Ka Nupepa Kuokoa, Volume XI, Number 18, 4 May 1872 — Ku mai ka "Hoku Ao." [ARTICLE]

Ku mai ka "Hoku Ao."

Ma ke kakahiaka Poaha iho nei, ku mai la ko kakou kialua Misionari iloko o na la he 13 mai ka Pae Aina mai o Fatuhiva. Mama maoli keia huakai holo ma ka moana. He 26 ka nui o kona mau la maanei aku a hiki i Fatuhiva, a he 12 la ka holo ana e ike i na kihapai. Huina o na la mai anei aku a huli hoi rnai nei, he 51 wale no. Haalele aku la ka "Hoku Ao" i na kauwa a ka hoomanawanui, ke hooikaika la no e hoohuli mai i na pegana e hahai la ma ke kae o ka pouli a i ke ola mau o na uhane ma kela ao. Ke paa la no lakou i ka lakou mau kamalii, aole e hookuu laelae mai e ao ia ma ka ike. He oia mau ko lakou paakiki. O kahi mea loli iki no paha, oia no ka hunaia o ka hapa nui o na olohelohe o na kanaka makua. Ua ahona iki lakou i ko Maikonisia. Ua hoi mai nei o Rev. L. Kaiwi kana wahine a me ka ohana, no kona omaimai kino. E loaa ana paha iaia ka maha ma kona onehanau nei. Ua hoihoi puia mai hoi kekahi o ka Rev. J. Kekela mau kaikamahine, e hoonaauaoia ma ke Kula o Makawao. Ua oluolu ke ola o ka luaui Elele i holo aku maluna ona, a e lohe ia no kana hoike no kana huakai ma kekahi Sabati e hiki mai ana. He nui ka ona ma keia Pae Aina i keia manawa mawaena o na kanaka ponoi. O na misionari wale no e noho la, o na Rev. J. Kekela, S. Kauwealoha a me Z. Hapuku me ka lakou mau wahine a me na ohana. E ike kakou, aole no i ohiia na hua ohaha a ke kanaka lulu hua.