kakauolelo hou hoi keia, no ka manawa pokole, o Edward Pierce. Aloha no ia, pau kona ike ana i ka huikau a na palapala iloko o ka pahu leta !
            MA KA AHA HOOKOLOKOLO HOOMALU.— Ma ka Poaha o kela pule aku nei, ua oili ae iloko o ia Aha ka hana maewaewa a kekahi aoao palupalu i kona hoa aloha pumehana o ia aoao hookahi no; oia hoi ke nahu ana a Kamealahaole i ka lima a me ka poohiwi o Hanewa ; no ka uka iuiu laua o Kapalama, a ua hoopaiia nae ka mea i hoopiiia he $13.37. I ka nana maoli ana aku no hoi a ke anaina i ka mainoino i kau mai maluna o Hanewa, ua hele maoli no a kulu ka waimaka uwe ka opua ; a i ka nana ana aku no hoi i na nahu ana, me he mea e i mai ana, " Kau onio me he weli la i ka laau, ka ua aaki pua lauki, i pua i ka nahele o Waipuhia — e."
            NO NA KAIKAMAHINE OPIOPIO.— I ka Poalima i hala ae nei, ua ku mai ka moku Kuna Hana mai Kauai mai, a ekolu mau iwa maluna mai ona, a eia lakou ke kikaha nei i na pali kukahalelo o ke Kaona o Honolulu.
            E holoia aku nei hoi paha i Kau e aho la ia, aole kikaha no nei i na pali o Honolulu, i mai paha auanei kahi o oukou e holo i Kau, i Palahemo, ea ? Ahe ! o ka Palahemo ka ia, o ko ao ia mai i ka naauao io ko mea e hanohano ai, a e ola pu ai hoi ka Lahui Hawaii, ma ko oukou lilo ana i poe makuahine pono. Alaila e pili pono mai kela inoa Iwa ia oukou. No ka mea, ua hooliloia ko kakou Lahui nei e hele ana ilalo i ka make, a ina pela. Pehea oukou e na mea e manao ana e lilo i mau Kumulau hoolaha ? Oia wale iho la no ka oukou la o ka hoolehelekii, aohe onioni mai, ka napa make pela ka noho ana. E hoolana ka manao, i ka hana a kela mau iwa e kikaha mai la i na pali o ke Kula Kaikamahine a O. H. Gulika o Kau.
            KA HOOLEWA ANA O KE KINO KUPAPAU O KAILIKOLE.—" Na ke Akua i haawi mai, a nana no i lawe aku." Ma ka Poakolu o ka pule i hala'e nei, ua hoolewaia ke kino kupapau o ka mea i alohanuiia Kailikole, he hoahanau maikai oia iloko o ka ekalesia o ko kakou Haku ; a ua waiho mai oia i na ki kaumaha a ke aloha i ko ke ao nei poe, a e waiho ana hoi i ka puuwai o kona mau kini i kii auwai a ke kaumaha. Ua hoolewaia aku oia ma ka hora 4 paha o ke ahiahi o ua la 'la ; a he la pumehana maikai no ia, a e kani kaohi ana ka bele o ka halepule Katolika Roma, me he mea e olelo mai ana, " E hele oukou a na ka lepo e hoomaalili i ko oukou aloha nona." Ma ka nana ana aku no hoi i kana mau pua i koe, me he mea la ua kahakaha kawakawaia ko lakou naau i ke aloha ; a o ka mama no hoi ia o ko makou hoa kula, i alo iho ai i ka la koikiiki o ke Kau. A i ka nana maoli ana aku no hoi i ua hoa la o makou, me he mea e i ana iloko ona penei : " Kuu makuahine lei hala i ka hala o Haimoeipo, He ipo ka'u e malama o ke aloha — e!" A o makou pu no hoi kekahi i hehiia e ka ua hoeha naau no ua mama la o makou, i naue aku la i ke ao polohiwa a Kane.

Kaikamahine pauahi ma Manoa.

                I ke awakea o ka Poakolu, oia ka la 18 o Ianuari nei ka pau ana, o kona inoa o Kahakauila.
            Penei ka pau ana. He imu uala ua kalua ia, a ua kiolaia ka momokuahi a nalo ka imu, hoi kanaka a pau iloko o ka hale, koe no o Kahakauila me kekahi kaikamahine e ae iwaho ua ane like no laua, ua nanea loa ka poe a pau iloko o ka hale, ia wa lohe ia'ku la ka pa-e ana mai o ka leo o Kahakauila, e kahea mai ana i kona makuakane " e Kekipi e ! pau au i ke ahi," ia wa holo aku la o Kekipi, ua puni loa ke ahi ma ke kapa a pau o ke kaikamahine, ua hiki ma kona opu ke ahi, lalau aku la ka makuakane ma ka ai o ke kapa e uhae, ia wa pane mai la o Kahakauila, " e pani mai oe i o'u mau maka," ia wa paa ka lima akau a haehae ka lima hema, a kaawale aku la ke ahi me ke kapa, aka, o ke kino a pau o ke kaikamahine ua wela a pau i ke ahi, ua pau pu me ka lima o ka makuakane, a i ke kakahiaka ana ae o ka la 19 ia o Ianuari, o ka make loa no ia. O ka loihi o kona ola ana 3 makahiki, me 8 malama, a hoi aku ia i ka opu o ka honua.
            Nolaila, e na makua mea keiki a pau o Hawaii nei, e makaala oukou i ka oukou mau keiki, ma na mea a pau e poino ai, o like auanei me ka Ioane i hoike mai ai ma Hoikeana, penei kana :
            " A i ole oe e makaala, ea ! e hele aku au i ou la, me he aihue la, aole hoi oe i ike i ko'u hora e hiki aku ai ia oe."
S. MAKUAOLE. Kaahaloa, Manoa. Feb. 6, 1864.

KA
NU HOU !
No Virigenia Komohana Hema.

                Ua loaa mai nei ia makou kekahi mau Nu Hou o na mea i hanaia e Babirike (Burbridge) me Konemana (Stoneman) ma, ma Vireginia Komohana Hema e like me ka makou mea i hai aku ai i kela pule i hala aku nei. Ua nui loa na mea a na Kipi i hana ino ia e lakou. Ua lanakila lakou maluna o Berekinirike, me ka lawe pio mai i na pukuniahi he 21, a me na Kipi he nui wale, me ka hoemi pu aku ia lakou iloko o Karolina Akau. Ua hana ino ia e lakou na lua eli kepau (mine) ma Mariona (Marion) na hale hana hao ma Abinedona (Abingdon) me ke puhi aku i ke ahi i kahi kaulana e hanaia'i ka paakai ma Paakaivila (Saltville) no neia wahi ka paakai e hoolako ai i ka Hema. Eia kekahi, ua hoopio ia e lakou ke alanui hao 100 mile, me na kaa ahi he 15 a me na kaa mahu 200. O ka nui o ke poho o na Kipi ma keia mau waiwai i hoopio ia, ua manaoia ua hiki i ka 20 miliona dala.

No Kalani.

                Mai ka puali koa mai o Kalani i loaa mai ai na nuhou ano nui, oia hoi ka paa ana o ka waiwai a na kanaka o Butela i eli ai ma kahi i kapaia o Kowa Holani (Dutch Gap.) Ua kekee loa ka muliwai Iamesa, a o keia auwai hoi, 533 kapuai wale no ka loihi, nolaila, ua oki pahupuia na mile he nui wale o ka muliwai. He 66 kapuai ka laula o keia auwai, a he 16 kapuai ka hohonu o ka wai. Ma keia auwai e hiki ai i na moku Aupuni ke komo me ke kue ole ia mai e kekahi papu ikaika o na Kipi, a malaila aku a waenakonu, ilaila e hoouka ai me na puali Kipi, a ma na aoao hoi o Kalani e hoouka mai ai. I kela pule i hala aku nei ua paiia maloko o ka pepa, he 10,000 nika iloko o ka puali Aupuni, aole oia ka pono, eia ka pono 100,000.

Ka hakaka mawaena o na Kipi.

                He nui na hoopaapaa mawaena o na Nupepa Kipi, a he nui no hoi ka poe i huhu ia Davisa no kona hoouna ana ia Huda i Tenesi, me ka olelo mai oia ke kumu o ko lakou mau popilikia a pau. Malama hoi kekahi poe ia Davisa a kue hoi ia Gen. Li. Ua kue loa ke Kiaaina o Georgia ia Davisa. Ua kauoha aku ke Kiaaina o Karolina Hema i na kanaka keokeo a pau mai na makahiki he 16 a hiki i ka 60 e lilo i koa.

He Moku Powa Hou.

                O Kenadoa ka moku hou o Kap. Sememes, ke hoomaka nei ia i kana hana o ke puhi i na moku Akau i ke ahi ma ka moana Atelanika.
            Ua haiia mai nei, ua hiki aku ka palapala a Sewade (Seward) ke Kuhina Amerika o ko na aina e i Berazila no ka hopuia ana o ka moku Kipi Felorida. Ua mahalo mai ke Aupuni Berazila ia palapala.

No Mesiko.

                Ua lohe mai makou, o ka puali koa malalo o Juarese (Juares) ma Oajaca, ma kona wahi i lohe hope ia mai nei, ua hiki i ka ahiku tausani ka nui ; o ka hapanui nae o lakou he poe hou, kupono ole no ke kaua, aole i makaukau. O keia lohe, ua hoolaha ia ae e na Farani, me ka olelo mai, ua haoia ka waiwai o na halepule, a me na waiwai e ae e na koa o Juasres. Ua paa loa a puni o Oajaca, i ka hanaia i na papu lepo.

No Peru.

                Elua pule i hala ae, aohe pomaikai i loaa mai i ka poe Peru i ka lawe ana mai i ka Pae moku Kinika mai ka poe Sepania mai. Aia nae ua hiki ae ka moku mua o ka aumoku Sepania i Valeparaiso, o Bereneguela ka inoa, he 30 ka nui o kona mau pu, a o ka nui o na moku manuwa aia no ma keia aoao o Lae Hao.
            Ke manao nei makou aole e kaua ana, aka e noiia'ku no o Peru e hana i kekahi kuikahi haahaa loa me Sepania.

No Iapana.

                Ua maopopo, aole e hiki ia Iapana ke hooluolu i kona mau keiki alii i ko lakou manao kue, aka, ke koi ikaika aku nei na Mana Kristiano nui, malama i na kuikahi i hanaia. O kahi e komo aku ai o ke kai pili aina liilii elua, mai ka aina maoli mai o Iapana ma ka hema. Hookahi kowa kupono no ke kalepa ana, oia ke kowa i kapaia o Simonosaki ma ke komohana.
            O keia wahi e komo aku ai, ua paa pono i na papu, a ua ikaika no hoi. Na ka Haku o Nagato e hooponopono ia wahi, ka mea nona ka aina ma ka Akau. I keia mau la i hala iho nei, ua hooikaika hou ae ia i na papu, me ka hookuke aku i na moku o na aina e. I kela makahiki i hala aku nei, ua ki ia i ka pu na moku Beritania, Farani, a me ka moku Amerika. A no koke mai nei no, ki ia ka moku Comorana (Cormorant) he moku Beritania, ma ka ihu ke ki ia ana. Nolaila, ua kuka na Kuhina o na aina e ma Yokohama, e hoopioia na papu. He 16 ka nui o na moku kaua i akoakoa mai iloko oia aumoku. No ka nele o ke Kuhina Amerika i ka manawa ole, nolaila, ua hoouna aku oia i kekahi moku maoli e hooiaio i ka Hae Amerika. O ka hapalua o ka aumoku, he poe moku Beritania, 3 moku Farani, 5 moku Holani. Ekolu la o ke kaua ana, wehe ia mai na kowa. He 46 ka poe i make o ka aoao Hui, a ua ekolu haneri paha o ka poe Iapana i make. E hoopioia'na na papu.

Na Palapala.

Ka Ahaolelo Hope o kela makahiki 1864 ma Hilo.

                E KA NUPEPA KUOKOA E ; ALOHA OE :
            Ka pua ailehua i ka nahele e lipolipo ana i na kuahiwi o Maunakea, e oluolu oe e ka Lunahooponopono o keia makahiki 1865 Oiai a kahi no kaua a kamailio malihini me oe, no ka mea, ua kaa hope ae nei keia mau makahiki i ka Lunahooponopono mua a H. M. Wini, a loaa mai nei oe ke keiki hai Euanelio ma ka olelo a ke Akua.
            Nolaila, ke hooili aku nei au i keia ukana imua o kou mau maka palupalu, a nau ia e hai ae mai ka lae o Kumukahi, a ka welo ana a ka la i ka ili o ke kai.
            Ua hoomaka ia ka Ahaolelo ma ka la 27 o Dekemaba, ma ka hora 9 o ke kakahiaka ma ka Halepule ma Hilo, ua hele mai na luna o Puna, a pela no ma Hilo Komohana, ma Laupahoehoe a hiki aku i Hilo Akau, a me na lua o ke kaona lai o Hilo, ua lilo ka hapalua hora ma ka pule, noho o T. Koana ma ka noho Lunahoomalu, a me Paila ke Kakauolelo.
            Kukuluia ka hana ia wa, ku mai la o Makuakane Kahuna Haiolelo a ke Akua no ka apana o Puna, hoike mai la i kana papa hoike makahiki no ka hanau, a no ka make, ka poe hoomaloka, ka poe haalele i ka Nupepa, a na ka poe i loaa i na mai makapo, a pela aku, a pau kana wehewehe ana ma kana papa hoike.
Alaila, ku mai la ka luna o Kaimu a me Kalaepana, hai mai la oia aole i loaa mai kana papa hoike makahiki, ua wehewehe uuku no oia ma ka mea i loaa iaia, o ka nui ua hoomoe ia ma ka papa a pau kana wehewehe ana.
            Ninau ka Lunahoomalu ia S. B. Nalimu, Kumukula o Waiolama, pehea kau papa hoike, alaila, hai mai la ia aole i makaukau ka'u papa hoike, ma ke noi a S. B. Nalimu e waiho a popo, ua hooholo ia.
            Ma ka ninau a ka Lunahoomalu ia Kane, Kumukula o Kaumana, no kana papa hoike, hai mai oia no ka make, na nuhou, na mai lolo, na halo na hanau, a pela wale aku no.
            Alaila, ku mai la o J. W. Kaainoa, wehewehe mai la oia no kana hapa hoike, ka poe i hoopai ia ma na Kanawai o ka aina, kela hihia, keia hihia, ka poe haalele kane, haalele wahine, ka hakaka, ka aihue, a pela wale aku no. Oia ka luna o Hilo Kulanakauhale, a pela no na luna o Hilo Komohana, ua like no ka wehewehe ana e like me ka na luna maluna i hai ia ae la.
            O ka luna o Laupahoehoe, hai mai la oia i kekahi haole hana i ka la Sabati ma Laupahoehoe, oia hoi o Kepoonahoahoa ka eueu o Honolulu mai, ua hana oia me na kanaka e hooili ana i ka ukana iluna o kekahi moku o Emalaina, pepeiao laau, a me kekahi mau ukana e ae, a ma ka la 28, ua nui ka hoopaapaa ma ia la, no ka nupepa no ka lawe ole o kekahi poe, ua haalele no ka loaa ole mai o ke kii o Kamehameha IV. Akahi, eia ka lua, no ke pai ole ia o na kaao, o ka poe makemake hoi i na mea lealea ole, eia ko lakou kumu i haalele ai, o ka hookomo ia o na mele, na kanikau, a pela aku, aka, he kumu pono ko lakou haalele ana, wahi a kekahi poe.
            O ka luna o Puna oia kai haalele i ka nupepa, i keia makahiki i kaa hope ae nei no ke pai ole ia o ke kii o Kamehameha IV. e like me ka olelo hoolaha wahi ana ma ka nupepa, ka ike ana wahi a kona ike iho, a no ke pai ana i ka pepa olenalena, a me ke omaomao, nolaila ke kumu i haalele ai.
            Nolaila, kekumu nui o kekahi poe i haalele ai, a no ka poe i ku i ka oiaio ma o Kalilo la, no ke pai ana i na kanikau, a me na olioli mele, a pela wale aku, nolaila kekahi poe i haalele ai. Ua paipai nui mai o T. Koana, e lawe nui kakou i keia nupepa, no ka mea, he mea keia e ike ai kakou i na nuhou o na aina e mai, a pela no hoi ma keia pae aina.
            O ka Nupepa ka hoa kamailio oluolu no ka wa mehameha ma ka malu o ka hale, a me na alanui, a me na wahi kanaka ole, a pela no ma na wahi e ae o keia Aupuni Hawaii, a naue aku ma na aina pekana, oiai ke paipai nei au io'u hoa mai ka lae o Kumukahi, a ka welo ana a ka la i lehua, e ala mai kakou e lawe i ka nupepa, mai hoomaau, mai pi, mai ke a, mai hoomauahala, a pela aku.
            Nolaila, ke hooki nei au i ko'u pulima i ke kakau ana ma keia pepa, ke hoolai mai nei ka hau o Maunakea ua ahiahi.
            E aloha auanei ka Luna Hooponopono hou o keia makahiki 1865, e mau aku ko kakou kamailio ma keia hope aku. E aloha no. J. A. KEALOHANUI.
Puueo, Hilo, Ianuari 4, 1865.

Na kokua Mahina Hou o Kawaiahao no ka Malama o Ianuari, 1865.
Kulanakauhale - - - $68 50
Maemae me Nuuanu - - 2 50
Kunawai - - - 1 75
Kapalama - - -1 00
Pauoa - - - 6 43
Kaakopua - - - 2 00
Manoa - - - 11 50
Makiki - - - 3 50
Kamoiliili - - - 12 62
Palolo - - - 0 00
Waikiki-kai - - - 4 25
Maunakiekie - - - 2 00
Huina - - - $116 05