Ka Nupepa Kuokoa, Volume IV, Number 35, 2 September 1865 — Olelo pane ia P. R. Holi. [ARTICLE]

Olelo pane ia P. R. Holi.

Aia ma ke "Au Okoa," Helu 14, ko P. R. Holi kukulu manao ana, ma kona kukulu manao ana i kono ia mai ai au e pane aku, aole au e hoohewa ana i kona wehewehe ana i ka hana a na Makani, ma kahi i pa mai ai o na Makani, malaila au e kuene pono iho ai. O ka Naulu: Wahi a P. K. Holi, ua pa mai keia Makani mai ka Akau mai, u malaila ka hoomaka ana e helu ina Makani a puni ka Mokupuni o Niihau. E ke hoa paaua o keia mea he kukulu manao, o ka Makani e pa maila ma ke alo o Niihau he Naulu ia, aole ia mai ka Akau mai, mai ke Komohana mai ia Makani kahi a ka La e iho akula. O ka Lehua : Kiulehua : Elua keia mau Makani mai ke Komohana Akau mai. O ka Lehua; ua aui iki ae ia mai ke Komohana ae. O ke Kiulehua, ua aui loa ae ia aneane pili pu me ka Akau. O ke Koolauwahine: Aia no keia Makani mai ka Akau mai o ka Mokupuni o Niihau, o ka makani keia iaia ka pulupulu. O ke Kiu : Aia no keia Makani ma ka Hikina Akau mai, o ka Makani keia nona ke alo e loku ana ka ia i ke anu a ke Kiu. O ka Aoa : Aia no keia Makani ma ka Hikina mai o ka Mokupuni o Niihau. O ka Aoalaenihi: Papaainuwai, elua keia mau Makani mai ka Hikina Akau mai, Aoalaenihi, ua aui iki ae keia Makani mai ka Hikma ae. Papaainuwai ua aui loa ae ia ane pili pu me ka Hema. O ka Unulau: Aia no keia Makani mai ka Hema mai o ka Mokupuni o Niihau. O ke Kona: Aia no keia Makani mai ke "Komohana Hema" mai, o ka helu 1 ia o na Makani ikaika o ka Mokupuni o Niihau. O ke Kulepe: Wahi a P. R. Holi, i ka moana wale no ia Makani e Kulepe ai, i na waa holo mai Kauai aku a Niihau "Huinamakani " o ka hui ana o kela Makani keia Makani a paio ae la i ka moana, o ka mea e ko ma ia hana ana, oia ka Makani nana e lawe aku a pae i Niihau. O ka Mikioi: Aole i ike ia kahi i pa mai ai o keia makani, o ke kakahiaka wale no ka wa hiki mai o keia Makani. E oki au maanei, ke hoi nei ke keiki o ka uka iuiu o Kapalama, ke ikaika nei ka pa a ka Moae. S. NAPAHUKAPU. Kapalama, Oahu. 14 Aug, A. D. 1865.