Ka Nupepa Kuokoa, Volume VIII, Number 30, 24 July 1869 — Ka La Hoihoi Ea o Hawaii Nei. [ARTICLE]

Ka La Hoihoi Ea o Hawaii Nei.

O ka la 31 o Iulai o ka makahiki 1843 i hala, he la nui kulaia ia no na puuwai Hawaii a pau mai ka elemakule poohina a i ke keiki hou o ia wa, no ka hoihoiia ana mai o ko kakou hae Hawaii, mai ka lima mai o kekahi haole Beritania oia o Lo Keoki i manao e pakaha wale i ko kakou ea, a e lawe pio i ko kakou hae, me ke ake paha e lilo i panalaau no kona aupuni, aka, aole nae pela ka manao o kekahi Aliikoa i kaulana, e noho Luna nui ana maluna o na aumoku kaua o ka moana Pakipika a pau o ke aupuni o o ka Moiwahine, oia o Adimarala Toma, o ka lawe wale ma ke ano kaili i ko kakou hae, me ke kumu ole. He mau malama ekolu a me na la keu ko kakou noho ana ma ke ano pio, a "moku hae ole" me he mea la e kuewa hele ana, aka, i waena o kela mau la popilikia, nune a mimihi no ko kakou noho ana he pio, aia hoi, hiki mai ana kela Adimarala kaulana a kakou e mahalo aku ai, me ka pauma ea, a hookuu mai la i ko kakou ea e hanu hou, oia hoi ka hoihoi ana mai i ko kakou hae. He mea e ka hauoli, olioli, lealea a me ka hoomanao nui ana o ka Moi, Moiwahine, na Kuhina, na kaukaualii a me na makaainana o kela wa i hala i keia la. Hookaniia na pu kuniahi, hoholaia na papa-aina akea, kai huakai na kanaka ma na alanui, haawiia he mau halawai haipule, a hoomakaia he mau hana hoohauoli puuwai a me kela mea keia mea ku i ka hoomanao no ia la. Ua kukala akeaia hoi e ko kakou Moi lokomaikai a i aloha nui loa ia, Kamehameha III, i hala e aku, e malamaia keia a me kela la 31 o Iulai o na makahiki a pau e kona lahui kanaka ponoi, i la e kulaia ai i ka hoihoiia ana mai o ko kakou ea. I ko makou huli ana aku i ka moolelo o ka lakou hoomanao ana i ka makahiki 1844 ma kela la 31, oia hoi hookahi makahiki mahope iho o ka 1843, ma na nupepa o ia wa, ua ike iho makou, ua hookaniia na pu kuniahi nunui o Puowina i ka po mamua o ka hiki ana mai o ka la hou ano nui, ua kai ae na huakai kukui malamalama ma na alanui, ua kakani ae na mea ano lealea a pau, e hoike ana kela a me keia kanaka iaia iho, me

he mea la, e olioli ana lakou ma ke ano Iubile. Ma ka auina la o keia la, ua haawiia he mau papa'ina ekolu i hiki aku ka loihi o kekahi i ka haneri na kapuai a pela mai hoi na papakaukau elua i koe. Ua hoolakoia na mea ai ano Hawaii a pau, a ua noho mai na Moi, Moiwahine, Kuhina nui, na kaukaualii, na Kuhina, na haole a me na makaainana, a hookahi ko lakou mau ahaaina like ana, e hui no ka hoomanao ana i kela la nui kaulana o ke aupuni Hawaii. He ekolu na la o ka olioii ana o na alii a me na makaainana iloko o keia makahiki no keia la, me ka haipule pu ana a me ka hoahaaina ana. Mahope iho o ia mau makahiki, ua mau ka malamaia ana ma kela a ma keia wahi o na moku o Hawaii nei. E noho nanea wale ana no na makaainana ma ko lakou ano iho, a e kokoke mai ana ka la "Hoihoi Ea," e kalua auanei ka lakou mau puaa, e ahaaina auanei, a pela aku, a pela aku. He kokoke e akahi hapaha Keneturia ka hoomanao mau ia ana o keia la mawaena o Hawaii nei a puni, aka, he mau wahi makahiki helu wale no elua i hala, mahope iho o ka a-e ana ae o keia mau luna aupuni e noho ma ke poo o ka hooponopono aupuni, ua paleaia

ae kela leo kuahaua alii a ka Moi, a ua uumiia iho ko kakou hoomanao mau ana i keia la hauoli. a o na la malihini i ko kakou aupuni a me ko kakou noho ana, oia ka keia mau luna aupuni e hoolaha nei, a e kauoha nei i ko kakou oihana kaua, e ki pu i ka po, a e hoala i na hiamoe he lehulehu wale. Ina paha e ala mai ana o Kamehameha III, mai

ka ilina mai o ka poe make, a ku kino mai i mua o keia honua, a kulukulu mai na waimaka me ka olelo ana, "o ka la nui a'u i kuahaua aku ai, e malamaia e ko'u lahui, i la hoomanao a me ka hoohanohano ana no ka hoihoiia ana mai o ke ea o ko'u aupuni," ke haalele ia nei e oukou, i na paha ua kaawe keia poe hooponopono aupuni hou ia lakou iho, a kulou iho i lalo lilo. Ma ke kumu hea, ma ke ano aha hoi i hooki pu waleia ai keia la kulaia o ke aupuni Hawaii ? No ka loli ana anei o ke kumukanawai ? No ka hoinoino anei i ke aupuni o ka Moiwahine ? No ka olelo ana anei o ke kumukanawai, he hiki wale no ke hoololiia ka hae ? lna hoi ha pela, alaila, ua oi loa aku ka hoololi ana i ko kakou hae o kela ku-1 mukanawai mamua o ke kiepaepa ana maluna iho o keia kumukanawai. Owai la o na alii kanu o ka aina i kue i keia la, a manao e hooki pu ? Owai hoi o na makaainana e uluhua nei no ke kulaia mau loa ia ana o keia la, mai na makahiki loihi loa mai i hala ? I ko ka lehulehu ike ana, ua hookiia, ua haohao lakou, a ke ninau mai nei no na kumu i hookiia ai. Pehea la makou e pani aku ai i na leo nunu mawaena iho o na kanaka nona ka aina ? Aole i akaka ia makou ke kumu o keia kowa ana a na Luna Hooponopono Aupuni o keia wa, i keia la i maa i na makaainana ka malama ana. Ina ua makemake

ole na Kuhina no ka nui loa o na la kulaia o keia aupuni, o pau loa auanei ka pauda i ke kiiia, alaila, he oi loa aku ka pono o ka waiho ana i na la hoomanao a pau o keia aupuni, a e waiho aku i na pauda no na la lealea o lakou iho.