Ka Nupepa Kuokoa, Volume X, Number 44, 4 November 1871 — He mea hou! [ARTICLE]

He mea hou!

MR. Luna Hooponopono; Aloha oe:— Eia ma ka Apana o Kawela, Molokai nei, ua make ano e loa mai na i-a he nui loa ma kuu Loko i-a e malama nei; Oia hoi ka loko hookahi ma keia Ahupuaa o Kawela nei. O ka mea nona keia aina, oia no Ka Mea Kiekie W. C. Lunalilo, a ua lilo nae i ko kakou Moi ma ke ano hoolimalima no na makahiki he umi, a malalo aku o ka Moi ko'u noho ana kanaka. Eia na inoa o na i-a i make ma ua loko nei: he amaama, awa, aholehole, oopu-hue, oopu-oluheluhe. O ke kumu e keia make ana o na i-a i hoikeia ae la, noloko mai no ia o kekahi mea ano e, i ikeia maloko o ka wai o ua Loko i-a la. Penei : Ma ka la Sabati iho nei, o ka la 22 o Oct., 187l, ua ano e mai la ka wai o ka loko, ua like nae me ke kai paakai ka haulaula ; a ua ike koke ia aku la no na i-a e lelele ana iluna a puni ka loko. A ma ia po iho a ao ae Poakahi, (oia ko'u la e ka'u lele nei i keia leta) ua ikeia aku la na i-a he nui wale, no lakou na inoa i hoikeia ae la maluna, ua pau i ka make, a ku ka pilau. Ua ohi na kane a me na wahine—na keiki, —ai ka puaa ame ka ilio, aohe wahi mea a pau iho, i ka ua he mea he nui. A ma ka hora 12 ponoi oia la ; ia wa i ikeia aku ai kekahi mea kupanaha, oia hoi ka lilo ana o ka wai i koko, iwaena konu o ka piko o ua loko nei. I ko'u manao wale aku, ua like paha keia wai ula me ko Makaweli wai i Kauai; a i ole ia, ua oi ae no paha keia mamua oia wai. I ko'u ninau pono ana ako i na kamaaina o keia wahi, ua hai mai lakou, " Akahi wale no a ikeia keia mea kupanaha ano e loa." J. W. Kanoa. Kawela, Molokai, Okatoba 23. 1871.