Ka Nupepa Kuokoa, Volume IV, Number 41, 14 October 1865 — He Make i Aloha ia. [ARTICLE]

He Make i Aloha ia.

E ka Nupepa Kuokoa e ; Aloha oe : Ua make emoole o Mareko Kaikai. Penei hoi ke ano o kona make ana, Ma ka la Sabati, oia hoi ka la 1 o Okatoba nei, hoomaka mai ana ke anu, ka wela ine ka nalulu, aole no nae he mahuahua loa ; a ma in po ana iho, nui mai una ka eha ma ka umauma. A ma ka la ekolu ae, hoomahuahua loa mai kona eha a puni ke kino ; a ia manawa, pane mai oia ina kaikamahine, "Ua nui loa mai nei kuu pilikia, a e aneane haalele ana paha wau ia oukou, aka, he lana no nae kuu manao, ina no i make, na ke Akua no i hana, a nana no e wawahi " A ma ka Poakolu, oia hoi ka ia 4 o keia malama, o ka pau no ia o kona mnnaolana no ke ola, me kona hai mai i kona manao hope, " e noho oukou me ka manao aloha kekahi i kekahi, me ke kue ole o ko oukou noho ana, a e hooloh e no hoi i ka olelo a Amau (Pake), oia no ko oukou makua, a ma kana olelo wale no e hoolohe ai oukou." Aloha mai la oia i na ohana a pau, a kailiia'ku ia kona aho. He kanaka maikai o Mareko Kaikai, a he hoahanau hoi no kaekalesia o Waimea i Hawaii, ma ka berita a Rev. L. Laiana. Ua noho no hoi oia me ka hihia ole ma na kanawai oia mea. Ua hanauia oM. Kaikai, ma Uti, Waimea, Hawaii, ma ka malama o lulai, M. H. 1804. Oka nui no hoi o kona mau makahiki, mai kona hanau ana a hiki i kona la ī make ai, oia hoi ka la 4 o Okntoba, makahiki 1865, oia hoi he 60 makahiki, 5 malama, me 4 ia. A ma ke ahiahi o ka la 5, ua hoolewaia kona kino kupapau; a mamua hoi o ka hoolewaia ana, ua himeni ia kekahi mau pauku i haku ia malalo iho nei. 1 Kanikau la he aloha, No Mareko Kaikai, Ua haalele mai nei f I ke hoa pili he wahine. Auwe oe, Aloha no." ii Ke uwe kanikau nei, Kau mau kaikamahine, I ka hala ana aku nei, Ko makou Papa. 3 Ke noho nei makou, Me ka u me ke kaumaha, Aole no e pau, Ko makou minamina. 4 Wehe maf nei i ka pili, Kaawale mai makou, IMa makamaka a pau, Me o'u hoa launa. 5 Aloha o'u hoa luhi, 0 ka imi ann i ka pono, - Na hana a ke Akua, 1 alo ai i ke anu. 6 E i aku nei paha oe, I ka Paredaiso nani, I ke ao o ke Akua, E kuu ai kou luhi. 7 Aia paha ka Uhane, I ka lani iluna lilo, I kabv ike ole ia, Huna na maka nalowale. Halelu ia, A Amene. A pau keia himeni ana, laweia aku la kona kino kupapau a waiho ma Kawaiahao, a na Rev. H. H. Pareka i pule a pau, a waiho ia aku la i ka aoao mau o ka honua. He leo no keia e kahea mai ana i kana mau keiki, a me kona mau makamaka a pau e kiai, me ka makaala, no ka mea, he hora ike ole ia ko ka Haku. Aloha no. Mrs. Kahaoleaipuni. Honoluln. Okatoba 5, 1865.