Ka Nupepa Kuokoa, Volume X, Number 8, 25 February 1871 — Make emoole. [ARTICLE]

Make emoole.

Ma ka Poaha, oia ka la 26 o Ianuari iho nei, make emoole iho la o Daniela Auwae ma Halaula, Kohala Akau. Penei ke ano o kona make ana: Ala ae oia ma ke kakahiaka nui, me ka manao e hele i kana hana he amara, no ka "Ahahui o Halawa," he 4 paha makahiki mamua, a he hana nui kana ma ia wahi. Hele aku la oia mai kona hale aku la oia mai kona hale aku, a kokoke mawaho o ka hale o Mokuhia, aole nae he kanaka o ia hale- iaia mawaho iki mai o ka hale, hele aku la paha oia e hana lepo; iaia nae malaila, o ka make iho la no ia. A ma ke awakea ana ae, loaa iho la kona kino kupapau e waiho make ana, a hoihoiia aku la a ka hale hou no ana i kukulu ai a paa; a ma ka po ana iho, hiki ana ka Aha Jure Koronelo, e huli a e nieniele i ke kumu o kona make ana, me ka manao paha ua pepehiia, a i ole ua ai paha i ka laau make, aka, aole nae i loaa ke kumu o ia imi ana. Aka, ma ka hooiaio ana mai a ka poe i ike nona, ua hooia mai lakou, oiai oia e noho ana ma ia hana, (amara) ua loaa oia i kekahi mai, he eha ma ka umauma, aia a loaa koke i ka lomiia, a laila, oluolu. Elua makahiki a oi aku ka loaa ana o keia mai iaia. I ko ai hoi ka mea a ka palapala i i mai ai, "Aole oukou i ike i ka la a me ka hora e hiki mai ai ke Keiki a ke Kanaka, nolaila, e kiai oukou a e makaala hoi." Ua hanauia oia ma Waimea, Hawaii, a ua haalele mai oia he wahine, he keiki, he mau kaikuaana a kaikaina, a he makuakane hoi, e kanikau aku ma keia aoao o ka honua. A lohe kona mau kini e noho ana ma Waimea no keia lono kaumaha, o ko lakou hele kanikau no ia e ike i kona kino make, a nona hoi keia wahi kanikau malalo iho nei: 1. Kanikau he aloha no Daniela, No ka pua roselani ku i ka wao, Ua mae i ka hora kakahiaka, Kupilikii ai kahi manao. Cho.— Ua hala e. ua hala loa, I ke ala hoi ole mai, Ke uwe kanikau nei na hoa, I ka mea minamina ua hala e. 2. Aia ka lono i Puuloa Home, Lohe ai na kini o ia kupa, Ka Alihikaua o Perusia, Hoeu na koa e naue mai. Cho.— Ua hala e, ua hala loa, &c. 3. Ka ihona olu ia o Keawewai, E ake ka manao o ka ike aku, I ke oni ae a Kalahikiola, A ike i ka Hui o Halaula. Cho.—Ua hala e, ua hala loa, &c. 4. Ka iho'na i ka pali o Halawa, Anoano ke aloha e kau nei, A hui me na kini pua rose, Pulu ai kaua la i ka wiai. Cho.— Ua hala e, ua hala loa, &c. 5. Ka wawalo a ke kai o Hapuu, Hui-lua i ka pali o Papaloa, O ke kino wailua ka ikena'ku, Ka waiho i ka home o Halealoha. Cho.— Ua hala e, ua hala loa, &c. 6. O ka lei hulu namo ka mea'loha, O ka hoa kui lima o ke ahiahi ; I ka Ahahui au aole oe, I ka home kuihao o Baluwina. Cho. — Ua hala e, ua hala loa, I ke ala hoi ole mai, Ke uwe kanikau nei na hoa, I ka mea minamina ua hala e. Mrs. Rebeka Auwae. Waimea, Hawaii, Feb 15, 1871,