Ka Nupepa Kuokoa, Volume XII, Number 39, 27 September 1873 — Page 4
| This text was transcribed by: | Dore Minatodani |
| This work is dedicated to: | Awaiaulu |
Ka Nupepa Kuokoa
KE KILOHANA POOKELA NO KA LAHUI HAWAII.
KA NUPEPA KUOKOA, ME KE AU OKOA I HUIIA.
Ka Nupepa Kuokoa
Beautiful Mansions.
FRESH LAURELS. p. 9.
1.
Kauhale nani, home maikai,
Kahi hoomaha, a malu ae,
Kuu home nani, home mau no;
Maanei he luhi, maha ma o.
Cho. Iesu kuu Hoa,
Kuu mea hoohauoli,
Kuu mea hoola,
Kuu Alakai.
2.
Ao waonahele, auwana wau,
Luuluu a eha, u kuu naau,
Kau mai na ino pouli no;
M@an@ei he luhi, maha m@ o.
Cho. Iesu kuu Hoa, &c.
3.
Nalo k@u Iesu, kaumaha au,
Ina hoolauna, aole makau;
Hee ae ka pouli, ao maikai no;
Maanei he luhi, maha ma o.
Cho. Iesu kuu Hoa, &c.
4.
Iesu kuu Hoa, aloha no au,
Launa i oli, hoopili mau;
Kuu manaolana, lama mau no'u;
Maanei he luhi, maha ma o.
Cho. Iesu kuu Hoa, &c.
HAWAII.
Because He loved me so.
The Prize. p. 12.
1.
E oli a hoonani
I kuu Iesu maikai
I iho mai ka lani
I Ola e ola'i.
He keiki hewa au Ia,
Ua lilo nae Iesu
I kalahala no'u @a
No kona aloha ia'u.
2.
Ua loha au a oli
He keiki no Iesu,
Maikai a hemolele,
He kumu oia no'u.
E pili au iaia la,
A hahai no a mau,
A nana e hoopaa mai la
No kona aloha ia'u.
3.
He oli @ mele
I kona aloha mai,
Hoolohe olu kela
I kuu hoomaikai ae.
Ua ae e hele au la,
Ke pono no a mau,
E mele me na anela,
No kona aloha ia'u.
HAWAII.
HAAWINA KULA SABATI.
HELU 40, SABATI, OKT, 5.
Kumuhana. -- KA LULUHUA ANA.
Pauku Baibala. -- MATAIO 13: 18-23.
18 ¶ E hoolohe oukou i ke ano o ka olelonane no ke kanaka luluhua.
19 O keia mea keia mea lohe i ka olelo no ke aupuni me ka hoomaopopo ole; alaila, hele mai no ka mea ino, a kaili aku ia i ka mea i luluia iloko o kona naau. Oia ka mea i luluia ma kapa alanui.
20 O ka mea i luluia ma kahi hapapa, oia ka mea i lohe i ka olelo, a hopu koke iho me ka olioli.
21 Aole nae he aa iloki one, nolaila, ua pokole kona kupaa ana; a hiki mai ka pilikia a me ka hoino no ka olelo, alaila haule koke iho la ia.
22 O ka mea i luluia ma kahi kakalaioa, oia ka mea i lohe i ka olelo; a na ka manao ana i @a mea o keia ao, a me ka hoopunipuni ana o ka waiwai e kinai iho ai i ka olelo, a lilo ia i mea hua ole.
23 A o ka mea i luluia ma kahi lepo maikai, oia ka mea i lohe i ka olelo me ka hoomaopopo; a hua mai i ka hua he pahaneri ka kekahi, he pakanaono ke kekahi, a he pakanakolu ka kekahi.
Pauku Alakai. Mat. 13:12. Hoopaa naau.
Pauku hui lahui. Iakobo 1:22. Hoopaa naau.
Mele. Himeni 498.
Pule no na aina lohe ole i ka Iesu olelo.
Mele. Him 478. Leo, Oto.
Pule hou no na aina Pegana.
NA NINAU
Na Makua. Ke komo nei kakou iloko o ka hapaha ehia o ka makahiki? Mahea ke kula ana i keia hapaha hope? Akaka ole @a. Ia wai ka haina? Ia'u nei, aia ma Mataio 13: 18. a pau ka buke Mataio. Pololei oe e Meli. Akaka anei e hiki'ku'na kakou i ka pau ana o keia makahiki? Ia Iesu i noho ai ma ke ao nei, nui anei na kanaka i hele e lohe i kana mau olelo? Lehulehu wale. I kekahi manawa i akoakoa ai na kanaka nui loa, a pono ole ka halehalawai maoli, mahea oia i ee aku ai? A lilo ka moku i aha? I awai paha. Mahea hoi i noho ai kanaka? Ka moanawai hea keia? Huli i loaa, kokua ke kula a pau. Owai la?
Na Keikikane . II i olelo o Iesu mamua ma na mokuna 5, 6, 7., me ka maopopo lea o ke ano; kana hai olelo ana ma keia mokuna 13 o Mataio, me ke aha ia? p. 3. No ke aha? p. 10, 11, 13 Ka wanana hea ka i hookoia? Isaia 6: 9. Pelaka loa ka lakou. Hiamoe loa ka naau Makehewa ke hai akaka aku i ka olelo maikai ia lakou. Mai noho palaka, a hiamoe oukou, o ahaia?
Na Kaikamahine. Ma ka olelo nane he kanaka luluhua, a hele aku la oia e lulu i ka hua. Ma na wahi ehia i helelei ai ka hua? Ma na wahi eha paha. 1. Kapa alanui. 2. Kahi hapapa. 3. Kahi kakalaioa. 4. Kahi lepo maikai. Heluhelu mai. p. 4--8.
Na Pokii. Ua ike anei oukou i kekahi moanawai a moanakai paha? Ae, aole, ae. Ua ike makou i ka moana; aole i ike i ka moanawai. Ua ike anei i ka moku? Ae, ua ike i ka moku maoli, i ka moku mahu ia Kilauea. Ma ka moku hea i ee aku ai o Iesu? Ma ka moku uuku paha, he kiakahi, he pea. A haiolelo anei oia ma ka moku? Mahea na kanaka, ka poe e lohe ana? Aia lakou mauka, ma kapa o ka moanawai. Hiki anei ke lohe malaila? Ae, ua kokoke loa ka moku i uka. Mahea ko oukou lohe ana i ka Iesu olelo? Nawai hoi i hai, a e hai nei? Ua ike anei oukou i ke kanaka e luluhua ana? Aole -- ua ike makou i ka poe kanu h@, kanu uala, kanu papapa, kanu kulina. Ae, pela ka nui o kanaka Hawai. Aka, he poe luluhua, lulu huita, lulu raiki paha kekahi. Ae, pela no kekahi poe ma Maui, a ma Oahu. Heaha ka oukou? He kanu hea? he luluhua? heaha? Aole no, molowa makou, aole make e kanu, e lulu, e waele --- Kahaha! Pono anei ka molowa? ka nohowale? Ka, ke hele nei makou i ke kula, auhea ka manawa mahiai? Ma na hora kaawale paha. Paani ma kahi hora, a hana ma kekahi hora. Ae, maikai ia.
Na Makua. Ko Iesu wehewehe ana i keia olelo nane. Eha no wahi i helelei ai ka hua. Ma ka hoopili ana, o ka poe luluhua owai lakou? Heaha ka hua i luluia? O ka poe lohe i ka ke Akua olelo, ehia mahele? Eha paha mahele.
P. 19. Owai ka poe ma ka mahele mua? Ka poe lohe wale me wai la? Me ka nui o na kanaka, na kamalii. Pela ko lakou ano? He mau pepeiao no a hiki ke lohe, a lohe iki no kekahi, a lohe ole kekahi, me he poe kuli la.
Ua paniia ka pepeiao, a uuku kahi olelo i komo, a komo, aole i hoomaopopoia, he makani wale me ke ano ole. A paa anei kahi hua i komo ma ka pepeiao? Aole paha. Nawai e kaili aku? Ka mea ino, owai ia? Hele pu anei Satana i ka halawai, i ke kula Sabati? Heaha kana hana malaila?
P. 20, 21. Na Keikikane. Ka mahele elua o ka poe lohe. Owai lakou? Nui anei ia poe? Ae, nui no ma kau wahi, a hapa ma kau wahi. Heaha ka mea e nui ai? Ke akamai, ka makaukau, ka ikaika o ka poe haiolelo. Ina he -- Haiolelo hou paha, he malihini paha, olili paha ka poe lohe. Olioli no hoi ka poe lohe ke maikai a akamai ka wehewehe ana o ke kahuna kamaaina. Mau anei keia olioli? Heaha ka mea e pau koke ai? Ka pilikia, ka hoomaania, ka hoino ia, a heneheneia, a hoowalewaleia, a hiki ole ke kupaa, ke malama, a hoihou i hope. No ke aha? Aohe aa maloko. A ma aohe aa maloko o ka laau, pehea ka laau? Hina e. Heaha ke aa? Ka makau, ke aloha, ka naau hou. Ua loaa anei ia aa ia oukou? A loaa ole, pehea? Hina a make. Pehea e loaa ai? Ma ka pule.
P. 22. Na Kaikamahine. Ka mahele Ekolu o ka poe lohe. Owai lakou? Lakou ka poe lohe, a hoomaopopo, a olioli, a huli mai no, a like lakou me ka poe pono io, komo iloko o ka ekalesia paha, hele i ka ahaaina a ka Haku, i ka halawai, i ke kua Sa bati, pule, paipia, himeni, ikaika no lakou mamua. E like me oukou, ea. A, mahope, hoi anei lakou ihope? No ke aha? No ka manao nui i ke aha? A lilo ka olelo lo a lakou i lohe'i i aha? Nui na mea lealea, na mea hoowalewale, ka nani o ka waiwai, na oihana aupuni, na hana e waiwaiai, heaha ka pono? Hoopaa naau. 1 Tim. 6: 9, 10.
Na Pokii. Ekolu papa o ka poe lohe i ha@ia mai, Owai? 1. Ka poe lohe wale me ka hoopaa ole, me ka manao ole. 2. Ka poe lohe me ka olioli, me ka manao e malama i ola, makau nae i ka hoinoia, i ka akaakaia, a haalele koke no. 3. Ka poe lohe a huli mai, a pule, a malama i kekahi manawa, aka, aole hoomau -- ae i na mea lealea, na mea hoowalewale, a hoi i hope. A pomaikai anei lakou? Aole. Owai ka poe ola? Hoopaa naau. Mataoio 24: 13.
"O ka mea hoomanawanui a hiki i ka hopena, e ola ia." No ka papa hea oukou? No ka papa mua paha makou, he poe lohe wale me ka hoopaa ole. A hele mai ka mea ino; owai ia? O Satana, a aha? kaili aku. Ae, kaili aku o Satana i ka apana ai e ola ai ka uhane, pololi ia a make. E makaala, e pale aku iaia.
P. 23. Ke kula a pau. Hookahi mahele i koe, ka mahele o ka poe lohe. Owai ia poe? Ka lepo maikai, heaha ia? Ka naau aha? He mau naau ko oukou a pau loa, oia hoi ka aina, na mahinaai, pehea? he aina maikai anei? Walewale, oluolu, mau? Ke kupu nei, a ulu nei, a hoohua mai nei anei i na @ua maikai pahia? Heaha na hua maikai, oia hoi na hua a ka Uhane? Hoopaa naau. Galatia 5: 22 23. Pili na hua maikai ia wai? I ka hoahanau hookahi, i ka ekalesia okoa, i ka ohana, i ke kula Sabati. Heaha ke ano o ka hua pahaneri, pa 60, pa 30? Pehea la e hiki ai ke huamai a hui wale na hua?
Na keiki a pau. Hai paanaau mai i ka pauku Alakai, a me ka pauku hui Lahui. Na manao pili.
Mele. Milenio. Himeni 499.
Pule -- no Fatuiva ma. HAWAII.
Ka moolelo o ka Ahahui Euanelio o Hawaii Akau.
Halawai ka Ahahui Euanelio o Hawaii Akau, ma ka halepule Hoolepope ma Kaipuhaa Kohala Komohana, ma ka la 4, 5, 6, o Set. M. H. 1873.
Ka Lunahoomalu mua ma ka noho. Weheia ka Halawai me ka pule a ka Lunahoomalu. Kohoia o Rev. S. C. Luhiau i Komite e hoomaopopo i na lala o ka Aha.
Eia na Kahu me na Elele i hiki mai.
Ekalesia, Kahu, Elele.
Hamakua H. Rev S. Kaau@. Ohakee.
Hamakua W. --- Waiohinu.
Hamakua K. C. Haae (haiolelo) Alapai.
Waimea, --- Z. Paakiki.
Kohala H. Rev. S. Aiwohi, Kauwewahine.
Kohala K. Rev. S. C. Luhiau, Kauaua.
Kohala A. Rev. E. Bond. Kaanaana.
Ma ka barota ana, ua kohoia o Rev. S. C. Luhiau i Lunahoomalu, o Rev. S. Aiwohi i Kakauolelo.
Koho ka Lunahoomalu, elua Komite, he Komite Imihana, he Komite Imihaawina.
Kohoia o Rev. E. Bond, Z Paakiki, J. W. Kaanaana i Komite Imihana; a o Rev. J. Pogue, Kauaua, Waiohinu, i Komite Imihaawina.
Noi mai o Rev. S. Kaaua e lilo o Rev. J. Pogue me Rev. J. H. Pahio i mau hoa kuka no keia halawai. Hooholoia.
Hoike mai ke Komite Imihana penei:
1 1/2 Hora haipule.
2 Hoike Kihapai.
3 Heluhelu Haawina.
4 Palapala Hoopii.
5 Heaha la ka kakou e hana aku ai a eu mai ka pono a holo aku imua?
6 E hoolohe i ka na Elele no na Ekalesia e ae mai.
7 Kula hanai kaikamahine.
8 Ka emi aku nei anei ka Waiwai o ka Palapala Hemolele iwaena o Kakou i keia wa e noho nei?
9 Elele no ka Akahui o Hawaii H.
10 Hanai Kahu.
11 Kula hanai o Hilo.
12 Kahi e halawai hou aku ai keia Ahahui.
Malama ka Aha i ka hapalua hora haipule.
Noi mai o Rev. S. Kaaua e lilo na mea a pau, i mau hoa no keia Aha. Ua ae ia.
Kumuhana 2. Na hoike Kihapai. Hoike mai o Rev. E Bond no ka Ekalesia o Kohala Akau, o Rev. S. C. Luhiau no ka Ekalesia o Kohoa Komohana, o Rev. S. Aiwohi no ka Ekalesia o Kohala Hema, o C Haae no ka Ekalesia o Hamakua Komohana.
Na ke Kakauolelo i heluhelu mai i ka hoike no ka Ekalesia o Hamakua Waena.
Heluhelu mai o Rev. S Kaaua no ka Ekalesia o Hamakua Hikina.
Noi mai o Rev. E. Bond e hoomaha ka Aha i hookahi hora.
Hooholoia. Pule o Rev. J. Pogue.
Ma ka hora 2 hoi mai ka Aha.
Hoomaka ia ka halawai, me ka himeni, a me ka pule a Waiohinu.
Kumuhana 3. Heluhelu Haawina. Heluhelu mai o Rev. E. Bond i kona Haawina. "Ua makaukau anei na Ekalesia o Hawaii nei no ka hiki ana mai o ka Uhane Hemolele?"
Kuka ka aha, a hooholo e paiia keia Kumumanao ma ka "nupepa Kuokoa."
Heluhelu mai ke Kakauolelo i ko Rev. J. Bikanele Haawina. "Ka ouli o ka manawa."
Heluhelu mai o Rev. S. Aiwohi i kona Haawina. "He mea hiki anei i ke kanaka ke hoomaopopo iho, ua kala ia kona hala mai ke Akua mai?"
Heluhelu mai o S. Kamelamela i kona Haawina. "Ua like anei ke kulana o na Ekalesia o Hawaii nei ma ka manaoio me ka Ekalesia i ka wa o na Lunaolelo?
Kumuhana 4 Na palapala Hoopii. Nele loa i na palapala Hoopii
Kumuhana 5. "Heaha la ka kakou e hana aku ai i eu mai ka pono a holo aku imua?"
Kukakuka nui ka Aha i keia Kumumanao. Noi mai o Rev. E. Bond e kuka hou ka Aha i keia kumuhana i ka la apopo. Hooholoia.
Hookuuia ka halawai me ka Himeni a me ka pule a Rev. E. Bond.
La Hana 2, Sepa. 5. Halawai hou ka Aha ma ka hora 10 kakahiaka. Pule ka Lunahoomalu.
Malama ka Aha i ka hapalua hora haipule. Kahea ia na inoa. Heluheluia ka moolelo, a aponoia.
Heluhelu mai ke Kakauolelo i ka hoike Kihapai o ka Ekalesia o Waimea, a me ko Rev L. Laiana Haawina.
"Owai la ka mea hewa i olelo ia ma ke II Tesalonite 2:8?"
Nonoi mai o S. Kamelamela e hoomaha ka Aha i hookahi hora, ae ia
Hoi hou mai ka Aha ma ka hora 2 e like me ka hoopanee ana. Hoomakaia ka hana me ka himeni a me ka pule a Rev. S. Ka aua.
Hapai hou ka Aha a kuka i ke Kumuhana 5. "Heaha la ka kakou e hana aku ai, a eu mai ka pono a holo aku imua?"
Waiho ia mai he olelo Hooholo. Hooholoia. Ke paipai ikaikia ia aku nei na lala o keia Aha, e pule nui i ke Akua, me ka haahaa me ka makemake nui o ka naau, e paulele oiaio aku i ke Akua, a e nonoi nui hoi i ka Uhane Hemolele a ninini nui mai maluna o na Ekalesia o Hawaii nei, i eu mai ka pono a holo aku imua.
Kumuhana 6. "E hoolohe i ka na Elele no na Ekalesia e ae mai."
Ku mai o Rev. J. H. Pahio he Elele mai ka Ahahui Euanelio mai o Hawaii Hikina, a hoike mai i ke aloha oia Aha i ka Ahahui Euanelio o Hawaii Akau, a me na hana e aku oia Ahahui.
Hoike mai hoi o Rev. J. Pogue no ka Ahahui o Hawaii Komohana.
Kumuhann 9 "Elele no ka Ahahui Euanelio o Hawaii Hikina." Ku mai o Rev E. Bond a hoike mai i ka Aha, na ke Komite Imihaawina e hoike mai i ka inoa o ka Elele o hele aku e hoike mai i ka inoa o ka Elele e hele aku e hoike i ke aloha o keia Aha Euanelio i ka Aha Euanelio o Hawaii Hikina. Ua ae ia.
Kumuhana 11. "Kula hanai o Hilo." Kuka nui ka Aha i keia.
Kohoia o S. Kaaua, Z. Paakiki, C. Haae S. C. Luhiau, me S. Aiwohi i Komite e imi i mao olelo Hooholo no keia kula. Ua ae ia.
Kumuhana 8. "Ke emi aku nei anei ka waiwai o ka palapala Hemolele, iwaena o kakou i keia wa e noho nei?"
Noi mai o Rev. E. Bond e Hoopanee ka Halawai apopo hora 10 kakahiaka, Hooholoia.
Hookuuia ka Halawai me ka Himeni a me ka pule a E. Bond
La hana 3, Sep. 6. Halawai hou ka Aha ma ka hora 10 kakahiaka. Malama ka Aha i ka hapalua hora haipule.
Kaheaia na inoa, Heluheluia ka moolelo, a Aponoia.
Hoike mai ka Lunahoomalu o ke Komite imi Haawina, o Rev. S. Aiwohi ka Elele e hele aku e hoike i na hana me ke aloha o keia aha i ka Ahahui o Hawaii Hikina.
Hoike mai ke Komite Imihaawina i na Haawaina no ka Halawai hou aku o keia Aha.
1 E wehewehe ia 1 Petero 3:18-20.
Rev. L. Laiana.
2 O ka hope o ka Pae Aina o Hawaii nei.
Rev. E. Bond.
3 O na manawa hoomaha heaha ka i oleloia mai ma Oihana 3:19.
Rev. J. Bicknell.
4 E hoike mai i kekahi mau hoailona o ka poe i kapaia mai he poe enemi lakou i ke Kea o Kristo , ma Pilipo 3:8.
Rev. S. Aiwohi.
5 Ua like anei ke kanawai o ke Akua me ke kanawai o ka aina e hookaawale nei i na mea i mare ia ke loaa kekahi o lana i ka mai lepera?
C. Haae.
6 Heaha la ka mea nui e imi ia ai i ka hoopai ana i ka poe kalohe?
Z. Paakiki.
7 Pehea la ka like ana o ka poe haipule me ka paakai i oleloia ai ma Mataio?
S. Kamelamela.
8 E hoomau ia na Haawina i heluhelu ole ia imua o ka Aha.
Waiho mai o Rev. E. Bond he olelo Hooholo. Hooholoia. No ka mea, ua lono wale ia mai he poho ma ke ano pono ole, kekahi mau dala i luluia e keia Aha ma Eleio i ka malama o Marati iho nei, no ka Luakini o Waimanu, a me kekahi mau dala e aku no hoi i hoiliili ia no ua hale 'la; nolaila, e kohoia kekahi Komite nana e imi i ka oiaio a me ka@ ole o keia wawa, a e hoike imua o keia Aha ma Marati ae nei.
Komite
Rev. J. Bicknell,
Rev. S. Kaaua,
G. W. D. Halemanu.
Noi mai o Rev. S. Kaaua e kohoia i Komite e hele aku i waena o na Ekalesia o keia Ahahui, e paipai i na hoahanau e hookaa koke mai i ko lakou mau aie i ko lakou mau Kahu. Ua ae ia. Kohoia o Rev. S. Kaaua i Komite.
Noi mai o C Haae; Aia a hoopanee keia Aha, e halawai hou ma Waipio, Hamakua Komohana, ma ka Poaha mua o Maraki, M. H. 1874, hora 10 kakahiaka. Hooholoia.
Noi mai o Rev. E. Bond e hoomakaukau koke ke Kakauolelo, a e hoouna koke aku e paiia ma ke Kuokoa. Hooholoia.
Ke mahalo aku nei keia Aha me ke aloha nui aku i ka Ekalesia o Kohala Komohana no ko lakou malama maikai ana i na lala, a me na hoa a pau o keia Aha, ma na mea e pono ai.
Heluheluia ka Moolelo a Aponoia.
Hoopanee ia keia Aha, a halawai hou ma ka Poaha mua o Maraki, M. H. 1874.
Na Rev. J. H. Pahio, me C. Haae ka pule.
S. AIWOHI.
Kakauolelo.
AHAHUI EUANELI, OAHU. -- O ka moolelo o ka Ahahui Euanelio o ka Mokupuni Oahu, i akoakoa ma Kaneohe i na la 9, 10, 11, o Sepatemaba nei, e paiia i keia hebedoma aku.
Hiki anei ke hooia i ka mea ona?
KALE WELA. LEDE ALOHA.
He mea mau ka ike ana i ka poe ona. He kaula hoohei ka rama, na ke diabolo paha e hoohei, na ka mea hana rama, na ka mea kuai a haawi wale paha. E kau hoopai nui maluna o ka mea hoohei. Hana ino! Pepehi kanaka!
A pehea ka poe ona? E waiho wale ia anei lakou, aole make e kii, e hoola?
E NANA I KEIA WAHI KAAO NO KALE WELA.
He kanaka ui oia a maikai, a holo kana mau hana mamua. A kau ka mahalo ia maluna ona. Aka, ua hooheiia oia e keia kaulahao, a komo ia iloko o kona ihu, a ua hukii oia iloko o ka loa o ka ona. Ka i noa @a paa loa oia ilaila, a hiki ole ke hukiia iwaho! Pela no ka manao o ka poe i ike. A no ia manao ua waihoia oia pela iloko o ka lua ona.
Aka, ma kekahi la, ala mai kekahi wahine aloha mai loko mai o ka hiamoe, me he la ua aoia oia ma ka moe uhane, a kau kona manao maluna o Kale. Ua nale aku ia ma ia mau la he nui, aole oia i ikeia, aole no hoi i lohe iaia. Aloha nae oia iaia a kukuli iho a pule nui i ola kona uhane. Lilo ka wahine i kana hana ma ia la, aka komo pinepine o Kale Wela iloko o kona naau. A ninau oia iaia iho, heaha la ka'u i hana ai mamua nona i hoopakeleia oia i ka ona? Aole ka au i hana i kekahi mea nona. Ina make oia, pili ole anei ka hewa ia'u? Hoohiki oia e hele koke a imi iaia me ka makau ole ke hoinoia, a heneheneia no ia imi ana.
Ku au, wahi ana, a hele aku la, aole liuliu a halawai au me Kale Wela. Inoino kona maka. Makau au a emi hope. Aka, ua hoomanao au he uhane kona, a pouo ke hoao e hoola. Lalau au i kona lima, a olelo, E Kale, nui kuu manao ia oe, a me ka'u pule nou i keia kakahiaka Nana pono mai oia ia'u me ka haohao, aole nae oia i pane mai. E kokua mai ke Akua ia oe, e Kale, ke hoao oe e hoano hou i kou noho ana. E hoolohe mai oe i ka'u e hoomanao, ka wa hope paha keia e haawiia no kou mihi ana. Na ke Akua paha oe i hoouna mai nei, wahi a Kale.
Ina pela kou manao, e paulele oe i ke Akua, e ae i kana olelo, mai pale aku i ka Uhane Hemolele, e ae mai oe e haalele loa i ka inu rama.
Lalau mai la oia i kuu lima a puliki ikaika Ae, ke ae nei au, a, me ko ke Akua kokua ana mai ia'u, aole au e inu hou i ka Rama.
A pehea? Ua hooko anei o Kale Wela i kona hoohiki ana? Ae, ua hooko, ua haalele loa i ka rama, ua hoano houia kona noho ana, a e paapu ana paha kona lei o ka oli i na hoku ma kela ao.
Hiki, ea, ke hoola i ka mea ona. E huli ia lakou, e like me keia Lede, a e hoao e hoola. Mai waiho wale, o make lakou, a pili ke koko i ka poe aloha ole, a hoao ole e hoopakele. Ina haule ka bipi iloko o ka lua, pehea ka ona? A haule kou hoa iloko o ka rama, heaha ka pono?
HAWAII.
He kukini lani.
Ma 1 Kor. 9: 24-25. Ua ike kakou he hana kahiko i kapaia, he kukini. Aia ma Helene, a iwaena o ka poe Helene ia hana.
He hana lealea no, aole nae i pili i ka lealea wale no. He hana ia e ikaika ai na kino.
Ma ka wawae no ke kukini ana. Ua like me ia ka heihei wawae, a lio paha o kanaka Hawaii i keia wa. O ka mea i oi ka mama, oia ka lanakila, he lei lau kona, a lilo oia i mea hanohano loa.
O kekahi makua, Diagosa kona inoa, oia kekahi mea i ikaika loa i ke kukini ana, a lanakila pinepine. Ia ia i elemakule ai, ua aa no oia e kukini pu me kana mau keiki elua, me na kanaka e ae hoi. Lanakila na keiki. Hooho oli nae ka makua.
Ua hoolei ia na keiki i na lei elua imua o ka hooho oli nui ana o kanaka. Aka, lawe na keiki i ko laua mau lei elua, a kau ma ke poo o Diagosa ka makuakane elemakule. A lawe a kau laua iaia ma ko laua mau poohiwi, a kaikai iaia me ka hooho lanakila ma ke kahua kukini iwaena o ka mahalo nui ia e kanaka, no ka mea, mahalo na Helene i na elemakule poohina.
Olelo na kanaka, e make oe, ano, e Diagosa, aohe mea i koe epomaikai ai. A pela io no, na make koke no ia ma na lima o kana keiki hiapo, no ka nui loa o ka olioli.
Ma ka lei mae wale i kukini ai na Helene. HAia nae ka lei mae ole, ka lei hula, ka lei o ke ola, maluna, e hooikaika, e kukini e heihei mama i loaa, a loaa, a kau ma ke poo, e lawe a waiho ma ka wawae o Iesu, me ka oleo, "Nou wale no ka mahaloia, ka noonaniia a mau loa aku-
HAWAII.
KULA KAHUNAPULE -- I ka la mua o Okatoba e hoomaka ana ke Kula Kahu@pule ma Honolulu. He pono no i na haumana o keia kula e hoi nui mai ia manawa. Ina he mau haumana hou kekahi i makemake e komo i ke kula, e houluulu mai lakou ma ka hale kula i ka la 30 o Sepatemaba i ka hora 10. He nui na keena kahi e noho ai na haumana. E loaa i na haumana kahi hana lima ma ka kulanakauhale o Honolulu, i kumu e lako ke kino i ka wa e noho ana ma ke Kula.
Ka punawai auau o Beteseda.
Beteseda ka inoa Helene; ma ka olelo Hawaii, Hale o ke aloha ka inoa. He punawai ia e kokoke ana i ka luakini me Ierusalema. He wai kupanaha kona, he wai lapaau a hooia i ka poe mai o kela o keia ano; na makapo, na oopa, na lolo, a pela aku.
Ua laweia lakou mamua, a waihoia iloko o na hale malumalu. A o ka poe i kaikaiia, a hooauau ia i ka wa kupono, ola lakou.
Pomaikai ka poe mea makamaka aloha, a kokua i ke kaikai ana, i ka hooauau ana. Ka poe mea makamaka ole nae, aloha ino lakou, aole mea kokua i ka lawe a hooauau i ka wa kupono. Ola ole lakou no ka lohi, no ke kokua ole ia. Ma ka hoopili ana.
1 Nui ka poe mai e noho ana iwaena o kakou. He mau mai maoli kekahi, ho lolo, he oopa, he kaokao, he lepera, he makapo, he kuli. Aka: o na mai ma ka uhane ka nui. Paa na maka o ka uhane, aole ike i kahi e hele nei, e hele lalau ana ma ke ala palahalaha, me ka ike ole aku i ka lua ahi mamua; e haule makapo ana iloko o ke ahi. Aole ike i ke ala ololi, i ke ala maluna e loaa ana ke hele ilaila. He poe lolo, aole ku a hele i na halawai, i na kula Sabati, aole hele ma ka pono, ma ka pololei.
He poe kuli, aole lohe i ka leo e kahea ana, e ala, e holo; e komo iloko o ka hale lana o Iesu, u ola.
2 He mau hale malumalu no, he mau hale mai no, no na mai maoli; he mau luakini hoi no na mai uhane.
3 He punawai auau hoola no, ke koko o Iesu, ka olelo maikai e ola'i.
4 E ola, na makamaka, e kokua i ke kaikai, i ka hooauah aku, i ola na kono, me na uhane.
HAWAII.
E ao ia e ke kulu hau liilii.
He kakahiaka laelae, a hulali mai ka hau. Puka oli mai ka la, a kau kona mau kukuna maluna o na kula, na puu e uli mai ana. Aia maluna o kekahi lau, he wahi kulu hau liilii, he keiki no ka po.
Penei i olelo ai ka la ia ia. E wehe oe i kou naau, e ke kulu hau liilii, i komo ae ko'u mau kukuna, a hoomalamalama i ko loko ou.
A ninau ke kulu hau liilii, E ka la nui, heaha kau e haawi mai ai no'u, a e hana 'i no'u, ke ae au e komo oe iloko o kuu poli? Pane mai ka la, E haawi au i ko'u mau kukuna e hoomalamalama ia oe, a e olinolino mai oe me he apo gula, a hoku la; a mahope, e kii aku au ia oe, a lawe malie mai iluna nei me a'u e noho pu ai.
Ka ae no ia o ke kulu hau liilii, a ua hoomalamalama koke ia, a olinolino ia me he apo gula la, a nana a mahalo na kanaka i kona nani daimana. Aole nae lakou i kanikau nona, no ka mea, ua maopopo, aia no ia ma ke ao, ma kahi mehana.
Pela oukou, e na pokii, e wehe oukou i ka puka o ko oukou naau, a e komo no Iesu iloko. Aole paha i maemae ko oukou naau me ke kulu hau, aka, e komo no Iesu iloko, e hoomalamalama, e hoomaemae, a, mahope, e kii oia ia oukou, a lawe ae iluna i ka lani, kahi e alohilohi ai oukou me na hoku a mau loa aku.
HAWAII.
NA BUKE
I HOOLAHA IA E KA PAPA HAWAII!
ME KE
KUMUKUAI O KELA ME KEIA
BAIBALA HEMOLELE Nui Ili Gula Nani me na kuhikuhi ma na aoao............................. $12.00
Baibala Hemolele Nui ili eleele kaekae wai gula. 5 00
" " nuku iki iho, " " 8 00
" " Pananaiki iho ili eleele 4 00
Baibala Hemolele ili eleele ............................................................................ 2 00
Kauoha Hou ili hula nani me na kuhikuhi ............................................................................ 3 00
" " eleele kaekae wai gula 1 00
" " " ............................................................................... 75
Kauoha Hou Hapa Haole ............................................................................... 75
Lira Hawaii 1848 me ke kanawai ............................................................................... 25
" " 1855 ............................................................................... 25
Moolelo Ekalesia............................................................................................................................ 20
Haiao ili lahilahi............................................................................................................................. 50
Hele Malihini ana........................................................................................................................... 15
No ko ke Akua ano........................................................................................................................ 25
Lira Kamalii ............................................................................................................................... 25
Hoike Palapala Hemolele............................................................................................................... 25
Moolelo o Heneri Opukahaia......................................................................................................... 25
Hoike Akua ............................................................................................................................... 20
Wehewehehala............................................................................................................................... 20
Ninau Hoike ili manoanoa............................................................................................................. 25
" " " lahilahi..................................................................................................... 15
Kumumua Kula Sabati................................................................................................................... 15
Buke Lawe Lima ................................................................................................................... 15
He Buke no ka Pope ................................................................................................................... 10
Ui Kula Sabati Helu 3 ................................................................................................................... 20
" " " 4............................................................................................................... 05
" " " 5............................................................................................................... 20
Buke Euanelio a Ioane................................................................................................................... 15
Himeni Hawaii ................................................................................................................ 1 00
Himeni ili nani Hawaii................................................................................................................ 1 70
Kumu Leo Mele ................................................................................................................... 15
Kumu Leo Mele ili nani................................................................................................................. 50
NA KAUOHA HOU PAKEKE.
Ili Gula nani ................................................................................................................ 1 50
Ili eleele kaekae nani ................................................................................................................... 50
Ili eleele ................................................................................................................... 35
KAUOHA HOU PAKEKE ME NA HALELU
Ili Gula nani ................................................................................................................ 1 75
Ili eleele kaekae wai gula............................................................................................................... 60
Ili eleele ................................................................................................................... 50
Buke wehewehe Huaolelo Baibala, elua ano.
Buke Wehewehe ano Mataio.
NA HALELU PAKEKE.
Ili Gula nani ................................................................................................................... 50
Ili eleele kaekae wai hula............................................................................................................... 30
Ili eleele ................................................................................................................... 20
Ka Hae Hoonani (Buke Mahele)................................................................................................... 25
EIA NA BUKE HAAWAI WALE.
PALAPALA LIILII --
Helu 4 -- Makemake anei oe i ke ola?
Helu 6 -- E hele i o Kristo la.
Hele 7 -- Ka hoi ana mai o ke Keiki Uhauha.
Hele 11 -- No ka hoohiki wahahee i ke Akua.
Helu 16 -- Ka Eehia ana o ka Ahaaina a ka Haku a me ka Bapetizo ana.
Helu 17 -- Mai hana ino i na holoholona.
Helu 18 -- No ka mahi ana, kuai ana a me ka inu ana i ka Awa.
Ka Davida Malo Kumumanao.
Ka Moolelo o Batimea Puaaiki.
Aia ke keena kuai buke o ka Pepa Hawaii ma ka huina o Alanui Betela me Alanui Kalepa, e kokoke ana i ka Hale Leta.
J. F. POKUE
Kakauolelo o ka Papa Hooko o ka Ahahui Euanelio o ko Hawaii Pae Aina
KA NUPEPA "KUOKOA!"
Hoopuka mau ia
I KELA POANO KEIA POAONO.
$2.00 no na mahina Umikumumalua.
$1.00 " " " @
ME KA HOOKAA MUA MAI.