Ka Nupepa Kuokoa, Volume XI, Number 46, 16 November 1872 — Page 4
| This text was transcribed by: | Lori Faleafine |
| This work is dedicated to: | ELIZABETH MA'IHUI'I BROWN-PARK |
Ka Nupepa Kuokoa
KE KILOHANA POOKELA NO KA LAHUI HAWAII.
Ka Nupepa Kuokoa
KE KILOHANA POOKELA NO KA LAHUI HAWAII.
Aloha no Iesu.
Leo, Lore for Jesus – Fresh Laurels, p 23.
1.
Aloha au ia Iesu,
Inoa maikai e
A na anela i mele,
A o hosana mai.
I a ia la kuu paulele,
la ia la e oli nei,
A no ho au a a ʻ o la
Ma kona mau wawae,
A noho au a a’o la
Ma kona mau wawae.
Repeat - Aloha, Aloha,
Aloha au ia Iesu,
Inoa maikai,
Inoa,
Inoa maikai e.
2.
Aloha au ia Iesu,
A nona kuu manao,
Me kuu hauoli ana
I kuu mau la a pau.
Aloha au ia Iesu,
Ua lokomaikai mai,
No ia la mai kuu pono,
A me kuu pomaikai,
No ia la mai kuu pono,
A me kuu pomaikai,
No ia la mai kuu pono,
A me kuu pomaikai.
Repeat, - Aloha, aloha, &c.
3.
Aloha au ia Iesu,
A hana nona mau;
Kokua e ka Uhane,
I hana pono au.
Ka hana no kuu Iesu,
Kuu oli nui nei –
Aloha oia ia o la,
A, iaia e ola’i,
Aloha oia ia’u la,
A, iaia e ola’i.
Repeat. - Aloha, aloha,
Aloha au ia Iesu,
Inoa maikai,
Inoa,
Inoa maikai e.
Hawaii.
Moolelo o ka Ahahui Ekalesia,
Ma Koloa, Mokupuni o Kauai.
Okatoba 16, 17, 1872.
Halawai ka Ahahui ma Koloa, ma ka la 16 o Okatoba. Ma ka balota ana, ua kohoia o Rev. J. H. Mahoe I Luna Hoomalu, a o A. W. Maioho i Kakauolelo. Eia na lala I hiki mai:
Na Ekalesia. Na Kahu. Na Elele.
Waioli, Rev. A. Pali Z. Seta,
Anahola,
Lihue T. Puuohau Kekaa,
Koloa, Rev. J. H. Mahoe, Puniwai,
Waimea. Rev. A. Kaukau. H. W. Kalua’hi.
Na lala mau Re. J. W. Smith a me S. Kahookui.
Na keiki o ka Aha. – A. Wa. Maioho, Kealahula a me Z. Seta.
Ua kohoia o Rev. J. F. Pogue, a me F. Puuohau i mau komite imi hana.
Kohoia o J. W. Smith, A Kuukau a me Z. Seta i mau komite imi haawina.
Hoike mai ke komite imi hana – penei:
1. 1 Ka hapalua hora haipule mamua o ka hana.
2. 2 Hoike kihapai.
3. 3 Heluhelu haawina.
4. 4 Ka haiolelo ma ka hora 3 ahiahi.
5. 5 Na palapala hoopii a me na leta.
6. 6 Ke kula kaula.
7. 7 Ka Mahina Hou.
8. 8 Heaha ka mea e nui ai na kanaka ma na halawai o ka Ahahui nei?
9. 9 Na kihapai kahu ole,
10. 10 He kuleana anei ko na Kahu Ekalesia ma na kula aupuni?
11. 11 No ke ola o na kahu.
12. 12 He mea pono anei i na Kahu a me na Haiolelo ke haalele loihi i ko lakou ma kihapai?
13. 13 Ka hebedoma mua o lanuari, a me ka Poaha hope o Feberuari i mau la haipule.
Hoomaka ia ka haipule ana, a pau ia; Heluheluia na Palapala Hoike no na Kihapai a pau, mai Waioli a hiki i Waimea.
Na Haawina
Heluhelu mai o A. Pali i kona haawina:
“Pehea e mahuahua ai ka makaukau o na kahu ekalesia ma ko lakou oihana:”
Heluhelu mai o Z. Seta i kona haawina, “Ka hewa o ka aie.”
Heluhelu mai o Puuohau i kona haawina.
“Ka launa ana o na Kahu Ekalesia me na kanaka oia ia hale aku ia hale aku.”
Hoopaneeia ka halawai a hiki i ka hora 2 ahiahi.
Akoakoa hou mai ka Aha, hora 2 ahiahi. Pule o Kaluahi.
Heluhelu mai o J. W. Smith i kona haawina. “Ka poe Moremona a me ka lakou mau hana.” Hoike waha mai o S. Kahookui i kona haawina. – “No ka pule mehameha.”
Heluhelu mai o D. Kealahula i kona haawina. –“Pehea la e makaukau ai na komo kula Sabati no ka lakou hana?”
Heluhelu mai o J. H. Mahoe i kona haawina. – “Na pilikia o na Misionari e noho ana ma na aina pegana.”
Hoomaha iki ka hana no ka hoaloha ana i ka haiolelo a T. Puuohau. Aia ka poolelo ma 11 Korineto 5:11.
Heluheluia he mau leta aloha mai he Ahahui Euanelio o Hawaii.
Kohoia o A. Pali i komite e hai aku i ke aloha o keia Aha I ka Ahahui o Hawaii Hikina.
Kohoia o T. Puuohau i komite e palapala aloha ake i ka Ahahui o Hawaii Akau. Hoopaneeia ka hana a apopo hora 8 Pule o D. Kealahula.
La hana Elua.
Hoomakaia ka hana i ka hora 8.
Kamailio ka Aha no ke Kula Kahunapule ma Honolulu, a hoike mai o Rev. J. F. Pogue i ka haawaina dela o keia. Mokupuni, a ua aponoia, a penei ka mahele:
No ka Ekalesia o Waioli, $30.00
“ “ Anahola, 15.00
“ “ Lihue, 30.00
“ “ Koloa, 30.00
“ “ Waimea, 15.00
______
Huina pau loa 120.00
Kamailio ka Aha no ke kumu manao 7, oia hoi, ka malama ana i ka pule mahina hou, a hooholo penei ia:
Hooholoia, ma ka manao ana o keia Aha, he mea pono ia e malama i ka pule mahina hou ma ke kakahiaka o ka la Sabati o ka mahina hou; a ia Manawa e hai aku ke Kahu i na mea hou o na aina e, a i kumu manao hoi e hoolana ai i ka manao, i lilo ai ia halawai i haiawai Misionari ma keia hope aku.
Hapai ia ka noonoo ana i ke kumu manao 8 – “Heaha la ka mea e nui ai na kanaka ma na halawai o keia Aha?” Kamailio ko ka hale, a pau ia, hooholo i keia olelo.
Hooholoia, e komo aku na Kahu a me na Elele i mau hoa no lakou e hele pu mai, i ka wa e halawai ai keia Aha.
Kamailio ka Aha no ke kumumanao 9, oia hoi, “Ke kihapi kahu ole;” a mahope hooholoia keia olelo.
Hooholoia, ma ka nana ana i ka Ekalesia o Anahola, ua nawaliwali a pilikia no ka noho kahu ole ana, nolaila, ke noi aku nei keia Aha i ka Papa Hawaii e kokua mai no ia Ekalesia i $50.00 no ke Kahu a lakou e kahea ai ma keia hope aku; a na ua Ekalesia la hoi e hoolawa aku i ke koena o kona ola.
Kohoia o J. W. Smith i komite e palapala aku i ka Papa Hawaii no ia mea.
Kohoia o Rev. A. Kaukau, a me Rev. A. Pali i mau komite e hele aku a e kuka pu me ka Ekalesia o Anahola.
Kumumanao 10. – “He kuleana a nei ko na Kahu Ekalesia ma na kula aupuni ?”
Kamailio ko ka hale no keia kumu, aole nae olelo hooholo.
Hoopaneeia ka Aha a ka hora 2 ahiahi.
Halawai hou ka Aha ma ka hora 2. Pule o Puniwai.
Hapai ka Aha i ke kumumanao 11. – “No ke ola o na Kahu.”
Kamailio ka Aha no keia kumumanao a eia na manao i hooholoia.
1 Ke paipai aku nei keia Aha i na Ekalesia malalo iho ona, e hooikaika ma ka mea e kaa ai ke ola o na kahu.
2 E hooikaika na luna i kaa pono i ka mua okela hapaha.
3 E malama pono na Luna Ekalesia i na inoa o na hoahanau i haawi mai; a na ka Puuku e heluhelu mai i na inoa oia poe i mua o ke anaina.
4. Ke kauoha nei keia Aha i na Elele e hoi aku, a hui me na luna a e hooikaika e aku, a hui me na luna a e hooikaika e me na mea i kukaia ma keia Aha.
Kumumanao 12. – He mea pono anei i na Kahu a me na haiolelo, ke haalele loihi i lakou mau kihapai?
Hooholoia. – Aole pono i na Kahu a me na Hailelo ke haalele wale i ko lakou Ekalesia.
Hoike mai ke komite imi haawina i mau haawina no ka halawai hou, a ua apono Penei:
1 Heaha ke kumu e hoino ai na kanaka i ke Kahu Ekalesia? A. Pali.
2 Ka wehewehe ana o 1 Korineto 12, 31. “Ka oihana oi.” A. Kaukao.
3 I ka make ana o na kanaka, komo koke a nei na uhane o ka poe hewa i ka po? a o na uhane hoi o ka poe pono i ka lani?
D. Dole.
4 Heaha na hewa kupono ke ouiia, a kapaeia paha, mawaho o ka Ekalesia?
S. Kahokui.
5 Me ke kino hea la na kanaka e ala hou ai i ka la mahope? T. Puuohau.
6 Pono anei i ke Kahunapule ke pule kupapau o ka hoomaloka? J. H. Mahoe.
7 Owai la ka poe kupono e hookomoia iloko o ka ekalesia? A. W. Maioho.
8 Hiki anei i ke kanaka haipule ke malama i ka oihana loio me ka noho maemae pu?
D. Kealahula.
9 No ke ola kino. J. W. Smith.
O Rev. J. H. Mahoe ka haiao i mua o ka Aha, a o Rev. A. Kaukau kona hope.
Hoohoholoia. – E malamaia ka hebedoma mua o Ian. 1873 i hebedoma haipule no kea o nei; a o ka Poaha hope o Feberuari i la haipule no na kula.
Hoopaneeia ka halawai a hiki i ka Poakolu mua o Aperila 1873, ma Koloa.
Heluheluia ka moolelo, a aponoia.
Hookuuia ka Aha ma ka pule o S. Kahookai.
A. A. W. Maioho.
. Kakauolelo.
He kau Leo aku.
Ina hoa Kahunapule Hawaii, a me na kumu kula Sabati, ke kau leo aku nei ao ia oukou, a me ka poe a pau e aka ana e ike i na mea pohihihi o ka Baibala; a heluhelu iho oukou, me ka hoomaopopo i keia mao wehewehe Baibala, iloko kekahi mau buke, a me ka Kuokoa.
I Na hoike o ka Baaibala. He buke ia i hoomakaukauia e ka ka Makua Rev. W. P. Alekanedero . A aia maloko o ia buke na hoike he 10. hooakakaia, e maopopo ai, na ke Akua ka Palapala Hemolele.
He buke keia e pau ai ke kaaaina o ka haipule, a e makaukau ai hoi ia, e pale aku i ka poe hole Baibala, a me ka poe hole Akua a pau. He mea pono loa i na Kahunapule Hawaii a pau, ke heluhelu mau i keia buke, a walewaha ioa; o ke keehina mua keia e pono ai; alaila, huli iho i ko loko me ke kanalua ole, e like me ia i ao ia ma ka Huli Ao Akua, ka buke aina a Rev. W.P. Alekao@ i hoomakaukau ai; i mea e pono ai ke Kula Nui, a me ke kula Kahuna.
II O ka Buke Wehewehe Huaolelo Baibala. i hoomakauhauia e Rev. E. W. Kalaka; he buke keia e wehewehe ai i kea no o kela huaolelo keia hua olelo oloko o ka Baibala, ma ka olelo, a me na kii. i ko’u heluhelu ana i keia buke, me e ka nui o kona malamalama; pau ka pohihihi, a me ke kuhihewa no kekahi mau hua olelo o ka Baibala. He malamalama nui keia e pono ai na Kahunapule, a me na Luna, a me na Kahu. a kumu kula Sabati.
He buke hou loa keia, iloko no o keia ma kahiki ka hoopuka ana mai; he makana na Kalaka i keia Lahui ana i aloha ai. O kona kumukuai $2.00. Aia ma ka hale Kuai Buke o Wini, a me ka Papa Hawaii.
Elua buke wehewehe i koe, a puka mai,o ka Buke Wehewehe no Mataio, a me ka Buke Kuhikuhi Baibala. E makaala ia laua ke hiki mai.
III O ka Olelo wehewehe no na Haawina Kula Sabati, i hoomakaukauia e C. J. Laiana, Peresidena o ka Ahahui Kula Sabati o ka Pae Aina Hawaii, i hoopukaia ma ke Kuokoa. He mea ia e pono ai na Kula Sabati, a me na Kahunapule a pao. Mai molowa i ka heluhelu i ka olelo wehewehe, no ka mea, o kea no nui ia o ia mau pauku a ua hakkuia na niniu noloko ae o na pauku, a me ia olelo wehewehe. Mai hooio kakou ma ko kakou manao, o lalau; e hui pu i ka noonoo me ia wehewehe, alaila, hele pololei.
IV O ka olelo Wehewehe no Oihana, i hoomakaukau ia e Rev. Mr. Dole, kumu mua o Punahou, e noho mai la i Koloa, Kauai. He mea nui ka wehewehe ana no Oihana, no ka mea, oia ka moolelo no ke kukulu ana i ka Ekalesia Kartiano. Ke kahua a kakou e ku nei. He mea pono e hoomaopopo i keia kahua, i ole e kukula hewa, a lalau wale i ke komo ana i ka ekalesia i kululu oleia maluna o ke kahua a na Lunaolelo, a me na Kaula.
O keia makua o kakou, aole e hiki ke kamailio pu me kakaou; aka, ua hoomakaukau oia keia olelo ma ka olelo haole, a ua unuhiia e Paleka opio, a ua paiia ma ka aoao 4 a ke Kuokoa, no kona aloha, a me kona iini i ka pono o na uhane o keia lahui. Nolaila, e o’u ohana iloko o na kihapai o ka Haku ma Hawaii nei, e hoomanao i ka luhi o na makua o kakou, e ake nei e kokua ia kakou ma ka wehewehe ana i ka Baibala, i mea e malamalama aikakou ma na pono o ka Uhane.
Me ka Mahalo.
M. Kuaea
Lahaina, Maui, Novemaba 1, 1872.
Ka Moolelo o ka Ahahui Euanelio o Hawaii Hikina, ma Hilo, Oct. 16, 17, 18, 19, 1872.
La akahi. Oct. 16, ma ka hora 3 p. m. O J. B. Hanaike ma ka noho, ka Lunahoomalu o ka halawai i hala, a o P. Barenaba ke kakauolelo o ka Manawa. Eia na lala i hiki mai.
Na Ekalesia, Na Kahu, Na Elele.
Keaiwa, Rev. J. Kahuhane J. Kaonohi,
Kalapana, “ P. Barenaba
Opihikao, “ D. Makuakane Kaleopaa,
Puula, Kapahee,
Haili, “ T. Koana Paulo,
Onomea, “ J. H. Pahio Kepaniwai,
Hakalau, “ J. B. Hanaike Kahea,
Laupahoehoe, “ J. Hanaloa Kainoa.
Lala mau, Rev. D. B. Laimana, a me Dr. D. H. Wetmore.
Ma ka Balota, ua kohoia o T. Koana i Lunahoomalu, a o J. B. Hanaike i kakauolelo. Ua weheia na hana me ka pule a ka Lunahoomalu.
Na keiki o ka Aba i hiki mai. J. H. Nawahi, Holopinai, G. Kaahiki, E. P. Hoaai, Mr. Kaolulo, Mr. Lapaela, Mr. Keliaukai, Mr. Kaonehu.
Hooholoia – O ka poe a pau i hele maino keia hana, elilo lakou i mau hoa kuka. Komite Ini Hana. Rev. T. Koana, a me Rev. P. Barenaba. Hoopaneeia na hana, me ka pule a ka hora 9 a.m. apopo.
La elua. Oct. 17, hoa 9 a.m.
Ua weheia na hana me ka pule. Heluheluia ka moolelo a aponoia. Hoike mai ke komite i na Kumuhana.
1. 1. Ka haipule
2. 2. Hoike Kihapai.
3. 3. Heluhelu leta aloha mai.
4. 4. Heluhelu Haawina.
5. 5. Komite Imi Haawina.
6. 6. Komite Moolelo o na Ekalesia.
7. 7. Na leta aloha aku.
8. 8. Moe manuahi.
9. 9. Na mea ona.
10. 10. Hoolaha Baibala.
11. 11. Palapala Hoopii.
12. 12. Hoolaha Nupepa.
13. 13. Kula Kaikamahine.
14. 14. Na Kula Sabati.
15. 15. Mahinahou.
16. 16. Na Misiona.
17. 17. Na mea e hoohuli ai i na kanaka i ke Akua.
18. 18. Ka heleana i na Aha Euanelio Hawaii.
19. 19. Hanai Kahu.
20. 20. Ka make ana o kekahi Makuahine.
KUOKOA
1. 21. Ka hui hou ana o ka Aha.
2. 22. Ke koia Kahana ma Honolulu.
3. 23. Ka hana a na hoahanau wahine.
Haipule i hapa hora.
Na Hoike Kihapai.
Hoike mai o J. Hanaloa no ha ekalesia o Laupahoehoe. Hoike mai o Rev. J. B Hanaike no Hakalau, Rev. J. H. Pahio no Onomea, Rev. T. Koana no Haili, Rev. J. B. Hanaike no Poula, Rev. D. Makuakane no Opihikao, Rev. P. Barenaba no Kalapana, Rev. J. Kauhane no Keaiwa .
Na Leta Aloha Mai.
Heluhelu mai ke kakauolelo i ka leta aloha, no ka Aha
Euanelio o Kauai mai. Ua hooholoia, na ka Lunahoomalu, a me ke kakauolelo e pane aku.
Na Heluhelu Haawina.
Heluhelu mai o D. B. Laimana i kona Kumumanao. “Ka Hoike no Tureke.” Ua hooholoia e hoopuka ma ka Nupea Kuokoa.
Heluhelu mai o J. H. Nawahi i kona Kumumanao. “No Pategonia.”
Heluhelu mai o J. Hanaloa i kona haawina. “No Nuuhiwa.”
Noi mai o Laimana e hoomaha ka Aha, a hui hou mai i ka hora 1 p.m. Ua hooholoia.
Hui hou mai ka Aha, a weheia na hana me ka pule a T. Koana.
Noi mai o Hanaloa, e kapae iki na heluhelu Haawina, a e hapaiia ka noonoo ana no na Palapala Hoopii. Hooholoia.
Heluhelu mai ke kakauolelo i ka Palapala Hoopii, no ka ekalesia o Puula, i ko lakou Kahu ia J. W. Hano. Ua nui ke kuka ana o ka Aha i keia, a ua haawiia ma ka lima o kekahi Komite, e noonoo a hoike mai i keia Aha.
{Rev. D. Laimana,
{ “ J. Kauhane,
Komite { “ J. Pahio,
{ “ D. Makuakane,
{ “ P. Barenaba
Heluhelu mai o Pahio i kona Kumumanao. “Kea no kahiko, a me kea no hou o Hawaii nei.”
Noi mai o D. B. Laimana e hoopanee i na hana, apopo hora 9 a.m. Ua hoopanee ia me ka haipule ana.
La ekolu, Oct. 18, hora 9 a.m.
Weheia na hana, me ka pule a Mr. Mioi. Heluheluia ka moolelo a apono ia. Haipule ka Aha i hapalua hora. Ka hoike a ke Komite no ka hoopii a ka ekalesia o Puula. Ua noonoo ke Komite, no ka hoopii no Hanu, Kahu o ka ekalesia o Puula, a ua hooholo lakou i keia mau mea.
1. 1. Ke hookuu aku nei keia Aha ia Hanu mai kona noho Kahu ana no ka ekalesia Puula.
2. 2. No ka nui o na mea pono ole i hoopii ia e ka ekalesia, a i hoikeia nona, nolai’a, kona lawelawe ana i ka ekalesia o Puula.
3. 3. Na ka Lunahoomalu a me ke kakauolelo e hai aku ia ia i na kumu i hoopii ia nona, a e kauoha ia ia e hele mai i ka wa e hui hou ai keia Aha.
Komite. D. B. Laimana, J. Kauhane, J. H. Pahio, D. Makuakane, P. Barenaba.
Heluhelu mai o J. Kauhane i kona Kumumanao. “1 Tesalonike 4:13 – 17.” Ua hooholoia. E paiia ma ka Nupepa Kuokoa.
Heluhelu mai o Lapaela i kona Kumumanao. “Ka hiki ana o ka pono ma Tahiti.”
Heluhelu mai o Kaunehu i kona Kumumanao, ma “1 Timote 4: 2.”
Heluhelu mai o T. Koana i kona Kumumanao. “E wehewehe ia 1 Timoteo 4: 18.”
Hooholoia – E hoounaia e pai ma ka Nupepa Kuokoa.
Heluhelu mai o Kaololo i kona Kumumanao. “E wehewehe ia 1 Korineto 9:22.”
Ma ke noi a D. B. Laimana. Ua hooholoiia. E hapaia ka noonoo ana, no ke Kula Kahuna ma Honolulu, a me ke Kula Kaikamahine o Hawaii nei.
Hoomaha ka Aha i hookahi hora.
Hui hou mai ka Aha i ka hora 1 p.m. Ua weheia na hana me ka pule a D. Makuakane.
No ke Kula Kaikamahine.
Elua mea nui a ka Aha i noonoo ai, o ka haawi aku $1,000.00 dala no ke Kula Kaikamahine e kukulu ia ana ma Kohala; a o ka pono o ke kukulu ana i Kula Kaikamahine okoa ma Hilo nei. Ua koho ka Aha I Komite. T. Koana, B. Laimana, J. H. Pahio, S. Kipi, a me Paulo, e hoike mai i ka hui hou ana o keia aha.
No ke Kula Kahunapule ma Honolulu.
Ua kuka keia Aha, a ua kaana like i ko lakou haawina dala $350. Penei na haawina. No ka ekalesia o Haili ($100.00) No Keaiwa ($50.00) No Kalapana ($50.00) No Opihikao ($25.00) No Puula ($50.00) No Onomea ($50.00) No Hakalau ($30.00) No Laupahoehoe ($20.00) Huina $375.00.
Ua koho keia Aha, e lilo o T. Koana, B. Laimana, Dr. C. H. Wetmore, J. H. Pahio, a me Paulo i Komite nana, a hoouna i na haumana i ke Kula Kahunapule ma Honolulu, ua hooholo ia.
Olelo Hooholo.
Oiai ma ka la 29 o Sepatemaba, 1872. Ua oluolu i ka Makua Mana Loa ka lawe ana aku i ko kakou makuahine aloha nui ia Mrs. Fidelia, Church, Coan; he makuahine i kaulana no ke aloha, oluolu a me ka hoopono; a ua mahalo nui ia e na mea a pau; a he hea hoi i noho pinepine mai ma keia Aha, ma na makahiki i hala aku nei, a ma na hoike a pau i ikeia nona, ua lana loa ka manao, aia no oia ma kela Home Lani; noaila e hooholoia.
Ke haawi aku nei keia Aha, i ko lakou aloha nui ia Rev. Titus Coan, ko kakou makua aloha nui ia i hoooeleia i ke kokoolua ole; me ka nonoi aku i ke Akua Mana Loa, e launa, a e kokua mai ia ia i keia noho mehameha ana; a ke haawi aku nei no hoi keia Aha i ko lakou aloha nui i na keiki i hoo@eleia i ka makuahine ole, me ka nonoi aku i ke Akua e kini, a hooluolu, a e malama mai ia lakou i keia wa i hoonele ia i ka makuahine ole.
“E uwe pu m@ ka poe e uwe ana, a e hauoli pu me ka poe e hauoli ana,” wahi a ka Haku.
Hoopaneeia na hana apopo hora 9 a.m. me ka haipule ana. (Aole i pau)
Na oleo Wehewehe no na Oihana a na Lunaolelo.
MOKUNA VIII.
p. 3. “Luku ae la o Saulo i ka ekalesia,” e like me ka luku ana o ka ilio hae i ka pu-a hipa. “Komo aku la i na hale,” kahi ana i manao ai e loaa ana ka poe Kristiano. “A kauo mai i na kane a me na wahine,” e like me ke kauo ia ana o na bipi hoopupu ma kahi a na kahu i manao ai e kuai aku, a e pepehi paha. “Hahao ae nla ia lakou iloko o ka halepaahao.” Ma ia mea i manao ai oia e hoopio loa i ka pono o Kristo. Kamahao ke aloha o ke Akua, i kona hookahuli ana i kea no o Saulo, ka ilio hae puni-ki-ko, a loaa o Paulo, ka lunaalelo haahaa, e hole ana iaia iho.
P. 4. Ua hele lakou ma na kauhale, a me na kulanakauhale, e hai ana i ka olelo; e hai ana’ku i ka euanelio. Pela i lilo ai ka e hoomaau ana i mea e hoolahaia’i ka nu homaikai iwaena o kekahi poe he nui, i lohe ole ana. Ke ole keia hoolaha ana. Ua hoopuka pinepine ke Akua i ka maikai mailoko mai o ka ino. Kinoh: 45: 5 a me Halehu 76:10. O ka hapa nui o kela poe i hoopuehuia, a i hele hoi ma na kauhale e hai ana i ka olelo, he poe hoahanau no lakou. Mawaena paha o lakou kekahi mau mea o na dia-kona ehiku. Pehea la lakou i hai ai i ka olelo a ke Akua? Aole paha ma ka hoouluulu ana ia lakou iloko o na anaina nui. Ua hai aku o Iesu i ka olelo i ka wahine o Samaria, Ioane 4:10-26. Ua hai aku o Pilipo i ka olelo i ka puuku o ke Aliiwahine o Aitiopa, Oihana 8:35. Pela auanei na na hoahanau e hai aku ai i ka olelo, i ka wa kupono, ke piha lakou i ke aloha o Kristo.
P. 5. “Iho ae la o Pilipo, “ oia kekahi o na kiakona i waeia, e nana i ka Mokuna 6:5; ua kappa ia no hoi oia o Pilipo ke kahuna euanelio. Mokuna 21:8. “I ke kulanakauhale o Samaria.” He kulanakauhale ia kukuloia e Omeri, a o kahi ia i ku ai na hale alii o na Lii o Iseraela no na haneri makahiki elua. 1 Na ‘Lii 16:24. “Hai aku la oia ia Kristo ia lakou,” oia hoi i ka poe o Samaria. Ua hai mua aku o Iesu i ka olelo i ka poe Samaria ma Sukara, Ioane 4:40-42, ano hoi ke hai nei o Pilipo i ka olelo i ka poe Samaria ma Samaria.
P. 6. “Malama lokai.” I keia wa, aole mea i hoomaau aku. i ka ike ana kana mau hana mano, manao iho la lakou he oiaio kana mau olelo. Ua pili kana mau olelo no Kristo ka Hoola. O ka hele mua ana o Iesu i hoike ia ma Ioane Mokuna 4, oia paha ka i hoomakaukau mua i ka naau o ko Samaria poe e apo i ka euanelio.
P. 7. Ua haiia mai ma ka pauku eono ua hana o Pilipo i na hana mana; a ma keia pauku hoi ua hai ia mai kekahi o ia mau hana mana. “Poe uhane haukae,” he poe uhane hemolele ole, ua kapaia no hoi he poe “uhane ino,” Luka 7:21. O ka hewa, he kue ia i ka maemae. O ka uhane hewa, he uhane maemai ole ia. He nui na hana o na uhane ino me na kanaka mai ka wa mai i haule ai na kupuna o kakou. A i ka wa o Iesu a me na lunaolelo, he nui ka poe i lilo aku nalalo o ka mana o na uhane ino, ua lawe pio ia e ka Diabolo ma kona makemake. 2 Timoteo 2:26. O kikahi poe i lilo aku malolo o ka mana o na uhane ino. Ua hoomainoino loa ia lakou, e like me ke kanaka e noho ana iwaena o na hale kupapau, e uwe ana, a e oki ana iaia iho me na pohaku i ka po a me kea o. Mareko 5:3,5; e like hoi me ke keiki i kiola ia iloko o kea hi, ailoko o ka wai e ka uhane haukae. Mareko 9:17-26. He mana aloha kupaianaha ka me nana i mahiki aku i keia mau uhaneino, a hoihoi mai i ka noonoo kanaka iloko o ka poe i uluhia ia e lakou. Mareko 5:15 “I walaau aku.” No keaha la i walaau ai lakou? Ke manao nei kakahi poe, ua koi ia lakou e hoike aku, o Iesu oia ke Keiki a ke Akua, Mareko 3:11, a me Lua 4:41, a me Mareko 1:24. Ke manao nei hoi kekahi poe, he walaau huhu keia main a daimnio mai, no ko lakou hookikina ia e haalele i ua poe la. Oka lolo a me ka oopa kekahi o na mai i hoola ia e Pilipo.
(Aole I pau)
HAAWINA KULA SABATI.
1872. Hapaha Hope. Olelo ao a Daniela.
HELU XLVII-Novemaba 24.
Ke Kakaulika Ma Ka Paia.
Pauku Baibala. Daniela 5:22-31.
22 A o oe, e Belehazara kana keiki e, ua ike no oe i keia mea a pau, aole nae oe i hoohaahaa i kou naau iho;
23 Aka, ua hookiekie oe ia oe iho maluna o ke Akua o ka lani; a ua laweia main a kiaha o kona hale mua ou, a o oe e me kou poe alii, a me kou mau wahine, a me na haiawahine au, ua inu oukou i ka waina i ole olaila; a hoolea oe i na akua kala a me ke gula, a me ke keleawe, a me ka hao, a me ka laau, a me ka pohaku, na me ika ole aole lohe, aole hoi i noonoo: aka, aole oe i hoonani i ke Akua, ka mea iloko o kona @ ma kou hanu, a nona kou mau aoao a pau.
24 Alaila ua hoounaia mai, mai ona me ka hapa o ka lima; a ua kakania keia palapala.
25 Eia ka palapla i kakauia: Menemene, Tekela, Uparesina.
26 A eia kea no o ia mea: Menemene @ i helu mai ke Akua I kou aupuni ana a @ hoopauia hoi.
27 Tekela; ua kaupaonaia oe ma ka me ke kaupaona, a ua ikeia kou mama ana.
28 Peresa; ua maheieia kou aupuni, a ua haawiia’ku, no ka poe Media a me ka poe Peresia.
29 Alaila kauoha aku la o Belehazara, @ hoaahu lakou ia Daniela i ke kappa ulaula, kau lakou i lei gula ma kona a-i, a kauoha no hoi oia nona, i lilo ai ia i ke kolu o na @ ma ke aupuni.
30 la po no pepehiia iho la a make o Belehazara ke alii o ka poe Kaledea.
31 A lilo ke aupuni ia Dariu i ka Me @ he kanaono kumamalua ona mau makahiki.
Pauku Alakai.-Ua kaupaonaia oe a @ haule ilolo.
Kumu noonoo.-Ka hewa o keia hoomanao ole I ke Akua nana i hoonoho mai.
Ninau ano nui.-Pehea kakou ina e ka @ paonaia?
Manao Wehewehe.- O ka hookiekie kahewa nui o Belehazira. Me he la nona ka ma na i lilo ai o Ierusalema iaia. E wehewehe mua ia aku i na haumana no kona kii ana i na kiaha nani a me na pa gula o ka luakini.
Ia lakou no e ahaaina ana e komo ma ana o Kuro me koua mau ko iloko o ke kulanakauhale a lakou i manao ai he paa loa O ke lii hope loa ia o ke aupuni o Babalona.
Ninau.-Owai ke lii i oleloia ma keia haawina? Owai kona makua? Heaha kana i hana ai? Ua kii aku i keaha i mea hoonani i kona ahaaina? (Pauku 2.) Heaha keia hana? Owai ka i huhu?
Heaha ka lakou i ike ai? (Pauku 5.) Mahea?
Owai ka i wehewehe mai i ka mea i kakauia? Pauku 12.
22. Ua aha o Belehazara ma ka olelo a Daniela?
25. Heaha na huaolelo i kakauia?
26. Heaha kea no o ka huaolelo MENE?
27. Heaha kea no o ka huaolelo TEKELA?
Heaha o Peresa?
29. Ua aha ia o Daniela no keia wehewehe ana?
30. Ua aha ia o Belehazara ia po? E wai? No hea keia poe? Ua kaua mai lakou, pehea ka loihi?
31. Liio aku la ke aupuni ia wai?
"KA NUPEPA KUOKOA,"
HOOPUKA MAU IA MA HONOLULU
I kela Poaono keia Poaono.
$2.00
No na mahina he UMIKUMAMALUA!
$1.00 no na mahina eono.
ME KA HOOKAA MUA MAI.
----------
NA OLELO HOOLAHA—aole i oi mamua o 10 laina no ka hoopuka hookahi ana, $1.00; alua komo ana, he $1.50; hookahi malama, $2.00. E uku mua ia mai ke dala o na olelo hoolaha a pau e hoounaia ana mai e pai.
KANIKAU—he hapalua dala ka uku no ka aoao hookahi o ka pepa leta, oia hoi 4 keneta no ka lalani hookahi—penei: he 25 lalani, $1.00; 50 lalani, $2.00; a pela'ku.
NA UKU NO NA OLELO HOOLAHA—ka uku pepa, a me ka uku o ke Kanikau, e haawiia no ma ka lima o na Luna o ke Kuokoa, a i oleia, e hoouna mai ia Kauka Kulika.
O NA UKU PEPA A PAU E HOOKAA MUA MAI NO—aole e kauia ka inoa o kekahi haole a kanaka maoli paha, ma ka inoa o ka poe lawe pepa ke ole e hookaa e mai mamua. E pono ke hiipoiia keia mau rula, no ka mea, he emi no ka auhau no keia nupepa.
AIA KE KEENA O KA NUPEPA KUOKOA—ma ke keena i noho mua ia iho nei e J.W. Aukina, maluna ae o ka Hale Leta. O na hora hana, ma ka eiwa o kakahiaka, a i ka ha o ke ahiahi.
H.M. WINI. (Luna Hoopuka.)
NA BUKE HOOLAHAIA E KA PAPA HAWAII
Baibala Hemolele Nui ili eula nani me na kuhikuhi ma na a ao.....$12 00 " " Nui ili eleele kaekae wai gula.....5 00 " " uuku iki ihi " ".....8 00 " " Pananaiki iho ili eleele.....4.00 Kauoha Hou ili gula nani me na kuhikuhi.....3.00 " " eleele kaekae wai gula.....1.00 " " " ......75 Kauoha Hou Hapa Haole.....75 Lira Hawaii 1848 me ke kanawai......25 " " 1855.....25 Moolelo Ekalesia.....50 Haiao ili lahiahi.....10 Hele Malihini ana.....25 No ko ke Akua ano......25 Lira Kamalii......25 Hoike Palapala Hemolele.....25 Moolelo o Heneri Opukahaia.....25 Hoike Akua.....25 Weheweheia.....25 Ninau Hoike ili manoanoa.....25 " " " lahilahi....10 Kumumua Kula Sabati.....10 Buke Lawe Lima.....10 He Buke no ka Pope.....10 Ui Kula Sabati Helu 3.....25 " " " " 4......25 " " " " 5......25 Buke Euanelio a Ioane.....10 Himeni .....1.00 Himeni Ili nani.....1.75 Na Kauoha Hou Pakeke Ili Gula nani.....1.50 Ili eleele kaekae nani......50 Ili eleele......35 Kauoha Hou Pakeke me na Halelu Ili Gula nani.....1.75 Ili eleele kaekae wai gula.....50 Ili eleele......50 Na Halelu Pakeke Ili Gula nani.....50 Ili eleele kaekae wai gula......30 Ili eleele.....20 Ka Hae Hoonani (Buke Mele)......25 Buke Wehewehe Huaolelo Baibala.....2.00 " " " Ili nani.....3.00 Eia na buke haawi wale Palapala Liilii-- Helu 4--Makemake anei oe i ke ola Helu 6--E hele i o Kristo la. Helu 7--Ka hoi ana mai o ke Keiki Uhauha Helu 11--No ka hoohiki wahahee i ke Akua Helu 16--Ka Kehia ana o ka Ahaaina a ka Haku a ma ka Bapetiso ana. Helu 17--Mai hana ino i na holoholona Helu 18--No ka mahi ana, kuai ana a me ka inu ana i ka Awa. Ka Davida Malo Kumumanao. Ka Moolelo o Batimea Puaaiki. J. F. POKUE. Kakauolelo o ka Papa Hooko o ka Ahahui Euanelio o ko Hawaii Pae Aina.
.