Ka Nupepa Kuokoa, Volume X, Number 43, 28 October 1871 — Ke Alanui Aupuni ma Koolau, Maui. [ARTICLE]

Ke Alanui Aupuni ma Koolau, Maui.

I ka Nupepa Kuokoa ; Aloha oe:— E hoikeike ae oe ma ke akea, no na mea e pili ana i ke alanui ma Koolau, Maui, e hoomaka ana ma Oopuola, ma ke Komohana, a hiki i Heleikeoho ma ka Hikina, oia no hoi ka palena ma keia moku o Maui nei. Penei na mea i ikeia no ia alanui ; he alanui kupono no ka poe hahai bipi o ka nahelehele, a he alanui kupono hoi no ka poe pii kahi olona, a ua kupono hoi i ka olelo a ka poe kahuna lapaau o ka wa kahiko, "he ala iki ko kahuna."

O ka hoomaka ana mai e komo ma Oopuola, e huli hele ana i ka hikina, eia ka pono ia oe e ku mea e hele ana ma ia alanui aupuni, e wehe i kou kapa maemae a me kou wahi paiti lole, a hauhoa a paa i ka noho lio. Ina oe e palaka i keia mau oleloao, e oki loa ana kou wahi kapa i ka hau o ka nahelehele, a e okupe anu ko wahi lio, i ka hoonoho pono ole ia o na pohaku o ke alanui ; a e malama no hoi oe i kou kau ana maluna o ka lio, o ku auanei ko maka i ka laau, no ka mea, ia oe e hele ana i ka paapu o ke alanui i na kuawa, a olelo aku i kanaka, e okioki ae, a i na pohaku hoi, e hoonohonoho pono iho, a hookahi no ano mea manao nui, o ka puawahiwa ana i ka hale, aohe hoi he malama i ke alanui, e hana pono i ka pomaikai o kalehulehu, e hele ana i o a ianei.

E na kini lehulehu, i ike ole i keia alanui i hai ia ae nei, e hilinai i keia olelo, o pilikia auanei oukou ke hele hemahema mai, aole o kana mai ka inoino a pohopoho o keia alanui. E nana mai hoi e ke Kuhina Kalaiaina, i ka hana a ka Luna Alanui o ka Apana o Hana nei a me kona hope kamalii. E koho mai ke aupuni i ke kanaka hana pololei i maa i ka noho Luna Alanui ana. Aloha no. J. Ikemaka. Nahiku, Koolau, Sept 26, 1871.