Ka Nupepa Kuokoa, Volume IV, Number 7, 16 February 1865 — Page 1

Page PDF (1.44 MB)

KA
NUPEPA KUOKOA
Ke Kilohana Pookela no ka Lahui Hawaii.
BUKE IV. HELU 7. HONOLULU, FEBERUARI 16, 1865. NA HELU A PAU 168.

" KA NUPEPA KUOKOA.,"
HOOPUKA MAU IA MA HONOLULU
I kela Poaha keia Poaha.
$2.00 no na mahina he UMIKUMAMALUA,
$1.00 no na mahina eono, ME KA HOOKAA MUA MAI.

NA OLELO HOOLAHA — aole i oi mamua o 10 laina no ka hoopuka hookahi ana, $1.00 ; alua komo ana, he $1.50 ; hookahi malama, $2.00. E uku mua ia mai ke dala o na olelo hoolaha a pau e hoounaia ana mai e pai.
KANIKAU — he hapalua dala ka uku no ka aoao hookahi o ka pepa leta, oia hoi 4 keneta no ka lalani hookahi — penei : he 25 lalani, $1.00 ; 50 lalani, $2.00 ; a pela'ku.
KA UKU NO NA OLELO HOOLAHA — ka uku pepa, a me ka uku o ka Kanikau, e haawiia no ma ka lima o na Luna o ke Kuokoa, a i oleia, e hoouna mai ia Kauka Kulika.
O KA UKU PEPA A PAU E HOOKAA MUA MAI NO — aole e kauia ka inoa o kekahi haole a kanaka maoli paha, ma ka inoa o ka poe lawe pepa ke ole e hookaa e mai mamua. E pono ke hiipoiia keia mau rula, no ka mea, he emi no ka auhau no keia nupepa.
AIA KE KEENA O KA NUPEPA KUOKOA — ma ke kihi hema o ka Hale Hookipa Luina (Sailor's Home.) O na hora hana, mai ka eiwa o kakahiaka, a i ka ha o ke ahiahi.
L. H. KULIKA, (Lona Hooponopono.)

KA " NUPEPA KUOKOA."
Is published in Honolulu
EVERY THURSDAY,
$2 00 per annum, or $1.00 per six
months, in advance.

ADVERTISEMENTS not exceeding 10 lines, inserted once for $1.00 ; twice for $1.50 ; and $2.00 for one month ; all advertisements must he paid for in advance. KANIKAUS will be charged 1.00 per page, or 4 cts. a line. PAYMENTS FOR ADVERTISEMENTS, Subscriptions or Kanikaus, may be paid to any of the Agents of the Kuokoa, or may be enclosed in a letter to the Publisher.
ALL SUBSCRIPTIONS must be PREPAID. No names, either of foreigners or natives will be inserted on the subscription list until paid for. This rule must be strictly adhered to, on account of the low subscription price. THE OFFICE OF THE KUOKOA is in the South corner of the Sailors' Home. Office hours from 9 A. M. to 4 P. M.
L H. GULICK.
Publisher.
Volume I. II. and III of the KUOKOA, bound, for sale, $3.50 each.
Persons having complete sets of the above, can have them bound by paying $1.50 each.

Ka Nupepa Kuokoa.

Ka Anesona Moolelo
No Hawaii nei.
HELU 4.
HE HOLO LIO LOIHI ANA.

                Aohe he hele lealea ka holo ana maluna o ka lio i na mile he kanaono mai Waiohinu aku a i Kona Hema, iloko o ka la hookahi a me ka hapa. Pela ka'u ike ana, aka o ka wahine opiopio me a'u, me he mea la he oluolu iaia. O O. H. Gulika ko maua hoa, a me ko maua alakai. Ua aneane he umi, a he umikumamalua paha mile i uhi ia i ke a-a maluna iho o ka pahoehoe paakiki, ua uhi ia i ka pohaku pele nahaha. Aole paha e hiki ia makou ke hele ina aole he wahi alanui lio ololi i hanaia e ke Aupuni. Ua ano hou, a maikai no hoi na kii aina i ko'u mau maka. Mai hea la kahi i hoea mai ai keia mau lepo puupuu Pele, a i uhi paapu ai hoi i kekahi mau tausani eka he nui wale ? E pono i ka mea wehewehe i ke ano o ka honua ke hele aku ma ia ala. Ua waiho ia ia makahiki, a maanei me he mea la ua hoonou ke kukulu ia ana ae iluna, a kiola liilii ia ae hoi e kekahi mea ikaika malalo.

KAHI NUI O KA PELE.

                I ka hala ana ia makou o kahi a, hele aku la makou i na mile he iwakalua maluna o ka pahoehoe, ma ke kakai o ka mauna, a i kahi ua pahee ka pahoehoe e like me ke aniani, a malaila no hoi kahi i hoopaakiki ia ai na pohaku hehee, ma na ano a pau, oiai ia e holokiki ana i ke kai. He alanui maloeloe keia i na mile he iwakalua, a he kanakolu, me ke kakaikahi loa o kanaka. He ano e na mile he iwakalua mahope. Ia wa aia makou i Kona, e mau ana ko makou hele kiekie ana maluna ae o ke kai, ma kula loa. Maanei ua oi aku ka hohonu o ka lepo ; ua uhi hoonani ia na aoao nani o na puu, me na malu lua ole o na laau kukui, a malaila no hoi kahi i ulu ai na ulu, maia, a me na laau kope. Aka ua loaa ia makou ka nele i ka wai. Ina e haule mai na pakaua, ua omo koke ia'ku no ia e na pohaku kipohopoho.

HE NOHO OHANA ANA.

                Ua hele ka mea nona ka hale, he hale pili, o kahi a makou i moe ai i ka po ; aka ua hookipa oluolu ia'ku makou e ke koena o ka ohana, a hohola ae la lakou i ko lakou mau moena maikai, a haawi mai la ia makou i kekahi kapa i uhi moe, a hoa ae la elua ihoiho kukui. I ka wa i hiki mai ai ke ahiahi, komo mai na makamaka a noho iho la ilaila a puni ka hale, a hoike mai ka Baibala ohana. Aole he pule haole wale no kai pule ia, aka ua pule kekahi mau hoahanau kanaka maoli oia wahi ma ka olelo Hawaii. Ua noho nui no na kanaka makai o na wahi e kokoke ana i kai, aka ke hoi nei iuka ma na wahi hiki ke mahiai ia. O ke ala mauka, no keia manawa iho nei no ia.

KE KOMO ANA I KONA.

                Mahope iho o ko makou komo ana i Kona, ike aku makou i kauhale, a he hookahi, a elua hale pohuku, e ku ana ma kahakai, i mamao loa'ku makai o makou. He umi mile i koe hiki mai i ka hopena o ko makou hele ana oia wa, halawai mai la makou me Parisa, me na lio hou ; a i ke awakea o ka la 31 o Maraki, loaa mai la i ka makuakane me ke kaikamahine, ke aloha olioli mai ka wahine, a me ka makuahine, ka mea hoi i hala e aku mamua o maua ; ua oi aku ka olioli, no ka mea ua lawe mai maua i kekahi mau leta i hiki mai, mai ka poe aloha mai o ka home. Hai mai la ka wahine a ko makou haku hale, i ka olioli o " Parisa a pau" i ko makou hiki ana'ku (no ka like ana o ko Mr. Parisa inoa me Parisa, Kulanakauhale i Farani.)

HE HOOKIPA OLUOLU.

                Ka noho ana o ka mokuahi ma Honolulu hookahi pule, nolaila, ua hooluolu ia makou e kona hookipa ana a hiki i ka la 11 o Aperila. Iloko oia wa, ua ike nui makou ia wahi a puni, a me ke ano o kanaka. E like me ka mea mua i hai ia aku ai, aia ko Parisa hale ma kiekiena, a me ka ike lea ia mai o ke kai. No ke oki kahiko loa ana o ka hoouna ana ae o Maunaloa i kona mau kawai pela ma ia wahi, nolaila ua hohonu ka lepo, a ua nui no hoi ka aina i paa i ka ululaau.

KEALAAKEAKUA, KA HOME I LIA IA E KAPIOLANI A ME NAIHE.

                Maanei kahi i noho ai o Kapiolani, a me kana kane o Naihe. No laua keia mau aina, a maluna olaila, ma kahi e kokoke ana i ko makou wahi i noho ai malaila kahi i kukulu ai o Kapiolani i kekahi hale pohaku, a ke mau nei kona ku ana. I ka wa i ike mua ia e na misionari, e noho ana o Kapiolani maluna o kekahi pohaku, e hana ana i kona kino i ka aila, Ia wa ua pouli kona manao, he hoomanakii, a he ake i na mea ona. He mau makahiki mahope mai, ua hoaahu maemae ia keia mamo a na'Lii kahiko i ka lole, he maka hanohano ma kona kulana, he Kristiano manao paa, a ua olioli e hookipa mai i na elele a kona Haku, a me kona hoola iloko o kona hale i hoolako maikai ia, a e kamailio pu me lakou no ka hoomaikai ana, i ke ano a me ke kulana o kona lahuikanaka. Ua huipu oia me Kaahumanu ma ka lawe ana i na iwi o kona makuakane, a me ko kekahi mau alii nui, a me na alii opio i hoomana ia,o ka Lahui Hawaii, mai ko lakou wahi laa mai " Hale o Keawe" a waiho ae ia lakou ma kahi e iloko o kekahi ana iluna o ka pali, ma ke kuono o ke awa o Kelaakeakua o kona wahi i noho ai.

KA LAUA MAU HANA KARISTIANO.

                Ke komo mua loa ana o ka Euanelio iwaena o na kanaka o keia wahi, ma ka hooikaika ana no ia a Kapiolani a me Naihe. Ma Kaawaloa, malalo iho o na ulu niu, ma kahi hoi a na kanaka e hoolele aku ai i ko lakou mau waa iloko o ke kai, no ka holo ana i ka lawaia, a kahi no hoi e hiki ai ia lakou ke kupou poo aku i ka heenalu no ko lakou lealea, oia no kahi noho o keia mau alakai maikai. Malaila i kukulu ai laua i kekahi hale pili no ka hoomana ana, a malaila laua a me ko laua mau kanaka kiekie, e heluhelu ai, a i hai aku ai hoi i ka lakou mau mea i ike ai no ka Euanelio, a me ke kono aku no hoi i na kanaka e apo mai ia, a pela no ka laua hana ana i na kauhale e aku e pili mai ana. Oiai he umikumalima mile ka mamao aku o Kilauea, ua hoouna pinepine aku laua i ka waa i na poaono i Misionari, a hoihoi aku hoi ia ia i ka Poakahi ae. Mahope iho ua kukulu laua i kekahi hale e pili koke ana i ko laua, a kono aku hoi ia Eli (Ely,) e hoi mai a noho ilaila.

NA HUA O IA MAU HANA.

                Iloko o ko lakou.mau au hoomanakii, ua maa a puni loa na kanaka i ka aihue ; aka ua hoolahaia malalo mai o na makahiki eha mai ia wa mai, ua waihoia kekahi mau waiwai kumukuai nui iloko o ka lanai, aole i nalowale, a aole no hoi ia i makau i ka lilo aihue ia aku. No ka nawaliwali o ke ola i hoouna aku ai o Eli mai na Mokupuni aku iloko o ka makahiki 1828, a lilo kona wahi ia Mi Raukeke (Ruggles.) No ka ino o kona ola, ua nee aku na'lii ano lokomaikai i kahi e kokoke aku ana o ko Parisa hale e ku nei, ua lawe pu aku no laua i ka misionari me laua a waiho i ka lehulehu o na kanaka ma kahakai.

KO LAUA ALOHA HOPE IA SITUATA.

                Ua hiki aku o Rev Kale S. Situata (Chas S. Stewart,) i Kaawaloa iloko o ka makahiki 1829, he Kahunapule oia no luna o kekahi moku kaua Verikeni (Vincenne,) o Amerika Huipuia, a ua hai no hoi ia me na kiakaunu ikaika o ka mahalo, no kona launa ana me Kapiolani a me kana kane. Penei kana hahai ana mai i ko lakou kaawale hope loa ana, ma ke aumoe.
            " Ua hoala ia ae na hoewaa mai ko lakou hihio ana ; Ua hoaa ae kekahi mau kauwa i na ihoiho kukui, i nakiia ae owaho i na laau, i mea e hoomalamalama aku ai ia makou a hiki i kahakai ; a e haawi aku ana au i ko'u aloha hope loa, aole ia Naihe wale no, aka ia Kapiolani kekahi, olelo mai la ia, aole maanei aia ma kahakai ;" A kiola ae la oia i kekahi kihei ma kona kua, i ukali ia mai e kana kane, a hele pu mai la makou a hiki i ka ae kai, mahope iho o ka lulu lima pumehana ana, a me ka haawi ana aku i ka manao lana e hoopomaikai ia mai me na waimaka, haalele aku makou ia ia e ku kilakila mai ana ma kekahi lae aa, mawaena o ka wena o na ihoiho kukui e hoopuni ana ia ia, a me ka hooho mau ana mai, oiai makou e panee mau aku ana. Aloha oe e Situata, aloha oe e Situata wahine, aloha i ke Kapena, aloha i ke Alii, a ua hoomau ia aku ke kiani ana mai o ka hainaka, no ke aloha no, a mahope mai ua nalowale kona leo i ka wawalo ana o ke kai, a ua nalowale aku no hoi kona kii i kahi mamao loa, i hoopuni ia e ke anaina kanaka e ku ana a puni ia."
            He mea hauoli, ma ka halawai ana ma Rosetera (Rochestr,) o ka Papa Misionari iloko o ka makahi 1863,   i ka ike ana aku i ka mau o ka hoomanao ana, me ke ano poina ole, o Mi Situata ia wa.

KO LAUA M.AKE ANA.

                Iloko o ka makahiki 1841, ko Kapiolani make ana, aole nae au i hai ia mai i kona wahi i kanuia ai. Ua make aku o Naihe he umi makahiki mamua aku ona. Aohe laua i like, aka ua manaoio ia ua komo aku laua iloko o kela " maha" i hookoe ia no na kanaka o ke Akua. Aole no e kala ko'u mahalo ia Kapiolani, a he olioli no hoi, ma ka hehi ana i ke kahua, a maa i kona mau kaina. " Pomaikai ka poe e make ana iloko o ka Haku."

KAHI PUUHONUA.

                Kekahi poe paahana e ae oloko o keia mau apana, a hiki i ka makahiki 1852, o Forebe.
            A mahope aku o lakou o Parisa. Ua hoihoi mai o Forebe i kahi hoomana i kai ma ka aoao hema o Kealakeakua, ua oi loa aku keia wahi o kanaka. Ke ku la no ka halepule i keia wa ; aka o kahi i hooaa'i o ka mea nana i kakau.

KA MOOLELO O KAPAKAILIULA !
MOKUNA XVI.
KA HANA AKAMAI A KEPAKAILIULA.

                MA KEIA MOKUNA, KE HOIKE hou ia'ku nei ke akamai lua ole o ke 'Lii Kepakakailiula no kana mau hana ia po, iaia no hoi e kau ana iluna o kaupaku, lohe iho la oia i ka olelo ino maoli a kona punalua a Kaikipaananea, i ka i ana ae, " e! e Makolea, e hula mai oe ia kakou," aka, aole oia nei hula iki.
Iwaena oia manawa, kenakena ae la o Kahaluu a me na'Lii no a pau o Hawaii, me ka olelo mai " aohe hoi e hula ae la ! aole hoi ou aloha iki i ko kane e koi aku nei la ?" Alaila, olelo mai la o Makolea, "aia no hoi paha i ko'u manao." Alaila, pane mai la o Kaikipaananea, (no ka mea he alii leo iki ia.) " E hula hoi kela ua aloha ia Kepakailiula, ua nokea ka hoi keia e Kapakailiula a ua aloha, aole nae hoi e hana mai i ke mele o laua," ku iho la ua wahine nei. Aka no ka pelapela o kekahi mau olelo, aole e hiki ke hoike aku, no ka mea, ua hoololi ia na mea ino a pau o keia Moolelo. Ia manawa, uwe mai la o Kepakailiula i ka wahine, i ka manawa ana e hula ana ilalo iloko o ka hale, a pau ka hula ana, kena ae la o Kaikipaananea ia Kamohulihia e olelo aku i na kanaka e mama i ka awa, a hoi aku i ka halau. A pau ae la ka ke 'Lii olelo ana, alaila, hai aku la o Keamohulihia i na mama awa o ke 'Lii, e mama i ka awa. O ko ianei lohe no ia, o kona nihi malie iho la no ia a hiki ilalo, o kona holo aku la no ia a komo iloko o ka halau, no ka mea iloko o laila na akua o Kaikipaananea.
            O ko ianei komo no ia iloko, no ka mea, ua lohe mua keia i ka olelo ana ae a Kaikipaananea, e hoolale ana i awa. Manao iho la keia he awa kaumaha i ke Akua, o ko ianei mea no ia e hele ai a komo iloko o ka hale akua, me na elemakule kiai elua. A komo keia iloko, alaila, o kona ike aku la no ia i na akua poko elua e ku mai ana, o ko ianei hele aku la no ia a komo iloko o kahi akua poko uuku, (komo keia iloko, aohe pono, pilikia,) a mahope, komo keia iloko o ke akula loa, poholopu keia iloko olaila. A komo oia iloko o ua akua la, aole i liuliu komo mai ana na'Lii, me na lama kukui, a malamalama ka hale, alaila, ku mai la o Kaikipaananea, a olelo mai la i na'Lii penei : " I keia po, ke kaumaha nei au i o'u akua, i na ua ike mai laua ia'u, alaila, e lanakila no au maluna o Kepakailiula, ina aole, a laila, e make paha au ia Kepakailiula," a pau ka olelo a Kaikipaananea, hoka iho la ka awa a pau iloko o na apu, a haina iho la ke 'Lii e like me kona manao. Aia no o Makolea maloko oia aha.
            A pau ka awa, alaila, kaumaha ae la o Kaikipaananea i na akua ona, me ka olelo ae i na'Liii a pau penei : " Auhea oukou e na'Lii o Hawaii, a me na'Lii o Maui nei, i keia manawa, e ike koke no oukou i ka'u hana, ina au e hana a ae mai o'u akua, alaila e ike pono no auanei oukou, aole e lanakila mai o Kepakailiula maluna o'u, ke pono ka'u hana ana, a ke ae mai hoi o'u akua." Ia manawa lohe keia i kona inoa i ka hoohiki ana ae a Kaikipaananea, ina no la e lohe ia he olelo ino ka Kaikipaananea nona, alaila, o kona puka no ia e hakaka maoli laua, he lima, he lima. I ka pau ana ae o ka hea ana a ke 'Lii i na akua ona, me kona hai ana'ku i na'Lii ia wa, hele aku la oia a kokoke i ke akua iki. o kona pai aku la no ia, aohe wahi mea a kunou mai, alaila, olelo ae ia ia, "ae, ole ae nei i neia akua o'u, aia paha i kela akua," ia manawa o kona pai aku la no ia i ke akua nui a Kepakailiula e hoopue ana.

MOKUNA XVII.
KA AE ANA O KE AKUA MA KA HANA AKAMAI A KEPAKAILIULA.

                NA KAIKIPAANANEA HOI KE pai i ua akua nui la, a ia nae ke keiki Alii iloko kahi i ku ai ka mea hoi nona keia Moolelo. Ia manawa, e hooilina ae ana kela i-o ia nei, imua ihope, a lilo iho la ia mea i na'Lii a pau e noho ana iloko he mea hou, me ko lakou olelo iho " he mana maoli." A i ka pau ana o ke ku ana a Kaikipaananea iluna, holoholo ae la oia ma-o, a maanei o ua hale nei, me kona hai aku imua o na'Lii penei : " E ! e na'Lii o Hawaii, e na'Lii o Maui nei, ke ike ae la no oukou i ka ae hemolele ana mai o kuu akua i keia po, a he oiaio no, i na maua e kaua me Kepakailiula, alaila, e ike no oukou e make ana ia'u, no ka mea, ua ae mai nei kuu akua a hemolele."
            Ia manawa, ninau ae la na'Lii o Hawaii i ko Maui poe alii, " Ea ! he oiaio anei, pela mau no kona akua e hana mai ai ke ku aku ia i ka pule ?" Wahi a na'Lii o Maui, " Aole, akahi wale no a ike makou, aole mai mua mai a hiki i keia po a kakou e ike nei."
            A pau ae la ka hana a me ke ku ana o Kaikipaananea i ka pule, alaila, olelo ae la oia i na'Lii, " E ! auhea oukou e na'Lii a pau, ua pau ka hana a kakou, a e hoi kakou a pau, hoi ae no ia mea kana wahine, hoi ae no ia me kana wahine, a pela no hoi au me ka'u wahine."
            A pau ka hai ana a Kaikipaananea i ka olelo, hoopauia ka akoakoa ana, a hoi aku la na'Lii a pau, a pela no hoi ua 'Lii nei me Makoleaikahaluu, a pau loa na'Lii i ka hoi i ko lakou mau hale, mehameha iho la ua hale nei, aka, aia nae iloko, he mau elemakule kiei a elua, alaila, oili mai la keia mailoko mai o kahi o ua akua la, a hoolale aku la keia i na elemakule, e ai, olelo mai la na elemakule, " e ho-a i ke ahi i malamalama," alaila, olelo aku ke Alii, " Aole, he holiolio ka maka."
            Alaila, i mai la ua mau elemakule la me ko laua manao kuhihewa o Keamohulihia la, o ke aikane a Kaikipaananea, me ko laua i mai, " Akahi wale no hoi au hoi ana mai e ke'Lii i hana mai ai pela e ai poeleele me ke kukui ole, a me ke ahi ole e malamalama iho ai." Alaila, haha poeleele aku la no o Kepakailiula i ka umeke poi, a me na mea ai momona (puaa) i kaluaia, a haawi aku la oia hookahi laulau puaa i kahi elemakule, a hookahi i kahi elemakule, a pela no i ka ai, hookahi umeke a kekahi, a pela no hoi kekahi, a o ua o Kepakailiula, hookahi umikumamalua umeke poi, me umikumamalua laulau puaa." " Heaha la hoi kona hoa e like ai ?"
            Ina elemakule e ai ana, i ae la kekahi i kekahi, " Ka ! lokomaikai mai nei ka hoi ka hanai a kaua, he kahi wale no hoi keia, heaha la ?" Pela laua nei e hawanawana'i, me ka lohe ole o Kepakailiula. Aka, ua haohao no nae kekahi elemakule. A pau no ka ai ana a ke'Lii, eueu ae la koi-nei mau wawae e ahai ka pupuhi, a palahi ana kela, a o na elemakule hoi, ke ai la no.
            [Ma keia wahi, e haalele ae kakou i ka olelo oluolu ana no Kepakailiula, a e olelo oluolu kakou no ka elemakule, a me ke aikane a Kaikipaananea, ia Kepakailiula i pupuhi aku ai.] Aole i liuliu iho, komo ana o Keamohulihia iloko, i komo aku auanei ko ia nei hana, e ai ana no na elemakule, " he keu no hoi na elemakule opu nui," ia manawa, huhu iho la o Keamohulihia i ua mau elemakule la, me ka olelo aku, " nawai olua i olelo aku e ai i ka ai a ke'Lii, a me ka ia ?" Alaila i mai la na elemakule, " Ka ! nau no, komo mai nei no oe iloko nei, a hoolale mai nei no oe a ai, i aku nei maua e ho-a i ke ahi i malamalama, i mai nei no oe he holiolio ko maka i ke ahi," hoole mai la kela, " Aole au i hoi mai nei, wahi a na elemakule, " O oe no."
            Alaila i mai la kela, " He mea kupanaha no ia olua e na mau elemakule, e nalo hoi paha ko'u leo, a e nalo hoi ko ka mea e, mahope olua e ike ai i ka io o ka olua hana."
            Alaila, ai iho la ua aikane nei a Kaikipaananea a hoi aku la imua, maanei e hooki ai kakou i ke kamailio ana no na elemakule, a e huli ae kakou e kamailio no Kepakailiula, a me kana mau hana ma ia po, ia ia i oili aku ai mailoko aku o ua hale akua nei ; o ko ia nei hele no ia a ma ka loha ma ke kua o ka hale, ku e hoolohe ana i ka olelo a Kaipaananea i na kahu e hele e hoomakaukau i wahi no laua e hiamoe ai i ua po pei. A olelo ae la ke'Lii i na kahu, "e hele e hana i kahi moe, i-o i ka hale ukana," ia manawa, lohe e no keia, he mea e ka hana a loko. Ia manawa nae, hookahi no hana a Kepakailiula, o ka uwe ia Makolea, no ka mea, oiai ua iho kupuni mai na kuluhau anu o na po o ka lai o Kona, a ua nui loa kona hoomanao ana i kana wahine ui a nani hoi. Oia ka mea i like a like me Laieikawai, a me Laielohelohe i olelo mua ia e S. N. Haleole ma na Buke i hala ae nei, a pela hoi o Makolea.
            O keia wahine o Makolea, oia ka wahine lua ole o ka la o Kona, i nokea mai e ke kai a, hele wale keia a ula weo i ka maka o ka opua ua mea he nani, nolaila, maule nui loa iho la ke'Lii nona keia Moolelo i ke aloha kupouli no ua Iwa la. No ka mea, oia no ka wahine o kona wa heu ole, e noho ana i na la opiopio o ko laua wa kamalii, a ma ka olelo paa o Keolonahihi, lawe ia i Maui nei. Ia manawa, hana iho la o Kepakailiula i ka mea pono i kona manao, me ka hana ino nui aku i ua wahi a pau a Kaikipaananea e olelo ae ai i na kahu ona.
(Aole i pau.)

Ka Hoomana Kahiko.
HELU 7.
O MILU, KONA MANA, A ME KANA HANA.

                O MILU, AOLE IA O KONA INOA i kona wa e ola kino ana ma keia ao, aka, ua pili ia inoa iaia mahope iho o kona make ana. Penei ka hoomaopopo ana ma ia ano : O Ku, he wahi kino ano Akua ia, a he kino ano kanaka no hoi, a no kona ai ana i na kanaka make i pilau a eu ka ilo, i kapaia'i kona inoa o Kuwahailo. Oiai oia e ola ana ma keia honua, he Alii no kona ano, a make aku oia a hoi ilalo, ua kapaia o Milu. Aka, ua pili keia inoa o Milu no ka ai ana o Ku i na mea pilau, a eu ka ilo, i kapaia'i o Milu. Nolaila, ma keia alanui kapili ana o ka pule anaana a ka poe kahiko o Hawaii nei.
A ke olelo nei no hoi lakou, he nui na wahi e noho ai na mea ano kino. Penei ei olelo ai lokou, " Iluna, iluna lilo i ke ao eleele la oloko lilo aku. Aia ilalo, ilalo i o Milu la."

KO MILU LAHUIKANAKA.

                He lahui akua kona lahuikanaka. Aole no o kana mai o ka nui, ua oleloia, ua piha pono, aole wahi kaawale iki o kona wahi, ua manaoia o na uhane o ka poe i make, oia no ko Milu poe kanaka. O ke alanui o keia poe uhane e iho ai, ua oleloia, oia na wahi e pana ia nei o " Kaleinaakauhane," aia ma Kamaomao ae nei kekahi wahi i kapaia i keia inoa, a pela'ku no ma na Mokupuni e pau o Hawaii nei. Eia hou hoi, ua oleloia hoi, he Ulu kekahi alanui e iho ai, he laau nui, a ua kapaia kona inoa, o ka " Ululeiwalo." O ka uhane i pii ma kekahi lala o keia Ulu o Leiwalo, o kona make