Ka Nupepa Kuokoa, Volume VII, Number 19, 9 May 1868 — He mele no Kualii, Kulanipipili, Ku-LANIOAKA, KUNUIAKEA &c. [ARTICLE]

He mele no Kualii, Kulanipipili, KuLANIOAKA, KUNUIAKEA &c.

I haku ia e Kuahukia a me Kaiwiokaekaha, na kahu ponoi o Kualii; ma ke kaua i Kunia, ma Keahumoa i Lihue. Ua hanau ia o Kualii ma Kalapawai, ma Kailua, Koolaupoko, i ka A. D. 1555. O Mahuluanuiokalani ka makuahine, a o Kauakahi a Kahoowahaokalani ka makuakane. Ua waiho aku au i ke Kumuuli me Kumulipo no ka mohai ole ka ! Pela paha oukou. S. M. KAMAKAU. HE HOOHALIKELIKE NO KUALII. 34. Aole i like i ka pana, I ka weke-lao a ke akua, Ka ulu kanu a Kahai, Aohe ka oe i ike, I ka wahine paumao, I ka luna o Puuokapolei–la— Ua like paha? Aole i like (me Ku)— 35. Aole i like i ka wiliwili, Kona hua i kupee ia, Kona kino i kalaiia, O kona kino i kai o ka nalu, Heenalu, heenalu–la— Ua like paha? Aole i like (me Ku)— 36. Aole i like i ke kaunoa, Ia laau kumu ole, E hihi wale ana i ka laau, O ka wai o ka laau kona olu, He punawelewele kona lua—laa— Ua like paha? Aole i like (me Ku)— 37. Aole i like i ka pa a ka makani Kona, Kakoo ana ka hale o ke koolau, Lanalana ana a hina i ka makani, Ka mokoi hoolou a ka lawaia, Ka pa o Manaiakalani–la— Ua like paha? Aole i like (me Ku)— 38. Aole i like i ka mamaki, I ka hialoa maka o ka nahele, Ka makohikohi laalaau, Ka eu makaulii makaehu, I ehu i ke alo o Kuehu, I ke alaiki i ke alaloa, I ke alaloa e hele ia–la— Ua like paha? Aole i like (me Ku)— 39. Aole i like i ka lauki, I ka lauki pala o Nuuanu, I heheia e ka ua, e ka makani, A helelei ka lauki pala, I ka luna o Waahila–la— Ua like paha? Aole i like (me Ku)— 40. Aole i like i ka halahili, I ka hala lei-ula o Kahuku, I okiia e ka papaua, I wiliia e ka makani, Na hala puakea i Kekela–la— Ua like paha? Aole i like (me Ku)— 41. Aole i like i ka ua Waahila, Ia makani anu o Kahaloa, E lu ana i ka pua Kou, E kuiia ana a paa, E lei ia ana i ke kai o Kapua–la— Ua like paha? Aole i like. (me Ku)— 42. Aole i like i ka makole, Ia laau kepia nui, E haloiloi ana i ka lihilihi, E hihi ana e ka punawelewele, E kupenupenu ana i ke kewai, A pau keae o Kaala–la— Ua like paha? Aole i like. (me Ku)— 43. Aole i like i ka manoniula, E kau haaheo ana i ka pou o ka waa Ma ke kiaula o ka manu la, Me he pa lei la no ka hala la, Me ka pua o ke kaalaukani o Ku–la– —O Ku no ke Alii— Aole i like (me Ku)— 44. Aia hoi ha kou hoa e like ai, O Keaweikekahialiiokamoku, O Keawe haku o Hawaii–la— He awaawa hoi ke kai, He mananalo hoi ko ka wai, He welawela hoi ko ka |a,

He mehana hoi ko ka ili. Ko kuu wahine o Ninininikewai, O Pulee–la— Ua like paha? Aole i like (me Ku)— 45. Aole i like nei Lani, I ka hoohalikelike wale mai, He kanaka ia, a he lepo, He akua o Ku, He ulele o Ku mai ka lani, He haole Ku mai Kahiki, He mau akua ia eha, Ewalu hoi nei kanaka, O Ku, o Lono, o Kane, o Kanaloa, O Kane ia Ahuwahine, O Kahaihaipua o Kekuawalu–la— Ua like paha? Ae. Ua like me Ku— 46. O Kona la, ua wela ka papa, Ua ku kehu o ka la, Ua wela kahua o Umulau, O ka lani pili o hooilo, Ea ae e puka ka la, O ka mana o Kuleonui, Haawiia mai ai ka la, Mahana ai na'lii aua o Kona—e— (Aole i pau.)