Ka Nupepa Kuokoa, Volume IV, Number 45, 11 November 1865 — No ke Ola kino. [ARTICLE]

No ke Ola kino.

KA INU LAAU ANA. E ka mea e heluhelu ana i keia, he mea maikai no ko inu ana i ka laau, i ka laau kupono nae i ka mai, aole pono ke ai wale i ka laau me ka maopopo ole o ka mai, o lilo ia i mea e mahuahua ai ka mai, a lilo ke kino holookoa i ka nawaliwali, a i kekahi wa make loa no. Pela no i hana'i kekahi poe mai, manao haiki, i ka wa e mai ai, o ka manao ae la no ia, e hele e kuai i laau me kahi hapaha, aole hoi hele aku a ke Kauka, i aku e nana mai oe i kuu mai, he ole loa no, ninau no ma ka laau i makemake ia a inu no ia laau. Ea, i kupono ia laau i ka mai, alaila e pono ana, aka, ina aole i kupono alaila e lilo ana ia laau i mu nana e ai ke kino nui puipui, i kau wale ia iho, e kahi mai palaueka, a no ka manao haiki, lawe wale i ka laau kupono ole ia mai, no ia mea poino ka hope. Eia kekahi mea e maopopo ai keia mea aia kekahi haole hanohano ma Amerika, he mai maloko o ka opu ai ai, a lohe oia he laau e ola ai "ka paakai hoohu" (soda,) no ia mea (dyspepsia) o ka hoao iho la no ia, ua haole nei, a eono malama mahope mai o ka make no ia, me ka manao ole e make ana, no ka ike ana iho ua ola, eia ka e make ana. I ke kahaia ana e ke Kauka ua ike ia, ua paakiki loa ka paakai maloko o ka naau a oia ke kumu i make ai. Pela no hoi kekahi kaikamahine, make no mamuli oia hana, no Amerika no ua kaikamahine nei. Pela no hoi kekahi wahine Hawaii i ka makahiki 1863, loaa no ia i ka mai wela hui a me ia mea aku, kii no i ka laau lupepa ia ai ana, a noke i ka luai, ia luai no a make loa. Pau kona ola kino, hele aku la oia i kahi mau o ke kino. Nolaila, e na makamaka e heluhelu ana i keia, e noonoo pono i ka ai ana i ka laau, mai laukua wle i kela laau keia laau, i kupono ole i ka mai, o lilo koke kahi kino i ka pilikia. O ke kali a maopopo lea ke ano o ka mai, alaila inu ka laau o ka mea e maopopo ai, ko ka hale i ke kaua akamai i ka nana mai a nana e haawi mai ka laau.