Ka Nupepa Kuokoa, Volume IX, Number 48, 26 November 1870 — Ka Nupepa Kuokoa. La Kuokoa o Hawaii. [ARTICLE]

Ka Nupepa Kuokoa.

La Kuokoa o Hawaii.

1. E ku kakou a olioli pu, No ka la Kuokoa o Hawaii nei, Ua hiki no ia kakou, Ke haanui a haakena, I ka pomaikai o ka lahui, No ka la Kuokoa o ke aupuni. He la kupanaha no keia, I ike ole ia mamua, Ia Kauikeouli me Liholiho, Me na la mua o Kamehameha. 2. Ke ku mai nei Hawaii, Ua hauoli na kuahiwi, Ua haanou o Maunakea, Ua hipahipa o Maunaloa, Hu-lo-hu-lo o Hualalai, No ka la Kuokoa o ke aupuni. He la kupanaha no keia, &c., 3. Ke ku mai nei o Maui, Me na hono o Piilani, Ke ninau nei lakou, Auhea ka la hooihoi-Ea, I maa mau ia makou, Eia ka he la Kuokoa. He la Kupanaha no keia, &c., 4. Ke ku mai nei Oahu, Me ke kuahiwi o Kaala, Ua ala mai Daimanahila, Me ka puu Puowina, Ua hauoli a olioli, No ka la Kuokoa o ke aupuni. He la kupanaha no keia, &c., 5. Ke ku mai nei Kauai, Me na moku au i ke kai, No lakou ka haupu ana, Ka manao haohao maloko, I ka hiki ana'ku o ka lono, He la Kuokoa no ke aupuni. He la kupanaha no keia, &c., W. D. N.