Ka Nupepa Kuokoa, Volume XI, Number 31, 3 August 1872 — Page 4
| This text was transcribed by: | Dawn Oshima |
| This work is dedicated to: | Awaiaulu |
Ka Nupepa Kuokoa
KE KILOHANA POOKELA NO KA LAHUI HAWAII.
He mele hui aloha i hakui meleia ma Imiola, Waimea, Hawaii,
MA KA LA 16 O IULAI 1872, NO ka pau ana o na makahiki he 40 i noho ai ke Kahu malaila.
Leo--Sunday School Volunteer Song: Fresh Laurels a me ke Alaula, Iulai 1872.
1.
Hui mai kakou, na hoaloha e.
La hauoli nei, hauoli Iubile.
Na poohina e, na oi, na pokii,
Hui mai a oli pu.
Hui mai koonei, na malihini e.
Na kupuna pu me na moopuna nei.
Na makua e, a me na kamalii.
Hui mai a oli pu.
Cho--Hui mai, hui mai, mele ae, mele ae.
Oli pu, oli pu @a hui huakai,
Hui mai kakou, a mele oli pu,
Ma ka malu no, ke aloha o lesu.
Hui hui mai a mele oli pu.
Hui mai a oli pu.
2.
Hui mai kakou, na hoa kumu nei.
O kela wa no, ka wa kahiko e.
Me na kumu hou e ao ikaika nei.
Hai mai a oli pu,
Na haumana pu mai mua a hiki ia nei.
O na ku'a la, na kula Sabati.
Kua kumu e, a kula himeni,
Hui mai a oli pu.
Cho--Hui mai, hui mai, mele ae, mele ae, &c.
3.
Hui mai kakou, na haole aloha nei.
Mai Amerika a Beritania mai,
Na ohana pu ma keia la maikai,
Hui mai a oli pu.
Ka makua e, ke kahu hanai nei,
Ka ohana pu, na keiki hanai e,
Me na hoahanau, na hoa makamae,
Hui mai a oli pu.
Cho--Hui mai, hui mai, mele ae, mele ae, &c.
I ka pau ana o ka halawai hui, he wahi pauku kanikau i meleia me ke kani ana o ka bele kanikau, a me ka pahu kanikau, no ka hoomanao aloha i na hoa i make iloko o na makahiki he 40, a no ka make pu ana o ia mau makahiki he 40.
Kanikau kakou na hoa i koe nei,
No na kini e @ hala mamua ae,
Na makua pu me na keiki aloha e,
Hui mai a kanikau--
Kanikau kakou, e u a haaloulou,
No na luna e, na hoaluhi pu,
No na haole hoi nalo aku no.
Hui mai a kanikau.
Cho--Kanikau, kanikau, mele u, mele u,
Uwe pu, use pu i ka hui o kakou,
Kanikau kakou, a mele uwe pu.
I ka nauwe ae iluna i ke no--
Hui hui mai a mele kanikau,
Hui mai a kanikau.
Madame Aneda. (w)
Ke makemake nei paha oukou e lohe i kekahi moolelo maikai no kekahi wahine Farani. Madame Andre (w) kona inoa. Ua like o Madame me Mrs. me Lede.
He wahine ano ahí keia, he kulana hanohano kona mamua, ma ka aha kukakuka alii o Farani. Ua haalele nae oia ia kulana, mahope, a kukuiu oia i hale nona, a no kona ohana ma kahi kaawale @ki aku, a hoopuni ia wahi me na mea ulu, o kela ano, keia ano, a pakela wale ka nani, me he Paredaizo lani la ma ka honua.
Ilaila kekahi Kahunapule o Amerika, mamua aku nei. Aia no ia ma Parisa, ke kuianakauhale alii o Farani. Imi oia i ka hale o ua wahine nei, a loaa no ma ke kuhikuhi ana o kekahi makamaka. A, eia malalo iho, ka moolelo ana i lohe pono ai no keia wahine
Madame Andre (Aneda) w, he kaikamahine oia na kekahi Generala punahele o Napoliona Bonepate mua. Na ka Emepera Napohona laua o Iosepine, ka Emepera wahine, i alakai i keia kaikamahine imua o kekahi kahuna Farani e bapetizoia. A, ma kona wa kamalii a ui hoi, ua lilo oia ma na lealea, ma na mea hoonaninani o ke kino, ke kumu hoohalike oia no na mea e pili ana i ka lealea, a me ka nani o ke kino. Aole ona manao ma ko ka uhane. Aole pule, aole malau i ke Akua. Aia kona makemake nui, me kona olioli ma ka hale keaka
He mau kahunapule hoole Pope elua e noho ana malaila, he Mosavia kekahi, a he Helevetia kekahi. Ua ike pinepine laua i keia wahine alu e holo okoa ana mamuli o ko ke kino, aloha no laua i kona uhane; minamina, a hele no e ike maka, he launa e kuka pu, e paipai ia ia e huli mai, a lilo i haumana ne lesu. Paupauaho ole laua e hele e ike, i ke ao, i ka paipai i ka pule nona. A, aole makehewa ka laua hana ana. Ua kokua mai ka Uhane Hemolele i ka laua ao a paipaipai ana, a huli io mai no oia ma ka pono, a haalele i na mea a pau no lesu. A, ma kona hui hou ana me ka lehulehu, aia ka, he wahine ano okoa oia. Ua pau ke ano puni lealea me ka mahaloia e kanaka. Ua hala na mea kahiko, ua ano hou ae la na mea a pau.
A, pehea i maopopo ai kona huli io ana ma ka pono? ma ka noho wale anei? me ka malama malu i ka Haku ma kona hale anei? Aole pela. He wahine ano nui oia, he wahine waiwai. A, ua hoolilo oia i kona ano nui. me kona waiwai, i mea e pono ai ke aupuni o lesu. A, ua hookauianaia kana mau hana maikai ma Europa a puni, a hiki aku i Amerika. (A. ke hiki mai nei ia Hawaii nei.
O kona hale, he kiko waena ia no ke apo o na pono he nui wale. Ma ke aha i mahuahua ai kana mau hana maikai? ma ka pule mau, a ma ka leo hoomaikai. Imi oia i kahunapule pono e like me ka kona naau i makemake ai
A loaa no, he malihini i hele mai e noho iki ma Parisa. Aka, no kona ano haipule, a piha i ka Uhane Hemolele, kaohi oia ia ia e noho pu, a noho no oia he umi makahiki. Kukulu oia i hale halawai nona, a malaila i akoakoa ai na lala o kona ohana, me ka poe e noho kokoke ana, ma ke kani ana o ka bele ma ke kakahiaka a me ke ahiahi o kela, a o keia la no ka halawai. A, ma na po kekahi halawai, a ma na Sabati hoi, ma ka hora kaawale a halawai ole ma ka luakini hoole Pop
Ina he wa malie maikai, aia ka halawai ma kahi ululaau maikai i hoolakoia me na noho, me na Baibala, na himeni a pela aku. O ka nui o ka poe hele i kona halawai, he poe Katolika lakou mamua, he poe koa kekahi no na koa kiai i ka papu o Neresaile. Nui ka poe huli mai ma ka pono; a no ka loli pinepine ana o na koa o keia papu, hele liilii no keia poe huli mai, a kokua no i ka hoolaha ana i ka pono ma kela, ma keia wahi a puni Farani
He keikikane a keia wahine, ua like oia me kona inakuahine--ikaika i ke kii, a alakai i na kanaka, i ka poe liilii, i ka poe hanohano, iloko o keia halawai, a malaila i loaa ai ka momi maikai o ke ola i na kanaka he nui wale. He kanaka Rusia, he luna alii kekahi i huli mai, a, no kona hele ana i luna aupuni ma Siberia, noi oia ma ka palapala, i keia wahine e pule nona i ikaika oia i ka hai aku i ka ke Akua olelo ma Siberia, ka aina naaupo.
Ua pau loa na lala o ka ohana o keia wahine i ka huli mai, aohe mea i koe. O kekahi kuke he koa mamua, oia kekahi i huli mai, ikaika loa oia ma ka pule, a ma ka paipai iloko o ka halawai. He 80 wale no ka poe hele ia halawai mamua, a, i keia wa, ua hiki aku i ka 200 a oi. Hele no na kahunapule e ae e kokua ma keia halawai. Kokua no hoi na hale Pai Palapala.
He hale mai kekahi a keia wahine i kukulu, ai no ka poe ilihune, malaila lakou i hookipa ia ai, a malama pono ia ai. Ilaila i hele pinepine ai oia e no i ka poe mai, a e himeni pu me lakou. Nui kana mau palapala i kela wahi i keia wahi, e hoala a paipai no ke aupuni o ke Akua, a e hoolana i ka manao o ka poe e hana ana. Nui na hora ana i hoolilo ai ma ka himeni ana, ma ka po, ma ke ao. Nana no i haku i kekahi mau himeni, a ua unuhi ia kekahi ma ka olelo Farani. He oli mau kana i kela la i keia la, aole ona makau iki i ka make; ka puka ia e komo ai kona uhane iloko o ka maha lani
A, eia kana kauoha nui; "aia a hiki mai i ko'u hora make, e akoakoa ko'u ohana, ko'u mau ohua a pau ma ko'u bela make, a lilo i ka himeni pu a lele aku kuu uhane."
Maikai io keia wahine Farani; e lilo oia i kumu hoohalike na na wahine haipule ma na wahi a pau. N.Y.O.
Hoike Kihapai ma Atuona, e Rev. Z. Hapuku, Aperila, M. H. 1872
(Koena o ka Hebedoma i hala.)
NA HAOLE KUAI. No Tahiti mai kekahi mau haole kuai i keia mau makahiki. Ua kuai mai i na pepeiao laau, me na mea e ae a lakou e makemake mai ai. A waiho mai ko lakou mau waiwai ma ko makou mau wahi. I waiho mai i ko makou mau wahi nei, i mea e pau ole ai i ka aihue me ka poe kolohe. Nolaila, pau no kahi mau pilikia o makou ma ia mea; a me na haumana pu, a hala ia manawa ilihune o ka noho ana. A no ka ike o na haole he pono i ka malama i ko lakou mau waiwai, aole no he makau mai, waiho mai no.
NA MANUWA FARANI. Ekolu moku Manuwa Farani i hiki mai i keia mau makahiki elua. Maraki 1870, ua hiki mai kekahi moku; 200 kanaka; o ke Kiaaina o Nuuhiva kekahi, e ao i kanaka. Iune 4. holo hoomai kekahi moku, aole nae i ku; kalewa wale mai no mawaho, o na kanaka, 400. He Adimarala maluna. Papa mai no i kanaka. Ku nae ma Tahuata; o ka waapa alii ka i holo mai, me elua mau waapa o na alii.
Augate 16, hiki hou mai o ua moku Farani la, me ke Kiaaina o Nuuhiva. Eha la i ku ai ma keia awa. A pii mai na alii moku, me na koa he 30, e olelo aelike me na alii onei. Ua ae like no keia kahawai, e hoopau i ke kaua ana; a ua pau no ke kaua.
NA MOKU OKOHOLA. He mau moku okohola no kahi i hiki mai ma Tahuata. Ua ike au i ka moku Johnkini, i ka mahina o Maraki M. H. 1871. O ko makou hiki aoa aku no ia, a e olelo ana kanaka Hawaii e haalele i ka moku, a e olelo ana, e hakaka me ke kapena, a e olelo ana ke kapena e huki i ka heleuma; a e hoolele i ka wati mauka. A mahope olelo mai ke kapena, e pau loa oukou e kanaka Nouhiva mauka. A o ko'u hele aku no ia e aloha i ke kapena, o ke kau no ia maluna o ko'u wahi waapa, a hele mauka e moe ai ma kahi o L. Kaiwi i noho mua ai, i hele au i ka Sabati malaila. Ma ia po no, i hakaka ai na kanaka maluna o ka moku. Nana aku makou i ke kakahiaka nui, ua holo ka moku; e kuhi ana makou, ua ho lo pono. Eia ka! ua loaa he pilikia nui i ka lahui Hawaii me ka Amerika. A ma ke awakea ae o ia la. Iohe mai makou, ua pau nai kanaka o ka moku i ka mahuka. Ekolu waapa i holo: akahi i Heteani. elua i Fatoiva. O ka waapa o ka poe i mahuka ai i Heteani, ua lilo mai i kanaka e hele aku ana e kaua i Hoamau; a eia me lakou e waiho nei i keia mauawa; a o kanaka aia no ma Heteani e noho nei
KA NUI O KANAKA. O ka nui o na kanaka ma Atuona, ke huiia me na kahawai o Taaoa, me Vaipaee, me Haamau, me Haamau, me Hanahehe, 1,800 kanaka, ke ole au e kuhihewa; oia ka nui o na kane, aole i heluia ka nui o na wahine.
NA HUA A KA DIABOLO
HE KAUA. Ma keia moku o Hivaoa nei, aole ne kahawai ke ole ke kaua ana. Haunaele mau ka noho ana o ka lahui ike ole i ke Akua oiaio; mokuahana pinepine, nui ka poe make; nui ka poe pio. Aole e noho ma kahi hookahi, nolaila, kauliilii lakou e noho nei i keia manawa, ma ia wahi aku ia wahi aku. Aka, he wa piha loa keia i ke kaua, mai na aina naaupo me na aina malamalama.
Nohea mai na kaua, a me na hakaka iwaena o ke ao holookoa? No na kuko ino e noho ana iwaena o ka lahuikanaka; oia ka aina, ka waiwai, ka aihue, ka moe kolohe ka pepehi kanaka, inu rama, hoopunipuni, na kuko ino he nui wale, a me ka hoopunahele mau ana i na hana haumia a ka Diabolo. O ka poe i make pepehiia ma Atuona, a pau i ka aiia; o Taputuhe, o Mihaoe, Dekemaba 1870. O Paepupea (w) kekahi, aole i moku ia ke poo, he keiki nae ko loko.
MA TAAOA. Ua pepehiia o Motohamo k. a moku ia ke poo. He kanaka hookipa ia'u, he hoomauhala ka mea i make ai ia kanaka. Ua pio aku ka poe nana i pepehi ia ia ma Tahuata.
MA HAAMAU. Ekolu kanaka i pepehiia ma ia kahawai. O ka inu rama, a ona ka mea e make ai. Kupu mai na manao huhu, na olelo ino he nui, a pepehi ke kuaana i ke kaikaina a make.
He nui na hana ino a puni keia moku o Hivaoa; pela ma Heteani, ma Puamau, Hanapaaoa, Hanateteua, Hanaiapa me Hanamenu.
Nohea mai ka mea e hoolana nui keia lahuikanaka uuku ma ka hana ino? No ka uhane ino no. Nolaila, e noi nui kakou i ke Akua, i hiki mai kona Uhane, i mea kokua mai ia kakou e hana i kana hana.
HANAMENU. Ua nui ka poe i lalau ma keia kahawai; elua wale no i koe, o Honiae me kana wahine. Elua ko'u hele ana ilaila e paipai i keia mau makahiki elua. A ua hele mai o Honiae ma Atuona nei. Paipai nui au e kukulu i luakini hou. Olelo mai kela, e kali iki a pau ae ku olelo kaua, alaila kukulu.
Ua kokua aku ka ekalesia o Atuona ia Honiae $10.00 no kona haiolelo malaila.
Z. HAPUKU.
Na Olelo Wehewehe no na Oihana a Na Lunaolelo
MOKUNA VII.
P. 1. "Pela no anei keia mau mea?" Mahope o ka hoolohe ana o ka Aha i ka olelo hoopii, a me na olelo hoike kue ia Setepano, ninau aku la ke Kahunanui, me he mea la ma kona ano Peresidena no ka Aha, "pela no anei keia mau mea?" ma ia mea, ua ae oia i ka mea i hoopiiia e olelo oia nona iho
P. 2. "E na kanaka, na hoahanau, a me na makua." Aole i maopopo ua kapa aku o Setepano i na hoa o ka Aha he poe "hoahanau me na makua," ua kapa paha oia i ka poe e makaikai ana he poe hoahanau, a i na hou o ka Aha Hookolokolo he poe makua. "Ke Akua nani," ka mea nana i hana a noho alii maluna o nu ao a pau. Ua hoopiiia mai oia no ka olelo hoino i ke Akua; aka, ke hoike nei oia ma ka hoomaka ana o kana haiolelo, he manao mahalo ilihia kona i ke Akua. “Ko kakou Kupuna o Aberahama.” He mea nui i ka poe Iudaio ko lakou ano mamo na Aberahama. “I kona noho ana ma Mesopotamia, i ka wa mamua aku o kona noho ana ma Harana.” O ke ano o ka olelo Mesopotamia, oia keia, mawaena o na muliwai; oia kekahi apana aina mawaena o na muliwai Tigris a me ka Euperate; he 700 mile ka loa, a mai ka 20 a i ka 120 mile ka laula. O Urehoa he eono mile mai ka muliwai Euperate aku ma ke Komohana Hema, a he 125 mile mai ke kai aku, he nui na mea e kuhikuhi ana. O Ura ia o ka poe Kaledaio. Mai keia wahi aku ua kaawale aku o Harana he 400 mile ma ke Komohana Akua. Aka, aole o Urehoa mawaena o na muliwai. O Ura o ko Kaledaio, Kinohi 11:31 a me 15:7, a me Harana, aia no laua ma keia wahi, 200 mile ke kaawale o Harana mai Ura aku. Me he mea la, elua kahea ana o ke Akua ia Aberahama; hookahi kahea ana iaia e noho ana ma Ura, a hookahi kahea ana ma Harana. Kinohi 12: 1 me 4
P. 3. “E puka aku oe mai kou aina aku, a mai kou poe hoahanau aku hoi, a e hele i ka aina a’u e kuhikuhi aku ai ia oe.” O ka haalele ana i kona aiaa hanau, a lilo i mea auwana, me ka maopopo ole o kahi ana e hele aku ai, he hoao kaomaha loa ia no kona manaoio; aka, he nui loa kona paulele i ke Akua, nolaila, aole oia i kanalua. Ua hoolohe koke oia. No kona manaoio kona hoolohe koke; ua paulele loa ia i ka lokomaikai, a me ka manao o ke Akua. O keia hoolohe koke ana mamuli o ka manaoio ka mea i hoapono loa ia ma Hebera 11:8.9. O ko Aberabama manaoio i ke Akua i hoike ia ma kona hoolohe i ke Akua me ke kanalua ole, ua lilo ia mea e pono ai oia. Galatia 3:6 Pela hoi o ka manaoio ana i ka Haku ia lesu Kristo i hoikeia mai. ma ka hoolohe ana i kana mau kauoha, oia wale no ka mea e ola'i. Mareko 16:16.
P. 4. "Ka aina o ko Kaledaio." "A make kona makuakane.” Ua hoikeia mai ma Kinoh@ 12:4, he kanahiku makahiki o Tera a hanau mai o Aberahama, Nahera, a me Harana. He kanahiko kumamalima makahiki o Aberahama i kona haalele ana ia Harana, e hele aku i ka aina o Kanaana. Kinohi 12:4. Ina o Aberahama ke keiki hiapo, alaila he 145 na makahiki o Tera i ka wa Aberahama i haalele ai ia Harana. Aka, he 205 na makahiki o Tera i kona wa i make ai. Me he mea la, o Harana ke keiki hanau mua, maha paha aole i hanau o Aberahama a haia na makahiki he nui mahope iho o ko Harana hanau ana. Ina paha ua hanau oia he 60 makahiki mahope mai o Harana, ua hiki no iaia ke noho malaila a make kona makuakane, a mahope iho hele i ka aina o Kanaana iloko o ke 75 o kona mau makahiki. Ua oleloia ma na kaao o ka poe Iudaio, o Sarai oia no o Iscah, ke kaikamahine a Harana, a kaikuahine hoi o Lota ka mea i kapaia ka hoahanau o Aberabama. Kinohi 14:14. 16. Ua kapa aku o Aberahama ia Sarai he kaikuahine nona e like me ke kapa ia o Lota kona hoahanau. No ke kaulana loa o Aberahama o kona moa ka i hoopuka mua ia, oiai oia no ka muli loa. (Aole i pau.)
No Rev. S. Kauwealoha, Ko Nakuhiva Pae Aina
Atuoua, Hivaoa, Aperila 16, 1872.
INA LALA O KA PAPA HAWAII; Aloha oukou:--
Ua koho ia mai au i Komite e pane aku ia oukou no kekahi mea i hoike ia ma ka oukou palapala nui, oia keia wahi olelo. "Kona Misionari lawelawe ana mu ka oihana kalepa." Ua lohe paha oukou i ko makou lawelawe ana ma ka oihana kuai. He oiaio no ia lohe ana o oukou. Ua lawelawe no makou ma ia hana
A penei na kumu oia hana.
1 Ua ehaeha mau ko makou naau i ka ike ana aku i na kane, e hoounauoa ana i ka lakou mau wahine e hele iluna o na moku; a me na makua e haawi ana i na kaikamahine a lakou e hookamakama iluna o na moku; e imi ana i waiwai no lakou ma ka hana ino loa. Olelo na kanaka he mama ia hana; a he nui ka waiwai.
I na paha i loaa kekahi hana ia lakou; a lilo ma ka hana e loaa ai ka lole, ke koi, ka pahi, ua pani ia ke alanui e hela aku ai i ka ino loa.
2 He ehaeha ka naau i ka olohelohe o na kino o na kane a me na wahine, a me ia olohelohe no e komo mai ai iloko o ka hale pule. Aole nae he nui o ka waiwai ma ko makou lima. Ua hu mau ke aloha no ko makou nele, nolaila, nonoi aku makou i ka haole kalepa, e waiho mai i mau apa lole, a me kekahi mau mea e ae ma ka lima o na kumu, a na ke kumu e nana mawaena o na kanaka a me na hoale
3 He nui na hoopaapaa iwaena o na kamaaina a me na haole; a o na kumu ka i uwao iwaena o lakou, e wehewehe pono ana i na kamaaina, i ole e ulu mai ka hakahaka, a me ka hookahe koko, iwaena o na haole a me na kamaaina.
Ua makemake loa na kanaka i ka waiwai make pono; aole ka pu me ka pauda e make ai. E hoonui ana ke kalepa i kona makepono, o e uwe ana kanaka ilihune i ka uuku o ka mea loaa mai.
Ua makemake no na haole kalepa, e kuai aku i ka pu, a me ka pauda, a me ka rama, a me ka baka i na kanaka; no ko lakou ike, he mea uuku ke lilo aku, a he nui ka mea e loaa inai, mai na kanaka mai.
O keia mau mea maluna ae nei, na mea i makemake loa ia e na kanaka; nole he makemake o na kalepa e haawi i ka mea e pomaikai ai na kanaka. Ua ike no kakou, o ka makemake nui o na haole kalepa a pau, e loaa mai na waiwai makepono loa; a e lilo aku na waiwai opala.
Eia hei kekahi kumu o ko makou lawe ana i na waiwai o na haole. O ka nui o na waiwai o na kumu Pope; ua kuai aku lakou i na waiwai me ka lakou mau haumana, a ina e hele aku ka makou mau haumana e kuai me lakou; alaile, e hookuke mai na kahuna Pope i ka makou mau haumana, aole e kuai i kekahi wahi lole no ka poe e launa mai ana me makou.
I kekahi manawa nonoi mai na haumana a makou, e imi i kahi e loaa mai ai kekahi waiwai. Mahea la? ma Hawaii paha? E kauoha aku paha i mau kalepa e holo mai i keia mau aina? aole paha e hiki. Alaila, ha i aku la na kumu. Eia na moku e holo mai nei i ko kakou mau awa kumoku. A ua ae mai na haumana, e lawe mai i mau waiwai mai na haole mai. E waiho malama ia ma ka hale o na kumu, oia kahi malu, aole lilo i ka aihueia. A lawe na kanaka a pau i na waiwai a na haole. A hoi hou mai ka moku, lawe mai na haumana i ka pepeiao laau, a me ka aila niu, me ka niu, me ka puaa, a uku i ke kapena nona ka waiwai.
Ina ua loaa na hale kuai kokoke no na kanaka i na kahawai, i na aole makou e lawe mai a malama i na waiwai.
A ke manao nei makou e waiho aku i ka lawe ana mai i na waiwai kalepa o na haole. Aole makou e lawe mai i ka waiwai no ka lehulehu. Me ke aloha ia oukou.
S. KAUWEALOHA.
Hoike kihapai no ka Ekalesia ma Hokoku, Uahuna.
Ua mau no ke kahu ole no keia ekalesia i keia mau makahiki eha. Ua kapaeia ae o Mr. Laioha, mai ka noho kiai ana no keia mau hipa.
Ua hiki aku au malaila i ka malama o Aperila, 1871. Ua halawai au me kekahi poe auku. Ninau aku la au i kekahi mau hoahanau, auhea hea o mea? i hea o mea? Hai mai ia kekahi, ua hoi. Hivaoa, ua hele i Nuuhiva; ua auwana i na hana ino; a ua hoi hou kekahi poe ma na hana kahiko.
Aia no kekahi poe uuku e hoomau ana ma ka pono o ke Akua.
Ua haalele o Laioha i ka pono ana i lawe mai ai ma kaia mau aina. Ua lilo i ka inu rama, e like me na pegaua: oia kekahi kumu o ka haalele o kekahi poe i ka pono o ke Akua, no ka ike i ka hana ino a ko lakou kumu. O ka wahine a Laioha, oia ka wahine maikai, a ke malama la no i kona pono. He aloha makou ia ia. He makuahine maikai oia no kana mau keiki; a he kupaa ma ka oiaio. Aole i maopopo ia'u ka nui o na hoahanau e noho pono ana i keia wa; a me ka nui o na mea i auwana; a me ka poe i make. Ke kumu o ko Laioha hana i ka inu rama; o ko ka Papa Hawaii hoopau wale i kana oihana misionari, a me ka hoouna ole ia mai o ko laua oia makahiki. Ke mau nei no ka manao o kekahi poe; e noho mai kekahi kumu hou no lakou. O A. Kaukau ko lakou kumu i makemake loa. Ua noi pinepine mai lakou ia'u e kauoha aku ia Kaukau.
He wahi kihapai maikai o Hokoku; E nana mai oukou i keia kihapai kahu ole.
S. KAUWEALOHA:
WELA LOA O KA-LA. Nani ka wela o ka la ma Amerika Akau. i ka la 4 o lulai. Ma Nu loka. ua ku wela loa ka la i na kanaka 97. (Sun Struck) a ua make he 27 o lakou. Ma Philedelphia 23 ka poe i make; a 9 hoi ma Holyoke. Elua kanaka opiopio, ua kuia i ka uila, a make ia la, ma Governors Island.
HI LEPO O NA KEIKI LIILII. (Cholera Infantum). Ma Brooklyn, Nu loka, 170 na keiki ka i make iloko o na la elima, mai ka la 3 o lulai, a hiki i ka la 8; i ka mai hi lepo.--Pono i na makua e malama pono i ka lakou mau keiki liilii i keia wa wela.
Kula Kahunapule.
E like me ka hooholo ana o ka Papa Hawaii, e wehe ana keia kula ma Honolulu me ka haiolelo e Rev. J. D. Parisa ma ka rumi halawai o Kawaiahao i ka la mua o Okatoba ma ka hora 10 kakahiaka. O ka poe e makemake e komo maloko o keia kula, a e hoomakaukau no keia oihana maikai a nui, e hele mai oukou. Me ka hoaponoia e na Aha Euanelio Mokupuni, e hele mai ai na mea e manao ana e komo. Inu makemake kekahi e ninau a e kukakuka no keia kula, he pono me Rev. J. D. Parisa, a me Rev. J. F. Pokue e kuka ai, a e palapala ai.
J. D. PARISA
Honolulu, Iune 29, 1872
HAAWINA KULA SABATI.
1872: HAPAHA Ekolu. Olelo ao a Paulo.
HELU XXXII. Augate 11
KE ALOHA E HOOKO ANA I KE KANAWAI
Pauku Baibala. Roma 13:8-14.
8 Mai noho a aie wale i ka kekahi, anoai ma ke aloha i kekahi i kekahi; no ka mea, o ka mea aloha ia hai, oia ke malama i ke kanawai.
9 No ka mea. eia. Mai moe kolohe oe; Mai pepehi kanaka oe; Mai aihue oe; Mai hoike wahahee oe; Mai kuko wale oe: a ina he kanawai e ae, ua komo poko ia iloko o keia olelo, o nei, E aloha oe i kou hoalauna e like me oe iho.
10 Aole e hana hewa ana ke aloha i kona hoalauna; nolaila o ke aloha ka hooko ana i ke kanawai.
11 Malaila hoi oukou, e hoomanao ana i ka manawa, eia ka hora e ala'i kakou mai ka hiamoe ana, no ka mea, ano ua kokoke mai ko kakou ola, aole i ko kakou wa i manaoio ai.
12 Ua auwi ae nei ka po, ua kokoke mai hoi ke ao, nolaila, e haalele aku kakou i na nana o ka pouli, a e aahu i na mea kaua no ka malamalama.
13 E hele pono kakou me ka hele ana i ka la, aole me ka uhauha aoa a me ka ona aoa, aole me ka moe kolohe ana a me ka makaleho ana, aole me ka hakaka ana a me ka ukiuki ana.
14 Aka, e aahu oukou i ka Haku ia Iesu Kristo, aole e hoomakaukau no ke kino mamuli o kona mau kuko.
Pauku Alakai.--Ua aneane hala loa ka po ke kokoke mai nei ke ao, e haalele kakou i na hana o ka pouli.
Ninau ano nui.--Ke hoomakaukau nei anei kakou e hooko i na kuko o ke kino?
Kumu noonoo.--Ke konu ole o ka hahai ana o ka poe i hoolaia e Kristo mamuli o na hana e pili ana i na kuko kino.
MANAO WEHEWEHE.--Ua papaia i na Keristiano ka aeia ana o ka mea i pili ia hai, oia hoi ka aie. Aole i papaia ka ae ana i kekahi mea e ae e kokua mai i ka wa pilikia, ke hana mai kela ma ke ano aloha.
Eono kanawai a Mose, oia ka i pili i ke aloha hoalauna; mai ke kanawai elima a ke kanawai e umi. Eha noi i pili i ke aloha Akua. Ua maopopo no ia kakou ka mea nana i hoopokole i keia mau @@@@@ o lesu Kristo. Mat. 22:36-40.
10 O ka mea i komo loa iloko @@@ nae aloha, aole i hiki iaia ke uhahki keia mau kanawai e pili ana i ka noho'na @@@ i una. Nolaila o ke a eha ka mea e @@@@ ai ke kanawai.
11 Ua ike kakou i ke au o ka manao, oia hoi ua weheia mai ua kaulahao paa o ka makau kanawai: he noho'na pomaikai @@ waihoia mai imua o na maka o kakou. Nolaila ua hoeueuia kakou e hoopau i ka @@@ moe. O ke kumu nui i hanaia mai no ka haalele aua i na hewa, oia ke @@@ o ia mau hana i ka poe i hoo@@@. E @@@@ kakou, aole keia he kamailio aloha keia: me he la, ua ae @@@ me ka manaoio; ao ka mea @@@ noo ana i na mea i kohu no ia mara@@@.
E aahu ia Iesu Kristo @@@@@@ ke i na ano a pau me ia.
O ke kauoha hope loa o keia haawi @@@ mea e kupono loa ia kakou e noonoo.
NINAU.--Ua aha ia ka aie ma @@@? O ka aie hea ka aie i aeia? Owai @@@ i maluna i ke kanawai?
10. Ehia na kanawai @ Mose, i pili @@@@ aloha hoalauna? Ehia o ia mau kanawai @@@ pili i ke aloha i ke Akua? Ina e hoopoke e ia na kanawai i pili i ka @ hoalauna i @ hookahi?
11. Heaha ka mea e hoopaa @@@@ kou manao me ka hiki ole ke uhaki ia na kanawai? Heaha ka hooko ana i ko keia wai?
12. Ma ka pauku 12 ua kauohia kakou e haalele i na hana o ka pouli; no ke aha Heaha ia po i hala? E aahu kakou i ke aha Heaha ke ao i oleloia maanei?
13. E hele kakou pehea? Pane. Ma ka mea kohu pono o ka hele ana o ke ao. Hea ha na mea i papaia ma keia pauku?
14. Heaha ka aahu anu ia lesu Kristo O na kanawai hea na kanawai paakiki o ka malama ana? Pehea e ikaika ni kakou e malama ia mau kanawai? Mai hooluolu kakou i ke aha?
Heaha ka meu i kohu ole ai keia mau mea no ka poe e hele ana i ke Kula Sabati.
"KA NUPEPA KUOKOA,"
HOOPUKA MAU IA MA HONOLULU
I kela Poaono keia Poaono.
$2.00
No na mahina he UMIKUMAMALUA!
$1.00 no na mahina eono.
ME KA HOOKAA MUA MAI.
----------
NA OLELO HOOLAHA—aole i oi mamua o 10 laina no ka hoopuka hookahi ana, $1.00; alua komo ana, he $1.50; hookahi malama, $2.00. E uku mua ia mai ke dala o na olelo hoolaha a pau e hoounaia ana mai e pai.
KANIKAU—he hapalua dala ka uku no ka aoao hookahi o ka pepa leta, oia hoi 4 keneta no ka lalani hookahi—penei: he 25 lalani, $1.00; 50 lalani, $2.00; a pela'ku.
NA UKU NO NA OLELO HOOLAHA—ka uku pepa, a me ka uku o ke Kanikau, e haawiia no ma ka lima o na Luna o ke Kuokoa, a i oleia, e hoouna mai ia Kauka Kulika.
O NA UKU PEPA A PAU E HOOKAA MUA MAI NO—aole e kauia ka inoa o kekahi haole a kanaka maoli paha, ma ka inoa o ka poe lawe pepa ke ole e hookaa e mai mamua. E pono ke hiipoiia keia mau rula, no ka mea, he emi no ka auhau no keia nupepa.
AIA KE KEENA O KA NUPEPA KUOKOA—ma ke keena i noho mua ia iho nei e J.W. Aukina, maluna ae o ka Hale Leta. O na hora hana, mai ka eiwa o kakahiaka, a i ka ha o ke ahiahi.
H.M. WINI Luna Hoopuka
KA "NUPEPA KUOKOA."
Is published in Honolulu
EVERY SATURDAY,
$2.00 per annum, or $1.00 per six
months, in advance.
ADVERTISEMENTS not exceeding 10 lines, inserted once for $1.00; twice or $1.50; and $2.00 for one month; all advertisements must be paid for in advance.
KANIKAUS will be charged 1.00 per page, or 4 cts. a line. PAYMENTS FOR ADVERTISEMENTS, Subscriptions or Kanikaus, may be paid to any of the Agents of the Kuokoa, or may be enclosed in a letter to the Publisher.
ALL SUBSCRIPTIONS must be PREPAID. No names, either of foreigners or natives, will be inserted on the subscription list, until paid for. This rule must be strictly adhered to, on account of the low subscription price.
THE OFFICE OF THE KUOKOA is over the Post Office. Office hours from 9 A.M. to 4 P.M.
H.M. WHITNEY, Publisher
Bound Volumes of the KUOKOA, for sale, at the office over the Bookstore. - $3.50 each.
Persons having complete sets of the above, can have them bound by paying $2.00 each.
NA BUKE
HOOLAHAIA E KA PAPA HAWAII
Baibala Hemolele Nui ili eula nani me na kuhikuhi ma na a ao.....$12 00
" " Nui ili eleele kaekae wai gula.....5 00
" " uuku iki ihi " ".....8 00
" " Pananaiki iho ili eleele.....4.00
Kauoha Hou ili gula nani me na kuhikuhi.....3.00
" " eleele kaekae wai gula.....1.00
" " " ......75
Kauoha Hou Hapa Haole.....75
Lira Hawaii 1848 me ke kanawai......25
" " 1855.....25
Moolelo Ekalesia.....50
Haiao ili lahiahi.....10
Hele Malihini ana.....25
No ko ke Akua ano......25
Lira Kamalii......25
Hoike Palapala Hemolele.....25
Moolelo o Heneri Opukahaia.....25
Hoike Akua.....25
Weheweheia.....25
Ninau Hoike ili manoanoa.....25
" " " lahilahi....10
Kumumua Kula Sabati.....10
Buke Lawe Lima.....10
He Buke no ka Pope.....10
Ui Kula Sabati Helu 3.....25
" " " " 4......25
" " " " 5......25
Buke Euanelio a Ioane.....10
Himeni .....1.00
Himeni Ili nani.....1.75
Na Kauoha Hou Pakeke
Ili Gula nani.....1.50
Ili eleele kaekae nani......50
Ili eleele......35
Kauoha Hou Pakeke me na Halelu
Ili Gula nani.....1.75
Ili eleele kaekae wai gula.....50
Ili eleele......50
Na Halelu Pakeke
Ili Gula nani.....50
Ili eleele kaekae wai gula......30
Ili eleele.....20
Ka Hae Hoonani (Buke Mele)......25
Buke Wehewehe Huaolelo Baibala.....2.00
" " " Ili nani.....3.00
Eia na buke haawi wale
Palapala Liilii--
Helu 4--Makemake anei oe i ke ola
Helu 6--E hele i o Kristo la.
Helu 7--Ka hoi ana mai o ke Keiki Uhauha
Helu 11--No ka hoohiki wahahee i ke Akua
Helu 16--Ka Kehia ana o ka Ahaaina a ka Haku a ma ka Bapetiso ana.
Helu 17--Mai hana ino i na holoholona
Helu 18--No ka mahi ana, kuai ana a me ka inu ana i ka Awa.
Ka Davida Malo Kumumanao.
Ka Moolelo o Batimea Puaaiki.
J. F. POKUE.
Kakauolelo o ka Papa Hoeke o ka Ahahui Euanelio o ko Hawaii Pae Aina.