Ka Nupepa Kuokoa, Volume V, Number 13, 31 March 1866 — No Kalani "Kauikeaouli Kamehameha III." [ARTICLE]

No Kalani "Kauikeaouli Kamehameha III."

O hanau ka La o na'u. O na'u ka la o Kupauole, O Kupauole ka la kohia, Kohia ka la ia Hina, O ke kukuna o ka la paa, O ka pea o hilima o hilinehu, O ka lala o ke Kamani, O ka hui o ke Kamani ula, O ka ehu o Halulu, Ke haina mai la hai, Ke hakia mai la e ka "La," E ke keiki hele lani a "Kea," O Wakea kai lalo o ka la kai luna, O ke keiki la a Kea i hookauhua ai, Oia hoi–o ka La–hanau ka La, O ka La hoi auanei ko luna la, Owai la auanei ko lalo nei? Owai la, o ka moana–aia, aia hoi ha. Hemo kahili kuhao i ka pohu, Mehe lala no ka hale loha maikai la, Ka paia ku a ka makani, I hoaho ia i hao ia e ka lai o Hauola, Oki kakaha Lahaina i ka malino, Honi na hono i ka makani paalaa, He hanu ia no ke ka Kalani–e, E aloha–e. Aloha aku la i ka lau o ka manao, Aiwaiwa i ka moe ke pa mai–a," Hae. Pa na lima o ka he Kuawa, He makemake okoa no i Wailuku, E like na manao me Kaiaiki, Kahiko i hoao ai i ka moe e, O ka momoe aku la ia i Hopukoa, Hi hihina i ke kula me ka Haakea, Loaa ka hoa i ke kaha o Kahuaiki—e, E aloha–e. O ka hue Kamehai ka inoa e nalo, Aia no ka hewa o ka lonoia—a, Hae. O hanau ka moana a Kea, O na nalu na Kea, o ke kai na Kea, O kai kane o kai wahine na Kea, O koa ku, o koa halelo ulu na Kea, hanau ka La, O hoowiliwili a ka ia oloko o ka moana, Uliuli eleele nei la e—o ka moana, O ka moana la hoi auanei ko lalo nei la, Owai la hoi auanei ko luna, owai la? O Ku, o Lono, o Kane, o Kanaloa, o Kaekae, O Maliu, o ka haku o ka pule, o nuupule, O Nuukahuna, o elieli holo imua kapu, O elieli holo imua noa, noa ka hanau ana o ke 'lii, Hanau "Ku," o ku la hoi auanei ko luna la, Owai la hoi auanei ko lalo nei owai la? O Haloa, Puka kanaka laha na 'lii, Loaa iluna nei o Kalani Mehameha, A Ekahi ka lani-la-akahi o luna nei, O Kalani Kauikaalaneo-la-alua oluna nei, Pili laua–ua mau paha-oia paha? O Kalani Nui kua Liholiho akahi, I ke kapu la-akahi oluna nei, O Kalani Kauikeaouli-la alua o luna nei, Pili laua ua mau paha oia paha." Ma keia wahi e na makamaka, akahi no a loaa pono ia kakou, kahi o keia mele i kau ia'i ka inoa o ka mea nona keia la hanau, ma ke mele i kapaia, "O hanau a Hua." Oia hoi o "Kapu Puna i ka wahine Ihiihi ka ma," a mahope aku nei la, e hoike aku no ko *** "Olohe," i ka la a me ka mahina, a me na mea a pau, e pili ana no ka hanau ana o ua "Leiopapa la,"