Ka Nupepa Kuokoa, Volume VI, Number 35, 31 August 1867 — Palapala mai Maui mai. [ARTICLE]

Palapala mai Maui mai.

I na Luna Hooponopono, Aloha oukou:— Mahope mai o ka'u palapala hope ana ia oukou, ua hanaia kekahi mau mea hou ma Maui nei. Ua hana ia ka fea ina Wailuku, he hana i kukulu ia e na wahine haole o na Wai-eha, i mea hoiliili dala, i loaa ka pila no ka halepule haole o Wailuku. He nui na mea i kuai ia i ua po la, a ua loaa mai he ekolu haneri dala a keu. Ua hoi mai nei ko lakou Kahu, o Rev. T. G. Kakina, mai Honolulu mai. I ka holo ana aku o ka moku Moi i ka Poaha iho nei, ua laweia aku i Oahu ka poe mai Lepela o keia wahi. Ua lohe mai nae makou, e lawe ia ana ua poe la i Honolulu, e nana ia e na kauka, a ina he maopopo ua loaa ua mai la ia lakou, alaila, hoihoi loa ia i kahi i hookaawaleia no lakou. He nui ka uwe a me ke kaumaha iwaena o kekahi mau ohana ma keia wahi no ia hana. Ua lawe ia ka wahine a koe ke kane ; ua lawe ia ke keiki a koe ka makua ; ua lawe ia ka makua a koe ke keiki. Auwe ka pilikia ! Ua lohe ia ka leo o ke kumakena a me ka pihe uwe ana ma na papu nani a me na awaawa uliuli o Maui Hikina nei, no ka hookaawaleia o na hoa'loha. Aka, he hana pono a he lokomaikai no hoi keia a ke Aupuni; he mea e pono ai ka lehulehu holookoa, no ke kaawale ana o ka poe mai a me ka poe ola. Ua hoike iho nei ke Kahukula Nui i na Kula Aupuni o keia Apana, a he oia mau no kana hana. Ke hookomo nei oia i na kumukula pope iloko o na kula o ka aoao hoole pope, a he nui no hoi na hana e ae a ua Kahukula nei i ku i ke ano o ka wa kahiko. Aka, ua hana no paha ia e like me ka haawina ike i loaa ia ia. Ua ike hou au i ka piko o Haleakala a me ka lua pele pio nui, kaulana loa o ka honua nei. Ua haaheo pono o Maui no keia lua kaulana, he lua i ike ole ia kona lua ma ke ao nei. Ia makoa i makaikai ai i ua lua nei i ka po a makou i noho ai iluna o ka mauna, eehia iho la ko'u manao. Ua hoopuniia makou malalo a maluna e na kia ao o kela ano keia ano i paila ia a kiekie loa, oia no na papu o ka lani; malalo waiho mai la ka lua he oneanea, he lai, he mehameha lua ole. Aohe leo, aohe kapalili ana o ka manu, aohe nakeke ana o ka lau nahale, aohe hoi he aheahe malie o ka makani nana e hahai ka lai mehameha o ia hora a'u i kiai ai ia Haleakala, ke kuahiwi alii o Maui. He lai maluna a he lai malalo; ua noho malie na mea a pau, me he mea la ua kapu

ka mauna. Nani! Hanohano oe, e Haleakala. Ua ana iho nei o Mr. Kowina, oia hoi ke Kahunapule o Kaukeano ma Honolulu, i ke alanui mai Wailuku aku a hiki i Lahaina ; ma ka pali o Aalaloloa ke ana ana, a he iwakalua mile ka loa o ke ala a hiki i Lahaina. Ua ana no hoi ua Kahunapule nei i ke alanui mai Ulupalakua aku a hiki i Wailuku ; nana no hoi i ana i ke ala mai luna mai o Haleakala a hiki i Maliko ; a nana no hoi i ana ia Oahu a puni i ka makahiki i hala. He keu ka hoi keia o ke Kahunapule ana alanui. Ua nele loa keia wahi i ka mea hou ; nolaila ka piha pono ole o keia palapala. Aohe pepehi kanaka, aohe hale pau ahi, aohe mea nui weliweli, e loaa ai la hoi kahi puolo mea hou o ke Kuokoa. Me ka mahalo. H. H. P. Maui Hikina, Aug. 23, 1867.