Ka Nupepa Kuokoa, Volume IV, Number 36, 9 September 1865 — No Lusia Lulea Kaiamoku M. Moehonua. [ARTICLE]

No Lusia Lulea Kaiamoku M. Moehonua.

He uhane la he aloha, He aloha la he uwe, Ke uwe nei makou, Na kini me ka lehulehu, Ka uhane kai hiki mai, Hoala ana i ka moe, Moe au a hoolana, Kuhi au he oiaio, Hopu hewa au i keaka. I ke aka Wailiula, O ka la kai ano mai, Nopu wela i kuu manawa, Halialia mai ana, I o'u nei ke aloha, Ke aloha o kuu hoa, Kihene lehua i uka, O ia uka iuiu, Iu anu o ka mauna. I walea me Hiilei, Me ka wahine kui pua, Na pua lehua i luna, I ka lala kaukolo, I lei no ka uhane, Kahiko i ka waokele, Ka wewehi o ka palai, Ka lilipo o kanahele, He nahele ulu wehiwehi, No kini uhane iluna, Luana i na hua hau, I ke oho o ka Hinahina, Haiamu me Hiku, I ka luna o Hainoa, Kanikau leo lea mai, Na Pupukanioe, E uwe hooki ole, Na Iiwipolena, Ke uwe loa lani nei, Na pua o kanahele, Ke uwe helu mai nei, Na kini opua iluna, Ka Opua hiki ahiahi, Kai kii mai e lawe, Lilo iho nei ke aloha, Ka uhane kinowailua, Elua hoi mea nui, Aloko e hana nei, O ka u me ka minamina, Ka uwe me ka waimaka, Na na KINIPONOI O HALANIANI. Honolulu Augate 31, 1865,