Ka Nupepa Kuokoa, Volume IV, Number 18, 4 May 1865 — Make ma Califonia. [ARTICLE]

Make ma Califonia.

E ka Nupepa Kuokoa E; Aloha Oe: E lululima kaua i ke aloha, aole hoi owau wale no, o lakou la'kui hoi kekahi. Ua make o Sinamae, Sep. 7, 1864, kekahi wahine kamaaina o keia aina, i noho pu me na kanaka maoli, mahope iho o ka hiki ana mai Capena Sutter ma Sacramento nei. Ua nui na keiki i hanau mai nana me kana mau kane kanaka no mamua, a ua pau aku ka nui o lakou i ka make, a hookahi i koe o Sarak. Ua mare ia i ke kane. A hookahi hoi a maua keiki me ia, a eia no ia ke ola nei. Nolaila, ua haku iho au i wahi Kanikau nona: Kuu wahine mai ka lai o California, Mai ka makani anu la he Nouaiki, He iki ia makani holo ka maeele i ka nui kino Kuu kino kai luhi i ke aloha I ka nana'e aole oe ka wahine, Aole hoi ka makua o ke keiki, Hele aku nei oe haalele mai ia maua, Eia au me ka luhi o kaua, E lewa hele nei iuka i kai la, Auwe kuu wahine, kuu hoa luhi hoi. Kuu wahine mai ka ua hulilua o Vernon, E lawe ia mai ana e ka makani he Kauliki, Ku ka e-a a ka ua i ka muliwai, Ka makani ua ia o ka Hooilo, Aloha ke Paina e au nei i ka wai, I awiliia ka wai kea me ka wai ula, Ka wai ula ia o Palalewa, O ka lepo ia no na kuahiwi mai, Ku ka ma-ku a a ka lepo i Sacramento, Auwe kuu wahine, kuu hoa luhi hoi. Kuu wahine mai na waa pea hulilua Fremonts, Na waa lawaia ia no Kakalameto mai, Keia poe lea e hoopuni nei i ka ia he kamano, Kani ka pio, o ka huki ia o ka upena, Ui ae nei L. H. Kapuaa, Kuu ae hoi ka kaua upena, Ku ke ehu a ka wai iluna he kakikni keia, Ka ia ili ooi o California, Ka mano niho ole o ka muliwai nei, Auwe kuu wahine, kuu hoa luhi hoi. Kuu wahine mai ka lai o Kakalameko, Oia kaona pihe kanaka nui, Ke hiki aku i ka po Julai, Aloha ka nome mai a ka huila o ka mokuahi Holo ia moku ke kani mai nei ka hokio, Ke weheia mai la ke pani o ka uapo, Kuu pau ka huila o Barnner, Ka puhi olaliia o Kakalameko, Aole no ou lua ma ka muliwai nei, Auwe kuu wahine, kuu hoa luhi hoi. Kuu wahine mai ka muliwai o Kakalameko Oia muliwai a kakou e holo ai, Hoolau kanaka i na keiki, Ka hele ana o ka huakaihele, E hiki ai i Raniani, Launa pu me kou mau pokii, Na kini hanauna o kou poe, O ka waiwai no ia o ka halawai pu, O ka noho ana o ke ao nei, Auwe kuu wahine, kuu hoa luhi hoi. Kuu wahine o ke kahawai o Makoceme, E hiki aku ai i Makalam City, Kau aku ka maka o ka uka o Amado, E hiki aku ai i Liberty, Oia kaona ku hao i ke kula, Nana'ku o ka luna o Makalam River, Kahi ia i waiho ai kou kino, A haalele mai oe ia maua, Hoi aku la oe i ka poli o ka makua mau, Auw kuu wahine, kuu hoa luhi hoi. Thomas B. Kamipele. Vernon, Sutter Co, Dec. 17, 1864, Eia ka hoi keia: - Ua loaa mai ia'u, he wahi Leta na J. A. Kapapu mai, e hai mai ana i ka make ana o Kauhola. Ua make ia i ka la 28 o Nowemaba. He hoahanau keia mea i make. Ua mau kona manao ana i ka Haku a hiki wale i kona wa i make ai. Ua elemakule loa no hoi kona kino, a hiki wale mai la i ka wa i pau ai kona luhi ma keia ao, o Pika, a me Kapahu, o laua na mea i ike i kona make ana, a ua haawi aku laua iaia i ka laau haole, olelo mai ia, "Aia ka laau ma ka lani." Aia ma Slough, West Butte, Sutter Co., kona wahi i make ai.