Ka Nupepa Kuokoa, Volume X, Number 37, 16 September 1871 — Ko Lanai mau mea hou. [ARTICLE]

Ko Lanai mau mea hou.

E ka Nupepa Kuokoa e; Aloha oe:— Eia malalo iho nei na mea hou o ka mokupuni o Kaululaau: HE HOLOHOLONA ANO E. Ina la o na hebeaoma i hala aku nei mamua, ua ikeia kekahi holoholona ano e; penei kona ano: He loloa kona hulu, e like me ka hulu o ka bea, he puipui kona kino a kiekie no hoi, he loihi kona huelo, a he maikai kona hulu ke nana'ku, o kona mau helehelena, he ku i ka hoomaka'uka'u. Elua mau kanaka nana i ike i keia holoholona ano e, o Analu a me Holu (pake), na laua i hai i ka lehulehu, a lohe ai ka mea e kakau nei. O kahi i loaa'i o keia holoholona ia laua, i Kahemano o uka ae olaila, e alualu ana ua holoholona ano e nei i ke kao, e puehu liilii ana ke kao i o ianei, a ua maka'u laua i ko laua ike ana. LULU DALA. Ke hoomaka nei kela keia apana o ka ekalesia o Lanai nei e lu!u i dala no ka luakini o Kihamaniania, i dala e hana hou ia ai a paa ia Betera o ke Akua. 0 ka haawina maluna o kela keia hoahanau kane, elua dala me ka hapalua ($2.50), a pela no hoi i kela a me keia hoahanau wahine, a pela no hoi me ka poe hoahanau ole, ua like ka auhau no lakou a pau. Ua lulu iho nei kekahi mau apana i ka lakou mau dala, aole nae i lawa ka makemake e paa'i ko ke Akua Hale. Ke hapai malie nei no ke kahu ame na luna ekalesia. He manaolana ko'u, e kokua mai ana no ka Haku nona ke kihapai i keia hana nui, a Kona poe kanaka e hapai nei. HE ONA I KA PANINI. Ke hoomahui hou mai nei iakou nei i keia mea kupuino, o ka inu panini. I ka wa i pala ole ai o ka panini, aole i ikeia e ona ana na kanaka, hookahi a lakou hana o ka mahiai uala, aka, i ka wa i pala iho nei o ka panini, o ko lakou nei okalakala heu panini mai nei no ka keia, moe ole ia iho ka po i ka ua mea o ka lealea. Ua lohe mai no hoi makou, he inu panini no i ka la 27 aku nei, ina pela, alaila, he Sabati ua la. E inu panini anei oukou i ka la Sabati ? E ona anei oukou iloko o ia la me ka lealea ? Kupanaha ko ke kanaka hoolilo ana i ko ke Akua la, i la e lealea ai nona ; a he mea ino keia. Ma keia mea, ke haohao nei au i ko na makai kiai ole ana ma ka lakou hana, e pono ia lakou i ka poe i kohoia e ke aupuni i poe nana e malama a kiai i ka maluhia o ka lehulehu, e kinai a hoopio i keia hana a ke Diabolo, aole make waiho a nui alaila kinai aku. Eia ka wa pono, o ka wa uuku o ke ahī, i hikiwawe ka pio ana. D. A. Kaleoalii. Palawai, Lanai,