Ka Nupepa Kuokoa, Volume VII, Number 31, 1 August 1868 — He Kanikau Aloha keia nou e Kiope Puawahie Kapule. [ARTICLE]

He Kanikau Aloha keia nou e Kiope Puawahie Kapule.

He kanikau aloha keia nou e Kiope Puawahie, Kuu wahine i ka wa pokeo o ka wa kamalii. Mai ka nohona Opiopio o ka wa naaupo loa e! Kuu wahine i ka waihuihui anuanu o Kalepolepo, Mai ka lai hulilua la o Kamano nei la, Kuu wahine i ka ia anuanu o Huainiu e ! Mai ka wai au anuanu huihui maeele o Waiakea, Kuu wahine i ka ua haaheo mai iluna o ka Ulu. Kaumaha luuluu kuu kino e noho nei ia oe la e! Haalele mai nei oe ia'u i ka hoa pili ke kane aloha. Hele hookahi aku la oe i ke ala hoi ole mai, Noho hookahi hoi au i keia ao pau wale, Hookahi kokoolua o ke kaikamahine a kaua ; Kuu wahine i ke One haaheo o Waiolama e ! Ke malama nei au i kou aloha aole e pau ; E hoonalonalo iho ana aole e nalo E hoonana ae ana i ke aloha o kuu hoa aole e na, Me he ahi la no Kilauea ke aloha e noho ia nei. Ka maeele lua la i kuu nui kino e! E lohi apa nei la i kuu manao, He manao ka ke aloha o kuu wahine ke hiki mai. A hiki mai no kou aloha e uwe ko au e! kuu wahine; Aohe wahi aloha ole a'u e noho nei la, He aloha ka noho ana o ke kane ene ka wahine, I ka hooponopono ana i na mea o ke kino o ka noho ana, Auwe kou wahine e! Kuu wahine hoi e!! Kuu wahine i ka uluniu o Mokuola e. Mai ka ia haaheo la ma ka moana, Ke hukiku mai la la i ka ilikai o Hiloone, aloha wale, Kuu wahine i ke one loa o Punahoa e ! Aloha ia one a kaua e hoolai ai maluna o ka lio, Kuu wahine o ke ahiahi Poaono o ke kaona e, Mai ka Pele kuilua la o Haili; Mai ka Piana kani hone la i ka iuiu, Kuu wahine i ka uka anuau nahelehele o Kumukukui e, Oia wahi a kaua i alo ai i ka haukololio o ke aumoe. Kuu wahine lelehua o Mokaulele e! Ke hoopulu ia ae ia e ka ua liilii o Makahuna, Huna na maka o kuu hoa la nalowale loa ; Pau ka pili ana o ke kane me ka wahine aloha, Ua haalele mai nei oe ia'u me ke keiki a kaua, O kau mea nui no ia o ke haikamahine aloha; He hoku haule ole ia nau i ka wa e ola ana oe; Kuu wahine i ke kula o Puainakko e! kuu boa; Kuu wahine i ka ohia loloa o Honokowailani, Mai ka ua noe halii mai i ka nahele e.

Kuu hoapili o ka aina ua nui o Hilo nei; Mai ka ua aweawe lua la ma ka moana, Mai ka ua nihi hele ae makai o Leleiwi e, Kuu wahine i Kauakanilehua o Panaewa, Ke lei haaheo mai la i ka liko o ka Lehua. Auwe kuu wahine e! kuu hoapili o ka aina e!! Kuu wahine i ka Hiilinehe o Paki e, kuu wahine, Kuu wahine i ka pahoehoe lehuaula o Hopoe e, Aloha o Malio i ka papalohi o Maukele, Hele ka Uhane o kuu wahine la hele hoi ole mai; Haalele ka uhane i ka hoapili o ke kino la e, Aloha ke kino ka hale e noho ai ka uhane o kuu wahine, Kuu wahine i na puu o Pele i Honolulu e, A ka lae o Kookoolau pau ka ike ana ia Hiloone, Kuu wahine i ka ululehua o Kuaokala e, kuu hoapili. Kuu wahine aloha i ka uluniu o Keahialaka, Kuu wahine i ka pahoehoe o Malama e! Kuu wahine i ka lai hulilua Opihikao, Kuu wahine i ke ana-wai pouli ke komo e, kuu wahine. Kuu wahine i ka niu-moe o Kalapana e kuu ! hoapili; Aloha ia'u na wahi a kaua i hele pu ai, Aloha o—e, aloha no hoi au ke kane aloha e, Kuu wahine i ka pali o Piikea e, kuu wahine aloha. Kuu wahine i ka papa kahulihuli o Wailuku e, Mai na Lehua lei la o Mokupane, Mai ka wai au la o Waimalino, Kuu wahine i ka piina ikiiki la e Amauulu,. Mai ka uka anuanu la o Puueo, Kuu wahine i ka ai lauoho loloa o kanahele e! Ola kaua i ka ai uahi ole a ka haole, Kuu wahine i kahi ai uuku me kahi ia uuku e ! Auwe kuu wahine e! kuu hoa hele hoi; e!! Aole oe he wahine he hoa make no kahi e hele ai, Kuu wahine i ke kai hanupanupa o ka moana, Mai ua ale hulilua la o Alenuihaha, Hopohopo mai kaua kupilikii ka manao e; Kahulihuli ka ale o Pailolo i ka wa ino, Aloha ia'u ke kai o Mamala oia moana a kaua i holo ai. Kuu wahine i ka Pelekani Boy i Waialua, Kuu wahine i ka ui kukala hale o Honolulu, Kuu wahine i ka ia mililima o Ulakoheo e, Mai ka huikau lua la e na kanaka, Kuu wahine i ke alanui kikeekee o ke kaona, Mai ka Pele kuilua la o Kaukeano, Mai ka wati hai manawa ia e Kawaiahao, Kuu wahine i ka hale imi ola o ka Moiwahine, Oia wahi a kaua i noho ai aloha wale, Kuu wahine i ka uka anuanu o Nuuanu e! Mai ka la hiki anuanu ae maluna o Konahuauui, Mai ka Ohu paapu mai la i ke kunhiwi, i Kuu wahine i ka waihuihui o Waihi e. Kuu wahine i ka malu laukoa o Kolowalu e ! Mai ka piina ikiiki ia e Kahaukomo, Hoomaha aku kaua i ka nuku o Nuuanu, Huli aku nana i ke koa mokomoku o Heeia, Kuu wahine i ka hala lei o Kekele e! Mai ke Kaweluholu o Lanihuli la i kamakani, Kuu wahine i ka waihuihui o Waikahalulu, Kuu wahine i ka pukuilua ia o Puoina, Mai na la nui la o ke Aupuni Hawnii, Kuu wahine holoholopo o ke ahiahi o Honoluiu, Mai ka hale hulahula la o Keopu aloha wale, Kuu wahine aloha i ka lai o Kaakopua, Oia wahi a kaua i noho ai me ke aloha, Auwe kuu wahine e! kuu hoamake hoi e!! J. W. K. WAHINEOLE K. Kalepolepo, Hilo, lulai 14, 1868.