Ka Nupepa Kuokoa, Volume VII, Number 35, 29 August 1868 — Page 1

Page PDF (1.63 MB)

KA NUPEPA KUOKOA.
KE KILOHANA POOKELA NO KA LAHUI HAWAII.
BUKE VII. HELU 35. HONOLULU, AUGATE 29. 1868. NA HELU A PAU 352.

KA NUPEPA KUOKOA,
HOOPUKA MAU IA MA HONOLULU
I kela Poaono keia Poaono.
$2.00
No na mahina he UMIKUMAMALUA,
$1.00 no na mahina eono.
ME KA HOOKAA MUA MAI.

NA OLELO HOOLAHA—aole i oi mamua o 10 laina no ka hoopuka hookahi ana, $1.00; alua komo ana, he $1.50; hookahi malama, $2.00. E uku mua ia mai ke dala o na olelo hoolaha a pau e hoounaia ana mai e pai.
KANIKAU—he hapalua dala ka uku no ka aoao hookahi o ka pepa leta, oia hoi 4 keneta no ka lalani hookahi—penei: he 25 lalani, $1.00; 50 lalani, $2.00; a pela'ku.
NA UKU NO NA OLELO HOOLAHA—ka uku pepa, a me ka uku o ke Kanikau, e haawiia no ma ka lima o na Luna o ke Kuokoa, a i oleia, e hoouna mai ia Kauka Kulika.
O NA UKU PEPA A PAU E HOOKAA MUA MAI NO—aole e kauia ka inoa o kekahi haole a kanaka maoli paha, ma ka inoa o ka poe lawe pepa ke ole e hookaa e mai mamua. E pono ke hiipoiia keia mau rula, no ka mea, he emi no ka auhau no keia nupepa.
AIA KE KEENA O KA NUPEPA KUOKOA—ma ke kihi hema o ka Hale Hookipa Luina (Sailor's Home.) O na hora hana, ma ka eiwa o kakahiaka, a i ka ha o ke ahiahi.
L. H. KULIKA. (Luna Hoopuka.)

“KA NUPEPA KUOKOA."
Is published in Honolulu
EVERY SATURDAY,
$2.00 per annum, or $1.00 per six
months, in advance.

ADVERTISEMENTS not exceeding 10 lines, inserted once for $1.00; twice or $1.50; and $2.00 for one month; all advertisements must be paid for in advance.
KANIKAUS will be charged 1.00 per page, or 4 cts. a line.
PAYMENTS FOR ADVERTISEMENTS, Subscriptions or Kanikaus, may be paid to any of the Agents of the Kuokoa, or may be enclosed in a letter to the Publisher.
ALL SUBSCRIPTIONS must be PREPAID. No names, either of foreigners or natives, will be inserted on the subscription list, until paid for. This rule must be strictly adhered to, on account of the low subscription price.
THE OFFICE OF THE KUOKOA is in the South corner of the Sailors' Home. Office hours from 9 A.M. to 4 P.M.
L. H. GULICK.
For the Publishers.
                     Volume I, II, and III of the KUOKOA, bound, for sale, $3.50 each.
                     Persons having complete sets of the above, can have them bound by paying $2.00 each.

Ka Nupepa Kuokoa
HE MELE KOIHONUA NO
KEKAULUOHI.
-
NA KEAWEKAHEULU KALNIMAMAHU A ME KEKAHI
POE ALII E AE I HAKU.
-

Ua hanau ia o Kekauluohi o Mano, o Kekahaikaaoaokapu o Ku, o Kekaha o Ku ma laua o Lono, i ka makahiki 1794, ma Kona, Hawaii. O Kaheiheimalie Hoapiliwahine ka makuahine, a o Kalanimamahu a Kalanikupuapaikalaninui ka makuakane.
Ua noho Kuhina Nui oia i ka A.D. 1839, a make iho la i ka A.D. 1845, ma Pohukaina, Honolulu, Oahu.

-
MUKUNA III.
MAHELE.

O ka wewehi iluna o ka laau,
Ka maiewa oho loloa o ka hala,
Ke kauna lauolio loloa o Hanalei,
I hoao mokumoku ia e ka ipo,
Ua moku ka welelau,
O kelakela ke kupu,
Mamae ka liko ua eha Kaukaopua,
Akahi a hai mai i ka eha—ua eha ia,
Ke eha wale la no—
Iloko o ka eha lima ole a ke aloha,
A kakou e ike pu ole nei—no—

MOKUNA IV.

1. O ke apukele apuaimano o ke kapu,
O Mano o Kukona, na Kukona a Mano,
Na Kaumaka a Mano
Na haku hana kea,
O ka haku nanakea,
I hee puka keakea aikea kaukea,
Ka haku kea o Kuwalu a Kahakuakane,
O Kahakualoa, o Kahakuhaakoi,
O Kalani ke'lii,
Ke'lii hoku kini maka hoku lani,
2. A Kahakuohua a Kalani,
O Kalanikuihonoikamoku ka haku lani,
Ka makamaka hokulele,
Maka o Kuma i ke kapu,
I ke kapu o ka haku Pohano ka lani,
O hiki kaukau Keawe.
Ka haku maka hilahila,
Maka olelo, olelo mai o Keawe i ke kapu,
Ka lani pakua pahua kekee lapa,
3. Hilala ka lani, hilala halala,
Hiohio oni loa Keawe i ke kapu,
He laau oni loa Keawe,
I ke kapu aole e pono,
I ka pono i ka poho o ka aina a kaulani,
Ku i ka ona o ka lani nei alii,
O ka lani kaalolohi lohi kaa ka lani,
Kaalolohi i ke aoa lalahua o ka lani,
O Kalanikupuapaikalaninui.
4. O kupu lani makaokao makaokao,
O lele makaokao Kanealiiikehukai.
Ka momoku, he papaa o ka lanahu'lii,
Kaa ole i ke kapuahi okoa a Loe,
O Loe o Kukohoulani Kaniuhi Kanipahu
O Kalapana Kahai Kalauohua,
O ke'lii e hea ia nei,
O ke kaha i ka aoao kapu o Ku,
O ke kaha o Ku ma laua o Lono,
O Kekauluohi o Mano ia nei—la—

MAHELE.

Noweohina ka uka o Puna,
Liua i ka uwahi a ka wahine,
I hoa no i ka luna o Kaana,
Puoko e no i kai o Heeia,
Malamalama aku la Kulilikaua,
E hilo oe i ke aho a ke aloha,
Nana no ia e nu a na wale iho no—

MOKUNA V.

1. O Kalaunuiohua ka mano alii,
O Kuaiwa o Kahoukapu o Laa ia,
O ka maka o Laa, o Laakapu ke alii,
O ke kapu wela a Ahukini.
O ka hahana o ke kapa a Kukona,
O ke awa o ke kapu a Laulihewa,
2. Na Ulaloa ua Kauluhinalo,
Na Kalohiiki a Kamalani,
Na Kapuhili na Kama nei alii,
Na Kupanihi na Hinaula,
Na Kahaoi na ka puaa,
Iloko o Halehalekalani,
3. Na Kahuoi na ka puaa—e—
Na Kahaoi na Maili,
Na Kanonoiki o Piliwale,
Na Kaholialale a Malela,
Nana i hanau Kanehoalani.
Hanau Kaui hole mai ka hope,
4. Na Kanehoalani,
Kamanu Kahawali Kaholopokii,
Kaihikapu, Ipuwaiahoalani,
O Kauakahi Kaneikauaiwiloni,
O Kanekapu a Iwikauikaua,
Nana hoi Kalanikauleleiaiwi—la—
5. Nana na Haho na Palena ia la.
Nana na Auanini,
Na Kalapakaoaka na Lani.
Na Moemoeaaulii keia na Luahaku,
Na pohaku na eho ku manawa,
I ku i ka lapa wai,
6. I ka hanononowai makaili
I hu i ka awai kapo o Keakealani,
I ke poo o ka mano i kiekie.
I ka mauna loa o ke kapu Kuihewa,
I lele aku kau i ka pea o Huia,
I kau aku ai i ka pea lani,
Kealohikikaupea Keaweakealohi.
Kahe mai ana o Liloa ke kaaiulunui,
7. O Umi ke'lii o ke kawai ka iki hakukau,
Nolaila ke'lii mailoko o Pakaalana,
Ke'lii e hea ia nei,
O Kekaha i ka aoao kapu o Ku,
O ke kaha o Ku ma laua o Lono,
O Kekauluohi o Mano ia nei—la—

MAHELE.

O ka wai opua makani o Wailua,
I hulia e ke kai awahia ka wai,
Awahia ka lau hau me ka lau ai,
Palakahe ka ai o Makaukiu,
He kiu ka pua kukui na ka makani,
He alele hooholo na ke koolau,
Ke kuehu mai la iuka o Kapehu,
Ike ke kanaka kahea ualo makani,
Ke kipaku mai la ka waa e holo,
Holo newa ka lau maia,
Ka pua hau i pili aloha
Me ka mokilaula i ka wai,
Maalo pulelo i ka wai o Maluaka,
He aka no ua makani kaili hoa la,
Kaili ino ka lau o maluakele,
Lalawe i ka hoa kanaka la lilo,
Koe a ka u me ka manao iloko,
Ke apo hewa wale la no i ke one,
Uwe wale iho no i Moomooiki—e—
He hoomoomoo olelo na ke ke kuhiwale, He kuhi wale—
Aole ae ma ka waha e hewa-ai—e—
E hewa pono ai la hoi au e ke aloha-e
Owau ka! ka ke aloha i luaiele,
Ua kuewa i ke ala me ka waimaka,
Aole hoi he wa—
Ua uku hoi l ko hale—hewa au—e—
(Aole i pau.)

-
KA MOOLELO O NA KAMEHAMEHA.
-
NA S.M. KAMAKAU.
HELU 86.
-
NO KA NOHO ALII ANA O KAUIKEAOULI
MALUNA O KE AUPUNI, A UA KAPAIA
O KAMEHAMEHA III.
-

                     Ia wa i olelo ai o Kaahumanu ia Hoapili ma, e malama i na kumu o Lahainaluna i ka ai, a o ka ia o Kaipaki i Molokai, oia ka ia, a o ka mamaki o Hawaii oia ke Kupa; a o na'lii i hoouna i ka lakou mau kumu i Lahainaluna, e kokua no lakou i ka lole a me ke dala.
                     Nani ka hoomomoa o na'lii o ia wa i na kumu a lakou. Ua ike no hoi au i ka hooko ana o Kaahumanu ia mau olelo ana. Ua haawi ia na kumu a me na wahine i ka mamaki e Kaahumanu. Ua hoohanohano maoli no na'lii o ia wa i ka poe e imi ana i ka naauao.
                     Holo aku la o Kaahumanu a ku ma Kaawaloa, no ka make ana o Naihe, aka, ua hala e aku nae oia. Halawai pu iho la nae oia me Kapiolani, Kamakau ma, a me na'lii a pau ma Kaawaloa a ma Napoopoo.
                     A pau ka noho ana o Kaahumanu ma Kaawaloa, holo mai la ka moku a ku ma Kailua, a e noho ana no hoi ko lai poe alii, oia hoi o Kahahana ma, Maheha Kapulikoliko ma, a me na'lii no a pau ma Kailua. A pau ka noho ana ma Kailua, Kawaihae a ma Waimea, hoi mai la a noho hou ma Lahaina, a huipu no hoi me Hoapili ma. Ia wa, hoomaka iho la o Kaahumanu a me Hoapili ma e hana hou i mau Kanawai hoomalu no ke Aupuni, a i kanawai no ka moekolohe a me na kanawai no ka mare ana.
                     A i ka malama o Mei, hoi mai la hoi o Kaahumanu i Oahu, a he mau la no ka noho ana iho, o kona loaa koke no ia i ka mai. Aole i hula ka pule o ka noho ana iho i ke kulanakauhale, o ka hoi no ia iuka o Manoa.
                     Iloko o ia wau la, Mei 17, ua ku mai ka lima o na Misionari, oia o Rev. J.S. Emesona me kana wahine, ua noho laua ma Waialua, a o Rev. W.P. Alekanedero a me kana wahine, ua noho laua ma Hanalei, a o Rev. H. Hikikoki a me kana wahine, ua hoonoho ia, laua ma Kaluaaha i Molokai; o Rev. E. Kapolena a me kana wahine, o Dauta A. Kapena a me kana wahine, na hoonoho ia lakou ma Lahaina. O Rev. C. Porebe me kani wahine, ua hoonohoia laua ma Kaawaloa, i o Rev. L. Laiana a me kana wahine, ua hoonohoia laua ma Waimea, a o Rev. D.B. Laimana me kaua wahine, ua hoonoho ia laua ma Hilo, a o Mr. E.H. Rogete, he Pai Palapala kana hana, ua noho ma Kawaiahao a ma Lahainaluna, a make ma Honolulu. O Rev. R. Limaikaika a me kana wahine, aole laua i noho kihapai ia makahiki.
                     He poe leho ula keia poe i ka haiolelo, a na keia poe i hoopalahalaha loa ae na kihapai o ke ekalesia. O ka hoolilo ana o keia poe kahuna pule i poe kumu ao e hoonaauao maoli ai i ka lehulehu. O ke ao maoli i ka Helunaau, Helukakau, Kakauluna, Palapala Honua, Palapala Aina a me no Kula Sabati. O na wahine kekahi a lakou i hooikaika i ke ao, a he kakaikahi na wahine a lakou i noho hoomakuekue. Aole no paha hoi e hoopoina ia na inoa o Emesona ma, na laua no i ao kula maoli, mai ka Lae o ka Oio a hiki i Waianae.

KA MAKE ANA O ELISABETA KAAHUMANU.

                     I ka hoi ana mai o E. Kaahumanu mai Hawaii mai, a mai Maui mai hoi, maluna o ka moku Mikapako. O na hana nui a kona manao e noonoo nui ai iloko o kona puuwai:
                     1. O ka hooikaika nui e hoolaha i ka olelo a ke Akua, a o ka hoohuli i na'lii a me na makaainana ma ka pono o ka olelo a ke Akua. Ua ike maoli ia ma kana mau hana, ua oluolu a ua lealea kona mau helehelena i ke kanaka, ka wahine e haipule pu ana me ia, a ua oluolu no hoi kona mau maka i ka poe e heluhelu mau ana i na apana o ka Palapala Hemolele. O ka poe e hana mau ana pela, ua lilo koke oia i hoaaloha nona, i hoa kuka, a i mau hoa paina pu ma kana papaaina a me ka hoolako pu mai no hoi i kekahi mau hemahema o ke kino a me ko kona hale, aka, no ka poe hana hewa, a no kona poe aialo heluhelu ole i ka palapala, a haipule ole hoi—e ao oe, a e malama hoi, e ike koke aku no auanei oe i ka ulaula hiki wawe o na maka, a o ka hoomaka koke mai la no ia o ka huhu laka ole ia oe, alaila, e lohe aku no oe i ka leo, "Ke! ke!! ke!!! ke!!!! kahi wahine (a kane paha) hookano." E ike koke oe, he lili niu i ka hewa. A o ke kane a me ka wahine e malama ana i ka pono, ua waipahe a oluolu hoi kona manao ia kane a wahine paha, a he mau hoa aloha ia nona. Ua lilo ka poe haahaa ana i launa ole mai ai i kona wa e noho ana mamuli o kona kapu alii, i mau hoa ohumuhumu, a i mau hoa kukakuka no ka pono o ka olelo a ke Akua.
                     2. Ua manao nui o Kaahumanu, o ka olelo a ke Akua, o ka Palapala Hemolelele, o ke kuhua ia a me ka honua e paa ai ke Aupuni o kana Alii. Ua ike no na mea a pau, aole he oluolu o Kaahumanu i ka poe hoowalewale a me ka poe e alakai ana i ke'Lii Kauikeaouli ma ka aoao hewa. Oia no hoi ke kumu i kaili ia ai mai ke alo aku oke Kahu Alii Liliha. A o kekahi poe alii paha e hoowalewale ana pela, ua pau lakou i ke kipaku ia. Ua like pu no me ia ka malama ia ana o ke kaikamahine alii Hariata Nahienaemi, a e hoomanao ana paha oukou, oia wale no ke kumu i kipakuia ai na kaikamahine alii aialo o Nahienaena, i ka makahiki 1830, oia hoi o Kini Lahilahi, Ulumeheihei, Polupolu a me kekahi poe kaikamahine e ae he nui. Pela no hoi kekahi poe wahine i kipaku ia ai ma Lahaina, oia o Konia, Alapai, Kapoli, Kahololio a me kekahi poe wahine e ae, oia paha ka makahiki 1835. O kekahi o keia poe alii wahine, ua hahau ia i ka laau me ke kipaku pu ia aku. No ke aha la keia? No ka makee alii no hoi e malama i ka pono, aole e lilo i ka hoowalewale a me ka hewa.
                     Pela no ko Kaahumanu manao lili i ka poe hewa a me ka poe hoowalewale i kana Alii. (I na alii hoolohe nae paha ia i kana).
                     3. He manao aloha ko Kaahumanu i na makaainana. I kekahi mau makahiki, ua hoonoa o Kaahumanu i na kai kapu o Oahu nei, aole e hookapu na konohiki, a ua hele wale na makaainana. O na ia kapu a na'lii, oia hoi ka Uhu. Opule. Hee, Kahala a me kekahi mau ia e ae, ua hoonoa ia e Kaahumanu, aohe he mau kai kapu.
                     4. O na hana hookaumaha a na alii i na makaainana, ua hoopau ia e Kaahumanu, me ka papa aku no i na'lii, aole e auhau hookaumaha i na hoaaina malalo, e noho ana ma ko lakou mao aina. O ke kauoha o na'lii i ko lakou mau hoaaina ma ha aina kuaaina e, e hele i ka hana ma kahi loihi.
                     5. He mana nui kukilakila ko Kaahumanu hookupu ana i ka hoomanamana i na akua, i ka hoomanakii, hookahuna anaana, hoopiopio, kilokilo, hoopupule, hoonohonoho akua, ke olioli, ke mele, ka hula o kela ano keia ano, ua kapu loa ia mau mea a pau ia Kaahumanu.
                     Ua kapu ia ka awa, aolo e kanu, aole no hoi e inu. Ina e kanu kekahi, aole ona aina, a e kuheleloa ia oia. Nolaila, wi ka iole, lele kolea ua mea he maluhia. "Hele ka elemakule ka luahine a me ke keiki a moe i ke ala."
                     I ka hiki ana mai o Kuakini mai ka Papu mai e ike i kona kaikuahine, oiai o Kaahumanu ua hoi mai, mai Lahaina mai. A pau ka laua kamailio ana no ka mai, alaila, pane aku la o Kaahumanu ia Kuakini, "He wahi manao kaumaha ko'u ia oe." "I ke aha la?" wahi a ke kaikunane. Pane hou mai o Kaahumanu, "Heaha mai ka hoi kau, ka i no hoi, ua olelo mai hoi o Hoapili ma, i ko hana hookaumaha i na makaainana o kakou ma Hana; ua lawe aku ka oe i ka niu ilaila, a ua hoolimalima i ka auhau hookaumaha i ko kaua mau makaainana; hookahi ka niu, hookahi lei olona ka auhau. A o keia hana au, he hookaumaha ia hana au." Pane mai hoi o Kuakini, "Aole paha na'u,na ke kanaka wale aku la no paha ia hana, aka hoi, ua hoouna io aku no au i mau moku niu ilaila, e hoolimalima i ke olona." Pane hou mai o Kaahumanu, "Aole na ke kanaka wale, aole e hiki wale i ka manao o na kanaka, aia a he olelo aku nau na ke alii, alaila, ikaika ka manao o ke kanaka i ka hookaumaha i na makaainana; a i hana ole ke kanaka e like me kau mau kauoha ka ke alii, alaila, he hoopau ia kona hope. Eia hoi kekahi, ua hana mai nei makou i mau kanawai me ia mau hoahanau o kaua, e hoopau ana i na hana hookaumaha wale a na'lii i na makaainana." Ua hala paha ka manao aloha makaaikana—Ina e olelo i keia wa i ke kaumaha i na auhau a me na kanawai hoopilikia lehulehu wale, e olelo koke mai no auanei na'lii, "Na na Lunamakaainana pu no ka hoi i hana ke Kanawai a hooholo." Naauao no.
                     A no keia mau olelo a Kaahumanu, i mai o Kuakini, "Ua pono no ia mau kanawai a oukou i kau ai, a maluna no nae o ko oukou mau aina, a o ko'u mau aina aohe pono ke kau ia ke kanawai." I noho maialile wale ai hoi ha ka ua o Hilo ia Kanuha. Ua paa ka manao o na'lii e kiola ia Kanuha i Kahoolawe, no ka mawae i ke dala o ka mokupuni o Hawaii. A no ia manao ana o na alii pela, i mai o Kuakini, "E ai no au i ke dala o Hawaii, aia au a make, alaila, hoihoi ke dala o Hawaii i ke Aupuni. A e aho owau ke kiola ia i Kahoolawe, aole o Kanuha, kuu aikane." Kanaka no o Kuakini, a oia paha ka makahiki 1841.
                     I ka lohe ana o Kaahumanu i na olelo a Kuakini, a me ke kupono ole i kona manao, o ka uwe aku la no ia, a wili i ke kapa, pulou iho la a paa. A hiki i ka poeleele ana iho, o ka loaa no ia i ka mai, a i ke ao ana ae, o ka hoihoiia no ia iuka o Manoa, ma kahi i ku ai o kona hale hooluolu ma ka Pukaomaomao, ma ka lihi malu o ka ulu ohia apane me ka ulu kukui. Hookahi wale no pule me ka hapa ke kaa ana i ka mai, a i ka wanaao o ka Poalua, la 5 o Iune 1832, make iho la o Elisabeta Kaahumanu, i ke 64 o kona mau makahiki. Aohe i luia iho kona kino a me kona hanohano ai a maikai.
                     I ka wa kakahiaka nui, ua hoihoi ia mai i ke kulanakauhale, i auamo ia mai maloko o ka manele halelole, a no ka luliluli, ua komo pu laua me ke kaikamahine Kamanele iloko o ka halelole.
(Aole i pau.)

-
HE MOOLELO
—NO—
HAMANALAU,
HANAI A HAWEA.
-
I laweia mailoko mai o na kaao kahiko
Hawaii nei.
HELU 21. KA HOOMAKAUKAU ANA O KAUKANAPOKII
NO NA MEA E PILI ANA I KA LA HILAHILA
O KANA KAIKAMAHINE, OIA
HOI O KUKONA.

                     I ka hala ana'ku o ua mau imi Haku a imi alii nei o Kuaihelani, ua hoouna koke ia ae la kukini mama ma Kahana, ma na makamaka o Uluhoaloha, a ua hoounaia kekahi mau hoewaa ma Halawa, a ma Keanae, a hiki loa kekahi ma Puna, a ma Waipio kahi hanau o Kaihuauwaalua e auhau aku no ka hoolako ana mai no ka la hoao kane o Kukona, a o Kaihuauwaalua no kekahi i hoi i Hawaii. A o kekahi mau Alu ai okana hoi Oahu nei, e like me Waialua, Ewa, a me Koolau, a me Kona nei, Koolaupoko, ua kokua pu aku la, a ua hele aku la no hoi kekahi poe ilaila e noho ai a hiki mai ke kane a ke kaikamahine? a Kaukanapokii. A o na kahiko nani no hoi i hoanaia no Hamanalau, ua pau no i ka hooiliia mai no ua kaikamahine, a ua hoihoiia no o Kukona me ke kupunawahine me Hawea iluna o Kaala e noho ai, a hiki i ka wa e kauoha ia aku ai, oia kona wa e hele mai ai, (e nana i ka ia hoao o o Hamanalau me Hinahelelani, a pela no o Kukona e hanaia ai, hanohano io no.) A ua kauoha hou ia na kanaka e hana hou i mau kauhale, a oi ae mamua o na hale mua a lakou e noho ana, i hale no na malihini e hiki mai ai, aole no na malihini mai o Kuaihelani wale no, aka, no na malihini no kekahi o keia mau aina i oleloia mamua 'enei; ua lako mai la no ia ma kanaka mamuli o ke kauoha alii; ua ulua mai na mea maikai, na makamaka aloha a nui i Kahelekua, aohe wahi hemahema iki o Hopoikeau; a ke liuliu wale la no o ua o Kaukanapokii, hele wale no na kanaka a i-o, aole wahi e oloolo ae ai i hope, ua haohia mai la e kela keiki makaukau nui wale o ka Mokupalewale, a he nani wale no, i loa i ke kali wale no o ka hiki mai, ua hala paha na pule ekolu a me ka hapa o ka hoomakaukau ana, a ua lako io no.

KA HIKI ANA MAI O KA AU-WAA O HOOMAILEANUE
MAWAHO PONO O WAIALUA,
A PAE IUKA.

                     I ka wanaao pulehulehu o kekahi la ae, ua ike aku la na kanaka ala kakahiaka nui i keia mea uliuli, a hauwalaau, a wawa, e hoonakeke ai mawaho iho, eia ka o ka auwaa o ua hunona nei a ua o Kaukanapokii; o ka hoala ia aku la no ia o na kanaka a pau, a hoa mai la i ka imu o ka puaa, mai ka Lae o Kahuku a ka Lae o Kaena ka a o ua mea he imu puaa, ka ilio, ke koelepalau, ka maia kulolo, a me ka ulu, ke kalo kulolo, ahiawela ua mea he ahi, o ka a mai la no hoi mai uka o Kawailoa a hiki i kai o na alii, hele a malamalama o uka, hele no hoi a malamalama o kai, a kohu ike ole ia no ke awa e hookomo mai ai ka auwaa. A no ka manao no kekahi o ka poe malihini o ke ao ae no ia, noho no lakou i waho a no loa ae. I lawa no i ke ao ana, halakika ana kahi waa kialoa o ua mau wahi luna elele nei a Hoomaileanue, a pae i kaha-one, he mea manawa ole ia, o ka waa o ua mau wahi kanaka nei, he mea ole ia i na kamaaina, hiki ana i kahi kau-waa, a hele e auau, a wehe ka malo wai, aahu ke kapa maloo, a hele aku la i hahi o Kaukanapokii, a hai aku la i na olelo a pau, a kii ia aku la ka auwaa e hookomo mai. A ua pae mai la na poe a pau iuka, a ua hookipa ia ae la kela a me keia ma kauhale kamaaina, mai Waimea a hiki i Mokuleia ka paa i na kauhale a me na kanaka, a o kekahi poe no, noho oihuauwaa iho la no. A ua hookipa ia ae la o Hoomaileanue ma kekahi hale nui a nani, a maikai loa, me ka ike oleia mai e na poe e ae, o Kaukanapokii wale no, a me na Kahu o ua keiki la o Kukulu o Kahiki, a pela i hana ia ai na mea e pili ana ia ia, a hiki i ka wa i hoohalawai ai laua me ka moopuna kua-lua a Hawea o lumi o Kaala, kela kuahiwi a ka nani i noho ai.

KA HOAO ANA O KUKONA ME KE KANE ME
HOOMAILEANUE.

                     Ua makaukau mai nei ka poe o ka aina e, a eia lakou ke noho nei me ka makuahonowai. I loa wale no i kamaaina. Olelo malu aku la o Hoomaileanue i na kanaka ona, e ninau aku i ua makuahonowai, i ke ano o ka ike wahine ana 'ku. Olelo mai ia o Kaukanapokii, aia a halii mai ka ohu ilalo nei o Waialua, a nalowale kela a me keia kanaka i kona hoa iho, a pau oe ia a me kekahi mau hoailona e ae, a oia ka wa e ike aku ai kakou e noho mai ana oia i kahi i hoomakaukau ia no ka hoao ana. A hoi aku la ua mau Elele nei a olelo aku la ia Hoomaileanue, ia mau mea a pau a Kaukanapokii i olelo mai la. A he mea maikai iho la ia i ka manao o ka kakou hunona hou, (auwe! o ka'u hunona no ka! o ka maua me Kaukanapokii ole wale.) Ua ike mai la no o Hawea iluna o Kaala i ke ano makaukau olalo o Waialua; hoouna aku la oia ia Kokona e hele i ka auau i ka wai auau o ua makuahine: a hana aku la no o Kukona pela, e like no me na mea i hana ia ia Hamanalau, pela no hoi keia. A ua hoomaka ia no hoi na hekili e like me ke ano mau; a i ka makaukau ana, ua uhi paa mai la ka poe, a ke kokolo mai la ka ohu i na Kuahiwi a ke halii mai la i ka lau laau. A i ka mau na ae, eia ka o Kukona ke noho pu nei me na kanaka ilalo o Waialua, a ke noho mai la no hoi o Konunaileanue ma kela aoao, oiai, aole no hoi i ikeia mai kona hele ana mai a noho pu, mai ke pua nei ka ohu, oia no ka manawa ona i hoouna ia mai ai ma ke kauoha a Kaukanapokii. I ka wa i ike ia mai ai laua e na mea a pau; uwa ka pahe a haalele wale; a o ka poe i ike mua ia Kukona, ua hoohewahewa hou lakou, a ua lilo ae la o Kukona i mea ano e, no ka auau ana i ua wai hoomaemae la o Kaala, o na huehue keia ma ka papalina, ua ho-la ia ae la ia a he ililaumania wale no, he nana'ku no hoi i ka hana a Hawea a he oioi okoa no Maui Hikini.
                     Ua ike ne la kakou ia Kukona me ke kane ana, ke u-noho nei ilalo o ka lanai au-olo hookahakaha o laua, ke nana nei kela mea keia mea, oi mahalo aku a pakuwa wale. A mahope iho o laila, ua hoohui ia ae la laua e like me ko Hamanalau ma hanaia ana, a ua hoi aku la laua iluna o Kaala e noho ai me ke kupunawahine, mahope iho no hoi o ka noho liuliu ana makai o Waialua. A pela no hoi o Hamanalau ma, hoi no hoi laua i ka uka o Oahunui, a ia nahelehele aku paha. Ua olelo ia, ua noho no o Hamanalau me kana kane, a ua hanau mai ekolu keiki na laua, elua keiki kane, a hookahi kaikamahine, a o Kukona no ka lua o ke kaikamahine. A o ka Kaukanapokii mau keiki hoi, e hiki ana i ka elima, elua keiki kane, a ekolu kaikamahine; a ua pi-o ae na keiki elua a Kaukanapokii me Hamanalau, ua noho aku no na keiki a me na moopuna a Hamanalau, na lakou no hoi ia e noho aku i ka lakou pono. Ua olelo ia ma keia moolelo kaao, o Kaukanapokii wale no ka mea i oi aku ke ola ana, a hiki i ke ono o na hanauna, ua elemakule loa. O Kaiaka a me Puaena, na make no laua ma Waialua, a o kahi no e kapaia ana i keia manawa, o ko laua mau hooilina noia; a o Hawea, ua make kolopupu loa oia, aole nae i ikeia kona wahi i make ai, aole no hoi i waiho ia kona kino kanaka ma keia honua, ua lawe ola ia paha A o Hamanalau, ua ike oia i ke keiki a kana mau moopuna, a na keiki a Kukona, a ua make oia mauku o Oahunui, a na Kaukanapokii, a me Hinahelelani, a me Hoomaileanae i kanu ia ia, ma na lualiuna o na opalipali lele-kahako a ke koae o luna o Kaala, me ka ike ole ia o kekahi poe e ae. A ma ka make ana o Hamanalau ua hoi aku la o Kukona me ke kane ana i Kukulu o Kahiki, me kekahi o kana mau keiki a mau moopuna, a o ke keiki hiapo nae, ua noho no ia me Kaukanapokii, kanapokii, a nana no i lawe pu i na iwi o Kaukanapokii i Kuaihelani, o Kiha ka inoa, a i ko Kiha hiki ana aku hoi i Kuaihelani, ua make na makua, o na moopuna wale no koe. A maanei e hoopau ai ka kakou kaao.

MANAO HOPE.

                     E na hoa heluhelu Nupepa, ua liuliu wale ko kakou makaikai ana iho nei ia Hamanalau a me kona kaikunane, ua hele ae nei no kakou i ka loa, a me ka laula, a ua lilo no hoi i mea hoonanea no kakou, a hoowahawaha no hoi, a kohu eha ka moka o kekahi poe o kakou i ka nana ana iho. I ka puka ana mai o ka olelo hoohuoi a kekahi poe o kakou no keia moolelo ma na helu mua. Ua ninau koke au ia L.H. Kulika i ka moolelo a kaao o na aina haole, ina he like wale no ka moekahi ana o ka moolelo oia kanaka; i mai kela, he okoa no na mana a kekahi, a he okoa no hoi ka kekahi, a hui no ma kekahi wahi, a nui wale aku. A malaila, ke noi aku nei au i kekahi poe ike o kakou i ka moolelo oiaio loa o Hamanalau e hoolaha mai, i mea hoonanea na kakou no na la kulolia o ke kau, a me na la omamalu o ka hooilo, alaila, o ka'u kalai pono no ia o ke kuu ae i ke akea.
E aloha auanei. J.H. KANEPUU.
Palolo, Oahu, Aug. 14, 1868.

HALE HUMUHUMU PEA.
W.G. WOOLSEY MEA HUMUHUMU PEA.

UA WEHE AE NEI AU I HALE HUMUHUMU Pea ma ka Hale Pohaku ma Alanui Moiwahine, oia ka Hale Kalepa mua o Walker, Allen & Co., malaila e makaukau mau ai ma ka hana i haiia maluna. Aohe uku no ka hoahu ana i na pea.
Honolulu, Iulai 4, 1868. 344-3ms.