Ka Nupepa Kuokoa, Volume IV, Number 42, 21 October 1865 — No ka Mahiai. [ARTICLE]

No ka Mahiai.

Ua kamailio aku au ia oukou e na hoa mahiai, i na mea e mau pono ai na mea kanu i ka wai, oiai na la wela ua ole o ke Kau. Eia no: 1. O ke poi i lepo me ka opala. 2. O ka hoowali hohonu i ka lepo me ka palau ; a i ole ia, e paeli hohonu i na makalua me ka oo. 3. O ka waele mau i ka nahelehele, ka mea e omo mau ana i ka wai, a nele na mea kanu me ka maloo. Ina uhuki oukou i kekahi nahelehele uliuli a palahalaha loa, a paeli iho malaila, e loaa auanei ia oukou ua maloo, puupuu, apaapaa paha ka lepo, no ka mea, ua pau ko laila mau i ke omoia e ke aa o ka nahelehele. 4. Eia ka ha o ka mea e mau ai ka lepo, o ke kipulu. Ua kuhihewa kekahi poe no ke kipulu, e manao ana he mea wale no ia e momona ai ka lepo, a ma ona hoi na mea kanu, e ai ana ia momona ; a nolaila ka uliuli o na mea i kipulu ia. A pela io no hoi, aka, e loaa ia kakou na pomaikai elua no loko ae o ke kipulu. O ka momona o ka lepo akahi, a o ka mau o ka lepo alua. Ua mau no ka pulu wai o ka lepo i kipuluia ke ua, a ke ua ole paha malaila ; no ka mea, ua hihia pu ka wai me ia, i ole nou ia ilalo, aole hoi mahu ae iluna i ka la. Aka, ke ninau mai nei paha oukou ia'u, " Heaha ke kipuiu ? " Eia no ia, ka nahelehele,' ka opala, ia mea'ku ia mea'ku i ulu mamua, a ua popopo, a ua palahe, a lilo hou i lepo. Eia ke kumu e mau ai ka pulu wai ma kahi kipulu, ua makalii loa ka lepo kipulu. O ka lepo maoli, he pohaku palahe no ia. O ke one, he pohaku, a he puna paha i anaanai ia a makalii iki; helelei koke nae ilalo ka wai i nininia maluna o ke one. O ka wai ma kahi lepo maoli, ua mau iho no no kona makalii iho i ko ke one. Aka, ma kahi i awili ia ka lepo kipulu me ka lepo maoli, ua loihi loa kona manawa puluwai, ua hihia pu ka wai me ia, aole hiki ke kulu iho ilalo, aole hoi i ka la ke uhuki ae iluna, a ua lealea loa na mea kanu a kakou e omo ae ia wai, a ulu ae, a uliuli ke nana aku, a hua hoi, pahaneri a keu aku. Na Luhua.