Ka Nupepa Kuokoa, Volume IV, Number 9, 2 March 1865 — Ka Hoomana Kahiko. [ARTICLE]

Ka Hoomana Kahiko.

HELU 9. Ka manao o ka poe kahiko i ke kaahele ana o na akua i ka po--"He elua mau mahele o na akua," wahi a ka poe kahiko. 1. Na akua i hoomanaia. 2. Na akua lapu o ka po. 1. Na akua i hoomana ia. -- He lehulehu na ano o na akua i hoomana ia e ka poe kahiko. Eia kekahi mau akua a lakou i hoomana ai: -- Ka manu, ka i-a, o Pele, o Hiiaka, o Kamohoalii, o Kane, o Lono, o Keawenuikauohilo, o Kapo, o Pua, Kuamu, a nui aku no. O ka manao o ka poe kahiko no ka hele ana o keia poe akua, ua manao lakou, ua heie mai no lakou i ka po a me ke ao me he ano makani la, a i ka ike ana aku e noho mai ana no iluna o kona kahu; ki-ha leo iki mai la, a o ke kamailio mai la no ia. A manao mai hoi kekahi poe, ua hele no kekahi poe akua ma ka hoouna ia o lakou e na kahu o lakou, ke inaina ua kahu la i kekahi kanaka e aku: e like paha me keia:--Ina paha o Pali ka mea nona ua mau akua hoouna nei, a ua inaina oia ia'u, a o kona hoouna mai la no ia penei, "E Keawenuikauohilo, e Keawehoopohaku, e Kapo, e Pua, e Kuamu, e hele oukou e komo iloko o Holokahiki, e komo poo, e komo hiu aku oukou ia ia, a e make ia." Ao ka hele aku la no ia mamuli o keia hoounaia ana, ina he po, a ina he ao. 2. Na'kua lapu o ka po.—Oia no na uhane o ka poe i make. Ua manao loa ka poe knhiko, o na uhane o ka poe i make, oia no na akua lapu o ka po, wahi a lakou. Ina e make kekahi, o ka makau mai la no ia, aole e hele hookahi i ka po, no ka manao no e lapuia mai ana e ka uhane o ua mea la i make. Eia hoi, ua manao kekahi poe, aole i pii ka uhane o ka poe make i ka lani, eia no ka lakou ma ka honua nei kahi i hele ai i ka ai pulelehua; a o ka kekahi poe aia ka i ka lua o Pele. Penei hoi i maopopo ai lakou: Ma ka muki ana, ka hokio ana, ke kahea ano, kau mai la na rnaka, a o ka hai aku la no ia, "ua lapu ia mai nei au e ke akua." A o kekahi hoi, ua ike kino maoli no ka i ka uhane i ka hele mai; peia ko Napela hai ana mai ia'u, no kona ike ana no ka i ka uhane o kona kahu nana ia i hanai, a no ia ike pono ana no ka ona, o kona makau no ia a hiki i keia la. A ke manaolana loa nei no oia, he hele no na uhane o ka poe make i ka po. Aole nae o Napela wale no, he nui aku no ka poe i manao pela. Eia hoi; ua manao no kekahi poe i ka hele ana o na akua i ka po, ma ka make aua o kekahi ma ke alanui, a ua olelo iho lakou, "i make i ka loaa ana i ka o-i-o," oia hoi ka huakai loa. He mau alii nae na uhane o na akua lehulehu; pela kuu lohe a ine kuu ikemaka i kekahi kanaka i make ai ma ke alanui i Hawaii, a ua oleloia, "ua make oia i ka o-i-o." A ua manao loa kekahi poe he nui no na akua wahi a lakou. Eia hoi kekahi mau akua i haiia mai ia'u; ke akua hokio, ke akua kiei, ke akua halo, ke akua loa, ke akua poko, ke akua muki, a me ke akua hele loa ma ke alanui. A penei au i lohe ai i ka pule ana a kekahi kanaka o Molokai, o Pakeaulani kona inoa. Ma ke ahiahi, hoomakaukau mua oia i na mea ai a lako, a i ka napoo ana o ka la, pule aku la oia penei: —" E ke akua loa, e ke akua poko, e ke akua muki, e ke akua hokio, e ke akua kiei, e ke akua halo, e ke akua hele ma ke alaloa; e kipa e ai, a e ola ia'u ia Pakeaulani, a me ko'u wahi makuakane o Kaimumahanahana, a maua e noho kokoolua nei i keia aina o Molokai nei. Amama. (Oia ka Amene ) Pela mau no oia e hana mau ai i na po a pau. Nolaila, ma ka hoike alua o keia wehewehe ana, ua maopopo paha ka manao ana o ka poe kahiko no ka hele ana o na akua i ka po; a ua manao ia oia iho la no paha ka haina o keia kumumanao. S. N. Holokahiki.