Ka Nupepa Kuokoa, Volume VII, Number 22, 30 May 1868 — He Mele Kanikau no Walia Kahaha- NA KA MOI O OAHU. [ARTICLE]

He Mele Kanikau no Walia KahahaNA KA MOI O OAHU.

Na Kalawela i haku. Ua hanauia o Walia Kahahana ma Manuaula, Waialua, Oahu, i ka A. D. 1785. O Kaionuilalahai ka makuahine, a o Elani ka makuakane. Ua noho ma ka Nohoalii i ka A. D. 1774. Ua noho pio i ka 1783 Ua pepehiia i ka A. D. 1785. 1. O Pililua oe, o hele lua i Ewa, O ka hele oe, a ka'u Lani— O kaawilikolo, o luaia luamea, O mea wale ia iho i ke kula—e— I ka oneanea i Kawailele. 2. Nolaila ka o Kahapuukolo, O ka paikaualulu, O ka pahu iloko o Kekeleiaiku, O kiolani o ka pueo kani ka ua, No Halaulani i Hanapouli, No ke kawelu hau i ke kai i Kupahu. 3. Nolaila ka o Kalohai. O pua na kau ka malama, O ka malama o Hikileiakakalea, O hionalele o ka maka o Kemilia— O Hikinauele, o Nauele kona lua, Elua laua i ka moana—e— 4. Oia kai ke awalau o Puuloa, Iluna o ka waa, ka i olohiolani, E i lauhoe ia nei Kalani, O oe ka i luna i ka pola waa—e— Kupu maikai Leahi i ka malie, I nea e ke koi a moku okoa. 5. Kuhi ka waa holo, he kai ko waena, Aole ka he kai, he hoopunipuni, He pili ka no uka o Huewa, Ua ehu wale i ka la o Makalii, I ke oho pukai o Mauaenaena, I enaena i ke kai i Kalehuawehe, 6. I na kulana heenalu i Aiwohi— Aloha na hoa o ka nalu mua kau, O kulana kai o ke Kaulua—e— He kaulua aloha keia, Nou hoi la e Maholekinaukalani— O Laauli o Lanikele, 7. O Kamahukeleaola, O ke kanaka o ka pali, Komo i Peapea, komo i ka halepea launiu, Hale pili o Kekaha ke noho oe— Owai ke kuleana o ka noho ana— I walea ai oe i ua kai la— 8. Ua hele Kona, he ole Koolau— Ua kuleana ole ua kaha la— O na Kaha aloha la au e noho—la— E Kamaelekapu ka i laahia Keawe, Ka awai kololua iho la ka maka— O ka makamaka ia o ke kapu o ke 'lii, 9. He pua laha ole nei no na moku— He kamahao Kalani na Oahu, I walea Kalani, i Kona i ka lulu, I ka pohu wale a ka ua waahila, Ke halii mai la i ke pili— Akaka ke kapu, e haki na nalu, 10. O na hua kai o Kaulahui— I huia puha oe, e moe mai la—e— A manawahua ka makani, Pahola iho la ka unulau, E ku e, e kaula ka waa, He waa huki kaula i ka pali, 11. I ka pali la oe i Kealia— I ka maomao la i Kinimakalehua— Noho ana kanaka i ka nahelehele, A hiki moana ka lehua, Ke koa, i kau i ka la, E kau oe i ka haka weloulani— 12. Ua ike paha oe e ka ua e ka la, Ia Kalani e moe nei— E moe lolo aikulani wale ana, aohe kapa E moe wale ana i ka ua o Hooilo, E Kalaninuimakahakumaikalani, Makolu ka lani, makahakuma ke'lii, l3. O Keakahiwa o Lono, o Kahakumalani— Ua hele uhane Kalani aohe kino— Ua uhane ololi wale Kalani, Ua hanehane ka leo, Ke hea i kona hoa moe o Alapai, O ke poo o Kukahauliaukama. 14. O ke kama la hoi ia ke kamalei—aole— O kona hoa moe ka ia, E ka pali welau loloa o Koolau, No Koolau hoi kekahi aloha, E ka huakai malo lauki, Ike wale e ka ua haao, 15. Ua hanai i ka pua Kamakahala, Ke hoomu la i ka muo o ka lehua— I u wale ia oe e Kalaulihewa, He wa Puaakahuoi kuu hoike— Kuu hoikeike o ka nahele— Kuu alakai o ka loa—e— 16. Akahi o noho ia ua hala aku la— Ka i noa ua hala kuu lani, Ua lawe la koawaa,

Ua ahai i Mahuka i ke ola, Ola la paha— O ke aha la ka hana a ke kanaka— 17. I hana ino ai ua kai la— O ke kai lawe ia'ku la, lawe ame— Waa umauma ke ala e hiki ai— Pae maeele i ke kohonu—e— Kuu ka luhi aloha ia oe— O Kukaailanikapu au o Liloa, 18. O ke kaai mawaho o Umi ke 'Lii, O ka hala ia— Kuu papa mokumoku i ke au, Noho i ke kai— Kamaaina aku la ka moana—e— O ke koa ia— 19. O Lonokaeho Laewakawaka, O na kapa ula o Kalani, elua—e— Elua olua, elua maua, Pai ha oukou i ke ala e Apua—e— O ko kaina— A ia hu ka la o Waianae— 20. Wehe ke kaiaulu i ke oho ka niu, Komo okoa iloko o ka hale, Aloha ka ha–le i ka mehana—e— Hui i ke hau, moe i ke anu, I ka makani anu he Waikoloa—e— Loa ke ala–e–ke hele ia— (Aole i pau.)