Ka Nupepa Kuokoa, Volume XII, Number 36, 6 September 1873 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

 

Ka Nupepa Kuokoa

 

The Children’s Savior.

FRESH LAURELS. p. 4.

 

-

1.

Iesu ka Hoola aloha.

Oia no ke Hoa mau,

Olu kana mau kauoha;

Oli iaia a mau no.

Hoa aloha, Hoa aloha,

||: Nou mau loa no makou :||

2

Iesu ka Hoola aloha

No na kamalii oonei

Make oia no oukou la,

No na lawehale e;

Make oia e hoola

||:  Ia oukou, e na pokii :||

3.

Iesu ka Hoola aloha,

Kahuhipa maikai e;

Ku a hele ae hookipa mai

Ma ka home lani one,

||:  Me ia pu e mele ai; :||

4.

Iesu ka Hoola aloha,

Ka Hoola Oia mau,

Kii a lawe ia makou la

I mau keiki maikai nau;

Huikala, a hoola

||:  Iloko o ke aupuni ou: :|

HAWAII.

 

Around the Throne

FRESH LAURELS. p. 7.

Ku mai ka lani na pokii,

A puni maikai e

Ka noho nani o ke Leii,

A mele mai menei,

 

Cho. Nani, nani, nani

Nani, ihi, me ka mana

I ka Haku a mau loa,

Mele, mele i ke Lii mau.

2.

Pehea lakou i hiki ai

Ia ao laelae maikai,

A malu e, a oli mai,

A mele a mau ae?

 

Cho.  Nani, nani, nani, &e.

3

Aloha Iesu ia lakou,

A kii a hoomaemae;

Pau ae kahewa, ano hou,

A ku a mele ae,

 

Cho.  Nani, nani, nani, &e.

4.

Aloha nui e oukou,

A lilo no Iesu,

A pii a hui me lakou,

A ku a mele pu,

 

Cho.  Nani, nani, nani &e.     HAWAII.

 

HAAWINA KULA SABATI.

-

HELU 37, SABATI, SEPT., 14.

Kumuhana – IESU ME IONE.

Pauku Baibala – MATAIO II: 1-11.

 

            A OKI ae la ka Iesu ao ana aku i kana poe haumana he umikumalua, hele aku la ia malaila aku, e ao a e olelo aku iloko o na kulanakauhale.

            2  Lohe ae la o Ioane iloko o ka halepaahao, i na hana a Kristo, hoouna mai la ia i na haumana ana elua,

            3  Ninau aku la iaia, O oe no anei ka mea e hele mai ana; e kali anei makou i kekahi mea e ae?

            4  Olelo mai la o Iesu, i mai la ia laua, Ou hoi olua, e hai aku ia Ioane i na mea a olua i lohe, a i ike iho nei.

            5  Ua ike na makapo, ua hele na oopa, ua huikalaia na lepero, ua lohe na kuli, ua hoalaia na make, a ua haiia aku ka euaneilio i ka poe ilihune.

            6  Pomaikai hoi ka mea i hoohihia ole ia no’u

            7  A hala aku la laua, olelo aku la Iesu i ka poe kanaka no Ioane, i aku la, I hele la oukou i ka waonahele e ike i ka aha?  I ka ohe anei i luli i makani?

            8   I hele hoi oukou e ike i ke aha?  I ke kanaka anei i kahikoia i ke kapa pahee?  Aia no ka poe i kahikoia i ke kapa pahee iloko o ka hale o na alii.

            9  I hele hoi oukou e ike i ke aha?  I ke kaula anei?  Oia, ke hai aku nei au ia oukou, o ka mea hoi e oi aku i ke kaula.

            10  Oia no ka mea i palapalaia nona, Aia hoi, ke hoouna aku nei au i ka’u elele mamua ou, nana e hoomakaukau i kou alanui mamua ou.

            11  He oiaio ka’u e olelo ia oukou, O na mea a na wahine i hanau ai, aole kekahi o lakou i oi aku imua o Ioane Bapetite: aka, o ka mea hili loa iloko o ke aupuni o ka lani, ua oi aku ia imua ona.

            Pauku Alakai.  Pauku 5.  Hoopaanaau.

            Pauku hui lahui.  Ioane 5: 33, 35. Hoopaanaau.

            Mele- Him. 241. Leo, Mendebras C. Sacra, page 224.

            Pule –i komo na haumana iloko o ke aupuni o ka lani.  

 

NA NINAU

 

            P. 1.  Na Makua.  Ehia haumana a Iesu?  Owai na i   ?  Ao oia ia lakou, mahea ka hoomaka ana?  Mokuna 10:5  Mahea ke oki ana? P., 42.  Loihi iki no; ua paanaau anei ia oukou?  Hai paanaau mai, p 16, 28

            Na Keikikane.  Hai paanaau mai. 32, 33, 37-39.

            Na Kaikamahine.  Hai paanaau mai, p 40-42.

            Na Pokii.  Hao paanaau mai, p. 29-31.  Ina ua pau na lauoho o ko oukou mau poo i ka heluia e ke Akua, pehea ko oukou mau hewa?  Ina malama oia i na manu liilii, pehea oia ia oukou?  Hoopaanaau ia Mat.6:26  No na manu o o ka lewa.

            Oukou a pau.  A oki ka Iesu ao ana i na haumana, heaha kana?  Ao oia iloko o na kulanakauhale.  Mahea?  Ma Galilaia. P. 21, 23.  Heaha ka manao pili?  E hoohalike paha me Iesu, e hele, e ao ma na alanui, ma kauhale, e paipai, e hoala.

            P. 2.  Na Makua:  Ihea o Ioane?  Ioane hea?  Heaha ke kumu i hooleiia ai oia iloko o ka halepahao?  Mataio 14:3,4.  Ua lohe e anei o Iesu ua hooleiia o Ioane iloko o ka halepaahao?  Mat. 4:12.  Mahea o Iesu ia wa?  A hele aku ia ihea?  No ke aha?  Loihi anei ko Ioane noho ana iloko o ka halepaahao?  Ua pepehiia anei oia mahope?  Mokuna 14:10.

             Na Keikikane.  Heaha ka Ioane i lohe ai?  Owai hoi kanai hoouna ai no Iesu la?

            P. 3.  No keaha i hopuna aku ai?  Kanalua anei o Ioane?  Nawai Iesu i bapetizo?  Aole anei i lohe e mamua, a ike i ka uhane e iho mai ana a kau maluna iho ona?  No ke aha kona kanalua?  Me he mea la, ua loihi ko Ioane noho ana iloko o ka halepaahao, a ike maka ole ia Iesu.  Ua lohe no oia i ka hana i hanaia, a manao o Iesu ka Mesia paha ia, ka mea a’u i bapetizo ai, aole paha, e hoouna aku au i mau haumana e ninau, e maopopo loa ia’u, a i ka’u poe haumana hoi.

            P. 4. 5.  Na Kaikamahine.  Pehea o Iesu i pane aku ai i na haumana elua?  Ua aha na makapo?  na oopa?  na lepero?  na kuli?  na make?  na ilihune?  He mau hoailona anei keia e maopopo ai o Iesu ka Mesia, ka mea e hiki mai ana, a pau ke kanalua ana o Ioane?  Hai paanaau mai Isaia 61: 1,2.

            P. 6.  Na Pokii            Hai mai i keia pauku?  Owai ka poe pomaikai?  Imi anei kekahi poe e hoohihia ia oukou no Iesu?  Ae  Olelo mai la kekahi poe, aole hiki ia makou ke lilo i mau haumana na Iesu, aole paha o Iesu i makemake ia makou, aole oia he kalahala no na keiki liilii, no na makua wale no.  A imi kekahi poe e alakai hewa ia makou.  A heaha ko oukou pono?  E hoole ia lakou, e ae e lilo i mau haumana nana, a e paulele nui iaia.

            P. 7-10.  Oukou a pau.  Ehia ninau a Iesu i ninau aku ai no Ioane?  Ekolu.  Heha ka mua?  ka lua?  ke kolu?  A pehea o Ioane?  he ohe anei?  he kanaka hanohano anei?  he kaula anei?  Mahea kona oi i ko ke kaula?  Kona lilo ana i elele no Iesu.  Malaki 3:1.  A ike maka ia Iesu.

            P. 11.  Na Pokii.  Owai ka mea i oi aku mamua o Ioane?  O oukou ea.  No ke aha?  Ua mahuahua ko makou lohe, ko makou ike, &e.

            Na keiki a pau.  Ka pauku Alakai me ka hui Lahui.  Na manao pili heaha?

            Mele-Him.  342-Leo.  Joy Cometh. Pure Diamonds p., 68.  Pule.

HAWAII.

 

Na olelo wehewehe no na Oihana

 a na Lunolelo.

MOKUNA XI.

-

            P. 19.  “O ka poe i hoopuehuia” – oia na haumana a pau, koe wale no na Lunaolelo. Mokuna 8:1.  “Hele no lakou a hiki i Poinike,” he apana aina ololi ia e pili ana ma kahakai, ma ka aoao akau o Palesetine, maloko o laila o Turo me Sidona.  “A i Kupero,” he mokupuni nui ia i paapu i na kanaka; aia ma ka hikina iloko o ke Kaiwaenahonua.  “A i Anetioka,” o ke Kapitala ia o Soria, ma ka muliwai Araotes, he aneane iwakalua mile mai ke Kaiwaenahonua aku.  I kekahi wa, o ke kolu ia o na kulanakauhale nui o ka honua nei.  “E hai aku ana i ka euanelio i na Iudaio wale no.”  Aole i ike kela poe haiolelo no na lahui a pau ka euanelio.  Aole lakou i hoomaopopo i ke kauoha a Iesu, “E hele ae oukou e hoohaumana i na lahuikanaka a pau,” Mat. 28:19.  Ua manao lakou, o ka hai ana aku i ka euanelio, oia ka lawe ana i ka ai a na keiki a haawi aku i na ilio.  Mataio 15:26, 27.

            P. 20. “No Kupero Kekahi poe o lakou, a no Kurenaio,” oia hoi kekahi o ka poe i hoopuehu ia.  No Kupero o Barenaba, mokuna 4:36.  O Simona, ka mea i kono ia e hali i ke Koa o Iesu.  (Mareko 15:21) a me Loukio, kekahi hoahanau no ka ekalesia ma Anetioka, no Kurenaio lana.  O Kurrenaio ke kulanakauhale nui o kela apana ma ka akau o Aferika, i kapa ia o Tripoli.  He kulanakauhale Helene ia, a he nui nae ka poe Iudaio malaila.  “Ao mai la lakou i ko Helene.”  Ua manao ia o kela poe i ao ia e lakou, he poe no ko na aina e, aole hoi o na Iudaio mai na kulanakauhale o ko na aina e elike me ka mea i hoakaka ia ma ka mokuna 6:1, me 9:29.  O ka huaolelo “Helene,” ua ike ia ma keia mau wahi ekolu wale no iloko o ke Kauoha hou.

P. 21.  “O ka lima pu o ka Haku kekahi me lakou” – eia ke ano, ua hoike mai ka Haku i kona mana.  Pela i olelo ia no Ioane Bapetite, “Aia me ia ka lima o ka Haku,” e malama ana, e alakai ana, a e hooikaika ana iaia, Luka. 1:66.

“Nui loa iho la ka poe i mananoio aku, a huli i ka Haku.”  O ka hua ia o ko lakou hai ana i ka euanelio, i ka wa i noho pu ai ka lima o ka Haku me lakou.  Ua kokua ke Akua ia lakou i ka lakou hui ana i ka euanelio, a ua hoike mai oia i kona mana ma kona haawi ana ia lakou ka ae oluolu i ka la o kona mana.  Halelu 110:3.  

Aia o ka lima pu o ka Haku me na kahunapule, e kokua ana ia lakou e pule ikaika me ka manaoio, a e hai aku o Kristo wale no ka mea hoola no ka poe hewa, alaila, e nui auanei ka poe lima pu o ka Haku me lakou, alaila, he makehewa ko lakou hai ana i ka olelo.  I Korineto 3:6

P. 22.  “Kaulana aku la ia mau mea a hiki i na pepeiao o ka ekalesia ma Ierusalema,” o ka huli ana o ko na aina e he nui loa, oia na mea i kaulana.  He 270, mile o Aneteoka mai Ierusalema aku.  Ia wa he hakalia ka lawe ia ana o na mea hou mawaena o ia mau kulanakauhale; e hala ana paha elua pule, alaila lohe ia ka mea hou mawaena o laua; aka, aole i nele ka lohe ia o na mea nui i hana ia ma kekahi o ia mau kulanakauahle, ua lohe ia no ma kekahi.  “Hoouna ae la lakou ia Barenaba e hele i Anetioka.”  Na ka ekalesia i hoo una ia Barenaba e kokua i na hoahanau malaila ma ka hana nui o ka hai ana ‘ku I ka euanelio.  Oiai no Kupero o Barenaba, na ike paha oia i ka poe e hai ana i ka euanelio i na Helene ma Anetioka.  Ua kauoha ia o Barenaba e nele i Anetoka.  Ua manao kekahi poe, ua kauoha ia oia e hai hele i ka olelo ma na kauhale a hiki aku ilaila, o ka palena ia, aole e hele hou aku.

P. 23.  “A hiki ae la ia, ike ae la i ka hoomaikai ia e ke Akua.”  Eia ke ano, ike ae la ia i na hoike o ka lokomaikai o ke Akua ma ka huli ana o ko na aina e i ka pono.  “Olioli iho la ia.”  He mea mau ka olioli o ka poe Kristiano ke huli ka poe hewa, a ina paha he hookahi wale no kanaka hewa ke huli, he mea ia e olioli nui ai iwaena o na anela.  Luka 15:7 me 10.

“Hooikaika mai la oia ia lakou a pau.”  Ka poe manaoio a pau.  Na ka poe Lunaolelo i haawi iaia ka inoa Barenaba; eia ke ano, “ke keiki a ka hooluolu,” mokuna 4:36.  Ua haawi paha lakou i keia inoa iaia, no ko lakou ike i kona akamai ma na olelo paipai.  “E hoopili lakou i ka Haku me ka manao ikaika o ka naau.”  Oia ke Barenaba i hooikaika ai ia lakou ma kana olelo paipai.  Pela no o Iesu e paipai nei i kana mau haymana.  “E noho oukou iloko o’u, a owau hoi iloko oukou.”  Aole e hiki i ka lala ke hoohua ma ona iho, ke pili ole i ke kumuwaina; pela e hiki ole ai ia oukou ke pili ole mai ia’u.  Ioane 15:4.  Elike me ka pili ana o ka lala i ke kumuwaina, a pela e loaa ai kona ola mai ke kumu mai, pela ka poe pono e pili ai ia Kristo, a e loaa ia lakou ke ola a me ka lokomaikai mai ia ia mai.  O ka poe i pili i ka Haku me ka ikaika o ka naau, o lakou wale no ke hoola ia.  Mareko 13:13.

P. 24.  “No ka mea, he kanaka maikai ia, ua piha hoi i ka Uhane Hemolele, a me ka manaoio.”  Ua hai ia keia ma ke ano he kumu no kekahi mea i ike mua ia.  Heaha ia mea?  O ke kumu paha keia o ka olioli.  Ina he kanaka lili oia, a he huahua, aole oia e olioli i kona ike ana i ka lokomaikai o ke Akua.  O ka poe maikai wale no ka i olioli i ka ike ana i ka pomaikai i hiki mai maluna o kanaka.  Ina i like oia me kekahi o ka poe Iudaio, ina ua hoahewa oia i ka poe nana i hai aku i ka euanelio i ko na aina e.  “Nui loa ae la ka poe i huiia me ka Haku.”  O ka hua ia o ka haiolelo ana a me ka hooikaika ana o Barenaba.

(Aole i pau.)

 

E huki i na kaula.

 

            He lio me ke kaa.  E holo ana ka ona i kahi e holo ai, i ka hale kuai paha, i ka hale halawai paha, i ka hale o ka hoa launa paha, a ku iho la, a hoopaa i ka lio i kahi kaula uuku ma ka pou o kahi lanai.  A komo ka ona iloko o ka hale, aole liuliu, puiwa ka lio, a moku kahi kaula uuku, a hoomaka e holo.  He wahi ilio iloko o ke kaa e kiai ana.  He wahi ilio noonoo ka keia.  No ka mea, huli oia i na kaula e hooholoai i ka lio, a loaa, hoopaa oia a huki ikaika i ka lio i hope.  A ike kekahi kanaka, holo mai oia a kokua i ka hopu a hoopaa ana i ka lio.  Hooluliluli ka ilio i kona huelo me he la ua olioli oia.  Ina he manawa, e ae, huhuloa ua ilio kiai nei ke hookokoke aku kekahi i ke kaa o kona haku.  He ilio maikai loa keia, a ma o na la e ao-ia’i na kamalii, me kanaka makua.

            I na e hele ana oe ma ke ala nui a hiki i kahi e huli ai e komo iloko o ka hale hookamakama, e huki ikaika i na kaula, i ole e huli aku ilaila.

            Ina he hale inu rama, kuai a puhiopioma, he hale inu bia, he hale hulahula, a pepa piliwaiwai, a e hookoke aku ana oe e huki i na kaula i paa, i komo ole aku.

            Ina he mea e holoholo olelo ai, e akiaki ai, e hoolei i na kaula ma kou olelo, e huki, e hoopaa.  Ina he manao ino kou, he huhu, he ukiuki, he kuko hewa, e kau i na kaula ma ia manao e hoopaa, mai hoopuka iwaho.  Ina e hoowalewale kahi hoa ia oe e hele i ke kolohe, i ka aihue, i ka hehi Sabati, e paa na kaula, i ole e hele aku.  E kiai, e makaala, e pule mau.     HAWAII.

 

E hookaa e i ka ke Akua.

 

            He wahi keikikane, o Ioane kona inoa, he keiki i maa i ke kokua mahina hou.  He wahi pahu liilii kona kahi e hahao ai i kana dala kokua.  He makuakane maikai kona, e mahiai ana oia iloko o kana mala uala i kekahi la.  Maalo ae la o Ioane, a kahea aku la me ka olioli.  E kuu makuakane, ea, he hapaha ka i loaa mai ia’u na kekahi wahine i haawi mai no kahi huhui pua a’o i ohi ai a haawi aku ai iaia.

            ‘Ae, e aha aku ana oe e Ioane, i kou hapaha?  wahi a ka makuakane.

            E lawe mua ana au i kekahi hapa no Iesu; ane mai ai o Ioane.  He 10 keneta ka’u e lawe ai ano, a hahao iloko o kuu wahi pahu kokua manawalea.

            Pono loa, wahi a ka makuakane, e hookaa e mamua i ka ke Akua.

            Maikai loa o Ioane.  He nui wale hoi na keikikane a me na kaikamahine ano like me kona ma Amerika, a ma na aina e kekahi.  Pela anei na keiki Hawaii nei?

            Ma ko’u ike ana, aole.  Haawi pinepine au i na hapaumi, hapawalu, hapaha, i na keiki, no kekahi hana no ka hoounaunaia, no ka lawe mai i kekahi ukana. &e. &e.  Aole nae lakou i hoomanao ia Iesu i ke kokua mahina hou, a olelo mai e haawi ana au i kekahi hapa no Iesu no ka la kokua.  Aole no.  Aia koi aku au e haawi i kekahi hapa no Iesu, alaila paha ae kekahi, me ka oluolu ole nae o ka manao.  Pela paha ma na wahi e ae.  E ake e lilo na hapawalu, i na mea ono, a ina mea pili i ke kino.  Ea, e na keiki, e hoohalike me Ioane.

HAWAII.

 

Malama o hoopio oe ma kekahi

mau hua hookanalua i ka

manaolana o kou hoa.

 

            Ua komo ka manao iloko o kou hoa, e huli mai.  Ua ala, na hele i na halawai, ua pule, ua hauoli ma ka pono, ma ka lohe i ka ke Akua olelo; ua komo ka malamalama ka manaolana iloko ona.  Aka, ua hoopuka oe i kekahi mau hua hoohenehene, hookanalua.  Ke kanalua no ia ona, me ka hoi hope a lilo i hoomaloka.

            Pela kekahi kanaka ui e huli mai ana, e imi ana i ke ola me ka manaolana e loaa.  Aka, o kona makuwahine me kona kaikuwahine, aka henehene laua iaia. Kona haalele no i ka pono, a lilo i ka auwana wale.  Mai make ilaila.  He leo aloha kana i lohe ai ma ke ala i hoopakele iaia i ka make.

            Nui ka poe i hoauwanaia e na hoa, e na makua, e na kaikuwahine, a kaikuaana paha, a e ka poe hoowalewale, a e na mea hookaumaha paha.  Paapu wale na alanui ma Honolulu, ma na hale inu rama, na hale lealea, a ma na mauna, ma na awawa, na uwapo, na moku, i ka poe auwana wale.  He poe ilihune makamaka ole, makua ole, oihana ole; ua makemake paha e loaa ka hana, aole nae i loaa; lilo i ka makilo, i ka ona, i ka lealea, i ka palaualelo, i ka pili mea ai ia hai.  Auhea na wawae aloha e kii aku?  Na lima aloha e lalau a apo ae?  Na leo aloha e kahea a paipai oluolu ia lakou?

            Ma ko lakou manao paha, ua haaleleia lakou, ua aloha oleia, hoowahawahaia, aole paha he makamaka menemene, aloha, a ahonui, imi e hoihoi i kahi home, i kahi e hana’i, e malu ai, e naauao ai, e ola’i.

            Ka hana nui ia, e na hoaaloha, na kane, na wahine, na kahu, na luna, na kumu, e imi i ka poe auwana, e hoihoi iloko o ka maluhia.                  HAWAII.

 

Holoholo, a piipii iluna, a haule, a

aha?

            A make anei?  Ko’u makau noia, wahi a kekahi kupuna wahine no Kini liilii, kana moopuna.

            Aia, ke holo la oia, ke pii la i ke kaa wahie, i ka laau fiku, aia, ke komo la na wawae iloko o ke kiowai, ke alualu la i na keiki hipa, aia, ke holo la me mea, i hea la hoi!

            Makemake ke kupuna wahine e noho malie ka moopuna ma ka hale, e humuhumu, e holoi pa, e kopalole, e heluheu.  Maikai no ia i kekahi manawa, aka, o ka holoholo iwaho i kekahi manawa, a lelele, a pii i na laau, a alualu i na holoholona, he mea ia e ulaula ai na papalina o na keiki me na pua rose, a e ikaiki ai hoi na kino.  Pela io no, aka, makau au o haule kuu moopuna, a hai na iwi, a make paha.

            He mea mau ia i ka poe oo, o ka hina pinepine mamua, aia a maa, alaila kupaa, aole hina.  Pela no na keiki, na moopuna, hina pinepine mamua, a eha paha, aka, aia maa i ka holo, i ka pii, i ka lelele, kupaa paha, aole hina.

Ke Akua, ko kakou Alii,

Aloha ia i na pokii,

Na pokii me a’u nei;

Hoolohe ia ke pule au,

Kokua i na la a pau

I ole e hina e.

HAWAII.

 

Na Olelo Oluolu a Kristo

 

            He kahuna nui o Kristo, a nui kona aloha i na kanaka nawaliwali, a pilikia ma keia ao; no ka mea, ua puni oia i na mea pilikia ma ke ao nei, ua hoowalewaleia hoi i na mea a pau e like me kanaka, “Aole hoi ona hewa.”

            “Kaahele ae ia o Iesu ma Galilaia a puni, e ao ana iloko o ko lakou mau halehalawai, a e hai mai ana i ka euanelio no ke aupuni, a e hoola ana hoi i ka mai, a me ka nawaliwali a pau o kanaka”

            “Kui aku la kona kaulana i Soria a puni, halihali mai la lakou io na la i ko lakou poe mai a pau, i loohia e kela mai keia mai, a me na eha, o ka poe i uluhia e na daimonio, a me ka poe behena, a me ka lolo; a hoola mai la oia ia lakou.”  Matio 4:23,24.

            Penei kana olelo i kela mea keia mea:

-I ka mai lolo.  “E kou keiki, e hoolana i kou manao, ua kalaia kou hewa.  Mat. 9:2.

-I ka wahine hee koko.  “E ke kaikamahine, e hoolana i kou manao, ua hoola mai kou manaoio ia oe.”  Mat. 9:22.

-I ka poe luhi a kaumaha.  “E nele mai oukou a pau loa i o’u nei e ka poe luhi a me ka poe kaumaha, na’u oukou e hoomaha aku.”  Mat. 11:28.

-I kona poe hoahanau.  “O ka mea i hana i ka makemake o ko’u Makua i ka lani, oia ko’u kaikaina, a me kou’u kaikuahine, a me ko’u makuwahine.”  Mat. 12:50.

-Ia Petero ma i ko lakou makau iaia, i kona hele ana maluna o ka loko.  “Olelo koke mai la o Iesu ia lakou, E hoolana oukou, Owau no keia, mai makau.”  Mataio mokuna 14:27.

-I ke anaina pololi.  “Kahea mai la o Iesu i kana poe haumana, i mai la, ke aloha aku nei ko’u naau i keia poe kanaka, no ka mea, eia ke kolu o ka la i noho ai lakou me a’u, aohe hoi a lakou mea e ai ai, aole o’u makemake e hoihoi aku ia lakou me ka pololi, o maule auanei lakou ma ke ala.”  &e  &e  Mataio 15: 32-39.

            Huhu hala ole ka poe Parisaio ia Kristo, a hoouna i na ilamuku e lalao iaia, a e lawe mai io lakou la.  A i ko lakou hoi wale mai, ninau aku la na Parisaio; “No ke aha la i lawe ole mai ai oukou iaia?  I aku la na Ilamuku, Aole loa he kanaka i olelo like me keia.”  Ioane 7:45,46.

            Hoomanawanui o Iesu iwaena o ka poe imi hala, a ua kaahele oia ma ia wahi aku ia wahi aku, e hana lokomaikai ana i na kanaka.  He kahuhipa maikai no oia, e kiai ana, a e hoi hoi mai ana i na mea auwana.  Mahalo nui na kanaka i ka olelo ana, a me kana hana ana.

 

He ohana iloko o ka Lani.

 

            Kanakolu makahiki mamua ‘ku nei, e ku ana kekahi moku ma ke awa o Bostonia, makaukau e holo aku i Smyrna.  A maluna o na moku la, ewalu misionari no na pegana.  Eha o lakou, he kane me kana wahine, a me na wahine kane ole elua, e holo ana i ka Misona Nestoria ma Persia.

            A kokoke lakou e holo aku ai, palapala kekahi o lakou penei; “E oluolu paha ou kou e ike, he mea mau ka maluhia o ko’u naau, a me ko’u manao lana.  Ke hele nei makou i ka oihana o ko makou Haku maikai.  Ke hele nei makou e hai aku ia Kristo i ka poe e make ana iloko o ka hewa.  Ke hele nei makou e noho iwaena o na popilikia; aka e hele ana me ka Baibala ma kekahi lima, a maloko o ua Baibala nei, ua hai ia mai na mea he nui loa e pomaikai ai; a ua makaukau mau no ka Haku e hoolohe i ko makou haipule, a e hooluolu, a e lokomaikai mai ia makou.  Aia hoi ma ke alo o Ierusalema hou, ko makou home.”

            I kona hoomaka ana me keia uhane maikai, aole kakou e kahaha no kona lilo ana he misionari maikai, a mahalo nui ia e kanaka.

            He iwakalua kumamaha kona mau makahiki i kona kakau ana i ua palapala la, a hala na makakahi he 15-ua pau kana hana ana.  Elima makahiki ka laua hana pu ana me kana wahine; alaila make ka wahine i ka mai cholera Asia, e haalele ana ia ia me ka laua mau kaikamahine elua.  Aia no na kaikamahine elua me ko laua mau makua ma ka lani i keia manawa.  A make ka makuakane, aole liuliu a make kekahi kaikamahine me ka manaoio ia Kristo a kanuia ma ka aoao o kona makuakane, iloko o ka ilina kupapau misionari.  Ua ola hoi kekahi, a lilo he wahine oo; ua aoia a makaukau e lilo he kumu ao maikai; ua laweia nae e ka make i keia mau hebedoma i hala ae nei.

            Pela iloko o na makahiki he 30, ua hoakoakoaia ka ohana misionari iloko o “Ierusalema hou, ko lakou home”  He ohana iloko o ka Lani!

            Nani ko lakou pomaikai i ka hui hou ana; a e hauoli pomaikai i ka hoomanao ana i ko lakou hoana e ana ia lakou iho no Kristo ma ke ao nei.

            Ikaika ka manao o kekahi poe e hoomau aku i ka inoa ohana, a me ka waiwai hoilina ma ka honua nei.  Aka, ua oi nui aku ka pomaikai e kakauia keia mau inoa ma ka lani, a e loaa kolaila hoilina waiwai pau ole, pelapela ole, mae ole, hoano e ia malaila.

 

Na inoa a Kristo.

 

            Ma ke Kauoha Hou, ua kapaia o Iesu Kristo ma na inoa maikai, a hanohano nui wale.  Eia no kekahi.

Keikihipa a ke Akua,

Mesia, ke Keiki a ke Akua,

Emanuela, ke Akua me kakou,

Berena o ke Ola,

Kokua i ka Iseraela,

Ka malamalama mai ka lani mai,

Ka malamalama o keia ao,

Ka malamalama io,

Ka mea Hemolelo a ke Akua,

Mea mana e ola’i,

Ke Alii o ka Iseraela,

Ke Alii o na Iudaio,

Mamo na Davida,

Keiki a ka Mea i hoomaikaiia,

Keiki a ka Mea Kiekie loa,

Kumuwaina Oiaio.

Ke Aia, ka Oiaio, ke Ola,

Ke ala hou ana, a me ke Ola. &e. &e.

            Ua mahalo nui ia keia mau inoa a ka Haku, e kona poe kanaka.  Maikai e kakania a paanaau, i makaukau e pane aku i ka poe e ninau mai auanei; “Heaha ko oukou manao no ka Mesia?”  “No ka mea, ua hookiekie loa ae la ke Akua ia ia, a haawi aku la nona i ka inoa maluna o na inoa a pau; E kukuli iho na kuli a pau i ka inoa o Iesu, o na mea o ka lani, a me na mea ma ka honua, a me na mea malalo o ka honua:  E hoola aku hoi na eleio a pau, o Iesu Kristo ka Haku, ka mea e nani ai ke Akua ka Makua.”  Pilipo 2;2-11.

 

Sabati Kristiano.

 

            O ka la Sabati Kristiano, he manawa ia e hoomanao ai i ke ala hou ana o Kristo, mai ka make mai.  He la kapu hemolele ia e paipai i na kanaka i kela hebedoma keia hebedoma, ua ala mai o Iesu mai ka make mai, i ke kakahiaka o ka la mua o ka hebedoma.

            Mai kinohi mai, ua malamaia ka hiku o ka la i Sabati, e hoomanao ai i ka hoomaha ana o ke Akua, mahope o kana hana ana i keia ao.  Aka, mai ke ala hou ana o Kristo, mai ka make mai; o ka la mua o ka hebedoma na kapaia ka “La o ka Haku,” oia hoi, ka Sabati Kristiano.  Ua akoakoa na haumana a Kristo, a me na haipule e ae e hoomana i ke Akua ia la.  Mai ia wa mai, o ka hapa nui o ka poe Kristiano, ua hoomahui i ka Iesu poe haumana, me he mea la, o ka la mua o ka hebedoma, oia ka la Sabati Kristiano.

 

Nu Hou.

 

            Ku mai ka mokuahi Costa Rica, me na eke leta nu hou, mai Kapalakiko mai, i ka la 1, o Sepatemaba nei, 9 la kona holo ana mai.

 

            KULA KAHUNAPULE-I ka la mua o Okatoba e hoomaka ana ke Kula Kahunapule ma Honolulu.  He pono no i na haumana o keia kula e @inui mai ia manawa.  Ina he mau haumana hou kekahi i makemake e komo i ke kula, e h@@ol@ulu mai lakou ma ka hale kula i ka la 30 o Sepatemaba i ka hora 10.  He nui na koena kahi e noho ai na haumana. E loaa i na haumana kahi hana lima ma ke kulanakauhale o Honolulu, i kumu e lako ke kino i ka wa e noho ana ma ke Kula.

 

NA BUKE

 

I HOOLAHA IA E KA PAPA HAWAII

 

- ME KE –

 

KUMUKUAI O KELA ME KEIA

 

BAIBALA HEMOLELE Nui Ili Gula Nani me

na kuhikuhi ma na aoao.. ………………………$12 00

Baibala Hemolele Nui ili eleele kaekae wai gula. $5 00

    “        “     uuku iki iho,    “       “.     8 00

    “        “     Pananaiki iho ili eleele… ..    4 00

Kauoha Hou ili gula nani me na kuhikuhi….      3 00

     “    “     eleele kaekae wai gula………    1 00

     “    “      “                         …..     75

Kauoha Hou Hapa Hale…………………………   75

Lira Hawaii 1848 me ke kanawai………………    25

     “    “  1855……………………………….   25

Moolelo Ekalesia………………………………..   20

Haiao ili lahilahi…………………………………  50

Hele Malihini ana……………………………….   15

No ko ke Akua ano………………………………  25

Lira Kamalii……………………………………..  25

Hoike Palapala Hemolele………………………..  25

Moolelo o Heneri Opukahaia……………………  25

Hoike Akua………………………………………  20

Wehewehehala…………………………………… 20

Ninau Hoike ili manoanoa………………………  25

   “    “    “  lahilahi…………………………  15

Kumumua Kula Sabati…………………………   15

Buke Lawe Lima………………………………… 15

He Buke no ka Pope……………………………  10

Ui Kula Sabati Helu 3…………………………… 30

   “      “     “    4…………………………  0@

   “      “     “    5…………………………  30

Buke Euanelio a Ioane…………………………….15

Himeni Hawaii………………………………….. 1 00

HImeni ili nani Hawaii…………………………. 1 70

Kumu Leo Mele………………………………….  15

Kumu Leo Mele ili nani…………………………  50

NA KAUOHA HOU PAKEKE.

Ili Gula nani……………………………………  1 50

Ili eleele kaekae nani……………………………   50

Ili eleele………………………………………….  35

KAUOHA HOU PAKEKE ME NA HELULU

Ili Gula nani……………………………………  1 75

Ili eleele kaekae wai gula……………………….   60

Ili eleele………………………………………….  50

Buke wehewehe Huaolelo Baibala, elua ano.

Buke Wehewehe ano Mataio.

NA HALELU PAKEKE.

Ili Gula nani…………………………………….   50

Ili eleele kaekae wai gula………………………… 30

Ili eleele………………………………………….  20

Ka Hae Hoonani (Buke Mele)…………………… 25

EIA NA BUKE HAWAII WALE.

PALAPALA LIILII-

            Helu  4 –Makemake anei oe i ke ola?

            Helu  6-E hele i o Kristo la.

            Helu  7-Ka hoi ana mai o ke Keiki Uhauha.

            Helu 11-No ka hoohiki wahahee i ke Akua.

            Helu 16-Ka Eehia ana o ka Ahaaina a ka Haku a

                                    me ka Bapetizo ana.

            Helu 17-Mai hana ino i na holoholona.

            Hulu 18-No  ka mahi ana, kuai ana a me ka inu

                                    ana i ka Awa.

Ka Davida Malo Kumumanao.

Ka Moolelo o Batimea Puaaiki.

            Aia ke keena kuai buke o ka Papa Hawaii ma

ka huina o Alanui Betela me Alanui Kalepa, e kokoke

ana i ka Hale Leta.

J. F. POKUE.

            Kakauolelo o ka Papa Hooko o ka Akahui Euanelio o ko Hawaii Pae Aina.