Ka Nupepa Kuokoa, Volume IX, Number 30, 23 July 1870 — Page 4

Ka Nupepa Kuokoa

KE KILOHANA POOKELA NO KA LAHUI HAWAII

 

Ka Nupepa Kuokoa.

 

KA LIMA KALA,

—OIA HOI KA—

Wanana Kupanaha o Maharata

HE KAAO NO KA AINA A ME KE KAI

[Unuhiia no ke Kuokoa]

 

MOKUNA IV

Iho aku la no hoi lakou ma ke keena o na kauwa, a loaa aku la no hoi o Rokue ia lakou malaila, ua ike hu no hoi oia a me kekahi o na kauwa kane. A i mai la o Rokue i kona manawa i ninauia aku ai, “O na papalina ona, ua like loa no ia me Lisete, aole no he kanalua ana, a oia maoli no kela. Ua ike maka loa au i kona ano, he ano ahiu nae a me ka makau i ka nana aku. I ka nana aku no hoi, me he mea la e nonoi mai ana oia e kokua aku iaia, aole nae oia i pane leo mai.”

Ninau aku la o Madame Inigelo, “O oukou no anei a pau loa kai ike aku nei iaia?” Ae like mai la na kauwa a pau.

Ninau aku la no hoi o Fabore Inigelo, “O ko wai mau helehelena ka oukou i ike ai?” I mai la o Lucile, “Ua like loa no me ia—me ka mea e manaoia nei ua pepehi ia—mai ke kauhale mai o Sana Pau.”

Pane mai la o Piere, “Ke noi ae nei au i ka lani, e hoikeia mai ia’u. Aole anei kekahi o oukou i puka aku iwaho?’

Olelo mai la o Rokue, “Mahope iho o ko’u hoohikileleia ana mai e kona mau maka ano lapu, a’u i ike ole ai mamua i ka mea like, puka aku ia no au iwaho. I ko’u hiki ana aku iwaho, he leo wale no ka’u i lohe i ka pae ana mai iloko o ka lewa, a i ole ia, iloko paha o ka hale, aka nae, ua lohe maopopo lea aku au i ka nakeke o na huila o ke kaa, ma ke alanui e hiki aku ai i Motela.”

Ekemu mai la no hoi o Piere me ke ano pihoihoi, “He mau huila kaa io no anei?” “Ae, i kuu manaoio maoli, me he mea la he wahine e lawe ululu ia ana i kahi e.”

Huli ae la o Piere i kona makuakane, me ka ninau ana, “Aia no anei o Nalo-a (Firefly) iloko o ka hale lio? E ae mai ia’u e hauhoa iaia me na mea e paa ai ke kaa.”

Ia manawa, hake pono mai la ka makuakane me na hiohiona kuoo, i ka i ana mai, “E kuu keiki, heaha na manao auwana nana e hoopoluluhi nei i kou mau noonoo?”

Pane aku la o Piere, “E ka makua, e pono au e huli pono i ka hopena o keia mea. Aole no i aumee loa, a o ka hora umi wale no keia, a o Jean ke hele pu me a’u. E pono ia oe ke hookuu mai ia Nalo-a—ina oe e hoole mai, e hele no au i Sana Pau, e hoolimalima lio ai no’u ano.”

“Ua oluolu ia oe ke lawe ia Nalo-a, e Malama pono nae iaia. E malama nae oe e kuu keiki, o lilo keia i mea na kou poo e hoauwana ai ia oe.”

“Mai hopohopo no ia mea,” wahi a Piere, a hele aku la ia e houhou ia Nalo-a; aole no hoi o Jean i hookaulua iho i ke kukua ana mai iaia; a o ua lio nei o Nalo-a, ka lio mama loa ma ua mau wahi la a pau.

E hoomaka ae ana ka mahina e puka ia lau i kau ae ai iluna o ke kaa, a aole no hoi i upuupu iho, ike lea ia aku la e laua nei na mala pua a me na mahinaai a pau o Matela. O Matela, oia kekahi o na kulanakauhale kanu waina kaulana o Farani.

Ninau aku la o Jean, “Heaha la kou manao no keia mea he lapu? E li ia no au ke manaoio ole no keia mea. Pehea no la e hiki ai na uhane i pepehiia ke moe malie? Aole o’u manao e moe malie ana lakou.”

Pane malie mai la o Piere, “Aole o’u manao he lapu ia.”

“No keaha! aole anei ou manaoio ia mea? Eia ke ala e holo ponoi ana i iloko o Matela, a eia no hoi ke ala e holo ai i Sana Pau;” pela aku o Jean.

I mai la o Piere, “I Sana Pau no au e hele ai, aole i kahi e ae.” Hooma-lo pono mai la oia i na kau kaohi o ka lio, me ka uhau ana aku i ka lio, a kani aku la ka welelau o kana huipa, a oia no hoi ka manawa i hoomahuahua hou ia aku ai ka holo o Nalo-a.

Pane mai la e Jean, “Ke manao nei anei oe, eia no o Lisete ke ola nei?”

Pane mai o Piere, “Ae, a eia no hoi me kela kanaka hoopoino wale.”

A i ka wa a ka mahina i puka pono mai ai, a molale moaelae mai la kona malamalama, me he kapa hau la no Lebanona, oia ka wa i ike ia aku ai ke kaa lio o Piere ma, e hooiho aku ana mai ke ahua aku, a ma na aoao ae hoi o kekahi puu, a hiki aku la i ka huina alanui mua o Sana Pau. Ninau aku la o Piere i ka makai, ina paha ua ike oia i kekahi kaa lio—hai aku la no hoi ka makai, ua ike no oia he kaa lio, i ka wa nae aohe i hiki pono ae ka mahina. Pela no hoi i ninau hele aku ai oia i ua makai, a oia huina like no ka lakou i pane mai ai.

Ia wa no hoi, ua anelai mai la ua kauhale nei, a ane lulul nehe ole ka makani, a mahope iho o na hauwalaau ana o ke ao a me na hauoli ana o ka la. O na poe i hooluheia e na wai ona, ua hoi nui aku lakou i ko lakou mau home, a i ole ia i ko lakou mau hale hookipa paha. Maluna o na kahua o ke alanui mehameha, o na kukuna mahina wale no e malino ana na mea ike ia, a me na malu aka o na hale. Ma na uwapo hoi, e ku oni ole mai ana na moku ma o a maanei. A iluna ae hoi o ka lewa, ke imoimo mai la na hoku kakaikahi, a ke uhola ae la hoi na malamalama opulepule o ka mahina i ka moana akea. Ma ia manawa pu no hoi, he leo hamumu nahenahe pu kekahi i loheia, a hookele pololei aku la o Piere i ke kaa ma kahi i pae mai ai ua mau leo la; a hiki aku la i kekahi wahi uwapo uuku. Hele mai la kekahi makai mai ke kauwahi kuono poliuhu mai ma kapa o ke alanui; a i kona hookokoke ana mai i ke kaa o Piere ma, o ka ninau koke aku la no ia o Piere, “E ka hoa’loha maikai, he mau moku anei kekahi i holo aku nei?”

Pane mai la ka makai, “Ae, ekolu mau moku i holo aku nei—elua mai nei aku, a hookahi mai ka uwapo ae o Le Pona.”

Pane mai la o Piere, “Nani ka poino nui!” A ninau ae la hoi o Jean, “I ka manawa hea ko lakou holo ana?” Pane mai ka makai, “Mai ka hora 6 a hiki i ka hora 10—o ka moku hope loa aku nei nae, aole paha i ekolu mile kona kaawale mai ka aina nei aku.”

I aku la o Piere, “E ka hoa, e uku pono no au ia oe, ina oe e hai mai ana i ka oiaio?”

Wahi a ka makai, “E hai no au ia oe i ka oiaio me ka uku ole. Heaha la kau e makemake nei e ike? Aole a’u mau mea huna mai ke aupuni mai, aka nae, oia no ko’u ano.”

Pane aku o Piere, “He makemake wale no au e ike, a e lohe hoi mai a oe mai, ina he kane a me ka wahine pu kekahi i kau aku nei maluna o ka moku hope loa.”

“A!” wahi a ka makai, “aole au i ike ia—ke hai aku nei au i ka oiaio, aole au ma ko’u kulana i ka wa i holo aku nei o ka moku Mermaid, ua hoounaia au ma kekauwahi e aku.”

Huli e ae la o Piere me ka i ae, “Oia ano pouli no e like me mamua.” I mai la hoi o Jean, “Ne keaha la wau i manao mua ole ai i kinohi? Owau ka hoi kekahi naaupo. Aole anei oia i kuhikuhi mai i ke ano o ka’u wahine ma keia hope aku iloko o kekahi omole aniani? Aole anei oia i hai mai ia’u i kela mea nana i hoano e i ko’u poo? Aole anei oia i hai mai ia’u i na mea a pau—na mea i hala, o keia wa ano a me ka wa e hiki mai ana? Ae, nani io no kuu naaupo, i kuu hoopoina ana iaia, aole au i hoomanao mua i kinohi.”

“A! ke olelo lalau wale nei no oe i keia manawa,” wahi a Piere.

Aole no hoi o’u manao e hoopuka aku i keia mea, aka hoi, no ko’u ike ana a me lakou nei ae aia oe ma ka aoao hoole i ka bila a J. C. Laiana i hoopuka ai, nolaila, hoomanao ae la au i kau mau olelo i puka ae ai mai kou waha ai poi ponoi ae no, oia hoi ko la e muhee i hele ae ai ma Paukaa, mamua iho o ka la koho balota.

A olelo iho ai oe ma ka puka o ka hale kuai o ka poe hui mahi-ko o Paukaa, me ka leo nui a wiwo ole. “E na kanaka o Paukaa nei, mai koho oukou ias G. W. A. Hapai, e koho mai oukou ia’u i pau ko oukou pilikia, na’u e hooikaika imua o ka Ahaolelo i pono no kuu lahui, pela aku a nui wale na olelo.” U.—Pau io ka pilikia la, ke kau mai la ka hoi ma ka noho kapae o na wahine haole, aole hoi o keia makahiki e hala ana ia aia hoi i-o wahi a Pahia.

Aole no paha oe i ike ike he pilikia ko makou e noho ia aku nei la, no keia mau pauku a kekahi mau hoa hanohano au e koi nei, e hoopau, aole ho o na kane wale no kai kepa ia, he mau wahine kekahi i hoopaa palapala ia i mau lima hana. Ma ka apana a’u e noho nei, ua kepa ia kekahi mau wahine i mau lima hana, a maloko o kekahi o keia mau wahine, ua palua ka hapai ana i ke keiki, aole nae e hanau mai e ola ana, hananu mai no ua make, no ka wela o ka opu o ka makuahine i ka hooikaika i ka hana.

Aole anei keia he pilikia no kou lahui a me ke Aupuni? I ko’u manao he pilikia no ia no ka lahui a me ke aupuni, no ka mea, aole aupuni ke ole ka lahui kanaka.

E ka poe o Kaupakuea i koho ai ia Muhee a me Onomea, a me Kaiwiki, a me Amaulu, ke ike ae ’la oukau i ka hana a ka L. M. a kakou. Ae ue ike makou.

O Mr. Hikikoki hoi, he haole keia luna a kakou i koho ai, a he papa hana ka kona mau hanau mua e hana nei, a ua kepa laua i mau lima hana no laua, ua olelo kaena ae hoi keia luna o kakou, ua hooko pololei ia ke Kanawai o na Haku a me ke kauwa e kona hanau mua. Ae, ua ike io au, ua hooko pololei ia. Penei, o Pooloa, he kanaka ua kepa ia malalo o laua, a ua ike o Pooloa i kekahi hemahema mawaena o ka haku hana, oia hoi, ka nele ana i ka ai ole iloko o kekahi mau la hana, a pilikia na kauwa i ka pololi no ka ai ole, nolaila, hoopii a Pooloa i ka L. K. Keena, aole i loaa ka pomaikai ia Pooloa a hiki i keia la. E keku mai paha auanei ua luna haole nei a kakou ia’u heaha la hoi kana ke keku mai, ike ia hoi na iwi o Hua i ka la. Me ke aloha i ka Luna o ka nupepa Kuokoa.   G. W. E. Makaainana.

Hilo , Hawaii , Iune 27, 1870.

 

O ka Awa anei ka mea e lealea ai o

KA HIAMOE? O KA RAMA ANEI

Ka mea e ikaika ai ke kino?

 

E KA NUPEPA KUOKOA E; Aloha oe:--

 

Ua nui paha ka poe i hoike mai i ke ino io o nei mea he awa, aka, aole no paha oe e uluhua ana ke lohe hou aku. O ka awa, oia kekahi mea waiwai nui o Hawaii nei, mai ka wa kahiko mai a hiki i keia la. I ka wa kahiko, o ka puni nui paha ia a ko kakou mau kupuna, o ka inu awa; a mai laila mai ka mao ana a hiki loa mai i keia au hou, a nolaila, ua mau loa ka inu awa ana iwaena o keia lahui.

I ka wa aku mamua o ka hiki ana mai o na kukuna o ka malamalama i Hawaii nei, aole paha i manao na kupuna o kakou, he mea hewa ka inu awa, nolaila, ua hana lakou me ka lealea palena ole. Ma keia mea hoi, ua lawe mai lakou i ka awa, oia kekahi kumu hana o ka lakou lapaau. Penei hoi i akaka ai; ina he mai ko kekahi kanaka, alaila, olelo mai la ke kahuna i ka mea mai, “he mea ka laau e ola ai, he puawa-hiwa a me ka puaa,” a pela aku. Inu ke kahuna a ona ole, alaila, inu hou no; a pela mau no e hana ai. O ka ili nae ke hele a nakaka, me ka olelo iho, “hunehune maikai na lima a pahee ka ili, a nani hoi me he maka moena makalii la, ula weo na maka me he kanaka luu kai la.” Aole nae no ka lapaau io ana, aka, no ka lealea hiamoe wale no. A pela wale no ka lapaau ana ina ia ano a hiki mai i keia manawa, me ka hoopunipuni makau ole.

E pane mai paha auanei kekahi, “Kuhihewa oe!” Aole au e kanalua ke pane aku, o kahi huluhulu awa no ke kumu lapaau a na kahuna Hawaii; a ina aole ia, ole loa e noho mai kahi aumakua lapaau, aole loa no hoi e ola ka mai.

Eia hoi kekahi; aia ma na hale wiliko a ma na wahi e ae no paha, o ka hapanui o na kanaka, he inu awa wale no, a he uuku wale no ka poe manaoio hana. I ke kii ana mai o ka luna e hele i ka hana, “e kau ana no ke poo i ka uluna, o Welehu ka malama.” I pane mai ka hana o ka luna, E hele hoi paha i ka hana. Eia nae ka ia la, He mai au la. He buke nae ka ka haole e kope iho no kou mau la, i ae ai oe he pilikia i ka hana a ka haole; he pilikia ka hoi ko hoolilo i ka hapaha nui i ka awa, i kumu e lealea ai ka hiamoe ana.

O ka rama, oia kekahi mea ino loa i ike ia ma Hawaii nei. He poe akamai ko Hawaii nei i ka hana ana i na mea ai a momona hi i rama, oia ka ipuhaole, ka ohia, ka hala-kahiki, ka papipi, uwala, ko, maia, ki a pela aku, i mea inu e ona ai a ikaika hoi ke kino i ka hoolapa ana. Aole paha i kapa mua ko Hawaii nei ia mea, “he wai hooikaika kino,” aka, i ka hiki ana mai hoi o ka lakou nei ae wai ulaula, kapa aku nae ko Hawaii nei, he “wai hooikaika kino.”

Maphope iho o ka haiki ana mai o ka rama ma keia pae aina, ua hele nui na kane, wahine ma na hale kuai rama, a hui aku hui mai, “hui kalo i ka nawao.” O ka hakaka me ka uhauha ka mea i ike nui ia malaila. Mai laila mai ka hoomahui o na opio i ka inu rama a hiki mai i keia manawa, a minamina ole ino i na $2.50 ke lilo na ka omole rama hookahi.

Ma ke kulanakauhale o Honolulu, ma ka nana ana i na opuu hou, e hele wale ana ma na alanui, me na helehelena hoohie, me ka manao nui e loaa kah hapaha, haule aku ma Halehai, pa wahi kiaha, a o kona iho mua aku la no ia ma ia alanui, a o ka hope o ia, o ka holo i ke okohola, a laki ka moku, hoi mai me ka puu dala nui, a i o a ia nei, a i na kiaha rama hoi, o ka puehu ae no ia. Ua ike nui loa ia keia iwaena o ka poe holokahiki, ua lilo ka lei a me ka rama i waiwai apau no ia poe, me ke kaena iho, “aloha no hoi ka wai hooikaika kino o ka aina.” Aole nae paha ma Honolulu wale no ia mea, eia no ma na apana kuaaina nei kekahi e hana mau nei i na wai awaawa. Ke lohe iki ia ka he pinika (rama) ko kahi o mea ma, he manawa ole noho aku ana ilaia; a pela ia wahi aku ia wahi aku. Ma io hana ana, ua haalele ka makua i ke keiki, o ke kane hoi i ka wahine, a o ka wahine i ke kane, a lilo nui aku la o i a lealea o ka inu rama. O ka ilihune a me ka aea haukae ka hopena o ia hana.

Nolaila, e o’u hoa opiopio o ka imi naauao a me lakou ne ae hoi na hoa i ka malu o Auwahikika, ano ka manawa e huli mai ai a haalele i na mea ona. Eia la he mea hou, ua hiki mai ka Iubile. O ke kanalima keia o na makahiki o ka olelo o ke ola ma keia pae aina. Ke loheia nei ma kela pea keia pea o ka aina, ua awakea o Hawaii nei i ka pono. Ke hai aku nei au me ka oiaio, o ka hapa hea la o ke Aupuni Hawaii nei kai awakea? O ke kulanakauhale nui anei o Honolulu, o Lahaina, Hilo a me na wahi kuaaina o ke mau pae moku anei? He mea maopopo lea, o ka hapakolu, ke kau nei ka la maluna pono o kona mau aoao, a o ka elua hapakolu, ke kau kapakahi nei ka la ma Waianae, he ano ahiahi ko na pali Koolau. Ua pau au maanei.

“E huli mai e na auwana nei,

Eia ka Iubile nani e.”

                                                                                    JOHN KAWELAU

Makawao, Maui, Iulai 7, 1870

 

Poe Aloha Makaainana:                      Poe Hana in o Makaainana

Laina C. J.                                           Hikikoki

Pilipo G. W.                                        Wahine

Asa Hopu.                                           Kumahoa

Kepoikai N.                                         Matina Toma

Kaluapihaole J.                                    Halemanu

Kamikana H.                                       Kaai Simona

Kamakau S. M.                                   Aholo

Naili J. L.                                            Hanaike

Kaukaha D.                                         Kahaulelio

Kuapuu S. K.                                      Kaiue

                                                            Ailuene

                                                            Kalama

                                                            Kale Kauka

                                                            Naukana

                                                            Komoikehuehu

                                                            Wili Laiki

            Ke noi nei au i kou lokomaikai e ke Kuokoa, e hoolaha mau i eha hebedoma ma kou nupepa, i maopopo mai i na makaainana ko lakou mau luna.     KAMAAINA

            Honolulu, Iulai 21, 1870

 

HALE KUAI BUKE

—O—

HENERE M. WINI

 

Aia ma Honolulu Hale, oia ka Hale Leta, aia malaila

he wahi e kuai aku ai i na buke haole he nui wale

O KELA ANO KEIA ANO.

BUKE Kula haole,

KUHIKUHI o ke kanaka Hawaii,

NA OLELO kike, (Phrase Book)

BUKE PA, KO, Li, (Carmina)

A ME NA BUKE KULA E AE HE NUI WALE.

Malaila no na Buke uo ke Kakau Waiwai no kela oihana keia oihana,

mai ka mea nui a ka mea liiliii.

AIA NO HOI

NA KANANA letter rulai a rula ole ia,

PENI hao maikai loa,

INIKA, Ipu-inika

PENIKALA ULIULI, eleele a ulaula

KUMU Peni,

WEPA ulaula a eleele,

WAHI palapala ulaula, keokeo a eleele (mea kakau)

PAPA POHAKU a me ka penikala pohaku,

INIKA ELEELE, ulaula a uliuli.

Me kekahi mau mea e ae no he nui no na Kula a me

na Oihana Kakau. A he makepono no ke kuai

ana malaila no keia mau mea. E hiki no i

na kanaka maoli mai Hawaii a Niihau

 ke hele malaila e kuai ai.

436-6ms.