Ka Nupepa Kuokoa, Volume IV, Number 38, 23 September 1865 — No ka Pepehi ana o ke Alii i ke keiki a ke Kahuna. [ARTICLE]

No ka Pepehi ana o ke Alii i ke keiki a ke Kahuna.

I ka makahiki o ko kakou Mesia 800 a keu aku. E noho ana kekahi Alii o Molokai ma Mapulehu, o Kupa kona inoa ; he hoahanau oia no Laamaikahiki, a o laua kai kelekeleau mai i ka moana kai lipolipo. Ua lilo iaia ka Mokupuni o Molokai. O Mapu ke Kahuna, a o Kokiamapu ke keiki. O ka hana a Kokiamapu, o ka haipule, a o ka hookani pahu iloko o ka Haiau imua, ka hana a ua keiki nei. Ua huhu ua Alii nei i ke kuhihewa iaia iho, no kona manao e kuamuamu ana ke keiki i ua Alii nei maloko o ka pule; ma ka leo o ke kaeke, ma ka hooheihei ana. Penei na hua: "E Kupa—e e Kupe—e Kupe—e, E Laamaikahiki, Hooheihei ana i ka moana, E Kupe—e, Ai-ai-ka halale, Ai-ka ha-le—Ai-ka ha-le, Lo-i-lo-i—Ai-ka hala-le, A-i-ka ha-le—A-i-kupoi-poi, A-i-kae—A-i-kae,' Loi-loi—ka-hele—ka-hele." Maloko o keia pule iloko o ka pahu ; ua kena ua Alii nei e pepehi ia Kokiamapu. A make ua keiki nei a ke Kahuna. I ke kakahiaka, hele aku la ua Alii nei i Waialua i ka Haiau i Kahakoililani. Kapukapuakea a noa ke kapu ana. Hele loa ua Alii nei i Moakea, a i Popokupili.

Hoi mai la ua Kahuna nei; no ke aloha i ke keiki. A imi iho la ka manao i wahi e ku ai ka makaia, a loaa iho la kahi e ko ai. Hopu aku la keia i ka puaa, a o ka puawa ma kekahi lima—a holu aku la keia i Koolau o Honokaupu ma Pelekunu. Ilaila kekahi kamaeu i noho ai, o Kauhuhu ka inoa ; he wahi keiki ehu no Manawaikaioo—no ke kai hulili anapa o Pukokokoo. Olelo mai la ia Kamaeu ; "O ka la o Olepau ko'u la e hiki aku ai i o oukou la. E nana pono oe, a ike i kuu kino, mai hoohewahewa oe i kuu kino." Hoi aku la o Mapu a hiki i Mapulehu, a mahope hoi mai la ke Alii o Kupa. A noho iho la iuka o Mapulehu ma ka Haiau. A hiki ka la i kauohaia'i. Hoomanao iho la o Mapu, a huli ae la oia e nana i Koolau o Molokai—kupu mai ana ke ao opua nui a kiekie loa i ka lani. O ke ano o keia ao like me ka mano, he poo, he waha, he niho; a hamama iluna ka waha. A kupono i kahi o ua Alii nei me kona ohana. Iliki iho ana ka ua, ka hekili me ka uila a me ke olai, Kauakapakulani. Lilo iho la ua'lii nei me kona ohana i ka wai, ame na mea a pau e pili ana iaia. Hili ae la ka wai i Mapunaula, a huli ae la i Pukoa, a komo aku la- iloko o ke kai. Ua makaukau kamalii ehu o loko o ke kai i mea paina na ia poe pololi Ku ka makaia a Mapu no ke aloha i kana keiki. Ua kapaia kela wahi o Aikanaka, oia kela awa ku moku o Pukoa. * * * * * * * S. M. Kamakau.