Ka Nupepa Kuokoa, Volume VI, Number 2, 12 January 1867 — Ka Nupepa Kuokoa. No ka Awa. [ARTICLE]

Ka Nupepa Kuokoa.

No ka Awa.

NA REV. M. KUAEA.

NO KE KUNI ANA ME KA AWA. He nui na ano o ke kuni ana. me ka awa ka kekahi. me ka awa ole ka kekahi. O ka poe kuni me ka awa, penei e hana ai, aia a lawe mai na makua o ka mea i make. i kekahi mau mea pili ia ia, imua o ke kahuna kuni, alaila, me ka awa i mama ia, hoka ia, kahee ia i ka apu, e ku iho ke kahuna i ka pule penei. " Ka Hoolua ku e pa mai, ka Moae ku e pa mai, pa mai. pa mai. pa mai, ke alo lolohi, lolohi, lolohi, lolohi, no-no-pa, no-no-pa, no-no-pa, aia-la, aia-la, aia-la, a pau i ka okioki i ka ohe kapu a ke akua o Kane, a-la. a hala a pa i ke kua au ai la." NO KA HOOPAU ANA I KA HOOHIKI ME KA AWA. He mea nui ka hoohiki imua o ke Akua, he mea paa, hiki ole ke hoololi. Penei ka ke Akua," e hooko aku oe no ka Haku i kau mea i hoohiki ai." I ka poe hoomanakii hoi hoololi no. Me ka huluhulu-awa, ku ma ka puka komo o ka hale, kanaenae ae i na Aumakua. "Na Aumakua i ka po, na Aumakua i ke ao, eia ka awa, he awa uku no ka hoohiki ana, ua hoohiki i ka puaa, a hiki i ka la hanau o ke keiki, alaila kalua, o ka pilikia hoi keia ke kalua nei, mai nana hou mai." A pau keia kanaenae ana, lawe ae i ka awa a kau ma ka puka o ka hale, o ka pau no ia, ua loli ae la ka hoohiki. Nani ka lilo ana o ka awa i kalahala, ma kahi o lesu ke kalahala oiaio. Nani ka naaupo, a me ke kuhihewa o ka poe hoomanakii!! A penei hoi ka kekahi, me ka huluhulunwa, a ku ma ka puka, a pule aku la. "Ma ka inoa o ka Makua, a me ke Keiki, a me ka Uhane-Hemolele A mene.'' Ua loli ne la ka hoohiki, a ua ola paha ka mai. Kupanaha ka poe kahuna hookamani, ke lawe nei i ka awa i mohai imua o ke Akua Kahikolu Mana Loa. Kai noa o ka naau mihi me ka pepe oia ka ke Akua mohai i oluolu ai, eia ka o ka awa ! Ua papa mai ia, mai malama i ke Akua me ka mamona. MANAO PILI. Ma keia mau mea, ua maopopo lea ke ino O ka awa, he mea e poino ai ke kino a me ka uhane ; no ka mea, ua olelo mai ke Akua, " aole ka poe hoomanakii, nole ka poe ona, aole e loaa ia lakou ke Aupuni o ka lani," a penei hoi. " Aia mawaho na ilio, n me na mea hoopiopio, a me na pepehi kanaka, a me ka poe hoomanakii, a me ka poe a pau i makemake e hana aku ma ka wahahee." Ua pili pono loa keia mau olelo poino i ka poe inu awa, no ka mea, he poe pepehi lakou ia iakou iho, he poe hooomanakii, he poe hoopunipuni hoi ia hai. Ua maopopo loa hoi ka hewa o ka poe kanu awa, a kuai awa ma keia Pae Aina. Ua maopopo loa hoi ka hewa o ka Ahaolelo i ka ae ana e kanu na kanaka i ka awa, a me ka haawi ana i mau palapala ae kuai awa ma kela apana keia apana, me ka manao i nui ke dala o ka waihona o ke Aupuni, a holo kana mau hana, me ka manao ole i ke ola o ka Lahui Hawaii, ka mea a ke Aupuni e imi nei i na mea e emi ai ka make, a e nui ai ka hanau, me ka hoalu nae i na kaula e hoopaa'i i ka ona, ka hoomanakii, a me ka moekolohe. ka Liona, Tiga, a me ka ilio hae e luku mau nei i ka Lahui me ka menemene ole. I ka nana ana i keia wa, ke kanu nui nei na kanaka i ka awa, ke kuai nei, a ke inu nei me ka palapala ole, me ka hoopai ole ia, me he la aole kanawai no ia mea ino e luku nei i ka Lahui. O ko ke Aupuni manao maoli no paha ia, e hookuu ia holoholona ino e hoopau i ka Lahui. E Hawuii e, a i makemake oe i ke ola, e oki ke kanu awa, kuai awa, inu awa. I ola oe.