Ka Nupepa Kuokoa, Volume XII, Number 3, 18 January 1873 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

 

KA NUPEPA KUOKOA

 

Mele oli, no ka hoi mai o ka mea auwana.

 

Leo.- Joy! Joy! Joy! Fresh Laurels, p 128.

1.

Oli! oli! oli! ma ka lani me na anela.

Oli! oli! oli! no ka auwana i hoi mai;

Hoi mai, hoi mai

I ka makua maikai.

Nalo ae, loaa nae.

Pau ka eha me ka uwe.

Hora pomaikai! hora e oli ai!

Ku a ike ae ka makua maikai,

A hui pu, a olelo ae,

E hoi aloha mai.

Oli! oli! oli! ma ka lani me na anela!

Oli! oli! oli! no ka auwana i hoi mai.

2.

Oli! oli! oli! ma na puu hilu o ka lani!

Oli! oli! oli! no ka auwana i hoi mai.

Hamau e! hamau e!

He oli, oli lani nei!

Hoi mai, moi mai

I ka home maikai e.

O i i helelei nna waimaka u

No ka auwana'e me ka hookai pu,

Paa ka Makua, olelo hou,

E hoi aloha mai.

Oli! oli! oli! ma na puu hilu o ka lani;

Oli! oli! oli! no ka auwana i hoi mai.

3.

Oli! oli! oli! ma na kula lai o ka nani;

Oli! oli! oli! no na auwana i hoi mai.

Wiki e! wiki e!

Ma ka wa opio nei.

Hea Iesu, hea Iesu,

Hoi mai a ola e.

Ku a nauwe ae i ke ao laelae,

A, ma o Iesu e puliki ai,

A pane no me ka hua maikai.

E hoi aloha mai.

Oli! oli! oli! ma na kula lai o ka nani;

Oli! oli! oli! no na auwana i hoi mai.

HAWAII.

 

Ka ipu Misionari.

 

1. He mea nui ka noonoo ana i na kumu e loaa'i na kokua misionari, na kokua mahina hou. A, ua pai pinepineia iloko o ke Kuokoa, a iloko o ke Alaula hoi, kekahi mau kumu e loaa'i ia mau kokua. Eia paha ka hewa, ka heluhelu ole, a i heluhelu ia, aole paha i hookoia. A he luhi makehewa ko ka mea nana i noonoo, a kakau iho, a hoolaha aku.

Ke kapiki misionari, moa misionari, puaa misionari, papapa misionari, kokua hapaumi, e like me ko Penimaua hoohiki ana, ua pai ia ua mau kumu kokua a pau. Heaha ka hua? heaha ka waiwai o ka hai a pai ana? Ke hana nei anei kakou e like me keia mau kuhikuhi ana?

A, eia keia kumu e loaa'i na kokua misionari; o ke kanu ana i na ipu, na pu, na palaai, na pumekini, (pumpkins). He keiki ilihune na kekahi wahinekanemake, he haumana oia no ke Kula Sabati, a nui kona makemake o kokua i na misionari, aole nae he dala e hiki ai. Noonoo oia i ke kumu e loaa ai ke dala, a puka mai keia kumu, a lawe au i mau anoano ipu palai, a e kanu iho a ulu a oo, alaila e kuai aku au i kekahi,a loaa ke dala kokua.

Hooko oia i kona noonoo ana, kanu no i mae anoano, a kupu mai, a ulu ae, a mahuahua wale na ipu. Waele oia, a hookahe i ka wai i ulu pono, a nana oia i ka ulu ana, i kela la, i keia la. A, iwaena o na ipu, ike oia i kekahi e ulu a mahuahua mau ana, a lilo i pookela, i ipu nui, a maikai, a kaumaha. A i ka wa i oo a melemele loa ai ia ipu, oki Keoni (oia ka inoa o ua keiki nei) ia ipu, a no kona kaumaha, he 100 paona ia, kau ia ma ke kaa pipi, a lawe ia ma kekahi hale kuai. O ka ona ia hale, he kumu Kula Sabati ia, he kanaka aloha, a oluolu, a kokua ia Keoni i ke kuai ana'ku i kona ipu.

Lawe ua kumu nei i ka ipu, a kapili i kekahi apana pepa maluna, a kau ia ma kona puka aniani nui.

Eia ka palapala i hoopiliia i ka ipu.

Ka Ipu Misionari o Keoni, E kuaiia ana.

Ma ke kakahiaka ae, hele no na kanaka i ka hale kuai, a ike i ua ipu nei ma ka puka aniani me na hua i kakauia maluna iho. Nani ka ipu! makemake nui ia. Haawi kekahi kanaka i elima dala, a lilo ka ipu ia ia.

Piha loa Keoni i ka olioli. Hana kona makuwahine i wahi eke, a hahao Keoni i na dala elima iloko, a, ma ka Sabati, hele oia i ke Kula Sabati, he Sabati kokua malama hou ia, a i ka wa kokua, wehe Keoni i kona eke a unuhi i ua mau dala elima, a haawi aku i kokua misionari. Maikai Keoni. Mahaloia kona noonoo a me kona kokua ana. He olioli nui hoi kona i ke kokua ana.

Mahope iho ala mai kekahi mau keiki e ae, a kanu i na anoano o na ipu, a kupu, a ulu, a malama ponoia. Maloko o na mala elua he mau ipu nunui elua. Ane like ke kaumaha o laua pakahi me ko Keoni. Kahea aku ke kahunapule i na kanaka e hele mai i kekahi halawai ane hou. I ka akoakoa ana, hoikeike aku oia i keia mau ipu nunui elua, a ma ke kudala ana'ku ia laua, ua loaa mai he 20 dala no kekahi, a 19 dala no ka lua. A hanaia i mau pai noloko o kekahi, a kuai ia'ku, a loaa hou mai 18 dala. A kuai ia'ku na anoano o na ipu elua, a loaa mai $6.50 dala. Huina $63.50. He mau dala keia no ke kokua misionari.

Ahea ala mai-na hana like iwaena o na ekalesia a me na Kula Sabati ma Hawaii nei? He nui na kumu e loaa'i ke kokua misionari, a me na kokua aloha a pau. Nui na mea kanu-nui na holoholona-nui na hana e loaa'i na kokua.

O ka hana ole ka hewa. Ke alakai ole, ke kuhikuhi ole, ke pailaka ole, ka hiamoe, ka lilo ana ma na mea o ke kino, o keia ao, na mea keakea keia a kaomi iho i na kokua.

E na kahu ekalesia, e ala, e noonoo, e hana, e alakai i na hoahanau, i na haumana ma keia hana nui i oi ka maikai mamua o na hana e ae a pau loa. Hoohalike me Iesu, waiwai oia, a lilo i mea ilihune i waiwai kakou. Ua waiwai hoi kakou, e lilo i poe ilihune i waiwai, i ike, i ola na kanaka, na kamalii ma na aina pouli.         HAWAII.

 

NU HOU MISIONARI.

 

NONOUTI, IULAI 13. 1872,

REV. J. F. POKUE; Aloha oe.

Ke kakau nei au i keia leta ia oe i mea e ike ai oukou i kahi mau mea ma keia kihapai hou a makou e hana nei.

Mai manao oukou no ko makou kaawale ana i ko na aina e, ua haalele makou i ka hoomanao ana no oukou, aole loa no.

O oukou no na makua iloko o ka hana, a o makou no na ukali; na oukou no hoi i lawe mai i ka lamaku o ke ola i ko Hawaii lahui naaupo, a ua loaa ka maauao, ua laha, ua ike a kaakaa na maka o kekahi poe, a o kekahi poe hoi, ua lolelua hou no na manao, a ke olelo ae la, o Katolika Roma ka hoomana oiaio; a o Moremona, a o Bihopa ka oiaio; nani ke kapaianaha! Nohea keia? No ka makemake i ko ke kino no.

He nui na mea e paakiki ai ka manao o keia lahuikanaka.

(1) O ka nui o na kaula wahahee iwaena o keia poe kanaka. I keia wa a makou eao aku nei, ua puka mai ka olelo a kekahi poe kanaka i manaoia, he mau kaula oiaio no lakou i keia mau la, me ka olelo ana, aia no me lakou ke Akua oiaio; oia hoi o Tieoba (Iehova) a ke manaoio nei no na kanaka i ka lakou mau hana, a penei ka lakou mau hana. Ua kukuluia he laau me he kea'la ke ano, aole nae he laau ano nani, aole hoi he laau haole i pena ia, aka he wahi laau apuupuu no mai ka nahelehele mai, a ua hikiikiiia me na hulumanu, a ke olelo nei lakou he laau mana, a o ka inoa o keia laau, Tekaibanaki (ka laau kea.) Ke olelo nei hoi na poe lapuwale nei (kaula nei) oia ke kea i kaulia ai o Iesu, a ke hookupu nei lakou i keia mau ano laau i na hua niu, na ahuihala, ka aila, ka ia, ina hoi lakou e puhi baka, e mumu no lakou i ka uahi baka, a e puhipuhi aku i na hulumanu e paa ana i ua laau nei.

Eia keia, ina e ulu mai ka manao hoopunipuni iloko o ua kaula nei, alaila e moe oia iluna o kona moena iho no me ka hoomakemake loa ana iaia iho, me ka haika o ka waha, haalulu ke kino, a ula na maka, aia a ike na kanaka i keia mea, alaila olelo lakou, ua hiki hou no ua akua nei, alaila e hoala koke lakou, me ka ninau aku, no keaha keia? Eia kana; ua hiki mai nei o Tieoba, he pono ia oukou e haawi mai i mau mea ono, a he manawa ole ua kokoke kona makemake, a ke olelo nei kela poe kaula hoopunipuni i na kanaka, ua like pu no ka malou e ao nei, @ne ka na misenere e ao mai nei; aka, o ka oiaio loa nae ka hulumanu (buraeniman) aka, eia ka Iesu. "Ina olelo mai kekahi, eia maanei ka Mesia, a aia hoi ma o, mai ae aku." Eia keia, ke makemake nei na kanaka i kela hana, no ke ko ana o ko lakou makemake e hula, no ka mea, eia ka lakou la olelo; "Ina oukou e huli ma ka buke, alaila kapu ia ka oukou mau keiki, aole e hula;" nani no ka maalea o na keiki o ka pouli. He mau kaula hoopunipuni e ae no kekahi, a ke olelo nei i na kanaka penei: No na haole wale no kela Akua o Iehova, aole kakou i ike i ke ano o keia mea, ua pono no kakou i na akua o ko kakou mau kupuna; na ko kakou mau akua no ka ua, ka makani, ka heliki. Ke hana nei no hoi keia poe i ka lakou mau hana hoopunipuni. I ka nui loa ana o ka la i keia mau la, ke olelo nei lakou, e hoohaule mai i ka ua, aole nae i haule mai ka ua, ke nui loa nei ka la, ke maloo nei niu a me na kumuhala.

(2) Ke hana nei no hoi kahi poe kahuna hoonohonoho akua lapuwale, e like no hoi me kahi poe o kuu lahuikanaka, a ke huli nui nei no kahi poe malaila. I ka malama o Maraki o keia makahiki no, ua mai loa ka wahine a ke kanaka nana makou i aua e noho meia, o kona mai, he luai moku, ono ole ka ai, ua kokoke no e make; aka, ua kahea ia kekahi kahuna e lapaau, aole laau, aka, he olelo hoopunipuni wale no, aole nae oluolu, a ua kokoke e make, a mahope ua haawiia mai ia makou na makou e hooinu i ka laau; a ua haawi au i ke laau hoopan hi, (Carminative balsam) nolaila ua oluolu koke, a no ka paa o ka lepo, ua haawiia i ka huaale, a ua nui ka naha. Aka, hiki mai kekahi kahuna wahine, a olelo he make i ke akua o lakoo, "nolaila e haalele oe i keia wahi." Aka, ua pau ka pilikia, ua oluolu i ka laau a makou i haawi ai. Aka i kuu lohe ana mai, he mana ke akua o kela kahuna wahine, a ua ola kela mai i kona akua, pela ka olelo a na kanaka; aka eia ka'u, mai kuhihewa oukou pela; hookahi no mea mana, o ka Haku, a no ko lakou paakiki, ua kahea au ia T. Kaehuaea, e hele e nana i ka oiaio, no ka mea, olelo lakou he hokiokio mai no kela akua i na e hiki mai, aka, i ko maua hiki ana, nui na kanaka, a i ka hooiaio ana, aole no; ua huli au iloko o ka hale, no ka makemake e ike i ka oiaio, a e lohe hoi i ka hokiokio e like me ka lakou olelo, aole no he oiaio. Eia ka'u, nui loa ko oukou hoopunipuni, mai hahai hou oukou ma keia mea wahahee, me ka nui loa o ko'u leo, aole no he mea hookahi i ekemu mai, aole i pane ko lakou leo, ua nui loa ko'u huhu, no kuu lili ana mamuli o ka pono, aole no ke kokua i ka hewa. Ke manao nei au ua pono kakou ke lilo no ka Haku, e like me Elia i kona lili ana no Iehova, a ua kena aku oia e hopu i na kaula o Baala 450. O ka kakou hana keia o ka hoike aku ia lakou i ka oiaio, a hoopale i ka hana hewa. Ke makemake nei lakou ma na mea ike makaia, e like no hoi me Lui ma e malama nei i na ano kii, a e haliu aku ai no hoi i ke kuahu, me ka olelo malu oia wale no.

Owai la o ka poe ui e noho ana ma ko Hawaii pae aina, i makemake e hele mai e kokua i keia hana nui imi uhane? Mai kanalua lakou no ka nawaliwali o kahi luaui makuahine, a makuakane paha; mai kanalua no ka aina, no na waiwai, no na hoalauna, a me na makamaka hoohihia mai o na olelo e lauwili mai ai. Ua make ka Rev. J. D. Ahia wahine, e hoi aku ana paha oia i Hawaii. Owai la e pani i kona hakahaka? Ua nawaliwali hoi o G. Haina, a owai la ka mea kino ikaika e kokua mai?

Mai hookananuha na wahine, na ka maka'u o ai ia; aole loa pela ka Iesu; aole oia i makau, aole minamina i kona nani, aole kanalua i kona make, ae no a haawi e kaulia ma ke Kea. Ina malama kakou i ko kakou ola nei, e lilo loa ana ko kakou ola. Mareko S:35. Ke hoomanawanui nei no i ka hana, aole kanalua no keia mau pilikia, no ka mea, o ka hiki ana mai o ka make ka palena o ka kakou hana.

E hai aku i ko'u aloha i na'lii, a me na makaainana a pau, i na kahunapule a me na hoahanau, na kumu hoi a me na haumana. E hoomanao hoi i ka Haku no makou. Owau no kau keiki iloko o ka Haku.

G. LELEO.

 

Kipe.

 

Ma ka Palapala Hemolele, ke papa mai nei ke Akua i kana poe kanaka i ka lawe ana i na mea Kipe. O ka hoolohe kona makemake; aole ona oluolu e lawe i ke kipe, a me na mea mohai no ka hookuli, a me na hewa a na kanuka i hana'i.

E heluhelu kakou ma Kanawailua 10:17. a me 1 Samuela 15:22.

Eia hoi kana olelo i ka poe Iseraela, Pukaana 23:8. "Mai lawa oe i ka waiwai Kipe; no ka mea, o ka waiwai kipe ka mea e makapo ai ka poe ike, a e kekee ai na olelo o ka poe pone."

Penei hoi ma Kanawailua 16:19. "Mai pale ae oe i ka pono, aole hoi e ike aku i na maka, aole hoi oe e lawe i ke Kipe; no ka mea, ke hoomakapo ke kipe i na maka o ka poe naauao, a ke hoololi ae i na mea o ka poe pono.

O Samuela kekahi kaula makai ua hana pololei a me ka oiaio imua o na kanaka. Aka, aole pela kana mau keikikane elua, o Ioela laua o Abia. No ka mea, i ko laua lilo ana he mau lunakanawai ma Beereseba, huli ae la laua mamuli o ka waiwai alunu, a lawe laua i ke kipe, a hookahuli i ka pono. Nolaila, ua kaumaha loa ka poe Iseraela i ka laua hana ana. 1 Samuela 8;-Pehea ka poe pono, ka poe e noho auanei ma ka lani? Ua lawe anei lakou i na mea kipe? Ke hoole mai nei o Davida. "aole i lawe i ke kipe." Halelu 15:5.

Eia hoi ko Isaia 33:15,16. "O ka mea e noho ana ma kahi kiekie, oia ka mea lulu mawaho aku o kona lima, i ka waiwai i loaa ma ke kipe ana.

Eia ko Amosa manao i ka poe Iseraela; "Ua ike au, he nui wale ko oukou lawehala ana, a me ko oukou mau hewa nui; ua hoopilikia i ka poe hoopono, e lawe ana i ka uku kipe, a e hookahuli ana i ka pono o ka poe ilihune ma ka pukapa." Amosa 5:12.

Penei ka olelo ma 1 Timoteo 6:10. "O ka puni dala, o ka mole ia o ka hewa a pau; ua kuko nui ia ia e kekahi poe, a ua haalele lakou i ka manaoio, a ua houhou lakou ia lakou iho i na ehaeha he nui."

Pela no o Iuda Isekareota, kekahi haumana o Kristo; i kona hele ana i ka poe kahuna nui, a ninau ia lakou; "Heaha ka oukou e haawi mai ia'u, a na'u ia e kumakaia aku ai ia oukou?" "Kaupaona mai la lakou nana i na wahi moni dala he kanakolu." Mat. 26:14,15. He "Shekel" ko lakou mea dala, ua like kona ano me ko lakou hapalua dala; nolaila, ua kuai aku o Iuda i kona Haku no na dala maoli he $15.00. Pehea keia haumana kumakaia? Pomaikai anei oia me kela mau dala he umikumamalima?

Eia ka moolelo o kona hope. "Ike ae la o Iuda ua hoahewaia o Iesu e make, mihi iho la ia, hoihoi aku la oia i na moni he kanakolu i ka poe kahuna nui, a me na lunakahiko; I aku la, ua hewa wau i kuu kumakaia ana'ku i ke koko hala ole." "I mai la lakou, heaha ia ia makou? Ia oe aku no ia mea?" "Hoolei iho la ia i na moai ilalo maloko o ka luakini, hele aku la, a kaawe iho la ia ia iho;" - "haule iho la ia ilalo kona poo, nahae iho la iwaenakonu ona, a pahu aku la kona naau a pau iwaho." Mat. 27:3-5. a me Oihana 1:18.

 

He Akua anei Iesu?

 

Aia a makemake kekahi e lilo i Haiolelo, a i kahunapule paha, noloko mai paha o ke kula kahunapule, no kona imi ma kona hale iho paha, he mea mau e lawe ia oia imua o ka Aha Kahunapule, a e ninaninauia no kona makaukau e lawe ia oihana.

He hoahanau Metodika ma kahi kuaaina loa, aole oia i aoia ma ke kula kahunapule, a ma kekahi kula nui, ua ike nae oia i ke ola ma o Iesu la.

Nui kona makemake e lilo i kahunapule. kauoha ka Aha Kahuna e hele oia imua o lakou e ninaninauia.

Eia kekahi ninau. He Akua anei Iesu? Ae. No ke aha kou manao ana, he Akua Iesu? Nana pilihua oia, aka, noonoo iki oia, a hooho me he leo lanakila, no ke aha ko'u manao ana, he Akua Iesu? Eia, ua hoola oia i kuu uhane. Ka pau no ia o ko lakou kanalua ia ia, a lili iho la oia i kahunapule.

I kinohi ka Logou, me ke Akua ka Logou, a o ke Akua no ka Logou.

Ua hele mai o Kristo Iesu i ke ao nei e hoola i ka poe hewa; owau no ko lakou mea oi, wahi a Paulo. 1 Tim. 1:15.

Ke Akua no Iesu, he mana Akua kona e ola mau loa'i na uhane o ka poe manao io ia ia, a he mana hoi kona e make mau loa'i na uhane o ka poe manaoio ole.

HAWAII.

 

E nana iluna, a i o aku.

 

"E kau mau ka maka ma ka weuweu omao." He leo kahea keia o kekahi hoa i kekahi hoa i loohia i ka pihoihoi.

He la hauoli a hoomaha, e like me ka la kuokoa, ka la kulaia o ke aupuni. He ahaaina ka kekahi poe. Elua hoa i hele aku e makaikai, a imi i na mea e hoonanea olioli ai. Ia laua e kaahele ana, ike aku la laua i kela poe e ahaaina ana, a me na lio, a kaa lio nani e ku malie ana. Kahea lakou la ia laua nei. E hele mai olua, e ahaaina pu, he wahi kaawale no olua.

Eia nae he pilikia mawaena, he muliwai e kahe ikaika a halulu ana. Ma ke kauwahi he uapo laula a maikai e hele aku ai i kela aoao. A he wahi uapo ololi e pili kokoke ana i kahi o ua ahaaina nei. Ua maa kekahi hoa i ka hele makau ole ma keia uapo ololi. Ua maa ole kekahi. Akahi no a manao e hoao. I ka lohe ana i ka leo kahea, o ka lele no ia o ka hoa i maa, a holo, a ku emo ole ma kekahi aoao o ka muliwai. O ka mea maa ole, ku oia, a ana 'ku a ike i na puu uliuli, a me ke kula omaomao malalo iho, kahi i akoakoa ai na hoa ahaaina, a hoomaka no e hele ma ia uapo ololi. Maikai ka nauwe ana mamua, ololi hoi me ka manao e hui koke ana me na hoa. Mawaena konu nae, ua loaa ka pilikia, e hooponiuniu ana, a ane maule. O kona hoa i puka e aku, ua huli mai oia e nana i ke hoa i hope, a i ka ike ana i kona pilikia, kahea mai oia me ka leo nui, E kau mau ka maka ma ka weuweu omaomao. He leo hoopakele keia; hoolohe no oia, a kau ka maka ma ka weuweu uliuli ma o ae o ka muliwai weliweli, a o kona pakele no ia i ka haule ilalo, a make iho? I ka puka ola ana i kela aoao, hui pu na hoa elua, a hauoli pu no keia pakele ana. Ua hoopakele keia hoaaloha i kekahi poe mamua. A, o kekahi poe, ua loaa no ka poniuniu, a maule, a haule ilalo, a lilo i ka wai.

E na hoa o'u, he mau kula omaomao, a he mau puu uliuli ma o aku o keia ola ana. He muliwai nae mawaena, he muliwai e kahe ana me ka halulu nui; e like me Ioredane, e kahe ana mawaena o ka poe Iseraela a me Kanaana, i paapu i na kula omao, a me na puu uliuli.

Na pilikia, na kaumaha, na mea hoohihia, a hoowalewale, oia paha ua muliwai nei. He ala, he uapo maluna o keia muliwai, he ololi nae - Ua ololi ke ala o ke ola, wahi a Iesu. No ka ikaika loa o na wai kahe, o na enemi, poniuniu paha kekahi i kekahi manawa, a ane maule a haule iho ilalo, a make. Pehea la e pakele ai? Hoolohe i keia leo, "E kau mau ka maka ma ka weuweu omaomao." A hoopili aku ia Iesu ke Alakai.

He aina nani kamahao,

Ma o, ma o maluna;

Uli na awawa me na puu,

Ma o, ma o maluna,

Ane hoea mai la,

Kolaila kabakai la,

Me kona ao laelae la,

Ma o, ma o maluna,

E hoe kakou, e hoe a mau,

Kokoke pau ka ino,

A komo i ke awa a ku

Ma ia kahahai olino?

HAWAII.

 

HAAWINA KULA SABATI.

 

Helu IV. Ianuari Sabati 26,

KUMU HANA, KAINA ME ABELA.

Pauku Baibala? - Kinohi 4:3-10.

3 Mahope iho o na la, lawe aku la o Kaina i kekahi hua o ka honua i moai na Iehova.

4 Lawe aku la hoi o Abela i kekahi o na hanau mua o kana poe hipa, i na mea momona hoi. A maliu mai la o Iehova ia Abela a me kana mohai:

5 Aka, aole ia i maliu mai ia Kaina a me kana mohai. Huhu loa iho la o Kaina, a kulou iho la kona maka ilalo.

6 I mai la o Iehova ia Kaina, Heaha kau i huhu ai? No ke aha hoi i kulou iho ai koumaka ilalo?

7 A i hana pono oe, aole anei oe e maliuia'ku? a i ole oe e hana i ka pono, ke waiho la ka mohai hala ma ka puka. A ia oe no ko ia la makemake, a e alii iho oe maluna one.

8 Kamailio ne la o Kaina me kona kaikaina, me Abela: a ia laua ma ka waena, ku ae la o Kaina me ke ku e i kona kaikaina ia Abela, pepehi iho la ia ia a make.

9 Olelo mai la o Iehova ia Kaina, Auhea la o Abela o kou kaikaina? I aku la oia, Aole au i ike; owau anei ke kahu o kuu kaikaina?

******** COL 5 ********

Pauku Alakai, Hebera 11:4. "Ma ka manaoio i kaumaha aku ai o Abela i ke Akua i ka mohai maikai aku i ko Kaina."

Kumu Noonoo. - Ke ano o ka manaoio, a me kona mana.

Ninau ano nui. - Ua loaa anei i kela a i keia haumana ka manaoio e ola'i?

Mele Him. 293.

 

NA NINAU.

P. 3. Kaina, owai ia?

Ke keiki mua anei ia o na keiki a pau? Pela aole paha he keiki mamua aku. Adamu ka makua mua, he kanaka makua oia i ka wa i hanaia'i, aole ona ano keiki.

Kaina ke keiki mua. Nana i ka pauk 1. Akahi no a ike Adamu i kana wahine; akahi no a moe pu.

Ke ano o ka inoa Kaina, heaha? Loaa.

No ke aha? No ka manao o Eva, ua loaa keia keiki ma ke kokua ana mai o Iehova.

Ma o wai la e loaa'i ka kakou mau keiki?

A loaa, heaha ka pono? E hoomaikai aku i ke Akua, a e hoolaa aku i ke keiki na Iehova.

Na wai mai na pono a pau?

A kanaka makua Kaina, heaha kana oihana?

Owai ka mahiai mua? Mahea?

He oihana maikai anei keia? Ae, ka oihana mua ka ia.

Mahea kona mahiai ana? Mawaho o Paredaiso.

No ke aha ka mahiai ole iloko o Paredaiso?

Ua akaka anei na makahiki o Adamu i ka wa i hanau ai o Kaina? Aole. Malalo iho o ka 130. Nana Kin. 5:3.

Ka mohai, heaha ka Kaina i lawe ai i mohai na ke Akua?

He mohai aha keia? he mohai hoomaikai aku paha i ke Akua.

Ka mohai mua anei keia? Aole paha, ua maa paha Adamu i ka mohai ana. He kapa ili ko laua me Eva, Kin. 3:21.

Nohea na ili? no na holoholona paha i pepehiia no ka mohai, no ka mea, aole he mea ai ka io ia manawa.

Mahea i laweia'i na mohai? Mawaho paha o ka puka o Paredaiso ma ke alo o na Kerubima, Mok 3:24, Ilaila paha ke Sekina, ka hoailona no Iehova.

No ke aha i manao ai pela? No ka mea, ua kipakuia o Adamu ma mawaho o Paredaiso mua no ka hewa; ua kiaiia ka puka e na Kerubima, i ole e komo hou ke kanaka iloko o keia Paredaiso. Aka, o ka Paredaiso maluna, hiki no ke komo, a ai i ka hua o ka laau ola, a ola mau loa ma ka manaoio ia Iesu, ka mohai nui e hiki mai ana.

Ka mohai a Adamu ma, he hoailona anei ia no Iesu ka mohai nui? Ae.

He mohai aha keia hoailona? He mohai koko e like me ka mohai hipa.

He mohai koko anei ka Kaina? Aole, he mohai hua.

P. 4. Abela, owai la?

Ke ano oia inoa, heaha? Lapuwale.

No ke aha? No ka mea, he lapuwale na mea a pau o keia ao. Kuhi o Eva he keiki maikai o Kaina; aole ka! Kuhi hewa. He keiki hewa ka, he lapuwale, a kapaia ke kaikaina, lapuwale, oia hoi Abela.

Ka oihana a Abela heaha?

Oia anei ke kahu hipa mua? Ae, oia ke kahuhipa kuokoa mua. Malama no Adamu laua o Eva i na hipa ma Paredaiso; ia laua na oihana a pau malaila; ua huikau, aole hookaawaleia.

He oihana maikai anei ia?

Owai kekahi mau kahuhipa mahope? Rahela, Mose, Davida.

Owai ke kahu hipa maikai loa?

Ka mohai a Abela, heaha?

He mohai koko anei kana? Ae, he keiki hipa no kekahi hapa.

Ua maliu mai a oluolu Iehova ia Abela a me kana mohai, no ke aha? No ka manaoio i ka mohai nui e hiki mai ana.

Owai ia?

Heaha ka hoailona? Ke keiki hipa a Abela i mohai ai. Nana Hebera 11:4, Ioane 1:29, Heluhelu.

P. 5. Ka mohai a Kaina, ua maliu mai anei Iehova i kana? Aole.

No ke aha? No kona manaoio ole, he kanaka hoomaloka.

Ma ke aha i maopopo ai ko Iehova oluolu, a apono ana mai i ka Abela mohai; a hoole i ka Kaina? Ma ka hoopau ana paha i ka Abela ma ka lapalapa ahi; a waihe wale i ka Kaina. Me keia, lawe mai Ana i makana no ke kahu; a lawe mai Maria i makana okoa nona. Oluolu, a olioli ke kahu i ka Ana, a lawe no, a kau paha ma kona hale; Aka, o ko Maria, aole i laweia, ua waiho wale ia, no ka ike paha o ke Kahu, he mea pono ole e pili ana i kona makana.

Ka huhu o Kaina, no ke aha kona huhu?

Hoike i kona huhu ma ka maka aha?

P. 6. Ka ninau o Iehova ia Kaina heaha?

He kumu pono anei no ko Kaina huhu?

Huhu oia ia wai? i ke Akua, ia Abela anei?

Heaha ko Abela hewa? Aole ona hewa. Huhu oia ia Abela, no ka mea, he hiki ia ia ke hana ino ia Abela, i kona kino, aole nae i hiki ke hana ino i ke kino o ke Akua, he kino anela, hiki ole ke pepehiia.

P. 7. A i hana pono Kaina, pahea ia?

A i hana pono ole, pehea e lilo ai kana hana i pono? Peuei, E kii i mohai pono, i mohai koko, mohai hala, aia no hoi ia ma ka puka, ma kahi kokoke, e lawe mai a mohai me la manaoio, e like me Abela, alaila, oluolu au i kau, a lawe no. A loaa no ko ka hanau mua pono ia oe. O oe no ka hooilina.

P. 8. Ua ae anei Kaina i ko Iehova manao? Aole, mahuahua loa kona huhu.

Ka hope o ko Kaina huhu, heaha?

No ke aha kona pepehi ana i kona kaikaina? Nana ia I Ioane 3:12, Heluhelu. Maikai Abela, maikai kana hana - Hewa Kaina, hewa kana hana.

Ka pepehi kanaka mua anei keia? Pela paha; Nana ia Mat 23:35, Ioane 8:44.

Nawai i paipai i keia pepehi kanaka?

Ua kau anei ke kanawai pepehi kanaka ma ia wa?

Mahea i kau mua ai? Kinohi 9:6.

Mahea ke kau alua ana? Ke kanawai ehia ia?

Heaha ka mea ano like me ka pepehi kanaka? I Ionae 3:15, Mat 5:22.

Na ano pepehi kanaka. - He pepehi lima: he pepehi elelo; he pepehi manao, he mau pepehi kanaka lakou. E makau o pepehi kanaka oukou ma kekahi o keia mau mea ekolu.

Heaha ke kumu o ka pepehi kanaka?

Mai hookipa i ka huhu - mai hoomauhala o aha?

P. 9. Ka ninau o ke Akua ia Kaina, heaha?

Heaha hoi ka pane? Ehia hewa ma ia pane?

Ehia hewa a pau o Kaina i puka mai noloko mai o kona mohai ana? Hoomaloke, hookamani, huahua, huhu, pepehi kanaka, hoole wahahee, pakike i ke Akua, ehia?

P. 10. Ke olelo hooweliwli a ke Akua ia Kaina, heaha?

Heaha hoi ke ano? he ano hoopai.

Kaina ke poo ia o ka poe ea?

Seta, ke pani o Abela, ke poo ia owai? Kinohi 6:2-4.

Mele, "Honi Maikai." Alaula Nov-71.

 

Ea, ke makemake nei anei oe e ola?

 

Ka ninau no ia o Iesu i kekahi kanaka lolo, a hiki ole ke hele. Ehia la makahiki o kona waiho lolo ana? Io. 5:5. He mau kahuna lapaau paha mamua, i hoao e hoola, aole nae i hiki. He wai auau hoi e auau ai kekahi poe mai a ola. Aka, aohe makamaka i aloha i keia kanaka lolo, a lawe ia ia e hoauau iloko o ua wai hoola nei. Aloha ino!

Owai la kona kahuna aloha, a hoola? Iesu ao. Ua imi Iesu ia ia, ua ike iaia e waiho lolo ana, me ke kokua oleia, 38 makahiki ka moe ana iloko o ka pilikia. Hu kona aloha iaia. A ninau, Ea, ke makemake nei anei oe e ola? Ae, ko'u makemake nui no ia, aka, pehea la e ola'i? Aohe mea kokua mai ia'u. Pane aku la Iesu, E ku ae, e kaikai i kou wahi moe, a hele. O kona hoolohe koke no ia, a ku, a hele aku. Ua ola.

Pilikia anei kekahi? he mai, he lolo, he luuluu, he makapo, he lepera, a makemake e ola? Eia no ke kahuna lapaau aloha, a mana, e hoopii aku ia ia, a e hoola oia me ka uku ole.

E ka poe makamaka ole, e moe loihi ana iloko o ka hewa, a ane komo iloko o ka make; e nana i keia makamaka, e manaoio ia ia, e ku a hele mamuli ona, a e ola no oukou.

E kuu mau makamaka,

Na hoa hewa pu,

Nana i kuu Kahuna,

E noi ia Iesu,

Kahuna aloha; mana,

Nana e lapaau

Ko oukou mau uhane,

A ola pu kakou

HAWAII.

 

"KA NUPEPA KUOKOA." Is published on Honolulu EVERY SATURDAY $2 00 per annum, or $1.00 per six months, in advance.

 

ADVERTISEMENTS not exceeding 10 lines, inserted once for $1.00, twice for $1.50; and $2.00 for one month; all advertisements must be paid for in advance.

KANIKAUS will be charged 1.00 per page, or 4 cts. a line.

PAYMENTS DOR ADVERTISEMENTS, Subscriptions or Kanikaus may be paid to any of the Agents of the Kuokoa, or may be enclosed in a letter to the Publisher.

ALL SUBSCRIPTIONS must be PREPAID. No names, either of foreigners or natives, will be inserted on the subscription list untill paid for. This rule must be strictly adhered to on account of the low subscription price

THE OFFICE OF THE KUOKOA over the Post Office. Office hours from 9 A. M. to 4 P. M.

H. M. WHITNEY. Publisher.

Bound Volumes of the KUOKOA, for sale at the office over the Bookstore - $3.50 each.

Persons having complete sets of the aboven can have @ bound by paying $2.@0 each.

 

NA BUKE

HOOLAHAIA E KA PAPA HAWAII.

 

Baibala Hemolele Nui ili gula nani me na kuhikuhi ma na aoao ... $12 00

" " Nui ili eleele kaekae wai gula ... 5 00

" " uuku iki iho, " " ... 5 00

" " pananaiki iho Ili eleele ... 4 00

Kauoka Hou ili gula nani me na kuhikuhi ... 3 00

" " eleele kaekae wai gula ... 1 00

" " " ... 75

Kauoha Hou Hapa Haole ... 75

Lira Hawaii 1848 me ke kanawal ... 25

" " 1866 ... 25

Moolelo Ekalesia ... 50

Haiao ili lahilahi ... 10

Hele Nalihini aua ... 25

No ko ke Akuapano ... 25

Lira Kamaili ... 25

Hoike palapala Hemelele ... 25

Moolelo o Heneri Opukahaia ... 25

Hoike Akua ... 25

Wehewehehale ... 25

Ninau Hoike Hi manoanoa ... 25

" " " lahilahi ... 20

Kamumua Kula Sabati ... 10

Buke Lawe Lima ... 10

He Buke no ka Pope ... 10

Ua Kula Sabati Helu 8 ... 25

" " " " 4 ... 05

" " " " 3... 25

Buke Euanello a Ioane... 10

Himeni ... 1 00

Himeni Ili nani ... 1 75

Na Kauoha Hou Pakeke.

Ili Gula nani ... 1 00

Ili eleele kaekae nani ... 50

Ili eleele ... 25

Keuoha Hoi Pakeke me na Halelu.

Ili Gula nani ... 1 75

Ili eleele kaekae wai gula ... @0

Ili eleele ... 50

Na Ealeku Pakeke.

Ili Gula nani ... 50

Ili eleele kaekae wau gula ... @0

Ili eleele ... @0

Ka Hae Heonani (Buke Male) ... 25

Buke Wehewehe Huaolele Balbala ... 2 00

" " " Ili nani ... @ 50