Ka Nupepa Kuokoa, Volume V, Number 48, 1 December 1866 — No ka poni ana ia D. Puhi. [ARTICLE]

No ka poni ana ia D. Puhi.

E KE KUOKOA E; ALOHA OE. —Ma ka la 16 o Hilinehu, ua hookohuia o D. Puhi i kahu no ka Ekalesia o Kipahulu i Maui, a o na komite i hiki mai, o Rev. W. P. Alekanedero a me Rev. H. Manase, a ua hele pu mai no hoi o W. P. Kaawa kahunapule hou o Kaupo, a me na keiki o ke kula kahuna o Wailuku. A penei ka hana ma ia la. I ka wa i akoakoa mai ai ke anaina iloko o ka halepule, ku mai o H. Manase, a hoakaka mai e like me ka mea i kaheaia e ka Ekalesia o Kipahulu nei, a iaia no hoi ka pule a me ka ninaninau ana ia D. Puhi, no na mea e pili ana i kona huli ana mai i kauwa io na ke Akua, a na W. P. Alekanedero, ka ninau hope, a me ka haiolelo i mua o ke anaina. A o kana poolelo, aia ma Epeso 6:12, himeni mua 190, (120) ma na buke kahiko, a o ka lua 316, (306.) A pau ka haiolelo ana, ku hou mai o H. Manase a ninaninau hou ia D. Puhi, a me na hoahanau, pau ia, hai hou o W. P. Alekanedero i ka himeni 318, a pau ka himeni ana, kau iho la na lima o na kahuna maluna o D. Puhi, a me ka haawi aku i ke aloha lulu lima ana; a pii aku la ia maluna o ka awai, a pule mai la i ka pule hookuu. A o ka pau no ia oka hana oia la. Nolaila, ua lilo keia hana i mea hou i ko makou mau maka, a no keia mea hou i ike iho nei, e oluolu mai paha ke Kapena o ka Nupepa Kuokoa, e hookomo iho ma kahi e kaawale ana o na kolamu. Aloha oukou. Na IKEMANA. Maui, Hilinehu 20, 1866.