Ka Nupepa Kuokoa, Volume X, Number 25, 24 June 1871 — Page 4

Page PDF (1.58 MB)

This text was transcribed by:  Halena Kapuni-reynolds
This work is dedicated to:  Awaiaulu

Ka Nupepa Kuokoa KE KILOHANA POOKELA NO KA LAHUI HAWAII.

 

NA KUMU PULE HUI NO KELA ME KEIA LA O KA MALAMA.

IULAI 1, 1871

 

1. No ke aupuni o ke Akua, i hiki koke mai a puni ka honua.
2. No ke aupuni o Hawaii, ka Moi, na ‘lii, na luna, me na kanaka.
3. No na kahu ekalesia, me na kahuna haiolelo a pau.
4. No na ekalesia Hawaii a pau.
5. No na ekalesia haole, na kahuna haole, me na haole a pau.
6. No ka Aha Euanelio Hawaii, kona Papa, me na aha mokupuni a pau.
7. No na Kula Sabati Hawaii, na kahu, na kumu me na haumana a pau.
8. Na kula la, hanai, kaikamahine, kula nui, me na kula a pau.
9. No na mea mai Pake, a me na mai a pau.
10. No na kumu, na ekalesia, na kula, me na kanaka o Maikonisia
11. No na misionari, na ekalesia, na kula, me na kanaka o Nuuhiva.
12. No na paahao a pau o Hawaii nei.
13. No na mea i hoole kaua, i okiia ke kaua ma ka honua.
14. No ka poe e hooikaika ana e kinai i na mea ona ma ka honua.
15. No na mea e hoolaha ana i ka Baibala ma ka honua.
16. No na Nika i hookuuia mai ka auamo hooluhi aku.
17. No na mea a pau e noho ana malalo o ka hookaumahaia.
18. No ka Papa Misionari ma Bosetona.
19. No na aha misionari a pau ma ka honua.
20. No na misionari a pau ma ka honua.
21. No ka Uhane Hemolele, i iho mai ia maluna o na ekalesia a pau.
22. No na lahui Mahometa.
23. No na Hebera e noho makapaa ana ma ka honua.
24. No na kanaka hahai i ka Pope.
25. No na ohana, na makua, na keiki
26. o ke aloha nui, a me ke kuikahi ana o na haipule a pau. Ioane 17
27. No na kula kahuna a pau.
28. I ka Haku nona ke kihapai, i hoouna’ku i na lawe hana a lawa.
29. No na Pake ma Hawaii, a ma kela a me keia lahui.
30. No ka lehulehu o na kanaka holo ma na moku.
31. No ka inoa o Iesu, i lilo koke ia ka inoa lanakila ma na aina a pau, a i inoa e kukuliia ae na kuli a pau.

 

SUBJECTS FOR PRAYER  FOR EVERY DAY IN THE MONTH

JULY 1, 1871

 

1. That the Kingdom of God may speedily come throughout the world.
2. For the Hawaiian Kingdom, its King, chiefs and people.
3. For all pastors and ministers of the Gospel.
4. For all the Hawaiian churches.
5. For all foreign churches, pastors, and people.
6. For the hawaiian Evangelical Association, its Board, and its Island associations.
7. For the Hawaiian Sabbath Schools.
8. For all the schools, both day and boarding schools.
9. For the lepers and all sick people.
10. For the Micronesian Mission.
11. For the Marquesas Mission.
12. For all Hawaiian convicts.
13. For all opposed to war, that it may cease.
14. For Temperance Societies, and all who labor to put an end to intemperance.
15. For Bible Societies.
16. For Freedmen.
17. For all who are living in bondage.
18. For the Foreign Missionary Board in Boston.
19. For all missionary associations.
20. For all missionaries.
21. For the Holy Spirit to visit all the churches.
22. For Mahomatans.
23. For the Jews.
24. For the Papists.
25. For families, parents and children.
26. For love and union among all Chrisitians.  John 17.
27. For all theological seminaries.
28. To the Lord of the harvest, that He will send forth laborers.
29. For the Chinese here and elsewhere.
30. For all seamen.
31. The name of Jesus may soon triumph in all lands and every knee bow to Him.

 

Malama o piha ka pu

 

            Ka pu aha hoi keia? ka pu ki manu, ki holoholona, ki kanaka paha.  A piha i ke aha? i ka pauda, i ka lu, a poka paha.
I kekahi manawa, e waiho wale ana ka pu ma ke kihi o ka hale, aohe mea maloko, he  mea makau ole ia, hiki no ke lawelawe, hulihuli, milimili, puhi maloko, kuhikuhi ki i ka paea, me ka makau ole.
            I kekahi manawa, e waiho ana ia me ka piha i ka pauda, ka lu, ka poka, a he mea makau ke lawelawe, a hulihuli, a milimili, a kuhikuhi a ki i ka paea, o pahu ka pauda, a lele ka lu, ka poka, a ku i ka mea i alohaia a eha, a hina, a make paha.
            Komo kekahi kanaka ui iloko o ka hale i kekahi la, a ike he pu e kau wale ana ma ke kihi, aole nae oia i ninau i ka piha, i ka piha ole, aole hoi i nana a hoao i ka akaka, aole i malama, aole ao iki.  Lalau oia i ka pu me ka naaupo. me ka noonoo ole, a kuhikuhi paani i kekahi kaikamahine maikai, a ki wale aku no.  Pahu ka pauda, lele ka poka a ku i ka naau o ua kaikamahine nei; hina oia ilalo, holo ke kanaka e nana, aia ka, ua make! Pihoihoi loa oia a ane pupule, a manao e hoopiha houe i ka pu a ki ia ia iho a make pu me ke kaikamahine, no ka nui o ke aloha---e hoopilipili ana no laua, a ua kokoke loa ka manawa e mare ai.  Naaupo loa ea! aole i nana’e i ka pu i akaka ka piha. ka piha ole.
            E makau i na pu ke ike aku.  Mai lawe, a hulihuli, a kuhikuhi, a ki wale aku; malama paha o piha i ka mea make.
            Ma ka nana’ku ua kuhi oe aole paha i piha, no ke aha i piha ai?  aohe enemi e hele mai ana.  He pu no nae ia, he mea hoopiha, he mea ki a make kekahi mau mea.  He mea makau no, ke piha, ke piha ole.  E makau i ka lawelawe, mamua o ka ninau a hoao ana. Aole akaka kona ano ma ka nana wale aku no.
            Ea, he nui na mea i like ke ano me na pu, Ma ka nana mua uku, aole akaka ka piha, ka piha ole, ke ano maikai, ke ano hewa, ke ano ola, ke ano make.  E malama nae o piha ka pu.
            1. He kanaka malihini paha he kane, he wahine, ua akamai i ke kamailio, a kamakamailio a nui wale, e kaena ana, e haanui ana, e hoouka mai ana i kona manao no kela a no keia mea, no ka mare ana, no ka waiwai a mea e waiwai ai, no na oihana— nona hoalauna, e hoohalahala a hoahewa ana—e makau i keia pu; mai wikiwiki e lawe, e launa, e hui, e ae, e hoapono—malama o piha i ka pauda—i ka poke—a kiia mai oe a eha, a make—Alia—e nana—e ninau—
            2. He kanaka noi i ke kala kokua no kekahi luakini, no kekahi mea e paha—mai wikiwiki e haawi aku—malama he pu makau keia, ua piha i ka hoopunipuni e nana—e ninau e mamua, he palapala hoapono, hooiaio anei kau? auhea? e hoike mai.  He noi hoopunipuni kekahi poe, he noi apuka i mea e waiwai ai lakou.
            3. He poe i kapaia, he poe kahuna lapaau, a akamai i ka hoola, i ka mahiki i na daimonio, na mai ino.  Mai wikiwiki i ka  lawelawe i keia mau pu. Malama o lawe hewa i keia mau pu.  Malama o lawe a kiia mai oe, ke kanaka mai e ae ana e lapaauia. Alia oe e ae—he mau kanaka hoopunipuni paha a lapaau hoomanamana i loaa kou waiwai ia lakou—a mahope make oe.  He nui na kanaka hoopunipuni ; e makaala o puni ia lakou.
            4, He poe i kapaia he poe kahunapula e kaapuni ana me ka paipai e huli oukou ma ko lakou aoao e bapatemaia, e luu iloko o na kahawai—a, o ka poe huli; e ola; a, o ka poe huli ole, e pai i ka make.  He mau pu keia—e makau i ka milimili i ka lawelawe —malama, ua piha i ka mea make, a ma ka lawe a ki ana, e pahu ka pauda, e lele ka poka a ku ia oe, a hina, a make iho.
            5. He hale tiaka, he hale lealea, hulahula he hale kuai bia ; he mau pu keia, e makau i ka hele wale aku—e milimili, e hulihuli, e ki wale i ka paea—malama o piha i ka mea make—a ma ka lawelawe wale, e haule ka huna ahi a wela ka pauda, a wela kou maka, kou waha, kou lima, a komo ka poka iloko o kou puuwai, a auwe oe i kou make naaupo ana.
            6. He wahine opiopio, a maikai oe, ua ilinae, a puni lealea paha, a manao e  loaa kou waiwai, kou lole nani, kou ola kino, ma ka lawe ana i ka palapala leikini, a  lilo oe i wahine hookamakama, i wahine manuahi paha—E makau oe ea, he pu ka palapala leikini, he pu ka noho manuahi—ua piha ka pauda a me ka poka ; a ma kou  lawelawe a milimili ana, e wela ana ka pauda, e hoaia’na oe i ka poka a haule a make.
            7. He pu ka wahine hookamakama—he pu ka wahine manuahi, he pu ke kane manuahi—ua piha i ka pauda, a lele ka poka, a ku i  ka naau o ka poe e lawelawe, a hulihuli ana a make—Mai hoopa, mai lawelawe, ke makau oe i ka make, a makemake i ke ola.
            8. He nui na pu e waiho ana me ka manao ia e kekahi poe, aole i piha, e hiki ke  milimili a hulihuli a paani wale me ia, me ka makau ole ; ua piha nae i ka pauda, i ka  poka—i na mea make ; oia na hale kuai rama, kuai opiuma, na kiaha rama, kiaha waina me na mea ane like he nui.  E makau ia mau pu, i ka hoopa, i ka lawelawe, i ka hoao, i ka launa pu.  E waiho aku pela—o hoopa’ku a pahu ka pauda—a lele mai na poka wela, a haehae liilii ia oe.            HAWAII 

 

Pule Mehameha

 

            "I kau pule ana, e komo ae oe i kou keena mehameha, a papani oe i kou puka, e pule aku i kou Akua ina no ma kahi nalo, a o kou Makua e ike ana iloko o kahi nao, oia ke  aku mai ia oe ma ke akea."  Ae, ma ke akea kekahi uku, a ma kahi mehameha kekahi uku.  Ke ninini mai nei ke Akua i kona aloha iloko o ka naau o ka mea e pule mau ana ia ia.  Ua kokoke mai nei ke Akua i ka mea e hookokoke ana iaia.
            O ke kanaka i manao nui i ko ke ao nei, ua ike no oia i kona kaumaha iho ; pela ka mea i manaoio i ka Haku, iloko ona ka malu a me ka pomaikai i komo ole iloko o ka hoomaloka ; a e hiki iaia ke olelo,  “Aole i  ike ka maka, aole i lohe ka pepeiao, aole hoi i komo iloko o ka naau o kanaka ka olioli a me ka pomaikai o ka poe e pule mau ana i ko kakou Haku.
            No laila, e na hoahanau Kristiano, e kiai me ka pule mau ; "e pule hooki ole."  "Mai manao nui oukou i kekahi mea ; aka, i na mea a pau e hoike aku i ko oukou makemake i ke Akua—ma ka pule, a me ka noi aku, a me ka hoomaikai.”

 

Ka hoike a ke Komite of ka Aha Luna kahiko o Maui.

 

            Ma ke aloha a me ka lokomaikai o ka kakou Haku, ua malama a kiai pono mai i na kahu Ekalesia, a me na haiolelo malalo o ka malu oia aha, i ka makahiki i pau iho nei.
            A ke ola maikai nei lakou a pau.  He 17 no Ekalesia malalo oia Aha, ke hui ia mai o  Siloama, ka Ekalesia o na mai Pake ma Molokai.
            He 11 Kihapai e malama ia nei e na kahu Hawaii, hookahi kihapai o L. luna e malama ia nei e ke kumu Peresidena oia kula Elua kihapai e malama ia nei e kekahi mau  haiolelo i loaa na Palapala. 

            I ka halawai ana oia Aha i ka malama o Novemba o kela makahiki, ua hooholo ia e hookahuna ia S.P. Heulu e noho kahu nei no Kaluaaha, a me J.M. Kealoha, no Kaupo ; a ua hooholo ia hoi ma ia halawai, e  haawi ia J. Kaimana o H. & K. i palapala ae haiolelo a me Kealoalii, o Waihee.  A ke  waiho wale nei kekahi mau Kihapai me ke ole, a owai la ka mea ia, a hoomakaukau ia  e ka Uhane Hemolele, e lilo i paahana no  ko Jesu Kihapai?              O ke kahi hana nui a ka Aha i imi ai a i  noonoo ai hoi ma ia halawai o Nov, o ka hoolohe i ka palapala hoopii kue, mai Honuaula mai, i ko laila kahu Ekalesia.  A i ka noho ana o ka Aha e huli e imi i ka oiaio oia palapala, ua maopopo i ka aha, he imi hala wale no i ke kahu Ekalesia. 

            I ka halawai hope ana mai nei o ia Aha i  ka malama o Mei, ua kahea ia ke kahu Ekalesia o Kaanapali e nee aku i Waikapu.  Ua ae aku ka mea i kahae ia.  Ua kahea ia hoi ke Kahu o Honuaula, e nee aku i ka  Ekalesia o Pukaana, Kealia, S. Kona Hawaii ; ua ae ka mea i kahea ia. 

            Ma ia halawai o Mei, ua olioli ka aha i ka  lohe ana i ke ano, a me ka noho ana o ke  kahi mau kihapai Ekalesia, ua ulu a holo  pono ka hana a ka Haku, ua ikaika a makaala ma ke kokua i ke aupuni o Jesu.   

 

The Rain Drop.
It fell upon my burning cheek.

 

1. Pa ma kuu maka wela nei,
He paka ua e;
A ninau au, nohea mai?
Noonei? noluna anei? 
Kalae ke ao, a lai ka la, 
Aole no he ao ; 
He kulu hau, he ha mama, 
Ua lele a pa mai ia’u.  
2. Nawai la hoi i hana’e
Ia paka ua nei? 
Ka mea i hana a kau ae
I keia ao maikai ;
 A nana i hoohaule mai
Ia kulu mahu hau
Ma kuu nei maka wela e, 
A oluolu au.  
3. E nalu ana o loko o’u,
Kuu mea aloha no, 
Ua lili, a haalele ia’u,
Kaumaha kuu naau ; —
A pa ua paka ua nei, 
Nana kuu maka u
Iluna i ke ao laelae, 
A maha iki au.  
4. A huli au mai ko ke ao, 
Mai na kahawai maloo, 
I kuu Akua nana i kau
Na lama, na hoku, 
I kona aloha wale mai I
 keia ao, a ia’u
Hoohiki au e waiho ae
Na akua e a pau.  
5. Ke Akua, e kokua mai, 
I hemolele au, 
I paa kou kila ma kuu lae,
Kou kii ma kuu naau ; 
O oe ke ‘Lii maluna o’u, 
Kou hale kuu naau, 
E launa mai me au a mau 
I ola a maha pu            HAWAII.

 

Ka Oihana Kahuna a Kahu Ekalesia. 
Helu 6.

 

            Nui na hana i pau i ke kuhikuhiia no ka oihana kahuna a kahu ekalesia.  He aha la na hana i koe? e hai mai oe i lohe makou  a hana’ku. 
            1. He Alakai no ke kahu ekalesia, e like me ke kahu hipa maoli.  Na ke kahu no e  alakai mai i na hipa i o ianei, i uka, i kai.  i ke kula, i ka mauna, i na kahawai kahe malie ; oia ke hele mamua, a hahai na hipa mahope.  A, ioa lalau lakou, e hoi ke kahu ma hope a hooa pololei aku.  A ma na wahi nihinihi, kiekie a pilikia, ku no ke kahu a kahea i na hipa me ka leo oluolu, a hoolohe no lakou a hahai no. 
            Pela ke kahu ekalesia, he alakai oia—he kumu hoohalike ; oia ke hele mamua—ma na hana, ma na halawai, a kokua, a hookipa,  a noho hemolele, a hoomau ana.  E mau ka hele i na halawai nui, halawai liilii, me ka  makau ole i ka ua, i ke anu, i ka ipo, i ka  mai liilii, i ka loihi.  E mau ke kokua, kokua a nui, me ke pi ole, a minamina ole, ke waiwai oia ; a kala ole, pehea e hiki ai?  E mau ka hookipa ana i na malihini kupono i na makamaka pilikia io.       E alakai ke kahu i na hoahanau ma na hana hou.  Aole make e hoomau ma na hana kahiko wale no.  E noonooa imi a hoala  i na hana hou, halawai hou, kokua hou,  aha hui hou.  Hoololi hoano hou i na hana,  i na halawai, i na kula ekalesia.  Ina holo  ole kekahi hana kekahi ano hana, e waiho  ia, a hoao i kekahi hana e, a ano hana e, a  loaa ka hana ku i ka makemake o kanaka. 
            E hoala i na ahahui ano hou, ano maikai, ahahui kinai i na mea ona i ka baka, i ka awa, opiuma, ahahui humuhumu, ahahui kokua i ka poe ilihune, mai, palupalu, ahahui  misionari, ahahui kuai baibala, a na ke kahu no e noonoo i na ahahui e ae e holo ai  na hana pono a pau, kuloko, kuwaho; he hana mau keia, o ka noonoo, mai paupauaho. 
            2. He kini ke kahu ekalesia.  E nana ia Ezekiela 33:1—9.  E pii ae oe i ka pa, i  ka puu, e nana a pani kou kihapai, malama he enemi paha e hoea mai ana, he ilio hae, he liona uwo, e hoomakaukau ana e lele maluna o na hipa, he haole paha, e momomoe ana e popoi maluna o kahi wahine ui a maikai, me ka manao e lawe ia ia i wahine manuahi nana—he kahuna, he kaula hoopunipuni,  he Moremona, he Palani, he kahuna  lapaau hoomanamana, he kumuao i ka hula,  i ka lua ; a ike ke kiai, e pupuhi i ka pu, e  hookiekie i ka lea, e ao aku.  E kiai ma na  puka, i ole e komo mai na enemi—e kiai ma na puka, i ole e komo mai na enemi—e kiai i na hipa i ole e auwana—a i auwana e kii  a hoihoi mai.  E kiai i ka lakou mau hana —i ko lakou mau hele ana ; —ke hele nei i  hea? i ke kula hea? heaha ka mauu, ka ai,  he lau oliva, he lau make, he hua ono, he  hua awaawa? he aha ka lakou mau palapala heluhelu? he mau palapala hoolalau paha,  he mau ope pepa lealea, piliwaiwai—he mau manuahi, —e ao—e paipai e kiola aku.  E kiai o haule kekahi iloko o na lua he nui wale e hamama ana mao—maanei—a hamama ole kekahi—ua hunaia ka waha i ka  opala, a i ka mea hoowalewale i hele me ka  noonoo ole. a haule iho a paa a make—Na  ke kahu e heke e huli ia mau loa i hunaia,  a hai aku, i ole e hookokoke aku na hipa  ilaila.
            3. He makua hanai ke kahu ekalesia, oia ka hana nui.  E hanai mau i ka ai kupono e maona ai, e ola’i, e ikaika’i na hipa. 
            He aha ka ai? mahea e loaa’i? pehea e  hoomakaukau ai? ahea e haawi ai? ehia haawi ana i ka la hookahi?    O ka olelo a ke Akua a me na mea e pili  ana ilaila, oia no ka ai.  Nui na mea e pili  ana i ka Baibala, i ka olelo a ke Akua, na palapala paipai liilii no ka mihi, no ka pule, no ka manaoio, no ke ola, a pela aku—na  buke himeni, ka Moolelo Baibala, a ekalesia,  ka wehewehe Hala, &c., &c. malaila no e loaa’i ka ai, ka ai paa, ka ai waiu.  E hoolakoia ke kahi i keia mau palapala a pau— a e huli pinepine, a e hoopaanaau.  E makaukau i ke kuhikuhi ana i ka buke, i ka mokuna, i ka pauku ; e makaukau i ka heluhelu a wehewehe hewa, a lalau, a kuhihewa,  ka poe e lohe ana.  Malama o huipu ka  mea make me ka ai, a ai a make ka hipa. 
            Pehea e hoomakaukau ai i ka ai? he mea nui keia.  Aole like ka poe e ai ana, ka poe e lohe ana, ka poe au e hanai ana.  He poe pono kekahi, he poe hewa kekahi, a like ole  hoi ke ano o ka poe pono, a me ka poe hewa,  he nui ka hewa o kekahi, a okoa no; e like me ka poe mai, okoa kekahi mai, a okoa kekahi— okoa hoi ka laau a me ka lapaau ana.  He poe opiopio kekahi, he poe ui, he poe o-o a kanaka makua, a elemakule a luahine—he poe lealea a olioli kekahi ; he poe luuluu a kaumaha, a kanikau kekahi.  E akamai kekahi i ka mahele ana i na lala o kona kihapai— ehia la mahele? ua 20 a oi a emi paha.  E mahele pono i ole e haule kekahi hapa, kekahi papa a loaa ole ka ai, a make no ka hanai ole ia.  Aia a akaka ke ano o  na kanaka, o na kamalii, ka nui o na papa,  o na mahele, alaila hiki ke hanai aku i kela  a i keia me ka ai kupono i kona ano, i kona ouli, i kona ano mai, ano ola, ano pono, ano  hewa.  Aole make e lalau a hanai hewa aku.  He wela ka mai, a ke haawi nei oe i  laau no ke nahu—he hi ka mai, he laau no ka paa ka i haawiia—A o keia kanaka, aole ona mai, a ke haawi nei ka oe i laau nona!   A he keiki mai keia, a he laau kanaka makua ka, ka i haawiia! Naaupo, ea!  (Aole i Pau)  

 

No ka make ana o A.S. Kuke.

 

            Ke hea mai nei ka leo o Iehova i keia Aha, E ku malie, a e noonoo i ke ano o kana hana, i kona lawe ana i kekahi hoa aloha,  he lala o ko kakou aha.  Ua 34 makahiki ka noho ana o keia hoahanau misionari  ma ka hana pono ma Hawaii nei; a ua hoomaopopoia kona ano paa ma ka pono a ikaika hoi ma ka hana.  Ua pilikia no nae kekahi mau makahiki i ka mai; aka, ua mau kona manao i ka Haku a hiki i kona manawa e laweia’e.  No laila—
            HOOHOLOIA, ke hoomanao nei na lala o keia Aha, i ka inoa a me ka hana a A.S. Kuke,  me ke aloha a me ka mahalo. 
            Ke uwe pu nei hoi kakou me ka wahine mehameha a ka mea i make; a me na keiki makuakane ole, e like me ka olelo a ka Hake, “E uwe pu me na mea uwe.”
            Ke manao nei hoi kakou e kaei i na puhaka o kakou no ka hana a me ka manawa  i koe, no ka mea, aole hana ma ka luakupapau kahi a kakhi e hele aku ai, aole hoi e hiki ke hoomakaukau malaila.  T. Koana  

 

HAAWINA KULA SABATI.

HELU XXVII. IULAI 2, 1871

Ka Hoole Kino

Pauku Baibala, Mar. 8:31-38 31.

 

            Ilaila kana hoomaka ana e hoike mai ia lakou e hoomainoino nui ia ke Keiki a ke  kanaka, a e hooleiia e ka poe kahiko, a me  ka poe kahuna nui, a me ka poe kakauolelo,  a e pepehiia oia; a Poakolu ae e ala hou mai.
            32. Hai maopopo mai la oia ia olelo, alaila,  lalau aela o Petero ia ia, a papa aku la. 
            33. Haliu ae la o Iesu, nana ae la i kana mau haumana, papa ae la ia Petero, i ae la,  “E hele oe pela mahope o’u, e ka mea kue, no ka mea, aole i like kou manao me ko ke  Akua.”
            34. A kahea mai la ia i kanaka, a i kana poe haumana no hoi, i mai la ia lakou, O ka mea makemake e hahai mai mahope o’u, e  hoole oia ia ia iho, a e kaikai i kona kea a e hahai mai ia’u. 
            35. O ka mea manao e malama i kona ola nei, e lilo auanei kona ola, a e ka mea haalele i kona ola no’u nei, a no ka euanelio, e  loaa ia ia ke ola. 
            36. He aha la uanei ko ke kanaka pomaikai ke loaa ia ia ke ao nei a pau, a lilo aku  kona uhane? 
            37. Heaha la hoi ko ke kanaka kumu e haawi aku ai, e loaa hou mai ai kona uhane?
            38. O ka mea e hilahila mai ia’u a me  ka’u olelo, i keia hanauna poolua hewa, e hilahila no hoi ke Keiki a ke kanaka ia ia i kona wa e hele mai i me ka nani o kona Makua, me na anela hemolele.

 

            Pauku Alakai—O ka mea e makemake  aha e hahai mamuli o’u, e hoole oia iaia iho,  a e hapai ae i kona kea, a e hahai mai ia’u.  (Mar. 8:34)
            Kumu noonoo. —Ke kanawai o ka hahai ana mamuli o Iesu.
            Ninau ano nui- Heaha ka waiwai nui?

 

            Manao Wehewehe. —O ka mua keia o  ka Iesu hoike ana aku i kana poe haumana no kona make, a me kona hoomainoinoia ana. Ua manao paha o Petero, he pono ole keia hoonawaliwali ana i ka manao o na haumana,  e hooiloilo ana no na pilikia e hiki mai  ana.  Nolaila, huhu kula ua Iesu.  Aole i  weheweheia ia Petero ke kanawai hou o ka  noho haumana ana, oia hoi ka makaukau no ka pilikia a pau. 
            33. Ua kapa aku o Iesu ia Petero o Satana,  no ka mea, o ka Satana hoowalewale mau no keia, o ka hoohuli i ka manao o ke kanaka ma ka mea e oluolu pono ai ke kino.  Ua like no me ka hoowalewale mua o Satana ia Iesu me ka onou ana aku i na lealea a  pau i makemake ia e oluolu ai ka noho kino ana. 
            34. No ko Iesu ike ana i keia kuhihewa o ka pookela o kana poe haumana, nolaila   kona hoakoakoa ana mai ia lakou e ao hou aku, o pau auanei lakou i ke kuhihewa mai no na pono o keia aupuni ana e hookumu nei.  Penei kana: “Ke makemake mai nei  oukou ia’u, i alakai no oukou.  Aka ea, he  noho ana pilikia keia, a’u e kono aku nei ia oukou e hui mai; aia no a ae oukou e haalele  i ke ola kino, ke kauohaia pela e a’u, a hele aku iloko o ka make me ka wiwo ole,  alaila aeia oukou e hahai mamuli o’u.”
            36. Aole i hoomalimali o Iesu i na kanaka e lilo i mau haumana nana, aka nae, ua hoike aku no ia lakou  ka naauao o keia  hahai ana mamuli ona.  No ka mea, wahi ana, he uku no ko ia haalele ana i ke ole kino; oia hoi ka ola uhane, a owai ka i oi o  laua?  Aole anei o ka ola uhane, i oi pakela  loa aku.

 

            Ninau. —31. Owai ke Keiki a ke kanaka? Heaha ka Iesu i wehewehe aku ai i na haumana?  Ua hoike aku nei oia pela mamua?  Ua hai pohihihi aku nae paha no kona ala hou ana? (Ioane 2,19)  Peheao Petero No keia olelo a Iesu? He aha kana hana?  No kona aloha anei keia ia Iesu?
            Pane.  Ae, no kona aloha kuhihewa nae. 
            Heaha ka Iesu i kapa aku ai ia Petero?  Mahea ka like o Petero me Satana iloko o  keia hana?  Heaha ka Satana mea hoike pinepine mai ia kakou? Mahea ko Petero nana ana? 
            Pane. Ma ka oluolu kino. 
            34.  No ke aha ko Iesu hoakoakoa ana mai na haumana? Ua makemake anei  ia e hahai na kanaka mamuli ona? Heaha  kana mea hou i hoike aku ai ia lakou i keia akoakoa ana?  Owai na haumana a Iesu i ae ole ai e hele pu me ia?  No ke aha ko Iesu hoomalimali ole i na kanaka?  Owai  ke loaa ana i ke ola?  Owai ka e lilo ana kona ola? Pehea ke kanaka e manao nui  ana i kona oluolu kino? Aole anei he uku  no ka hahai ana mamuli o Iesu? Heaha ke  kumu kupono e hahai ai kakou mamuli ona? 
            Pane.  O ke aloha ia ia. 
            E hoopaanaau a hai mai i ka pauku 36. 
            E puana mai i ka pauku 37.  
            38.  He hanauna aha keia, wahi a Iesu?  Pehea kekahi poe no Iesu. 
            Pane. Ua hilahila iaia.  Pehea hoi ke  Keiki a ke kanaka no lakou? I ka manawa  hea? 

 

"KA NUPEPA KUOKOA,"

HOOPUKA MAU IA MA HONOLULU

I kela Poaono keia Poaono.

$2.00

No na mahina he UMIKUMAMALUA!

$1.00 no na mahina eono.

ME KA HOOKAA MUA MAI.

----------

NA OLELO HOOLAHA—aole i oi mamua o 10 laina no ka hoopuka hookahi ana, $1.00; alua komo ana, he $1.50; hookahi malama, $2.00. E uku mua ia mai ke dala o na olelo hoolaha a pau e hoounaia ana mai e pai.

KANIKAU—he hapalua dala ka uku no ka aoao hookahi o ka pepa leta, oia hoi 4 keneta no ka lalani hookahi—penei: he 25 lalani, $1.00; 50 lalani, $2.00; a pela'ku.

NA UKU NO NA OLELO HOOLAHA—ka uku pepa, a me ka uku o ke Kanikau, e haawiia no ma ka lima o na Luna o ke Kuokoa, a i oleia, e hoouna mai ia Kauka Kulika.

O NA UKU PEPA A PAU E HOOKAA MUA MAI NO—aole e kauia ka inoa o kekahi haole a kanaka maoli paha, ma ka inoa o ka poe lawe pepa ke ole e hookaa e mai mamua. E pono ke hiipoiia keia mau rula, no ka mea, he emi no ka auhau no keia nupepa.

AIA KE KEENA O KA NUPEPA KUOKOA—ma ke keena i noho mua ia iho nei e J.W. Aukina, maluna ae o ka Hale Leta. O na hora hana, mai ka eiwa o kakahiaka, a i ka ha o ke ahiahi.
H.M. WINI Luna Hoopuka

KA "NUPEPA KUOKOA."

Is published in Honolulu

EVERY SATURDAY,

$2.00 per annum, or $1.00 per six

months, in advance.

ADVERTISEMENTS not exceeding 10 lines, inserted once for $1.00; twice or $1.50; and $2.00 for one month; all advertisements must be paid for in advance.

KANIKAUS will be charged 1.00 per page, or 4 cts. a line. PAYMENTS FOR ADVERTISEMENTS, Subscriptions or Kanikaus, may be paid to any of the Agents of the Kuokoa, or may be enclosed in a letter to the Publisher.

ALL SUBSCRIPTIONS must be PREPAID. No names, either of foreigners or natives, will be inserted on the subscription list, until paid for. This rule must be strictly adhered to, on account of the low subscription price.

THE OFFICE OF THE KUOKOA is over the Post Office. Office hours from 9 A.M. to 4 P.M.
H.M. WHITNEY, Publisher

Bound Volumes of the KUOKOA, for sale, at the office over the Bookstore. - $3.50 each.

Persons having complete sets of the above, can have them bound by paying $2.00 each.

 

NA BUKE
HOOLAHAIA E KA PAPA HAWAII

 

Baibala Hemolele Nui ili eula nani me na kuhikuhi ma na a ao.....$12 00
"            " Nui ili eleele kaekae wai gula.....5 00
"            " uuku iki ihi " ".....8 00
"            " Pananaiki iho ili eleele.....4.00
Kauoha Hou ili gula nani me na kuhikuhi.....3.00
"             " eleele kaekae wai gula.....1.00
"             "  " ......75
Kauoha Hou Hapa Haole.....75
Lira Hawaii 1848 me ke kanawai......25
"       " 1855.....25
Moolelo Ekalesia.....50
Haiao ili lahiahi.....10
Hele Malihini ana.....25
No ko ke Akua ano......25
Lira Kamalii......25
Hoike Palapala Hemolele.....25
Moolelo o Heneri Opukahaia.....25
Hoike Akua.....25
Weheweheia.....25
Ninau Hoike ili manoanoa.....25
"         "          " lahilahi....10
Kumumua Kula Sabati.....10
Buke Lawe Lima.....10
He Buke no ka Pope.....10
Ui Kula Sabati Helu 3.....25
"    "       "         "      4......25
"    "       "         "      5......25
Buke Euanelio a Ioane.....10
Himeni            .....1.00
Himeni Ili nani.....1.75
Na Kauoha Hou Pakeke
Ili Gula nani.....1.50
Ili eleele kaekae nani......50
Ili eleele......35
Kauoha Hou Pakeke me na Halelu
Ili Gula nani.....1.75
Ili eleele kaekae wai gula.....50
Ili eleele......50
Na Halelu Pakeke
Ili Gula nani.....50
Ili eleele kaekae wai gula......30
Ili eleele.....20
Ka Hae Hoonani (Buke Mele)......25
Buke Wehewehe Huaolelo Baibala.....2.00
            "              "    "  Ili nani.....3.00
Eia na buke haawi wale
Palapala Liilii--
            Helu 4--Makemake anei oe i ke ola
            Helu 6--E hele i o Kristo la.
            Helu 7--Ka hoi ana mai o ke Keiki Uhauha
            Helu 11--No ka hoohiki wahahee i ke Akua
            Helu 16--Ka Kehia ana o ka Ahaaina a ka Haku a ma ka Bapetiso ana.
            Helu 17--Mai hana ino i na holoholona
            Helu 18--No ka mahi ana, kuai ana a me ka inu ana i ka Awa.
Ka Davida Malo Kumumanao.
Ka Moolelo o Batimea Puaaiki.
J. F. POKUE.
Kakauolelo o ka Papa Hoeke o ka Ahahui Euanelio o ko Hawaii Pae Aina.