Ka Nupepa Kuokoa, Volume VI, Number 13, 30 March 1867 — Mea hou o Hamakuapoko, Maui. [ARTICLE]

Mea hou o Hamakuapoko, Maui.

1. Ua puka mai he umikumamaha ilo ma ke kuli o kekahi kanaka, o Makaino kona inoa. 2. O ka punawai e inu ai o na kanaka ma Waiopua, Hamakuapoko, ua huipu me ka wai e inu ai na holoholona i ka ua nui ana iho nei. Olelo mai hoi ka poe kahiko, i ka wa mamua, aole no i huipu ka wai o na kanaka e inu ai me ko na holoholona, a i ka makahiki 1867 nei, akahi wale no a ike ia. Ua inu pu na kanaka me na holoholona ia wai, hookahi malama, a ua emi aku ka wai, a ua ike lea ia na punawai elua ko na kanaka me ko na holoholona, a ua pau ka inu pu ana. Ke manao nei nae lakou e hana i ahaaina i mea e hoomanalo ai i ko lakou inu pu ana i ka wai me na holoholona. 3. O ka uliuli maikai o ka lau o ke ko ma Hamakuapoko nei i keia manawa, no ka mea, mamua ua hele a pookole, a kuahu no hoi ma ka nana ana. 4. O ka holo o ka palau ana a na kahu bipi i ka iniko, no ka mea, i ka palau ana, aole no i okioki mua ia ka iniko, aka, me ia ulu no, a o ka eku aku la no ia o ka ihu o ka palau, a he manawa ole ua maikai like. 5. He keu ka makaala a me ka ikaika maoli o na kanaka i ka hana a ka haole, oia ka mahiko, ka holehole, ke oki a me ke kanu ana, a pela aku. 6. He mahalo nui ko'u no ka mikioi o ka mahiko ana a na pake, a me ko lakou ku hana io ana ma ko'u nana ana aku. 7. Ke hooikaika nui nei na kanaka o keia wahi i ka mahi ana i ko lakou mau kihapai, ma ke kanu nui ana i ka uala a me kekahi mau mea ea ae, a ua mahalo no au no ka huliamahi nui ana o na kanaka i ka mahiai. Ke i mai nei hoi ka Palapala Hemolele, "O ka mea mahi i ka aina, e maona oia i ka ai." A ke hoomahui nei no hoi na kanaka ma keia wahi e kukulu i mau halelaau no lakou. O kekahi kakaka hoi o S. Kaohimanu ka inoa, he umi ka nui o kona ohana, a he kanaka akamai a ikaika ma ka lawaia ana, a no loko mai o ia hana, ua hiki ia ia ke malama i ke ola o kona ohana i na kau a kau me ka pilikia ole. He pii loa no hoi ke kumukuai o ka i-a maanei, aka, aohe nae he i ae o ka makapehu i-a e he pii, kuai no, a haalelele aku la hoi auanei, mahea ae hoi kahi o ka i-a e loaa ai. Me ka mahalo no. F. ILIWAI. Hamakuapoko, Mar. 18, 1867.