Ka Nupepa Kuokoa, Volume VII, Number 11, 14 March 1868 — Aumeume kahi wai o na pa wili ko O HILO NEI. [ARTICLE]

Aumeume kahi wai o na pa wili ko O HILO NEI.

E KA NUPEPA KUOKOA E; ALOHA OE: - Ua ike ae la no kaua i kela mau hua e kau ae la maluna. A ua maopopo o Hilo nei he aina i hooholo ia ma ke mele; "no ka ua." Nolaila, i ka hapa o ka A. D. 1867, a hiki i ka hapa mua o keia makahiki e naue aku nei, ua maloo loa, a kohu aina kula ka panoa o ka lepo. A no ka haule ino ana o Hilo nei, ka aina kaulana i nei mea he kulu mau ka ua no Hilo a po ka La. Ua maloo mai na kumu wai, a ano uuku mai ka wai o na kahawai. Nolaila, ua aumeume na Pa wili ko i kahi wai, mawaena o poonahoahoa & Capt. Bottas. Ke kumu o keia hana, no ka nele i ka wai ole. Malaila au e kaena ae ai, ua malie o Hilo i keia mau malama, a he nu hou ia a na kupa o Hilo nei e waha kani mau ai. "Malie! Malie o Hilo nei!!" He kumu hoike oiaio ia e olelo ae ana, ua hiki io aku la o Hua i Hilo, ka mea nona ka inoa. "Nakeke na iwi o Hua i ka la." A ke ninau nei kekahi poe. Heaha la ke kumu o ka malie o Hilo nei. Ke hai hookamani ole aenei au, ua au'a ka Mea nana i hana i ka ua, no ka hoomahui o na kanaka, o kekahi hapa e lilo nei i ka inu uwala. E kanu aku ana, hao mai ka La, maloo kahi lau, a ulu homimi, a ke hoka iho la i ka mea e waha ko'u ole ai, haalele ia iho ka ai mau o Hilo nei he poi, piikoi aku o ka uwala, i ka nono mai ai ka lae i ke Kanawai, poha ka auwae o ka hai keiki. Weliwli ka ulu hou o nei mea ino ma Hilo nei, a ke kapa aku nei au i ka inoa o ka poe e hana ana ia hana, o ke Kao walewale a John. Pukaka. Oia ka nui o ko'u manao i ko kakou Kilohana. Me ka mahalo. J. P. Iwa. Alae, Hilo Feberuari 24, 1868. KEANAE, MAUI, Maraki 3, 1868. REV. L. H. KULIKA; Aloha oe: - Ke waiho nei na dala maoli o ka mahina hou no ka mahina o Feberuari. Dala maoli $18.87 1/2 Dala ma ke olona, 4 lau 7 apana, $9.00 Huina, $27.87 1/2 I ka akoakoa pau loa ana mai o na hunahuna, oi ae ka huina imua o ke kope i hoouna mua ia aku, olioli au i ka holo o ka loaa o ka mahina hou, aole o na hoahanau wale no ka i haawi, o ka poe mawaho kahi, o na keiki kekahi, hui pu me na hoahanau, holo loa ka loaa o ka mahina hou. Ua holo pono na hana haipule maanei e hana ei, ua launa mai ka Uhane Hemolele. Ke hooeueu mai nei i na naau o na keiki a me na kaikamahine. Ua lana maikai ka manao i ka nana aku, ke launa mau mai ka Haku, ka mea nana ke kihapai ai. Ua hiki mai o S. Kapaha i o makou nei, ua nui loa ka makemake o na kanaka a me na wahine, i ka haiolelo ana, ua nui loa na kanaka, ua piha ka luakini o Keanae, pau ka haiolelo, kokua na kanaka ia S. Kapaha, ua loaa he $16.25. Ua hana ia ka hale halawai ma Kaloa, kokoke e paa. Aole i loaa mahuahua mai ko'u wahi ola e noho nei, malaila no ka pilikia. S. KAMAKAHIKI.