Ka Nupepa Kuokoa, Volume XI, Number 41, 12 October 1872 — No ka Pepa Piliwaiwai. [ARTICLE]

No ka Pepa Piliwaiwai.

E KA NUPEPA KUOKOA E ; Aloha oe:— Elua a'u mau apana i ike nui ai no keia hana, o ka pepa pili waiwai, aia ma Kawela, a me Kaunakahakai, aia laua ma ka Mokupuni o Molokai. Ia'u nae i naue aku ai ma ko'u wahi lio, a kipa mua ae la au ma kahi o Kekaula, ma ka apana o Kawela, a ike iho la au he ewalu ko lakou nui e pepa ana, " hai, lo, keaka, kemu, poa kaima;" , a o ka pili o lalo he kukaepelo, aole nae au i ike he dala kekahi, a hoomaopopo iho la au, ua pili no keia hana i ke kanawai o ka aina, pau ko'u ike ana ia Kawela. Hoomaka aku la au e holo a hiki i Kaunakahakai, a kipa mua ae la au ma kahi o Neti, ka mea nona ka hale kuai e ku nei malaila, ia'u e noho ana malaila, ike hou no au i kekahi poe e pepa ana, a o ka pili o lalo he kukaepele no, e like me ko Kawela, he pulapu ka lakou pepa. Eia ko'u mea o ka makee ana i keia hana ino, no ka huli nui ana o na hoahanau ma keia hana uso ole, a alakai pu no hoi i ka lakou mau keiki iloko oia hana hookahi. Nolaila, e i mai paha auanei kekahi o na hoa naauao, "aole makou i manao ua pili keia ninau i ke kanawai o ka aina, no ka mea, aole makou i pili dala! e akaka'i la hoi ko makou pili waiwai ana." Ke hoike aku nei au ia oe e ka mea hoolohe ole i ka ke kanawai, ua papa mai ke kanawai, penei: O ka pepa pili dala, a me ka pili ana i na waiwai e ae, oia hoi ka aina na aahu o ke kino, moku, waapa, waa-maoli, lio, bipi, kukaepele, a pela aku, ua hoohuiia lakou a pau, he waiwai, a o kela waiwai i keia waiwai i pili ia oe, a ua lawe nae oe a pepa me kou pili aku, a pili mai paha, i kekahi o na waiwai e ae, e like me keia, he pili waiwai no ia. E nana pono oukou i na kanawai, ua papa pu ia no na pepa lealea wale iho no o na mea a pau. Nolaila, e makaala na lima lawelawe o ke aupuni, mai hoopalaleha, a mai hoopili ma ke ano he makamaka, mai hele a ike i ke kaikaina, a makuakane, a kaikuahine a makuahine ponoi paha, a holo aku, eia kau mau olelo e hai aku ai, "E ka punahele, mai hoomahui i ka hewa, aka, i ka maikai no." S. K. PELELEU Waipahu, Molokai, Oct. 1, 1872.