Ka Nupepa Kuokoa, Volume IV, Number 34, 26 August 1865 — Mea Hou o ke Alo Alii. [ARTICLE]

Mea Hou o ke Alo Alii.

Ke mau nei no ka maikai o ke ola o ka Mea Ilihia. Aia no ia ma Molokai, aole i akaka kona manawa e hoi mai ai. CJa maikai no ke ola o ka Mea Kiekie M. Kekuanaoa i keia mau la, aia no ia ma Papakanene kahi i noho ai ma kona wahi mau. Ke pa-e mai nei no ka lono i o makou nei, ua maikai no ke ola o ke Kama Aliiwahine, aia no ia ma Luakaha kahi i hoomalule ai iaia iho malalo o na lau uliuli oia wahi anoano. Ua o nawaliwali iki ke Aliiwahine kanemake H. K. Kapakuhalii aia no ia ma Hainioeipo, a aia pu no hoi me ia ke alii opio Albert Kunuiakea. Ke pa mau nei no ke aheahe makani o ka nono oluolu ana o ka Mea Kiekie W. C. Lunalilo. Eia no ia ma Waikiki kahi i hoopulupe mau ia ai e ke ala onaona o ka limu lipoa a me ke kehau makani hoala hiamoe. Aia no ke Aliiwahine Lilia Kamakaeha me kona kaikaina alii Likelike ma ka Lai Ulu o Lele. Pela ka mea i lohe mua ia mai nei, me he mea la ua holo mai la lakou i Molokai i keia manawa.