Ka Nupepa Kuokoa, Volume IX, Number 5, 29 January 1870 — Hanaia ka Uwale maoli i Pia Lole. [ARTICLE]

Hanaia ka Uwala maoli i Pia Lole.

E KA NUPEPA KUOKOA E; Aloha oe:–– E oluolu paha oe e hookomo iho i keia wahi hunahuna mea hou e kau ae la maluna, oia hoi ka lilo ana o ka uwala maoli i pia no ka lole, a he pia maikai maoli keia. Ua like loa no me ka pia a kakou e hana nei, a oia hoi ko makou pia e hana nei i na wahi lole, a ua pau ka hemahema o ko Anahola poe i keia wa no ka pia. O na uwala kupono, o ia no na uwala ano keokeo a pau o loko, a ua kupono ia ke hanaia i pia. Aole kupono ka uwala eleele, lenalena a ulaula ke hanaia i pia uwala maoli, o na uwala keokeo wale no ka pono. Ua lako loa ko makou home i keia pia maikai. Ua pau ka luhi i ka pii ana i na kuahiwi a me na kualono. Pau hoi ka lilo ana aku o na wahi hapawalu, hapaha, hapalua dala okoa no ka pia maoli, oiai ua loaa ka uwala, na ka lima iho no e kanu a loaa mai. Na rula o ka hana ana. E hoomaemae mua i ka uwala i ka wai a pau ka lepo, alaila, kau iho maluna o ke pa piula i hanaia a pukapuka, alaila kuolo iho. A pau ia, alaila, ku aku i ka wai, e like no hoi me ka hana ana i ka pia maoli, alaila, loaa mai he pia. Auhea oukou e na makamaka Hawaii a pau, mai Hawaii o Keawe, a Kauai o Manokalanipo, ke paipai aku nei au ia oukou a pau, e kanu nui i ko kakou uwala Hawaii nei, i mea e pau ai ko kakou hemahema, a hoemiia hoi ko kakou mau lilo no ka pia maoli. A o ka uwala no hoi, he waiwai kalepa no ia no kekahi wahi; a ina hoi aole e kuaiia, e hanaia no i pia, a kuai aku no ka hapawalu, hapaha a pela aku, oia pomaikai no ia, loaa hoi ia kakou ka mea e maemae ai na palule alu lilina, na wawae, kuka, a pela aku. E hoao e na makamaka. J. S. LONO. Anahola, Kauai, Ian. 14, 1870. Ma ke ku ana mai o ke kiapa D. C. Murray i ka la Sabati aku nei i hala, ua hoi mai kekahi mau haole kamaaina o keia kulanakauhale i holo aku ma na aina nui o ka honua nei no ka imi ola, imi waiwai, hooluolu ana a me ka lealea. Ua hoi hou mai lakou a pau e ike i na home mokupuni mau o lakou.