Ka Nupepa Kuokoa, Volume V, Number 1, 6 January 1866 — Mai Ahulau! [ARTICLE]

Mai Ahulau!

Eia ma Hamakua, Hawaii nei, he mai ahulau ; ina keiki wale no nae ka ikaika o keia mai, ma ko makou wahi nei. Elima keiki i loaa i keia mai. O ke ano o keia mai, oia no ka nalulu a me ka wela pu kekahi. Ma koʻu manao wale ana nae, ina o keia mai a he mai pa make, ohi no i ka pili. Auwe! Na keiki hoi o kuu lahui, ke ewe o na mamo o kuu mau kupuna. Aloha ino. Nolaila, ke kauleo aku nei au i kuu lahui holookoa mai kela pea a keia pea o ka aina, ina ua lawa pu oukou i keia ukana kaumaha, ku hohonu i ka oukou mau keiki, ina hoi ua loaa ka laau kupono e ola ai keia mai i haiia ae nei maluna, alaila, e kuehu mai i ka lepa o ka hainaka ma kahi kuawale o ko kakou nupepa ke Kuokoa. Me ka mahalo. W. E. KAMAE. HANAIO KA MAKANI KAUAULA. --- I keia pule i aui ae nei. Ua hoomaka ka pa ana o ka makani mai ka Poakahi a i ka Poalima e hapai ana i na huna lepo i ka lewa. Pouli ka la nalowale na moku, me he uahi la o na hale mahu. Ula pu ka moana, ua huna ia o Kahoolawe, Lanai, Molokai, e ka ula o ka lepo, piha pu na hale.