Ka Nupepa Kuokoa, Volume IV, Number 50, 16 December 1865 — Page 1
KA NUPEPA KUOKOA :
KE KILOHANA POOKELA NO KA LAHUI HAWAII.
BUKE IV. HELU 50. HONOLULU, DEKEMABA 16, 1865. NA HELU A PAU 211.
" KA NUPEPA KUOKOA.,"
HOOPUKA MAU IA MA HONOLULU
I kela Poaono keia Poaono.
$2.00 no na mahina he UMIKUMAMALUA,
$1.00 no na mahina eono, ME KA HOOKAA MUA MAI.
NA OLELO HOOLAHA — aole i oi mamua o 10 laina no ka hoopuka hookahi ana, $1.00 ; alua komo ana, he $1.50 ; hookahi malama, $2.00. E uku mua ia mai ke dala o na olelo hoolaha a pau e hoounaia ana mai e pai.
KANIKAU — he hapalua dala ka uku no ka aoao hookahi o ka pepa leta, oia hoi 4 keneta no ka lalani hookahi — penei : he 25 lalani, $1.00 ; 50 lalani, $2.00 ; a pela'ku.
KA UKU NO NA OLELO HOOLAHA — ka uku pepa, a me ka uku o ke Kanikau, e haawiia no ma ka lima o na Luna o ke Kuokoa, a i oleia, e hoouna mai ia Kauka Kulika.
O KA UKU PEPA A PAU E HOOKAA MUA MAI NO — aole e kauia ka inoa o kekahi haole a kanaka maoli paha, ma ka inoa o ka poe lawe pepa ke ole e hookaa e mai mamua. E pono ke hiipoiia keia mau rula, no ka mea, he emi no ka auhau no keia nupepa.
AIA KE KEENA O KA NUPEPA KUOKOA — ma ke kihi hema o ka Hale Hookipa Luina (Sailor's Home.) O na hora hana, mai ka eiwa o kakahiaka, a i ka ha o ke ahiahi.
L. H. KULIKA, (Lona Hooponopono.)
KA " NUPEPA KUOKOA."
Is published in Honolulu
EVERY SATURDAY,
$2 00 per annum, or $1.00 per six
months, in advance.
ADVERTISEMENTS not exceeding 10 lines, inserted once for $1.00 ; twice for $1.50 ; and $2.00 for one month ; all advertisements must he paid for in advance.
KANIKAUS will be charged 1.00 per page, or 4 cts. a line.
PAYMENTS FOR ADVERTISEMENTS, Subscriptions or Kanikaus, may be paid to any of the Agents of the Kuokoa, or may be enclosed in a letter to the Publisher.
ALL SUBSCRIPTIONS must be PREPAID. No names, either of foreigners or natives will be inserted on the subscription list until paid for. This rule must be strictly adhered to, on account of the low subscription price.
THE OFFICE OF THE KUOKOA is in the South corner of the Sailors' Home. Office hours from 9 A. M. to 4 P. M.
L H. GULICK.
Publisher.
Volume I. II. and III of the KUOKOA, bound, for sale, $3.50 each.
Persons having complete sets of the above, can have them bound by paying $1.50 each.
JOHN H. PATY !
Mea Hooiaio Palapala, Honolulu, Pae Aina Hawaii. AIA KONA KEENA HANA MA KA HAle Banako o Bihopa ma. 195-6m
HALE PAI KII.
AIA KO'U HALEPAI KII MA KA HALE e pili ana me ka Hale Leta, maluna'e o ke Keena Pai o ka " Nupepa Kuokoa," Ua emi loa ke kumukuai o na kii.
H. L. CHASE (Keiki.)
274-1y Mea Pai Kii.
S. KUPANEA.
J. W. KEAWEHUNAHALA.
Loio ! Loio !
KE HOOLAHAIA'KU NEI I NA KANAka a pau o keia Aupuni, ua makaukau na mea nona na inoa maluna e Kokua, a e lilo hoi i LOIO no na mea a pau e loohia ia'na i ka hihia, a e pale ana no kekahi hihia imua o na Aha Hookolokolo o keia Aupuni. He mau mea laua i aoia i ka OIHANA HOONAAUAO ma ke Kulanui o LAHAINALUNA, a ua aoia hoi ma ka OIHANA Kanawai, a me ke kakau ana i na Palapala o kela ano keia ano, e ka Mea Hanohano G. M. ROBERTSON (LOPIKANA.) A o ko laua Hale Oihana, aia mauka iho o ka huina o ke Alanui Hotele a me Maunakea ma Honolulu, Oahu.
Honolulu. Feb. 6, 1865. 167-y
OLELO HOOLAHA !
I NA KANAKA HAWAII ;
Aloha oukou :— No kuu makemake e ike kela a me keia kanaka Hawaii i kahi e hiki ai ke hoowaiwai ia ia iho, nolaila, ua pai au a ke hoouna'ku nei i keia palapala ma na kihi eha o keia mau Mokupuni, ma ka loa hoi a me ka laula o ka aina ; a ke nonoi aku nei au ia oukou, e hoomaopopo i na olelo i hoikeia mahope nei.
Ke hai aku nei au ia oukou a pau loa, ua makaukau au e kuai i ka Loli ; a penei ke kuai ana, a me ka hana ana no hoi, i maikai ai, a i makepono ai no hoi oukou ka poe e lawe mai ana i ka Loli :
Ka hana ana o ka Loli :— Aole e hoopakuia ka naau o ka Loli ; o ke one ka mea hoolei aku, aole e kahaia ka opu, aka, e kaha no ma ke kua, i akahi iniha ke kaawale mai ke poo mai, alaila, hoomaka aku a koe hookahi iniha, alaila, e hookomo iloko o ka Ipuhao i ke kai maoli o ka moana, a e hoolapalapa i elua paila ana o ka wai, a pau ia, kaulai a maloo maikai. A ina pela e hanaia'i, alaila, e kuai koke no au ia.
Ke Kuai ana :— Aole e kuaiia ka Loli i emi malalo iho o ka eha (4) iniha ka loihi — mai ka eha iniha a pii ae iluna ka loihi o ka Loli i makemakeia, a o ke kumukuai penei noia. Ina EHA A ELIMA INIHA, he EONO KENETA ka uku o ka paona ; a ina EONO iniha, he EHIKU KENETA ka uku o ka paona ; a ina ehiku iniha, alaila, he EWALU KENETA no ka paona, a pela no hoi e pii ae ai ka uku, e like me ka pii ana'e o ka nui o ka Loli.
No ka Pepeiao Laau :— Ua makemake no au i ka Pepeiao Laau, a e uku no au i ke kumukuai makepono ke lawe ia mai i o'u nei, no ka paona hookahi.
Lala Mano :— E kuai no au i ka Lala Mano a ka poe a pau e lawe mai ai io'u nei, i IWAKALUA KENETA o ka paona.
Aia ko'u Halekuai ma ke Alanui Nuuanu, ma ka aoao makai o ka Halekuai o Ake (A. S. Cleghrn,) ma ka aoao hikina Alanui Nuuanu. Me ka mahalo. KIULANA,
Pake Kalepa. Honolulu, Oct. 25, 1865. 204-6m
Na Buke i Pai ia e ka Papa Hawaii.
Eia na buke kuai, a me ke kumukuai, Baibala nui no na Awai o na Halepule, $4 00
" Ohana, ano nui, me na kii, } { 2 50
a me na Moohana, } { 5 00
" Ohana uuku iho, me na Moo } hana, ili ulaula, } 1 00
" Ohana, me na Moohana wale no, 62 1/2
" Okoa, - - - 50
Kauoha Kahiko, i paiia i ka M. H. 1838, 25
Kauoha Hou, me ka pepa lahilahi o waho, 12 1/2
Kauoha Hou, hapa haole (Haw. Eng.) 25
Haiao, - - - - - 25
Hele Malihini Ana, - - - - 25
Wehewehehala, - - - - - 25
Lira Hawaii, - - - - - 25
No ko ke Akua Ano, - - - - - 25
Lira Kamalii, - - - - - 25
Kumumua Hou, - - - - - 12 1/2
Moolelo Ekalesia, - - - - - 50
Hoike Palapala Hemolele, - - - - -25
Himeni Hawaii me na Leo Mele, 1834, 25
Ninauhoike, - - - - - 12 1/2
Ui Kamalii no na Kula Sabati - - - - 12 ½
Eia na buke i haawi waleia.
Haawina Baibala.
Ui.
Na Dawida Malo Kumumanao.
Ko Olelo Ao Liilii.
Ka Moolelo o Batimea Puaaiki
L. H. Kulika.
Kakauolelo o ka Papa Hooko o ka Ahahui Euanelio o Hawaii.
Ka Nupepa Kuokoa.
HE KAAO
— NO —
PIKOIAKAALALA !
Ke Keiki.akamai i ka Pana.
HELU 1
O Alala ka makuakane, o Koukou ka makuahine. O ko laua aina i noho ai, o Waioli i Kauai. Ua ao no laua i ka laua hana o ka Pana iole i ko laua wa. A hanau mai na laua eono kaikamahine Akua, a hookahi kaikamahine kanaka. A o ka muli loa o Pikoiakaalala, ke keiki kaulana hoi no ke akamai i ka Pana Iole, ka mea hoi nona keia Kaao.
Eia hoi na inoa o na kaikamahine a laua,
" O Kikoookalani ka mua,
O Kikoookahonua ka lua,
O Kikoookamauna ke kolu,
O Kikoookamoana ka ha,
O Kikoookapo ka lima,
O Kikoookeao ke ono."
Pau na keiki Akua ; o Kauiomanoa ke kaikamahine kanaka ; a o ka hiku hoi ia, o Pikoiakaalala ka walu. O na kino o ua poe kaikamahine Akua nei he lole. A o ke kumu no hoi ia o ke akamai nui o Pikoiakaalala i ka Pana Iole. A nui ae la o Kauiomanoa, a ui, a wahine maikai ; makemake oia e holo i Oahu nei, e imi i kane nana. A i kona hiki ana i Oahu, loaa iho la kana kane o ke aikane a Kakuhihewa. A o ko laua wahi i noho ai o Manoa. A mahuahua iki ae la no hoi o Pikoiakaalala ; hoomaka iho la no ke ao o ka makuakane iaia i ka Pana ; a ike, a akamai.
A ma Kauai no hoi kahi i noho ai kekahi Ilio kaulana o Pupualenalena. I ka hele ana o ua keiki nei e Pana Iole i ka nahelehele ; a ike mai la ka Ilio i keia wahi keiki uuku i ke akamai i ka Pana Iole, alaila, hele pu aku la laua, popoi no hoi ka Ilio he umi Iole, Pana no hoi o Pikoiakaalala he umi lole ; pai iho la laua ia la.
A i kekahi la'e hoi, hele hou no laua i ka hooheihei ; hopu no ka Ilio he kanaha, Pana no hoi ke keiki he kanaha no hoi Iole. Pela no laua i haele heihei ai, a, aole o laua mea i eo. A no keia heihei ana o laua me ka Ilio Pupualenalena, aole hoi i eo i ka Ilio ke keiki kaulana. Nolaila i kukui aku ai kona kaulana ma Kauai a puni, a na ko Kauai hoi i hai aku ko Oahu, a pela aku ko na Mokupuni a pau o Hawaii nei, no ke akamai o Pikoiakaalala i ka Pana Iole. A o ka inoa wale no kai kaulana, aole hoi i ikeia ke kino.
A mahope iho o ko laua heihei ana me ka Ilio, alaila, olelo aku la o Alala kona makuakane, " E aho paha e holo kaua i Oahu e ike i ko kuahine." Oia hoi kela a'u i hai ae nei mamua. (Kauiomanoa) Ae aku la no hoi o Pikoiakaalala ; a o ka holo mai la no ia o laua nei a ka moana o ka Ieie-waho, alaila ike mai la o Pikoiakaalala i kekahi hee nui o Kakahee ka inoa o ua hee la. Olelo aku la ia i ka makuakane, penei : " Ka hee nui," " Aia i hea ?" wahi a ka makuakane, " Aia no hoi ke noho mai la iloko o ka lua ; aia i ka ae-kai." O kau holo mai la no ia o laua a aneane kokoke mai e ike i ka aina, kahi hoi o ka hee e noho ana, o ke ano o keia hee, he hee akua.
O ka lena ae la noia o ke keiki i kana kakaka, a o ka Pana mai la noia, i ka moana pili aina ole no ka Pana ana, ku ana ka hee i ka ae-kai, a mahope mai no hoi laua nei, a pae ana i Waiakaaiea ; a pae ka waa o laua nei ilaila, alaila, kii mai la laua e pepehi i ua hee nei ; o ka pepehi iho la noia o laua a make o Kakahee. [E ka mea heluhelu, aia no kela mau aina maanei mai o ka Lae o Kaena, o Waiakaaiea, o Kakahee.] Moe laua nei ilaila a kakahiaka'e, o ka holo mai la noia ma ka waa a pae i Waimanalo, a kau ka waa o laua i Kapu'a, e pua mai ana ilaila, a o ka mea ia i nana'i ka inoa o ua wahi la o " Kapu'a " a hiki i keia wa. Aole nae laua nei i hele aku e Pana Iole me na kamaaina. Pii no laua nei a kela wahi hoomaha o Kaulanaakaiole, ike ae la keia he mau Iole e kau ana i ka pali, o ka inoa oia mau Iole, o Hahaiole ma.
No ke ahiahi loa o laua, aole oia i Pana i kana Pana i na Iole, haele mai la no laua, a pii mai la ma Koha, a iho ma keia huli o Manoa, ua kau nae ka la maluna'e o Kaala. A hiki laua nei i ka hale, ike iho la ka makuakane me kana kaikamahine, a uwe iho la a pau ka uwe ana, ho-a ia ka imu o ka puaa. E a ana no ka imu, e unuunu ana ka poe ai-puupuu a ke kaikoeke i ua puaa nei, o ko ke kamalii ano mau no hoi o ka holoholo mawaho o ka hale, o ka iho mai la noia o Pikoiakaalala, a hiki ana keia i Kulaokahua. E pua Iole ana ilaila ke alii wahine a Kakuhihewa, oia hoi o Kahamaluihi, me ko o Oahu akamai nei hoi o Mainele, oia ka ke alii Pana Iole a Kakuhihewa, a o Kepanakahuahi hoi ka ke alii wahine a Kahamaluihi Pana Iole. E ku pua lole ana lakou i kahi i haiia'e la maluna. A ua paa ka pua, e ku ana ke alii wahine me kona kahu wahine no ; a ua hoomaluia ka pua, aole e komo mai kekahi kanaka iloko o ka pua. A ma kahi e ku ana o Kahamaluihi me kona kahu wahine. A komo ana keia wahi keiki uuku ma ke kowa mawaena o ke alii wahine me ke kahu, huhu iho la ke alii wahine i ke keiki penei : " Heaha kau e nei wahi keiki o ka wahi ana mai nei i ka makou pua, ua hoomaluia a ua malu ?"
Pane ae la no hoi ua wahi keiki nei, " A komo mai nei la hoi au maanei a ua hemo mai nei kekahi Iole maanei." Pane mai o Kahamaluihi, " A hiki mai nei la oe ia nei ua ike oe e na wahi keiki i ka Pana Iole ?"
A olelo aku la no hoi kahi keiki Pikoiakaalala penei, " He ike no, he wahi ike uuku." Olelo mai la o ke Kahamaluihi, " Pehea la hoi, ia oe hoi ka kaua Pana, e Pana ae oe ?" Ae aku la no ke keiki, " Ae." Alaila, houluuluia mai la ka pua a ke alii, me ke kakaka, a waiho ana ma ke alo o ua keiki nei ; alaila, olelo aku la ua keiki nei, " Aole e waiwai o ka pua keia me ke kakaka e Pana ai." Hai hou mai o ke Kahamaluihi i ke keiki penei : " Aole no ka paha oe i ike e na wahi keiki i ka Pana Iole o kau hele ana mai o anei ?"
Pane aku la o Pikoiakaalala penei : " Aole e waiwai o ka pua keia, a o ka hakihaki iho la noia o ka pu'a pua, me ke kakaka e ua wahi keiki nei. Pane hou mai o Kahamaluihi, " O keaha iho la ka pua o kau hakihaki ana e na keiki wahahee ?"
[A ma keia wahi, e waiho iki iho kakou i ka olelo ana no ke keiki me Kahamaluihi hoi ; a e olelo iki ae kakou no ka makuakane.] A kalua iho la ka imu o ka puaa ; ninau aku la o Alala i ke kaikamahine ana ia Kauiomanoa, " Auhea iho nei ko wahi kaikunane ?" Olelo aku la o Kauiomanoa. " A ma kai aku nei ia i hele aku nei la," pane mai o Alala, " Aole anei he hana nui aku ma kai nei la ?" Olelo mai la ke kaikamahine, " He haua, he pu'a Iole na ke alii wahine a Kakuhihewa." Alaila, manao ae la o Alala aia ilaila ke keiki ; o ka imi mai la noia, me kahi kapa ua popoia, aia nae ilaila ka pua me ke kikoo a kana keiki. A ku ana keia mahope o ke kua o ke keiki, a alawa ae la ke keiki mahope, a ike ae la i kona makuakane e ku ana mahope ona me ka puolo kapa. No ka mea, aia iloko o ka puolo kana pua me ke kikoo. Ua mau nae ka pili a Kahamaluihi me Mainele, a ua makaukau ka Pana, aka nae, aole iho la he pua a Kahamaluihi, ua pau i ka uhaiia e Pikoiakaalala.
[A ma keia wahi hoi, e olelo hou ae kakou i ke keiki me Kahamaluihi.] Pane mai o Kahamaluihi, " I aha iho la auanei ka kakou mea e Pana aku ai la ?" A no ka ike ana'e o Pikoiakaalala, i kona makuakane ia Alala e ku ana ma ke kua. Alaila, ninau aku la o Pikoiakaalala ia Kahamaluihi penei, " Ia wai mua," olelo mai o Mainele, " Ia oe ka mua," hoole aku la hoi ke keiki, " Aole, ia oe no mua i ke kamaaina, ina no e eo mai ia oe, oia iho la no, no ka mea, aole maua i Pana'ku." A ninau aku la nae ke keiki, " e hia ai e eo ai ?" Hai mai la o Mainele, " He umikumamalima Iole." A olelo aku la o Pikoiakaalala, " Oia, a Pana, na ke keiki no nae i haawi aku ia Mainele, penei oia i pane aku ai, " E Mainele — e, aia ka Iole la i ke kumu o ka aweoweo, pana ia," o ka Pana aku la noia o Mainele a ku ana ka Iole, helu akahi kela aoao. Pela no kana haawi pakahi ana a pau na Iole he umikumamaha, a koe hookahi Iole, o ka umikumamalima hoi ia alaila eo. Kena hou aku la no ke keiki, " Pana hou ia'ku." (Aole i pau.)
Ka Hoomana Kahiko.
HELU 31.
NO KA HULA A ME KA HAA ANA.
He nui wale na ano hula ma Hawaii nei, ke huli ae hoi kakou a hoomaopopo i ko lakou mau ano a me na helehelena. Eia iho ko lakou mau inoa pakahi. O ka hula pele, hulakalaau, hulapahua, hulapuniu, hula hoopahua, hula ulili, hula niaukani, hula paiumauma, a me na ano hula aku i koe.
O ka hulapele. Oia no ka hula upoho me na poholima elua, e paipai ana me ka like loa. Penei hoi ka hana ana,
Ina he umi wahine, a he umi no hoi kane, alaila, hoonoho ia na wahine mamua o na kane ; a ia manawa e ku ae ai kekahi mau mea elua a hookahi paha, he mau mea haa imua o ke anaina hula, ua kapaia ka mea e haa ana imua o ke anana hula, he olapa. I keia mau olapa e haa ana i o a ia nei, alaila, upoho aku na wahine a me na kane, me ka hana pu no hoi i na mele mai ko lakou waha aku. Aka, mamua aku o ka hula ana, e ku ae ke kumuao hula, a haawi mua ae i kanaenae no Pele ; a penei hoi e hana'i : " Oi hele mai ka lani e lili, me ka inaina, me ka ukiuki, me ke kala, me ka luoeke, me ka puhakelekele, ka ua huli honua, hulihia luna nei ia lalo, hulihia lalo nei ia luna, hulihia o Waakauhonua, e ka La e Ku — e, E poo no Hiiaka wahine mai ka lani." A pau keia pule ana a ke kumuao hula, alaila, o ka hoomaka mai la no ia o ka ahahula e upoho iho me ko lakou mau lima, a hana pu me na mele mai ko lakou mau waha aku ; a pela pu no hoi na mea i kapaia he olapa, e hana pu ana i na mele. Eia nae, o keia hula o ka hula Pele, i ka manawa e hana ai a pau, alaila, kanaenae ae no i ka pule e like no me kela pule i hai mua ia ae nei maluna o keia kukulu manao ana, a pela mau aku no e hana'i a pau ke mele pule, a pela mau aku no.
Hula ka-laau. O keia hula ana, aole no he mea haa i kapaia he Olapa, aka, he poe hana wale no, a penei hoi ka hana ana. Ina he umi wahine, a he umi no hoi kane, alaila, paa pu me na laau ma ko lakou mau lima, alaila, i ka manawa e hana ai i keia hula, o ka manawa ia e hahau ni i na laau, a hana pu no me na mele mai ko lakou mau waha mai. Pela mau aku no e hana ai.
Hula pahua. O keia hula, he hula keia na ka poe kane, ina he umi a emi mai paha, a i ole ia, e oi aku ana paha, a me kekahi wahine hookahi. I ka manawa e hana ai o na kane, alaila, ku mai ka mea haa, oia hoi ka olapa imua o ka poe kane, a haa mai no i o a ia nei ; a pela mau aku no e hana ai a pau na mele.
Hula puniu. He hula mahiai ia. Penei hoi e hanai : I ke ahiahi, kukalaia na kanaka a pau e hele i ka mahiai, alaila, i ke ala ana i ke kakahiaka nui, o ka hoomaka iho la no ia o ke kumu hula i kana hana o ka hula. I ka manawa e hana'i, he mau ipu hula kekahi me ka puniu hoi i wahiia i ka ili-kala, i mea e hookakani ai. I ka manawa e hana ai a pau, alaila hele i ka mahiai, me ka lawe pu no nae, i kekahi manawa i na ipu hula i kahi e mahiai ai, a i kekahi manawa no hoi, aole e laweia na ipu hula nunui, a o ka puniu wale no i wahiia i ka ili-kala, ke lawe pu ia i kahi e mahiai ai. I ka wa e hana ai, aole mea pane leo iki, a pau ka mahiai ana, alaiia hula hou ; a pau hoi ia hula ana, pii na kanaka a pau i kuahiwi i maile, i palai, i awapuhi, i ie-ie. I ka hoi ana mai hoi, e kukuluia i pahu hae mamua, a kai lalani mai na kanaka mahope, a pela mau no e iho ai a hiki i ka hale hula, alaila, kau aku i na lau o kuahiwi iluna o ke akua hula. A no keia hula ana i kahi e mahiai ai, ua kapaia he hula mahiai.
Hula hoopahupahu. O ka hula hoopahupahu, ua pili ia i ka hakukole, a hoino aku kekahi aha hula i kekahi aha hula. O ka nui o ka poe e hana i keia hula, elua paha, aole ekolu paha. O ka hana ana nae o keia hula, ua like me ka hula kalaau, aohe mea e haa imua o ka poe e hana ana i na mele. I ka manawa e hana ai o keia hula, he hana aku me ka paanaau o na mele i kupono i na wahi hilahila o ke kanaka, a pela mau aku no a pau na mele.
Hula uli-uli. O ka hula uli-uli, he hula pili ia i ka inoa o na'lii ; a penei no hoi ka hana ana, he mau kane a me na wahine pu, me na uli-uli i hoopihaia i ka hua poniu, a i ole, me na hua aliipoe paha. I ka manawa e hana ai, aole no he mea haa imua o lakou, aka nae, o lakou no a pau he poe olapa, a he poe hoopaa no hoi, oia ka poe i noho ilalo, a hana pu me kela mau ipu i hoopiiia ia me ka hua poniu, a hua aliipoe paha, e pa-i ai i ka umauma, i ka poohiwi, a i ka uha, a pela mau aku no a hiki i ka pau ana oia hula.
Hula niaukani. O keia hula, ua pili i ka poe kolohe ma ke ano hooipoipo, a pili no hoi i na hana lealea a pau. O kela mea keia mea, ina he kane a he wahine paha, ua pau loa i ka hana i keia hula. Penei hoi ka huna ana, ina he kane a he wahine, ua lawe mai i ke kumu o ka ha-ko i mea u-ke-ke a me ka niau. I ka wa nae e hana ai, e kau ae i ka waha, a pana ae i kekahi lima i ka niau, a pa ae i ka ha-ko, a kapalili ae ka niau, a o ka manawa iho la ia e hoopuka mai ai i na huaolelo, e like me ka mea ku i ko laua makemake, a kuhikuhi na lima i o a ia nei, me ka awihi o na maka, a oni ke kikala i o a ia nei, a pela mau aku no e hana ai. Pela no hoi ka hana ana i na he mele no ke alii. Aole no hoi he wa hana ole no keia hula, hana no i ke kakahiaka, ke awakea, ke ahiahi, ke aumoe, ka noho ana a me ka hele ana, a pela wale aku no.
Hula pa-i umauma. Ua pili keia hula i ka hana ana i ke mele no na'lii. A penei no hoi e hana ai, ina he mau kane, a i ole ia he mau wahine paha ; i ka wa nae e hana ai, papai like i na umauma, a kuhikuhi like i o a ia nei, me ka hana o na waha i ke mele, aka, o keia hula nae, aole he mea haa imua o keia mau hula. Pela mau iho la no ka hana ana.
D. S. KUPAHU.
Ka Moolelo o Heneri Opukahaia.
HELU 13.
KONA MAKE ANA, &c.
Nana ae la oia i kona mau wawae, e hoomaka ana malaila ka maeele o ka make, a kahea iho la ia, " E ka make !" Haawi aku la ke Kauka i kekahi laau inu ana i hoopailua ai, a i mai la hoi oia, " Alia, alia, apopo." Mahope iho nae, ae aku la me ka olelo iho, " Malia paha, aole he la apopo koe." I ke ahiahi mamua iho o kona make ana, komo mai la o Rev. Mr. Mila e ike ia ia. Nana pono aku la o Opukahaia ia ia, a i aku la, " E pule paha oe, mamua o kou hele ana ?" Pule iho la o Mr. Mila, a hoolohe pono o Opukahaia, a pau ka pule ana, haawi aku i kona aloha me ka leo oluolu loa, a me ka maka hauoli ano e.
A maopopo ua aneane mai ka make a kokoke loa, ninau aku la o Mrs. Stone, (Pohaku wahine). " Heneri, ke manao nei oe, o kou make keia ?" Pane mai la oia, " Ae ;" alaila, i hou iho la, " Aloha au ia oe no kou lokomaikai " I hou aku la keia, " Makemake no wau e halawai pu kaua ma kela ao." Pane mai la oia, " Ke lana nei ko'u manao no kela halawai ana." Lalau hoi i kona lima, a haawi aku i kona aloha. Pela no hoi i kekahi makamaka e ae.
Lulu lima oia me kona mau hoa Hawaii, me ka olelo pakahi aku no ia lakou, " Aloha oe."
He mau minute wale no mamua o kona make ana, ninau aku la ke Kauka ia ia, " Pehea oe i keia manawa, Heneri ?" Pane mai la oia, " Oluolu loa, aohe mai, aohe eha, me he mea la ua ola." Lanakila loa ka maluhia maikai o kona helehelena. Ano maikai iki mai la, a waiho malie me ka oluolu ia mau minute. A no ka manao ole o ka poe kiai i ke kokoke loa mai o kona make, ua noho aku ka nui o lakou e hoopumehana ia lakou iho ma kapuahi, (no ka mea, o ka manawa anu loa ia o kela aina). Koe nae kekahi o kona mau hoa, e ku ana ma ka aoao o kona wahi moe. Kahea mai ana o ia la, " Ua hala o Opukahaia." Akoakoa koke lakou a puni ka moe. Ua hala io no kona uhane. O kona kino kupapau wale no koe. Pela ka make ana o Opukahaia, i ka po o ka la 17 o Feberuari 1818.
Aka, he haawina nui i ao ia mai ia kakou iloko o keia moolelo o kona ola ana, a me kona make ana. Nolaila, he mea pono ia kakou e ku a nana, i ike i na loina o keia haawina.
E oluolu mua nae paha na mea heluhelu, he haiia ke ano o kona helehelena, me kona kino kanaka e like me ka mea i hoike ia mai e na makamaka ma Amerika, ka poe i ike ia ia.
" O kona nui kino, maluna ae no ia o ka hapa nui o kanaka. Aneane eono kapuai o kona kiekie, a ua kulike no hoi ka nui puipui o kona kino a me kona kino a me kona mau lala. O kona helehelena, ua ano o-o. Ku pololei loa oia, me ka hanohano oluolu maikai o ka hele ana. O kona maka, oiai he kaumaha i kino hou, ua hele a maikai, malamalama, eleu. I ka nana aku i kona mau maka, ua ike ia he ikaika kona noonoo. Aa ke alohilohi o kona mau onohi maka. Lipilipi kona ihu, a oioi kona auwae. O Kona ili, he ili ohelohelo, a o kona lauoho he eleele kalole.
" O kona ano he oluolu, aloha, akahai, aole i wikiwiki i ka huhu, aole no hoi he hoomauhala. Aole loa no hoi i ikeia ke ano hoomauhala iloko ona.
" Nui kona aloha i kona mau hoalauna, aole no hoi oia i hoopoina i ko lakou lokomaikai ana mai ia ia.
" Ma kona noonoo, ua oi aku kona noiau i ko ka nui o kanaka ui. Pakela aku kona noonoo. He naau ike no hoi kona, a me ka huli ikaika i na mea no a pau i loaa hou mai ia ia, a i waihoia mai imua ona e hoomaopopo ai. Nolaila, kupono, a koikoi hoi kona mau manao ke hoopukaia, a ua lilo oia i alakai, a i poo no kona mau hoa. Ina oia e hooholo i kekahi mea iwaena o lakou, o ke oki no ia ; ua holo."
Ua lawa paha keia no keia wahi Helu. A ma kela Helu aku, e ike hou ai kakou i kona makaukau ma ka naauao, a me kekahi mau ano e ae paha.
(Aole i pau. )
E hai mai i na rula.
E KA NUPEPA KUOKOA E ; ALOHA OE :
Ma ka ike ana iho maloko o ko kakou mau nupepa, he mea mau ka hoolaha nui ia ana o na mea make, maloko o ke Kuokoa, a me ke Au Okoa. O ka nui nae o na make no loko ae no ia o ko kakou lahui nei, oia hoi ka Lahui Hawaii ; he kakaikahi loa kuu ike ana i ka make ana o na ano kanaka e ae e noho nei me kakou, pela ka ike a ko'u mau maka.
Ma ko'u noonoo ana a me ka hoomaopopo ana i ke kumu o ka make nui ana o keia lahui, Eia paha kekahi kumu o ka make pinepine ana o keia lahui ke ole nae au e kuhihewa.
O ka malama pono ole ia o ke kino o ke kanaka i ka wa e mai ana, ina ua loaa kekahi kanaka i ka mai wela, a o kekahi wahine paha, alaila, penei e hana ai e hele e auau i ka wai anu-anu, i ka wa kakahiaka lilo aole e puka ka la, a pela no hoi i ke ahiahi, e noho mau ana ma na wahi makani, a pela aku.
Aole nae o keia mai wale no ka mai e loaa mai ana maluna o ke kanaka. Aka, he nui wale na mai o kela ano o keia ano e ili mai ana maluna o ke kanaka.
Eia hou, ina ua loaa kekahi kanaka i ka mai anu, a o kekahi wahine paha, aiole ia o ke keiki paha ka mea i loaa i ka mai anu. He mea mau ka noho ana mawaho o ka hale i ka wa e wela mai ana ka la. O ke kumu ka e noho ai ma kahi o ka la, i mehana iho wahi a ka mea mai.
No na mea ai. I ka wa e mai ana ke kanaka, he hiki no ke hoohanai ia i na mea ai kupono ole ke ai ia i ka wa mai, oia hoi ka ia paakai, a me na mea momona, a pela wale aku no.
O ke kumu nae o ka hana ana e like me ka mea i olelo ia maluna ae nei. Eia no ia, o ka ike ole i na rula kupono e hiki ai ke malama i ke kino o ka mea mai ; o kekahi poe no ua ike i na mea kupono e hiki ke hana aku i ka mea mai, a o ka hapa nui o na kanaka e noho nei ma kuaaina aole he ike, ke hana nei no e like me ka wa kahiko.
Nolaila, ke noi aku nei au i ke Kauka e noho ana iloko o ka Halemai o ka Moi wahine, nana e hoike mai i na rula kupono e like me kona ike.
Ina ua loaa kekahi i ka mai wela, e hoike mai i na mea kupono ke ai ia, a me na mea kupono ke inu, a me na mea kupono ke auau, he wai-wela anei, he wai anu paha.
Ina ua loaa kekahi i ka mai anu, e hoike mai i na mea kupono ke ai ia, a me na mea kupono ke inu ia, a me na mea kupono ke auau, he wai wela anei, a he wai anu paha.
Ina ua loaa kekahi i ka mai nalulu, e hoike mai i ka mea kupono ke ai ia, a me na mea kupono ole ke ai ia, e hoike mai hoi i kahi kupono ke noho, ma kahi anu anei, ma kahi wela paha.
Ina ua loaa kekahi kanaka i ka mai naenae, e hoike mai i na mea kupono ana e ai ai, a me na mea ana e inu ai, a me na mea ana e auau ai, he wai anu anei, he wai wela paha ? E hoike mai hoi i kahi kupono ke noho, ma kahi makani anei, ma kahi poho paha ? He nui aku no paha na mai i koe, aka, na ke Kauka paha e hai mai ia mau mai a me ka wehewehe mai i na rula kupono no ia mau mai, i hiki ke malama ia ke kino o ka mea mai.
He mau manao nui no keia ke hoomaopopo ia nae, he mea no e pono ai ka lehulehu. No ka mea, owau no kekahi e noho nei me ka naaupo, aole i ike i ka aulama ana i ko'u kino ke loohia ia e ka mai.
Ke waiho aku nei au imua ou e ka luna hooponopono o ke Kuokoa. Me ka mahalo.
P. PAPA.
Kealakomo, Puna, Hawaii, Sept. 28, 1865