Ka Nupepa Kuokoa, Volume VII, Number 20, 16 May 1868 — He mele no Kualii, Kulanipipili, Ku-LANIOAKA, KUNUIAKEA &c. [ARTICLE]

He mele no Kualii, Kulanipipili, KuLANIOAKA, KUNUIAKEA &c.

I haku ia e Kumahukia a me Kaiwiokaekaha, na kahu ponoi o Kualii; ma ke kaua i Kunia, ma Keahumoa i Lihue. Ua hanau ia o Kualii ma Kalapawai, ma Kailua, Koolaupoko, i ka A. D. 1555. O Mahuluanuiokalani ka makuahine, a o Kauakahi a Kahoowahaokalani ka makuakane. Ua waiho aku au i ke Kumuuli me Kumulipo no ka mohai ole ka! Pela paha oukou. S. M. KAMAKAU. 47. Akahi Kalani, alua Kalani, Akolu Kalani, aha Kalani, Alima Kalani, aono Kalani, Ahiku Kalani, awalu Kalani, Aiwa Kalani, umi Kalani ia Ku, Ia Kuikealaikauaokalani, a puni— 48. Akahi koa, alua koa, akolu koa, Aha koa, alima koa, aono koa, Ahiku koa, awalu koa, Aiwa koa, umi koa, Ia Kalanikahimakaialii, I ke keiki koa o Maui, a puni, 49. Owa Kauakahi—akahi, Kuihewa i ka lua–alua– He kolu Kaihikapu–akolu– He ha Kukawelo–aha– Lononuiakea i ka lima–alima, He ono Kahoowaha–aono– He hiku ai Kapua–ahiku– He like Hoalani–a like– He iwa kahakai o Hua, Kuu kahakai e paiai a puni— 50. Puni kahiki ia Kalani– I ka lele a ke koae nui– A ke koae lele kau maluna– O Kapiiohookala–ni— Ua ai oe i ka aina– O Waialua, o Waimea– O na wai aloha a Kalani– Ua hee Kupihea– Aia i kai i ka moana– Nana ka maka i Oahu– Me he ipuka no ka hale la– Ke kowa o Pohakea– Ke ku a Maunalahilahi– Ka holo ana i Kaneilio– Panee la–e–panee– Panee aku a Waihee– Pae no i Kapahukukui– Hopu no pahu i ka laau a puni— 51. Hookaa–la–e–hookaa– Hookaa na waa makai– Kau oe i Maeaea. Haawi o Kaweloiki a Aila, O na ai o Kamananui, O na ia o Palaau, Kani ko pihe i Nahuina, Kihewa a Kanealala, O keiki a Kaiao nui, O ka puaa i ka Moi, O ka haku-ne i ka nene, U o ka uau, li-o o ka li-o– A o ka ao, hou ka houhou, Ke anunu, ka ekekekeiau–e, Awihi ka iole, heo ka pueo, Owa ka aukuu, aeae koloa, O Waikoloa ia Keawawaihe, Pohakulepo, pae mai ka manu, Iloko o ka poopoo, Ka ao ka ao-e-ka li-o– ka lio-e— Kakakai honua, puaoao, Ai nui, pale kahawai kaakiko e, Ka makauakahi o Ewa, Ua puni ka ia o Mokumoa, Ua kau ia i ka nene, Ua haa kalo, haa nu, Haa ka ia o Kewalo, Haa na uala o Pahua, Haa ka mahiki i Puukea, Haa ka ununu i Peleula, Haa Makaaho i ke ala, E Ku–e–ma kekaha ka ua e Ku. 52. I ai na ka ia o Maunalua, Ua nana ia Kekuapololi, Hone ia i Puuokalalau– Naueue Koolau– E Ku e Kalamahaaiakea, No Kalama no ia aina. He aina noho mau i Kailua, Hoomaka lealea aku Waimanalo, E kii e peku o Kaneohe, Mai Mahinui a Haakolo—e– A ai o Kuikealaikauaokalani, Ma ke kua, ma ke alo–apuni— 53 A Kahiki ia Paumakuakalani, A Kahiki i keakeaau o ka lani, Ia Wakea ka lani, a malu Kahiki, Malumalu Kahiki,

I ke ao ua o Maheleana–e— Amaama ka Kauai, Ua hiki ma Pana mawaho, Ma Kau, i Hilo, Ia ikea ka like o ko aina, E kekahi alii hua i ka lani, A Keakaliilani o Waipa, O loohia oe e Kipu, ahiahi o Palaau, E ke kiu ahiu ilalo o Kahana, Hoolawa i kekahi alii, E puni e Kalani–e–ko aina–e— 54. A Kaiwi i Kekuapolo–li– A ka wai i ke hoomanalo, Ke kai kalua i ka manawa, Ka ohe oki i ka ili, O ka maka i ka ua o Haao, A ka hee i ka ua alaea o Kii, A ke kanaka luu hala o Halakua, Ka wai i ka hee moana, Ka a i ka hoea ana, Ka wai hole a ka ili, I ka wai e hookane ana, Ka hakipuu i ka manawa, Ka ioena o ka aina. Ka awa 'loha i ka ili, O ka maka i ka ua o Haao, A ka hana i ke ka wailehua o Hilo, A ka luuluu i ke hoaloha. A ka puhee miki i kai, A ka aha i ke hili a paa, O ka paa i ka hoolua, O ka hoolua i ka hoonui, Hiki ka pona i o honau, O ma i ka hookaona, O ke kaa ma i ka wela, O kai a Alapai inu a maleo, Papau kai e kohalalele, O Malae i ka ie waa, Me ka ie waa i kai, O Malae i ka hookahana. I ka pae puu e loaa, O Keana kai akea, O ka hoohukuhuku i ka hala lei, I ka hala lei o Puna, Uaua hiki kona, iluna ka malie, Ke hele ae la e Kuhoopepelaualani, Hele ae o Kaipunui ko aina–e— (Aole i pau.)