Ka Nupepa Kuokoa, Volume VII, Number 10, 7 March 1868 — Kapu ka olelo Hawaii ma LAHAINALUNA. [ARTICLE]

Kapu ka olelo Hawaii ma LAHAINALUNA.

Ua lohe mai makou ma ka palapala ana mai o kekahi o na haumana o ia Kula Nui, "Ua hooholo na kumu a me na haumana o Lahainaluna, e hookapu loa ia ke kamailio ana ma ka olelo Hawaii, a e namu kawala0 wala wale no i na wa a pau, a ina e kamailio aku kekahi ma ka olelo Hawaii, e hoohana ia oia." He oiaio anei keia lohe? Aloha ino na keiki i hoonele ia i ka waiu o ka makuahine, a i hanaiia i ka waiu bipi wale no. E wiwi auanei lakou, no ka mea, o ka ai a ke Akua i hoomakaukau ai no lakou, ua oi ka pono mamua o na ai e ae a pau loa. Aloha wale na kanaka opio i hoonele loa ia ke kamailio ana ma ka olelo a ko lakou mau makua. He aha hoi keia hooikaika ino ana e loaa ka olelo haole ? I mea @ ia e hoomakaukau ai ia lakou iho e lilo i poe Amerika i ka wa e hui aku ai o Hawaii nei i moku aina no Amerika Huipuia e like me ia e wawa wale ia nei ? O ka manao anei ia o ko Lahainaluna ? Eia ko makou manao. Mai hoowahawaha kakou i ka olelo mikomiko, ka olelo pahee, ka olelo nani o ke one hanau o kakou. E ao keia mau haumana o Lahainaluna e namu pakake nei, o loaa ole aku ia lakou ke kulana naauao o na haumana mua o Lahainaluna, a komo ole lakou ma ka heluna o Rev. M. Kuaea, S. M. Kamakau, S. P. Kalama a me ko lakou mau hoa kaulana o kanaka Hawaii naauao. Aole no e loaa ana ia kulana i na keiki Hawaii, i kupou iho ma ka olelo haole wale no, koe paha ka poe hoomaka opiopio wale no. Ina o ka namu wale no ke kamailio ana ma Lanainaluna, alaila, e aho no paha i mau kumu haole wale no ko laila, a e hoi mai o Kuaea i kahi i ike ia ka olelo Hawaii.