Ka Nupepa Kuokoa, Volume IV, Number 52, 30 December 1865 — Page 3

Page PDF (1.50 MB)

KA NUPEPA KUOKOA.

poleona a me ke alii Imperiala i Kamperina. Ua kauoha ae ka Emapera e hooemi hou na koa, i umi kumamawalu haneri alii, a i kanaka kumamalua mau koa. E ukuia na koa i kanalima dala Farani. Ua hiki ae ma Farani hookahi tausani koa mai Italia mai.

HE NUPEPA NA KA MAKAPO I HOOPONOPONO.

                    I kekahi mau la o keia makahiki, ua pai ia kekahi nupepa ma ka Wailele o Niagara. O ka Lunahooponopono o ua nupepa la, he kanaka makapo ; o ka poe nana e hoonoho na hua kepau, he poe kuli a me ka poe a-a. O ka mea pai, ua hooponoponoia e ka makapo ; o ka nupepa, ua wahi ia e ka poe hiki ole ke kamailio mai.

                    KA NUI O NA KAUA. O ka nui o na kaua ma ke aupuni Amerika, he elua haneri kanalima kumamalua. Mailoko mai o keia, ua ike ia, ua imi aku o Vireginia i ke koko o na kaua he kanawalu kumamaiwa. O Tenesi, he kanakolu kumamahiku kaua ana ma ia mokuaina. O Misouri, he kanakolu kumamalima kaua ana. O Geogira, he umikumamalua kaua ana ma ia wahi. Ma Carolina, he umi kaua ana ; ma Carolina Akau, he umikumamakahi kaua ana ; ma Alebama, he ehiku kaua ana. Ma Ferolida, he elima kaua ana. Ma Kenetukeka, he umikumamaha kaua ana. Ma Inediana, a me Mekiko Hou, he hookahi kaua ana o ka mea hookahi.

               KE ULU MAI NEI KE KAUA MA JAMAIKA. Ua hiki ae ka lohe ma Nu Ioka, ua oiaio ka ke *a ana mai o na negero e kue i ka poe keokeo. He nui loa na ohumu a me na hakaka i hoalaia e na negero. O kekahi Luna Aupuni, ua hoeha koke ia malaila ; ua moku aku kekahi mau manamanalima a me kona mau manamana wawae nui. Ua hiki wawe loa ae ka nenei ma na wahi a pau no keia mea.

               KA NUI O NA KANAKA MA BOSETONA A ME NA WAHI PILI KOKE MAI. Ua haiia mai e kekahi kanaka, o ka nui o na kanaka ma ke kulanakauhale o Bosetona a me na wahi e pili koke mai ana, he eha haneri tausani. O ka nui o na dala i loaa ma ia mau wahi, he $500,000,000. O ka nui o na dala i loaa noloko mai o ke kulanakauhale wale iho no, he $379,000,000. Nolaila o keia mau dala i hoikeia ae la, he hoailona no ia e hai mai ana, o Bosetona ke kulanakauhale dala iloko o keia au holookoa.

HE KAAO
— NO —
PIKOIAKAALALA !
Ke Keiki akamai i ka Pana.
HELU 3.

                    " Mai kela iwi a keia iwi o ka loi kalo, pela hoi ka moo uala okoa, a me ka hoomake an elima puaa, a he umi moa ; nolaila, manao mai nei kahi keiki he hana hoohuakaeo ka ! ka kaua." Alaila, olelo mai la o Pawaa i kana wahine.
               " Ka inoa no hoi i mahi kaua i ka kaua kalo, uala, a hanai hoi kaua i ka kaua puaa, moa, a hoohiki hoi kaua na ko kaua pokii, aole paha ia he hoohuakaeo." A lohe ae la o Kauiomanoa i ka kana kane olelo, alaila, huai ae la no o Pawaa i ka umu o ka ai, puaa, moa ; a na Pawaa no i kui ke kalo a piha ka umeke, alaila, hoihoi ia'ku la a ko Pikoiakaalala ma wahi hale. A ahiahi ae la, ua pau ae la hoi ka hana a Pawaa ; hele aku la ia i kona mua, kahi mau hoi e paina ai na kane oia wa.
               A ia Pawaa e paina ana, hele hou mai la la ua wahi keiki nei io Kauiomanoa la. Ninau mai la ke kaikuahine, " Heaha kau ?" " I hele mai nei au e ako mai oe i kuu poo," oiai o ka lauoho no mai ka hanau ana mai, a ua loloa loa, ua hele a uhi i kona mau kihipoohiwi. Alaila, olelo mai la ke kaikuahine, " Aole paha auanei he niho mano e ako ai kaua i ko poo ?" Nana ae la o Pikoiakaalala a ike ae la i kekahi mau niho e kau mai ana ma ka paia o ka hale,   a pane ae la ia, " A no wai la hoi kela mau niho e kau mai la ?" Pane aku ke kaikuahine,
               " No ke alii no Pawaa, no ka mea, he alii *****, a nona wale no keia mau niho."
               " A nana wale no, aole la hoi e pono i kou poo ; kai noa no hoi o ka olua mau mea kapu, a pau no'u hoi ia ?" wahi a Pikoiakaalala. " Oi hoi ha moe mai," wahi a Kauiomanoa ; o ka moe aku la no ia o Pikoiakaalala, a kau iho la ke kaikuahine i kekahi niho, a hoomaka iho la e upa, o ka hai ae la no ia o ka auhau, no ka mea, he auhau wale no ke kumu o na niho a eha ; a kau hoa no i ka lua o ka niho, a hai hou no, a pela no ke kolu, akolu no i ka hai, a pau loa na niho eha, a eha no ka hai ; aohe he wahi mea a mohole iki iho o ka lauoho o Pikoiakaalala. A no ka pau ana o na niho o ke alii koa (Pawaa,) he mea e ka makau o Kauiomanoa, a olelo ino iho la ia i kona pokii, " hokai no hoi ka lauoho o ke ino, o ka pau loa ae nei ka ia o ka niho o kuu kane i ka hai, i lauoho no hoi paha no ke kanaka, aole no la e hai ka niho, aole, o ka lauoho hoi o ke akua." Alua olelo ana o ke kaikuahine na olelo hoino. O ke ala ae la no ia o Pikoiakaalala, a hoi aku la i ko laua hale me Alala kona makuakane ; a ninau mai la o Alala, " I hea aku la oe ?" " I o aku nei hoi au ia Kauiomanoa ; i hele aku nei hoi au e ako i kua poo." " A ua ako ia mai la nae paha ?" " Aole," wahi a Pikoiakaalala. " Ua ako ia mai nei no nae, aole i moku iki kuu lauoho, ua pau loa na niho o ke kane ana i ka hahai, a no ka haihai ana, nolaila, i ia mai nei au he ino, a he akua ka !" A ia Pikoiakaalala ma e kamailio ana no na mea i hoi keia'e la maluna. Alaila, pane mai la na kaikuahine Iole ona penei : " Hoino wale la iho la hoi kou poo, e ole la hoi ko kanakapoo."
               A o ka moe aku la no ia o Pikoiakaalala ma ka paia o ka hale, a o ka lele maila noia o na kaikuahine Iole ona e nali i ke poo, i kana nali i kana nali, a o ku pau ae la noia o kona poo, me ka papaiole a manumanu hoi iluna kahi oho, a i lalo kahi oho. A oia no hoi kela olelo ana, mailaila a hiki i keia wa, penei : " Nana'ku oe i ke poo o mea, papaiole ka ako ana." Mai ko Pikoiakaalala mai kela olelo ana a hiki wale ia kakou nei. Ma keia wahi hoi, e kapae iki ae kakou i ko Pikoiakaalala aoao ana i kona makuakane, a me ka na kaikuahine Iole hana ana i kona poo. A e olelo ae hoi kakou no Pawaa me Kauiomanoa. A pau ka paina ana a Pawaa, hoi mai la ia i ka hale, a ia Pawaa i hiki mai ai, aia hoi, e noho ana kana kauwa wahine me ka makau ia Pawaa, no ka hai ana o na niho mano i ke poo o kona kaikunane. Ninau mai la o Pawaa, " Owai kou hoa i hamumumu ae nei ?" " O kahi keiki no, i hele mai nei e ako i ke poo ona, a ua pau loa ou niho i ka haihai, a no ka pau ana i ka haihai, nolaila, ua makau loa au ia oe," wahi a Kauiomanoa. Alaila, pane mai la o Pawaa, " He mea hai ole ka niho o ka mano, o ke kumu no ke hai, o ka auhau, a he hiki no i ka hoa hou iho, heaha auanei ka hewa ina e hai ia niho i ke poo o ko kaua pokii ?" A maanei hoi e ike ae ai kakou i ke kanalua ole o ko Pawaa manao, aole he kaniuhu, aole no hoi he huhu iki i kona wahi kaikoeke.
               A kakahiaka ae la, oia ka lae iho nui aku ai o ko Manoa i kai, e hoike ia lakou iho e like me ka mea mau.
               A ala ae la o Pikoiakaalala i ka wa kakahiaka nui, hele aku la ia io Kauiomanoa la, a ninau hou mai la no o Kauiomanoa, " Heaha kau ?" Olelo aku la o Pikoiakaalala, " Aohe paha he lehua o keia uka la ?" Hai mai la ke kaikuahine, " He mea nui wale ia o ka lehua mauka aku nei." Alaila, olelo mai la o Pikoiakaalala, " E aho hoi ha e hele ae oe e kui lei," a ae mai la no ke kaikuahine. A o ka hele aku la no ia o Kauiomanoa mai ko lakou wahi aku ; no ka mea hoi, o ko lakou wahi noho, o Kahaloa, aia no kela wahi mauka o Manoa, a malaila aku ka pii ana a hiki ma kela wahi i oleloia o Kahoiwai, malaila no kahi i kui lehua ai o Kauiomanoa a lawa na lei lehua eha, no ka ai elua lei, no ke poo elua lei. A o ka hoi mai la no ia ; a makaukau ka iho i kai, alaila, o ua mea ai a pau i hoomakaukau ia i o nana ai-puupuu i auamo, iho na aialo a pau o Pawaa, aohe mea noho, a iho mai na wahi a pau o uka o Manoa ; eia hoi na inoa o na aina ma Manoa. Iho ko Kaapakahua poe, na kane me na wahine. O ko Kawailele poe, o ko Puahia poe, ko Kanewai poe, ko Kamoiliili poe, ko Kamoku poe.
               A i na kane e iho ana i kai, a o Pikoiakaalala pu no hoi kekahi e iho ana, oiai a kahi no a ikeia'e la kona ano, a me kona helehelena e na keikikane me na kaikamahine o ka ua kuahine oia uka. A ia lakou i ike ai ia Pikoiakaalala, ua hai e na pua o ke kula, a ua ume holookoa ia aku na puuwai o ka aoao palupalu ; a ua haawi mai hoi lakou i ko lakou aloha oiaio ma ka honi hemolele ana me ka mahalo ia Pikoiakaalala.
               A ia lakou e iho ana, ua hoanoe loa ia ae la ko Pikoiakaalala ano, a hoohewahewa mai la no hoi kona makuakane ia ia, oia no hoi o Alala ; a pela no hoi kona kaikuahine o Kauiomanoa, a pela no hoi o Pawaa. Ua pau loa lakou i ka hoohewahewa, no ke ano e loa ana o kona helehelena.
               A hiki ka huakai i kai o Waikiki, a ma Ulukou hoi e hoike ia ai na kanaka. O Pikoiakaalala hoi, hele loa aku la no ia a kahi e pae mai ai ka heenalu ; oiai no hoi, aia no ke alii wahine o Kahamaluihi iwaho o ke kulana-nalu, me kona kahu wahine no.
               Ia Pikoiakaalala nae e ku ana ma kahi e pae mai ai o ke alii wahine, o ka pae mai la no ia o Kahamaluihi, a pae pono mai la no ma kahi a ia nei e ku ana. Nonoi aku la nae o Pikoiakaalala i ka papa. Pane mai la nae ke alii wahine, " He papa kapu nae hoi ko'u, aohe e hiki i kekahi mea ke hee i ko'u papa, ina e hee kekahi, o ka make no ka hope." A ia laua no e olelo ana, pae mai la no hoi ke kahu wahine, a haawi ae la ke'lii wahine, Ei ae hoi ha kou papa. Ua pono ia mea i ko Pikoiakaalala manao, a o kona lalau aku la no ia i ka papa o ua kahu wahine nei, ka mea hoi nana i kukulu pakahi i na kanaka a pau o Oahu ; aole nae i ike'e ua kahu wahine nei i ke ano o ke keiki nona keia Kaao. I ka loaa ana mai nae o ka papa ia Pikoiakaalala, koi nei au aku la no ia a hiki i k, kulana heenalu a kanaka e lana ana ; oia no hoi kela nalu o Kapuni. Ma kekahi aoao nae o ua nalu nei, he kapu io ke alii wahine no Kahamaluihi.
               Ia ia nei nae e lana ana, a ua ike ia mai la hoi ko ia nei ano malihini, nolaila, olelo mai la kamaaina, Mai au oe ma kela aoao la he kapu no ke alii wahine no Kahamaluihi. Lohe aku'la kela no ia huaolelo, aka nana aku la nae o Pikoiakaalala, o ka lana hookahi mai o Kahamaluihi, ko ia nei au aku la no ia.
               Ia ia nei nae hoi e au ana, hooholike mai la kamaaina ma ka olelo mai, Mai au aku oe malaila, o laahia aku oe i ka nalu kapu o ke alii. A no ko ia nei papaia ana mai, nolaila, pane aku la keia me ka i aku, " Malia paha o ka aoao kapu wale no ia o ke kulana nalu, aohe hoi he kapu aku o kela aoao ?" Aohe kapu aku oia aoao, wahi a ka poe kamaaina. Aohe no nae he nalu aku oia wahi.
               A no keia olelo ana mai a ka poe kamaaina aohe kapu, o ko ia nei au aku la no ia. Ma ia manawa nae, aohe no he wahi mea a kupu iki mai o ka nalu. Ia Pikoiakaalala no nae e au ana me kona mau papahi leilehua, a hoomohala iho la i kona mau papalina, ka puapua nono ula wale, i ka ua mea hoi o ka nani ano e. A na ia nani hoi i koi aku ia Kahamaluihi e au pu aku mahope o ke keiki. O Pikoiakaalala no nae mamua kahi i au ai, a kauaheahe wale aku la no hoi ke'lii wahine mahope kahi iukali aku ai. Au aku la nae o Pikoiakaalala a kupono mawaho ae o Kapua, maanei iki iho o Kaluaahole. Au aku la no hoi ke'lii wahine, a lana like ana laua nei i kahi hookahi.
               Ia laua nei nae hoi e lana ana, pane aku la o Pikoiakaalala i ke alii wahine, " He nalu kapu nae hoi kou a'u i lohe mai nei, a no ke aha la hoi kou mea i au pu mai nei me a'u ?" No ka nalu ole no hoi paha o kela mau kulana nalu, nolaila no hoi ko'u mea i ukali mai nei mahope ou ; wahi a ke alii wahine.
               A ia laua no hoi e lana ana ma ia kulana heenalu, oiai no hoi aohe no i maa ka heenalu ia oia wahi, aole no hoi i loaa ka inoa oia nalu ma ia wahi, a na laua nae i kapa iho i ka inoa oia nalu, a ua kaulana loa mai no ia a hiki mai nei i keia wa.
               Ike mai la o Kahamaluihi i ko ia nei mau leilehua, a o ke noi mai la no ia penei, " E aho hoi no'u kekahi lei ou." Pane aku la hoi o Pikoiakaalala, " He lei noa ko'u, pehea la hoi auanei e pono ai ia oe, no ka mea hoi, he kapu hoi oe he alii ?" Olelo mai la no hoi o Kahamaluihi, Ina no hai ka lei a kau i ko'u poo, ua lilo ia lei ia'u, aole e pono ke lei hou ia mai e ka noa ; a pela no hoi ka papa, ina no hai ka papa, a heeia hoi e a'u, ua laa ia papa no'u."
               Maopopo iho la ia Pikoiakaalala na huaolelo a ke alii wahine, pane aku la oia penei, O ka lei hea auanei kou "? Pane mai hoi ke alii wahine, O na lei ma ke poo, O ka wehe ae la no ia o Pikoiakaalala i na lei ma ke poo, a hoolei aku la ma ka a-i o ke alii wahine. Ia Pikoiakaala nae e nakii ana i ka lei ma ka a-i o ua alii wahine nei, lele iho la no ia o ua alii nei, a honi iho la i na lei lehua. A no ka wehe ana o Pikoiakaalala i kona leilehua a hoolei aku ia Kahamaluihi, ua kapaia ia nalu o Kalehuawehe ; a o ka inoa ia oia nalu a hiki i keia wa.
               Ma ia wa hoi a laua e lana ana, kupu kakala aku la ua mea he nalu, aohe o laua ike ia mai e uka, no ke alai ia mai e ka nalu, a no ka loihi loa no hoi kekahi o ua kulana heenalu nei, aneane poliuliu i ka ike aku, a na ia poliuliu i hoohuikau i na papa o laua nei, pili ai na laau o mua, ala mai ai na eu o kai.
               Akakuu iki mai la ka hai a ka nalu, alaila, pane aku o Pikoiakaalala i ke alii wahine, Ina e ku mai ka nalu mua, o kou nalu ia, pae e oe. Ku mai la no hoi ka nalu mua, kena aku la o Pikoiakaalala i ke alii wahine e pae, aole nae kela i pae. Ku mai la hoi ka lua o ka nalu, o ka hoomo iho la no ia o Pikoiakaalala, a o ka ili pu iho la no ia me Kahamaluihi ma ia nalu hookahi.
               Ma keia pae pu ana nae o laua, ua kupu ae ka manao iloko o Pikoiakaalala, no kona hoahewa wale ia. Aka nae, ia ko Kahamaluihi nae e holo ana i ka lala, hoi ae la hoi o Pikoiakalala i ka muku, a i ike hoi o Kahamaluihi, aia no o Pikoiakaalala i ka muku, alaila, hoi mai la hoi o Kahamaluihi i ka muku, a lilo aku la hoi o Pikoiakaalala i ka lala kahi i halalau ai.
               A pela no ko laua pae ana a ike mai la na'lii, a me na kanaka a pau o uka, a hooho like nui mai la. " A laa e ! a laa e !! a laa kela keiki i ka nalu o ke 'lii." A lohe ae la o Kakuihewa, a nana aku la, aia hoi elua mea e pae mai ana i ka nalu, o ke 'lii wahine kapu ana, a o keia keiki hoi, ia wa olelo aku la o Kakuihewa. Auhea oukou e na Ilamuku, e kali aku oukou a pae mai, alaila, e pepehi aku iaia, aole e ola ua laa mai la i kuu wahine kapu. O ka pae mai la no hoi ia o ia nei, a o ka hopu ia iho la no ia a paa na lima, a wehe ia ae la ka malo, a ike ia kahi huna, a hoana ia iho la e uhau me ka laau e make, alaila, pane ae la ke keiki, alia au e make a olelo au me ke 'lii. A o ke alakai ia aku la no hoi ia a ke alo o ke 'lii, a ninau mai la ke 'lii Kakuiheawa, heaha ka mea i hoola ia mai nei o nei aihue ? alaila, olelo aku la hoi na kanaka nana i hopu, no ka olelo ana mai nei aia ka a kamailio pu me oe. " Heaha auanei kana olelo e olelo mai ai ia'u, no ka mea, ua laa ia i ka nalu o ke 'lii wahine. Alaila, pane aku la no hoi o Pikoiakaalala. Ia'u i hiki mai nei i kai nei, a ku iho au ma kahi e pae mai ai o ka poe heenalu, aole nae au i ike i ke ano o ke 'lii wahine, a nonoi ana au i ka papa, ia'u hoi ko kakou papa, alaila pane mai la no hoi ke 'lii wahine, he papa kapu kona, a lohe ae la au he papa kapu kona, alaila, pae hou mai la no he wahine no, a i kona pae ana mai me kona papa, alaila, kena ae la ke 'lii wahine ia'u, eia kou papa e heenalu ai oe, a o ko'u lalau aku la no hoi ia a au ana, a ia'u e au ana, alawa ae la au mahope, e au mai ana no ko 'lii wahine mahope o'u, a no ka nalu ole o ke kulana nalu a na kamaaina e lana mai ana, alaila imi hele aku la au i nalu no'u, a ia'u no e imi hele ana i ka nalu. Alaila, au mai la no ke 'lii wahine mahope o'u. Eia hoi, i ka wa no o maua i pae mai nei, elua no o maua nalu i pae mai nei, a ia'u i alawa aku ai aia ke 'lii i ka lala, a pae no hoi au i ka muku, a hoi mai ke 'lii i ko'u nalu i ka hua, alaila holo hoi au i ka lala. Nolaila, elua o maua nalu i pae mai nei. A ia Pikoiakaalala no e kamailio ana, hiki ana ke kahu o ke 'lii wahine, a ike mai la i kana hoailona i ike ai mamua, he Ila ma ka aoao akau, alaila, olelo ae la oia ia Kakuihewa. O ke keiki no keia e huli ia nei, o ke keiki akamai no keia i ka pana.
               Alaila, olelo mai la o Kakuihewa, no ko ike paha i ke kanaka maikai nolaila oe i olelo ae la, a loaa ke kane a ko hanai. Alaila, paakiki mai la ke kahu wahine. O ke keiki no keia e huli ia nei.
               A no ka paakiki loa o ke kahu wahine, alaila, olelo ae la o Kakuihewa, e aho hoi ha e pana ae laua nei me Mainele, a o ka hoomaka iho la no hoi ia o ka pana, iloko o ka hale o Kakuihewa i pana ai, oia kela hale o Helumoa ka inoa. Ua halii ia oloko o ka hale a paa i ka moena, a hoonoho ia na kanaka, o na'lii a pau, a piha ka hale o ke 'lii, a mawaena konu kahi kaawale. A malaila no hoi o Pikoiakaalala i noho ai me Mainele. A makaukau ka pana a laua nei, alaila, " Ninau aku la o Pikoiakaalala," Ehia ka ai eo ? Alaila olelo mai la o Kakuihewa, he umi kuu maaamana lima, e like no me ka ai i pana mua ia ai i Kulaokahua.
               " A ia wai mua ? wahi a Pikoiakaalala, ia oe ka mua wahi a Mainele, hoole aku la o Pikoiakaalala, a i aku ia oe no ka mua i ke kamaaina, a i eo mai no ia oe, he nani eo ana no ia aole au i pana aku, a maopopo lea ae la i ke kahu wahine, e like nae kana mea i ike ai mamua, alaila, olelo mai la ua kahu wahine nei, oia no keia, o ua keiki akamai la no keia, ina ua nei i hoeu mai kekahi kanaka ine ka puolo la a ku ma ke kua, oia no ilaila ka pua a me ke kikoo. A ike mai la ka makuakane o Pikoiakaalala, oia hoi o Alala i kana keiki, oiai ua hoohewahewa lakou, ua kuhi no he kanaka e loa keia e olelo ia nei, a i ka ike ana mai o kona makuakane, helelei mai la kona waimaka, a hele ae la ma ke kua o kana keiki, me ka puolo kapa no o laua. A ike mai la ke kahu wahine i ua kanaka la, i ka hele ana ae ma ke kua o ke keiki, a hooho hou ae la ia imua o ke 'lii Kakuihewa. Aia ua kikoo la a me ka pua a ke keiki ke lawe ia mai la e ke kanaka la. A ike ae la no hoi o Pikoiakaalala ua makau oia, alaila, kahea aku la oia ia Mainele. E Mainele e, pana ia aku hoi ka iole i ka paepae o ka hale, a o ka pana aku la no ia, a ku no ka iole, he umikumalua, a hookahi i koe eo ka puni a laua, alaila kena hou aku la no o Pikoiakaalala e pana hou, no ka mea, o ka umiumi wale no o ka iole kai hoike ia, aohe ke kino, hoole mai o Mainele aohe iole i koe.
               A pau ka Mainele pana ana, alaila, kena mai la o Kakuihewa ia Pikoiakaalala e pana, a hai pu mai la no hoi i kona manao penei : " Aole ka Iole i ka pohaku, aole i ka hale, aia no a he Iole maoli e like me ka Mainele ka Iole maoli." A ma ia wa, hoomaka koke iho la ke keiki e lalau i kana kikoo mai ka puolo kapa mai, a huki ae la ia, a panee ana i ka loa ke kikoo, ku i kela aoao o ka hale i keia aoao o ka hale, a lalau ae la kona lima ma ke kua a nonoi ae la, " Ho mai ka pua," haawi mai la ka makuakane i ka huhui, a o ke kau aku la no ia o Pikoiakaalala ma kekahi kala o ka hale, no ka mea, ua ike aku la ia i kekahi elemakule haumakaiole e noho ana ma ia wahi. O ka heluhelu aku la no ia me ke mele penei :
               " Aia la aia la o Pikoiakaalala, O Alala no ka makuakane, O Koukou no ka makuahine, Hanau o Kikoookalani,
               O Kikoookahonua, O Kikoookamauna, O Kikoookamoana, O Kikoookapo, O Kikoookeao, O Kapunanui, O Kapunaiki, O Ke-i, O Ke hamau, Hamau, aia ka ua Iole." O ke kuu aku la no ia ku ana ka elemakule, helu akahi ana o Pikoiakaalala, " akai a'u Iole," hoole mai la o Kakuihewa, " Aole paha ia he Iole, he kanaka ia," alaila, olelo aku la o Pikoiakaalala, " He Iole ia, o ke kanaka i noho i kou hale a elemakule, a kanikoo, a kolopupu, a haumakaiole, he Iole ia, he elemakule haumakamaiole." A nana hou ae la no ke keiki a o ka noho mai o ka luahine ma kahi kala o ua hale nei, a hookau aku la no keia i ka maka o kana pua ilaila, a heluhelu hou aku la no keia ma ke mele e like no me keia mau lalani mele maluna'e ; a o ka hookuu aku la no ia i kana pua, oia kolili no a ku ana ka luahine, helu alua ana o Pikoiakaalala, "alua a'u Iole," hoole hou mai no o Kakuihewa, " Aole ia he Iole, he luahine ia," alaila, olelo aku la no o Pikoiakaalala, " He Iole ia, o ka wahine i noho i ko hale a kanikoo, a kolopupu, a haumakaiole, nolaila, he Iole ia, he luahine haumakaiole, alua a'u Iole." Alaila, hookau hou no keia i ka maka o ka pua ana ia
               Kakuihewa, a o ka pana aku la no ia a ku ana ka opea o ke alii, ekeeke ana o Kakuihewa i ka eha, a olelo aku ia, " Aohe paha au he Iole i pana mai ai oe ia'u," alaila, olelo aku la o Pikoiakaalala, " He Iole ia, penei i lilo ai i Iole, nana ae oe i ka hale o Kakuihewa, liilii ka laho o ka Iole, he Iole
hoi paha ia, akolu a'u Iole."
(Aole i pau.)

MARE.

PEMIDY — KAHANA ma Honolulu, Dec. 13, ua mareia e Rev.. H. H. Pareka o Pemidy k. me Kahana w. No Honolulu laua.
KAMEHEU — NAPUA ma Honolulu, Dec. 15, ua mareia e Rev. H. H. Pareka o Kameheu k. me Napua w. No Honolulu laua.
KAKAI — HELELA ma Honolulu, Dec. 25, ua mareia e Rev. H. H. Pareka o John Kakai k. me Helela w. No Honolulu laua.
KAPAHI —KAAIPULU ma Honolulu, Dec. 27, ua mareia e Rev. H. H. Pareka o Kapahi k me Kaaipulu w. No Waikiki-waena
laua.
HUA — NAHEA ma Honolulu, Dec. 27, ua mareia e Rev. H. H. Pareka o Hua k. me Nahea w. No Kakaako, Honolulu laua.
LILOA — HANA ma Kaneohe, Oahu, Dec. 15, ua mareia e Rev. B. W. Pareka o Liloa k. me Hana w. No Kipahulu, Maui laua.
HALL — VAN CLEVE ma Honolulu, Dec. 20, ua mareia e Rev. E. Cowin o William W. Hall Esq., me Elisabeka Van Cleve, ke kaikamahine hookahi a Gen. H. P. Cleve o Minesota.
KULANA — HOOLONOKOA ma Halehaku, Maui, Dec. 6, ua mareia e Rev. Green o Kulani me Hoolonokoa. No Halehaku laua.

HANAU.

Dec. 9, ma Kamanuwai, Honolulu, Oahu, hanau o Kaihookalani Helene Kauhema (w.) na Peter P. Kauhema me Kananimauloa.
Dec. 6. ma Kikihale, Honolulu, hanau o Kahihikuokalani k. na Keliiwaaole me Paele.
Dec. 4. ma Kuholilea, Lahaina, Maui, hanau o Kina w. na D. Kuhua me Wahine.
Dec. 22. ma Kunawai, Honolulu, hanau o Kaiahua w. na Kaaukai me Mainahu.

MAKE.

Dec. 10, ma Ohuauli, Kailua, Oahu, make o Paahao w.
Dec. 25, ma Kamoiliili, Waikiki, make o Kumuhonua w.
Dec. 2, ma Kauaula, Lahaina, make o Kawahineai w.
Dec. 5, ma Kauaula, Lahaina, make o Keanu k.
Dec. 6, ma ia wahi no make o Kaohimounu k.
  Dec. 17, ma Pakala, Lahaina, make o Hua w.
Dec. 20, ma Halealoha, Lahaina, make o Pau w.
Oct. 7. ma Maunalani, Lahaina, make o John Napeha k.
Dec. 14, ma Kuhua, Lahaina, make o Kahinemoeloa w.
Oct. 31, ma Halehaku, Maui, make o Kalimahuli k.
Dec. 9, malaila no make o Kalili w.
Dec. 21, ma Kalihi, make o Opu k.
Dec. 20, ma Kapauhi, make o Nohopua k.

OLELO HOOLAHA.

                    E IKE AUANEI NA KANAKA, OWAU O ka mea nona ka inoa malalo nei, ke kahea nei au ina kanaka a pau e makemake ana ma ka hana Ku makahiki ma Hilo i Paukaa, Hawaii. A e lana no au ia oukou ma ka hale o J. Kahai, ma ke Alanui Maunakea. A o ka uku mahina a mau malama paha, e pono no ke ninau ia'u no ia mea, a me ka nui o na dala e ohi ai mamua. mai ke $40 00 aku.
JIMO K. MAUHONUA. Kikihale, Honolulu, Dec. 20, 1865. 213-1t*

OLELO HOOLAHA.
EIA NA LIO MA KA PA AUPUNI

                    Ma Kaelepulu, he mau holoholona helehewa, ke ano malalo nei. 1 lio kane lokia hao ano e, 1 Lio kane ulaula hao ano e, 1 Lio kane ulaula hao SK, 1 Lio wahine puakea, hao hapala, 1 Lio wahine ahinahina hao ano e, 1 Lio wahine hulupala hao K-I. E ike koke mai oukou o hala na la 15 nele oukou, kudala ia i ka la 8 o Ianuari, 1866. JOHN PALE, Luna Pa Aupuni. Kailua, Koolaupoko. Dec. 25, 1865. 213-1t*

Ua Nalowale !

                    MA KA POALUA IHO NEI, DEC. 26, UA nalowale he kaikamahine uuku nona na makahiki 6. O ka inoa o ua kaikamahine la o Kamauoha, a o kekahi inoa o Kekuauli. Nolaila, ina e loaa keia kaikamahine, e hoihoi ae ma Kikihale, a e loaa no ka makana. O ke ano, he wahi kaikamahine ehuehu. NEAU. Kikihale, Honolulu. Dec. 28, 1865. 213-it*

OLELO HOOLAHA.

                    E IKE AUANEI NA KANAKA A PAU KE nana mai. Owau o ka mea nona ka inoa malalo iho, ke hoolilo aku nei au ia W. E. Pii, i mea nana o ohi i ka aie o kuu waiwai i kuai ia iho nei ma ka Halekuai o Kulailua ma Kaneohe, Koolaupoko. Nolaila, ke kahea nei au i ka poe a pau i aie i kekahi waiwai oia Halekuai i ka wa e kuai ana o AKI (PAKE) malaila, e haawi oukou i kuu Hope i oleloia ma keia Olelo Hoolaha, a nana no e haawi i na Bila hookaa i ka poe i pau loa, a mai haawi oukou i kekahi mea e ae, o pilikia auanei oukou. AKAI PAKE. Honolulu, Dec. 18, 1865. 212-4t*

Olelo Hoolaha
— I KA —
Poe ku i ka Auhau !
— O KA —
Apana o Kona, Honolulu, Oahu :

                    KE HAIIA'KU NEI IA OUKOU KE KAuoha a ke Kuhina Waiwai. O na mea a pau i ku i ka Auhau e noho ana ma keia Apana i hookaa ole mai i ko lakou Auhau ma ka la 6 o Ianuari 1866 ; a i ole ia, mamua'ku paha, alaila, e hoopiiia no e like me ke Kanawai.
               E nana mai :— E wehe ia ana ke Keena o ka Luna Auhau no ka ohi ana i na Auhau o na kanaka, i kela la keia la a hiwi i ka la 6 Ianuari, 1866.
GEO. H. LUCE.
Luna Auhau o ka Apana o Honolulu.
Honolulu, Dec. 23, 1865. 213-3t

Hale Kuai Hou !
UA WEHE AE NEI AU HE
Hale Kuai Hou !

                    Ma Keopuka, Kona Hema, Hawaii, a, aia malaila e loaa'i na lole o na ano nu hou a pau, kupono no na kane, na wahine, a me na keiki, no ke kumukuai makepono loa.
               O ka poe a pau e makemake ana e kuai i ka lakou Kofe, e lawe mai me a'u e kuai ai. I loaa ke kumukuai nui makepono ma ke Dala maoli, a ma ka lole paha. E hele mai e ike maka e na makamaka.
LIKI. (R. B. NEVILLE)
Keopuka, Kona Hema, Hawaii, Nov. 23, 1865 208-3m

OIHANA PULUPULU !
— O —
HAWAII NEI !

                    E LIKE ME KO'U MAU MANAO I hoopuka ia mamua ae nei, e kuai no au i ka Pulupulu maikai o ka HELU 1, A ME KA HELU 2, i lawe ia mai i o'u nei.
               Ua emi mai ke kumukuai o ka Pulupulu ma na aina e, no ka pau ana o ke kaua ma Amerika, a nolaila hoi ke kumu e emi nei maanei. I keia wa, e haawi no au i ke kumukuai no ka paona hookahi.

EONO KENETA.

                    Ina he ma-u, a he lepo, aole paha e oi mamua o 5, a me 5 1/2 keneta no ka paona. Aka, ina he loloa, a he maemae loa, mai ka 6 1/2 paha a hiki i ka 7 keneta o ka paona.
                    No ka Helu 2 — He 3 keneta no ka paona, a ina he maikai, a he maemae, he 3 1/2 keneta no ka paona.
                    Mai kanalua oukou e o'u mau hoa'loha, aka, e hoomau i ka mahi ana a me ke kanu ana i ka Pulupulu, oiai ua oi aku ko oukou pomaikai me ka nui ole o ka luhi, mamua o ke kanu ana i ke ko a me ka uala. Ina e kanu pono oukou i ka oukou mau Pulupulu, alaila, e loaa no i kela a me keia, no ka wa hookahi, i paa pono i ka Pulupulu Helu 1, he $50.00, a ina he umi eka, he $500.00 no ka makahiki hookahi.
Iloko ae nei o ka malama o Dekemaba, e loaa mai ana ia'u mai Kaletona mai, kekahi mau HUA PULUPULU SI AILANA HOU.
                    Mai Karetona Hema mai, i hoouluia'i na Pulupulu, e loaa no ia lakou na hua Pulupulu iloko o keia mahina ae.
               Mai hoopoina oukou iloko o ka malama'e nei o Ianuari e hiki mai ana, no ka mea, e haawi ana au i na Makana a'u i manao ai e haawi i ka mea nui loa o ka Pulupulu, iloko o keia makahiki1865 — ewalu makana ka nui — mai ke $.50 a i ke $5 pakahi. No ka makahiki hookahi 1866 e hiki mai ana, ua manao au, e haawi aku i na makana i oi ae. Nolaila, mai kanalua, a mai hoopoina hoi oukou, o ka mea hooikaika, oia ka mea e lilo ai ka makana. Me ke aloha.
H. M. WINI.
Mea kuai Pulupulu, ma ka Hale Leta
Honolulu. Nov. 16, 1865. 208-7t

E. C. McCANDLESS. CAPT. J. PATY.
MAKANELA MA !
(McCANDLESS & Co.)

                    Ma ke kihi alanui Papu me alanui Alii. KE KAHEA IA AKU NEI NA Kanaka Kamaaina o Honolulu ame ko na Mokupuni e ae. Eia ka mea a oukou i ono ai, oia hoi Ke Kamano Io Ula ! KAMANO ! Kuai ma ka Pahu, ame ke kuai Liilii. Barena Hou, Barena Oolea, Barena Liilii, Mea Ono, KOPAA, PIA, KOLU, KOPA. Aila Kohola, AILA HONUA, AILA NIU, AHI KOE, UWIKI, Pakeke me ke poi ! Kapu, Bakeke. Hinai, Kulina, Ota, Bale, PAAKAI NOHA, HUE-IE, KAULA LIO, E Hele Mai i Ike Pono. McCandless & Co. 210-3t

OLELO HOOLAHA !
— A KA —
AHAHUI HOOHOLO MOKUAHI MOKU MAOLI KULOKO
— O KO —
Hawaii Pae Aina.

               E HOLO ANA KA MOKUAHI ' KILAUEA' MAI HONOLULU AKU NEI, MA KA Poalua, Dekemaba 12.
                    I ka hapalua o ka hora eha o ke ahiahi. I LAHAINA, MAALAEA, KALEPOLEPO, MAKENA, KAWAIHAE, KAILUA, a me KEALAKEKUA.
               A ku hou mai ma Honolulu ma ka Poaono. A pela oia e holo mau ai i kela Poakahi keia Poakahi a hala na pule elima mahope aku.
               O ka uku o lalo o ke Keena Kapena, e like no me ka uku mamua, o ka ai ana, he hapalua Dala no ka aina hookahi.

KEKAHI MOKU KUNA MAIKAI O KEIA AHAHUI O
" ALBERNI "
DALYRMPLE ke KAPENA.

                    E holo mau ana keia moku i Hilo, a e ku ana i Lahaina a me Honoipu, maanei aku a ma-o mai. He moku hou keia, o ka paa ana iho nei no ia i keleawe, he 16O tona kona nui, he wahi maikai hoi e moe ai o loko o ke keena Kapena, aia no iluna o ka papahele ka hale. Kupono loa no na ohua keia moku, he nui hoi paha, aole i e pulu.

KA MOKU 'ANE LAURIA,'

                    I HANA HOU IA IHO NEI A Paa pono. E holo ana oia i Koloa a me Waimea, a hiki i ka wa e paa ai o ka moku kuna hou.

O KONA INOA IHO KEIA, “ONWARD,"

                    Ke kapili ia nei i ke keleawe, a paa, alaila hoihoi ia o Ane Laurie no Kahului, a me na awa e ae oia aoao o Maui. JANION GREEN & CO.
Na Hope o ka Ahahui hooholo Mokuahi a moku maoli Kuloko o ko Hawaii Pae Aina. 210-3t

OLELO HOOLAHA !

                    E HOOPANEEIA ANA KA HOOLEWA O ke kino kupapau o J. M. Kalanipoo. Aia i ka malama o Aug. 1866, aole i ka malama o Ianuari ae nei. S. W. KANAHELEAUMOKU. Waimea, Koolauloa, Dek. 19, 1865. 212-2t.

Olelo Hoolaha !

                    E IKE AUANEI OUKOU E KO KAUAI, owau o ka mea nona ka inoa malalo nei, ke hai aku nei wau ia oukou, e holo aku ana wau ma oukou la e malama ai i ka'u Oihana Pai Kii, e ku mua ana wau i Hanalei, malaila wau e hoomaka mua ai i ka'u hana. Ina ua makemake oukou i mau KII. alaila, e makaala ka pono, no ko'u hiki aku, he oluolu loa ka uku no ke KII. VALENTINE. 210-2t. Mea Pai Kii.