Ka Nupepa Kuokoa, Volume XII, Number 50, 13 December 1873 — Page 4
| This text was transcribed by: | Hiapo K. Perreira |
| This work is dedicated to: | Awaiaulu |
Ka Nupepa Kuokoa
KE KILOHANA POOKELA NO KA LAHUI HAWAII.
KA NUPEPA KUOKOA, ME KE AU OKOA I HUIIA.
KA NUPEPA KUOKOA
[No KA LA KARISIMAKA.]
The Royal Proclamation,
Golden Ghain p 40.
1.
E hoolohe, e na hoa,
I ka olelo o ke Ola ;
E, hoolaha i ka haina
Mai na kai a i na aina ;
Cho. Alii Iesu ! Alii Iesu ! Alii Iesu !
Alii Iesu a lanakila !
E hookani ae na lira !
Alii Iesu ! Alii Iesu ! Alii Iesu !
2.
Welo nani kona bana !
A ia ia la no ka mana
E kala ai i na lawehala ;
Lohe i ka leo kala,
Cho. Alii Iesu ! etc.
3.
Eia no na waiwai nani,
Wai hoola, mane lani ;
Kii mai no ka poe pololi,
Lawe me ke kuai ole.
Cho. Alii Iesu ! etc.
4.
E hooho oli ae la,
Ko na aina, ko na kai la,
O ko Iuda nei Liona,
Oia ke Lii o Ziona.
Cho. Alii Iesu ! etc.
5.
Oli wale, na haipule,
Ola nani ia Iesu la ;
Oli na puali lani,
Iesu Kristo, ke Lii nani.
Cho. Alii Iesu ! etc.
Hawaii.
The Sabbath School.
Fresh Laurels p. 68.
1.
Maikai ke Kula Sabati ;
||: E hele ae na kamalii :||
Malaila no na kumu e,
||: A @ i na ao maikai, :||
BOYS. ||: E hele au. ALL. E hele au--
I keia kula maikai e. :||
2.
Maikai ke Kula Sabati ;
||: Malaila no e lohe ai :||
Ua make Iesu no kakou,
||: I loaa mai ke ola mau :||
BOYS. ||: E hele au. ALL. E hele au--
I keia kula maikai e.:||
3.
Maikai ke Kula Sabati,
||:E hele ae, e na pokii, :||
Malaila no e mele ai,
||: A pule, imi, hoomaikai :||
BOYS. ||: E hele au. ALL. E hele au--
I keia kula maikai e. :||
4.
Maikai ke Kula Sabati,
||: Malaila e makaukau ai :||
E pii a hui pu kakou
||: Maluna ma ka lani no. :||
ALL. ||: Ka lani no, Ka lani no,
Ka lani no, a noho mau. :||
HAWAII.
HAAWINA KULA SABATI.
HELU 51, SABATI DEK., 21.
Kumuhana. Ke Ala Hou ana.
Pauku Baibala. Mataio 28: 1-8.
A noa ae la ka Sabati, a wehe ae la ke alaula o ka la mua o ka hebedoma, hele aku la o Maria no Magedala, a me kekahi Maria e nana i ka halekupapau.
2 Aia hoi, he olai nui : no ka mea, ua iho mai ka anela a ka Haku mai ka lani mai, a olokaa ae la i ka pohaku mai ka puka ae, a noho iho la iluna o ia mea.
3 Ua like kona helehelena me ka uila, a ua huali kona kapa e like me ka hau.
4 Haalulu iho la ka poe kiai i ka makau iaia, a ua like lakou me na kanaka make.
5 Olelo mai la ka anela i ua mau wahine la, Mai makau olua, no ka mea, ua ike au e imi ana olua ia Iesu i ka mea i kaulia ma ke kea.
6 Aole ia maanei, no ka mea, ua ala ae ia e like me kana olelo ana ; e haele mai olua e nana i kahi i waiho ai o ka Haku.
7 E haele koke olua e hai aku i kana poe haumana, ua ala ia mai ka make mai ; aia hoi, e hele aku ana ia mamua o oukou i Galilaia, malaila oukou e ike aku ai iaia. Eia hoi, ua hai aku no wau ia olua.
8 Hoi koke aku la laua i waho o ka halekupapapu me ka makau a me ka olioli nui, a holo aku la laua e hai aku i na haumana ana.
Pauku Alakai. Pauku 7. Hoopaa naau.
Pauku hui Lahui. 1 Korin. 15:20. E hoopaa naau.
Mele. Him. 110. Leo Zanesville, C. Sacra. p 94.
Pule i ala hou kakou a pau ma ka pono.
NA NINAU
Na Makua. Haalele kakou ia Iesu mahea? Ma ko Iesu kaulia'na ma ke kea, heaha ka olelo i hookoia ? Mat. 16:21. Ioane 3: 14. 8: 28. Nawai ia i lawe a kanu ? Mok. 27: 59, 60. Ioane 19: 38-41. Ka wanana hea k@ko ? Isaia 53: 9. Ma ka la hea i kanuia ai ? Ma ke ahiahi o ka Poaha ma ka manao o kekahi poe ; ma ke ahiahi o ka Poalima, ma ka manao o ka nui. Owai ka i ike i ke kanu ana ? Mok. 27:55. Ua ahaia ka luakupapau ? p. 66.
P. 1. Na Keikikane. Ua paa mau anei o Iesu iloko o ka lua? I ka wa hea ke ala hou ana ? Keia Sabati i noe ae la, ka la hea ia ia kakou ? Ko kakou Poaono anei ka Sabati o na Iudaio ? Ka la mua o ka hebedoma, ka la aha ia ? Ka Poakahi ia lakou, ka Sabati nae ia ia kakou. No ke aha ka hoololiia ana ? No ko Iesu ala hou ana ma ia la. Owai ka i hele e i ka luakupapau o Iesu ? I ka manawa hea ? Hele e ka na wahine ! Auhea o Petero ma? Hoololohi, ea? Pehea hoi oukou ? wikiwiki anei e hele e launa me Iesu ma na kakahiaka Sabati ? Hoololohi paha ? No ke aha ko Maria ma hele ana ? Mark. 16:1. Heaha na mea ala a oukou e lawe 'ku ai io Iesu la ? Ka pule, ka hoomaikai, ke Aloha.
P. 2, 3. Na Kaikamahine. Heaha ke kuhihewa o Maria ma ? Kuhi lakou, aia o Iesu iloko o ka lua. Heaha ka lakou i lohe ai ? Nohea keia olai? Heaha ka lakou i ike ai ? Ioane 20:1. Nawai i olokaa i ka pohaku? E noho ana ka anela mahea ? Aole anei lakou i makau ?. Hookahi wale no anei anela ? Luk. 24:4. Pehea ke ano o na anela ? p. 3.
Na Pokii. Make o Iesu mahea? kanu ia mahea? Ma ka mala. Nowai ia ana hou ? He kanaka o Iosepa ? He kanaka waiwai, he kanaka maikai, he haumana na Iesu, aloha nui hoi ia Iesu. Owai kona kokoolua i ke kanu ana ia Iesu ? Nikodemo. Paa ka puka o ke ana i ke aha ? I ka pohaku nui.
Mahea kahi i kanuia'i na kupuna, na makua paha o oukou ? Ua ike anei oukou i ke ana kupapau ? Ae-aole- He wahi aha ?
Ka la aha keia ? Ua like pu anei ko kakou Sabati me ko Iudaio ? Owai na wahine aloha nui ia Iesu, a hele kakahiaka nui e ike, a e ialoa i ko Iesu kupapau ? Elua Maria. Ua loaa anei ke kupapau ? U'ahaia ka pohaku nui ? He mea aha ka anela ? Makemake anei oukou e ike i na anela ? He mau anela no anei maanei ? Ina make na @ kii a kaikai i na uhane i ka lani ? Nawai i kii i ka uhane o Lazaro ? Luka 16:22.
P. 4. Na Makua. Pehea na kiai ? Nohea na kiai ? E kiai ana i ke aha ? Hiki anei ia lakou ke pale aku i na anela i hiki ole ia lakou ke olokaa aku i ka pohaku nui? Ua like na kiai me ke aha ? No ke aha ? He anela ikaika ma Hoikeana 18: 21., he aha kana i hana ai ?
P. 5 Na Keikikane. Owai ua mau wahine la ? Heaha ka ka anela ia laua ? Heaha ka laua e imi ana wahi a ka anela ? E imi ana ia Iesu mahea ? Ke imi nui nei anei oukou ia Iesu ? Mahea e loaa ai ? Aia anei iloko o ka lua ? Ma ke ano hea e imi ai ? No ke aha hoi ? No ka makemake anei e ike a e ola iaia ? E huli oukou iaia, a loaa, e malama.
P. 6. Na Kaikamahine. Heaha ka ka anela i hoole ai ? Ua aha o Iesu ? Ua ike maka anei laua aole o Iesu iloko o ka lua ? Luka 24: 3. Ioane 20: 2. Ua ike maka anei laua ua waihoia ko Iesu kino iloko o ke ana ? Ae. Mat. 27: 61. Ua ike anei laua ia Iesu mahope o kona ala hou ana ? Mok. 28: 9. Ua olelo e anei o Iesu mamua, e ala hou ana oia ? Mat. 20: 19. 26: 32.
Na Pokii. Ua paa anei o Iesu iloko o ka lua i kela pohaku nui ? Hemo ka pohaku ia wai ? A, ua aha o Iesu ? Ua ala hou. Make oia a kanuia ma kona ano aha ? Ano kanaka. A ala hou ma kona ano aha ? Ano Akua paha. Make oia no ke aha ? A, ala hou oia no ke aha ? Ua make anei kekahi poe mamua a ala hou mai ? Ae, ua make kekahi kaikamahine, me kekahi kanaka ui, me Lazaro hoi. A, nawai i hoala hou mai ? A make oukou, hiki anei ia Iesu ke hoala hou mai ? Mahea oukou e ola hou ai ? Ma ka honua, ma ka lewa, ma ka lani, ma ka po, mahea?
P. 7, 8. Oukou a pau. Heaha ke kauoha a ka anela i na wahine ? Pehea hoi laua ? Me ke aha i hoi ai ? Makau i ke aha ? Olioli i ke aha ? Ia wai laua i hai aku ai i ko Iesu ala hou ana ? Owai na haumana ?
Pehea ka loihi o ko Iesu moe ana iloko o ka lua ? Wehewehe mal ia mau la ekolu, me na po ekolu. Ua hai e mai anei oia i ka loihi ? Mahea ? Ua ike anei kona kino i ka palaho ? Halelu 16: 10 Akaka anei he wanana ia no Iesu ? Oiha. 2:27-31, 13: 35-37. Heaha ka manao o ka poe kahiko o Hawaii nei no ke ala hou ana ? Pohihihi ea. A pehea ? ua akaka anei i ka poe kahiko i kakauia ma ka Baibala, he ala hou ana no ? Ae, ua ike maka ia kekahi poe i hoalaia e Elia me Elisai. A pehea i ka wa ia Iesu ? Ua hoala hou anei o Iesu i kekahi poe ? Nui anei na hoike maka no ia ala hou ana ? Pehea ko Iesu ala hou ana mai ? Nui anei na ike maka ? Mahea ke kakau ana ? Mat. 28: Mar. 16: Luka 23: Ioane 20: 1 Korineko 15: 3-8. Nui wale na hoike maka.
Aole anei hoole kekahi poe, aole he ala ana ? Ae, pela na Sadukaio, a pela hoi kekahi poe e ae ; 1 Kor. 15: 12 A pehea, ina aohe ala hou ana ? 1 Kor@ 14, 17.
Make ia Adamu, ola ia wai @
Ko Iesu ala ana mai ka m@ai, he hoailona ia o ke aha ? No ke @ou ana o na make a pau. 1 Kor. 15: 51@4.
Pau loa anei kanaka i ke ola @o Iesu ala hou ana ? Aole, o ka pee ma @ io wale no. Heaha ka hoailona nui @au nei no ka oiaio o ko Iesu ala hou an@ai ?
Ma ka hoopili ana: Heluhelu @ Roma 6: 3-5.
Hai paanaau i ka pauku Alak@ me ka pauku hui Lhhui.
MELE. Him. Leo-Muhul, C. Sa@ p 206
PULE i ala mai mai ka ma@ a i ke ola.
H @ AII.
Ka poe aloha o ka Euan @ o.
"Pomaikai ka poe i aloha aku, no ka mea, e alohaia mai lakou." Mat. @ 7.
I ka wa e hana'i oe i ka ahaaina e kii aku oe i ka poe ilihune, i ka poe m @ muku, i ka poe oopa, a me ka poe makapo @ Luka 14: 13.
"Ou hoi olua, e hai aku ia Ioan @ - ua ike na makapo, ua hele na oopa, ua @ uikala ia na lepera, na lohe, na kuli, ua @ alaia na make, a ua hai ia 'ku ka euaneli @ i ka poe ilihune." Mat. 11: 4, 5.
"A i makemake oe e hemolele, ea @ e hele ae, a kuai lilo aku i kau waiwai @ pau, a e haawi aku na ka poe ilihune. M@taio 19: 21.
"O ka mea hana me ke aloha ole a @ u, e hoahewaia auanei oia me ke aloha @ leia mai." Iakobo 2;13.
Ma keia mau pauku, ua akaka ke ano aloha o ka euanelio. Ke aloha no ke kumu o ko Iesu hele ana mai i keia ao e ku @ ulu i ka euanelio, a me ona mau lala a pau.
Ua waiwai loa oia mamua, aka, ua lilo oia i mea ilihune i mea e waiwai ai kakou.
He poe aloha no na haumana a Iesu, he poe hoohalike me ia. I ka hoi ana '@u o Iesu i ka lani, a haule mai ka uhane maluna o na haumana, ka hoomaka ana no ia o ka oihana aloha kokua manawalea. Kuai lakou i ko lakou waiwai, a hui ia i hookahi puu, i mahele like ia ka waiwai iwaena o lakou, i ole e waiwai kekahi, a ilihune a nele kekahi. Ua kohoia hoi na diakona, lakou na puuku, a na lakou e puunaue aku i ka waiwai manawalea i ka poe ilihune. A i ka lohe ana, ua wi a loihi Iudea me Ieru @ pilikia na haumana malaila, ala mai ke aloha o ka poe @ tioka, a imi i puu manawalea, a laweia 'ku ilaila i ole e pilikia ia poe no ka wi.
Mailaila mai no a hiki ia nei na hana manawalea no ka poe pilikia o kela ano, o keia ano, o kela, me keia lahui.
E hoolohe, a e hai aku au ia oukou i ke aloha o kekahi poe ma Nu Ioka.
Mamua aku nei, he mau makahiki paha he 10, elua kanaka ma Nu Ioka, he kanaka waiwai, a he kauka kekahi, hui laua a kuka, a hooholo e kukulu i hale lapaau no ka poe ai, ka poe mumuku, ka poe lolo, wawae kekee, pehu, opu ohao, kaokao, puha, makapo &c. Ua paa ka hale.
A ua lapaauia 21 800. He hale nui i keia wa ; ua lilo nona $250.000. He hana manawale akeia. Eha hapa lima o ka poe i lapaauia kai hoolaia, a hoihoi ia 'ku i na makamaka, i na hoahanau, a loaa na hana kino ia lakou. Uuku ka poe i make.
Ina ma Kina keia poe mumuku, lolo, oopa, &c., ina ua hooleia 'ku iloko o ke kei i make, a pau na pilikia o ke kino. Ka hana ia a ka poe hoomana kii. Pela hoi na Mahomeda, aole lakou malama i ka poe mai me keia - Ua waiho wale ia lakou, a pilikia, a make me ke aloha ole ia mai. Na aina euanelio ke aloha aku.
Ma Enelani, kela aina Karistiano, waiwai, naauao, ua imiia a loaa 100.000 o ka poe pilikia, mumuku, lolo, kua-hai, wawae hai, he mau keiki ka nui a na makua ona, a haalele wale ia lakou. Ua ala no ke aloha o ka poe aloha, ua kokua ia keia poe, a e pomaikai ana paha lakou.
Ua ikeia ke ano o keia lahui mamua o ka puka ana mai o na misionari, a me ka poe aloha euanelio. Aole i malamaia ka poe mai, ka poe lolo, a mumuku, a oopa, a makapo ; ua waiho waleia na keiki makua ole, a pilikia, ua pepehiia kekahi poe, ua kanu olaia kekahi poe.
Eia no ma kahi kokoe mai la, he wahine i kanu olaia i kona wa uuku, a na kekahi mea aloha i kii a huki mai, a hoola-ia ia.
I keia manawa malamalama, ua hoala ia na hale mai, ua hookaawale ia kekahi aina no ka poe mai lepera, ua malama ponoia lakou. Ua lapaau wale ia ka poe mai. Ua haawi waleia 'ku ka laau lapaau i ka poe mai. A ke kaapuni mau la na kauka, e ike i ka poe mai, e lapaau ia lakou.
Pela na kula. Ua kukuluia na kula no na keiki a pau, na kula aupuni, kula hanai, kula ohana, kula Sabati. Ua aoia na haumana me kahi uku haahaa, a me ka uku ole ia o kekahi. Aole uku ia ke ao ana iloko o na kula Sabati.
He mau ahahui humuhumu kokua i ka poe ilihune. He mau aha kinai rama, a kinai ahi.
He mau aha Euanelio no ke kokua, a no ka hoolaha na ai ka Baibala, a kokua i na misionari ma na aina e.
Ka hana mau ia a ka poe aloha euanelio, ka poe aloha Karistiano.
Ua komo no kekahi poe iloko o keia mau aha kokua aloha. Ua nui no hoi ia poe. A ke mau nei ke kokua ana. Aka, he hana hoopii keia ; aloha hoomau makahi hookahi, ma ka hapaha hookahi.
E hoopii ae mai ka hapaha a i ka hapalua, i ke dala, a oi aku ke hiki. Aia a nui ke kokua, nui ka uku ma ka lani.
He mea weliweli nae keia, o ke kokua hapa, me ke kokua ole, e like me kekahi poe kanaka Hawaii, kekahi poe hoahanau e hana ana me ke aloha ole. E hoomanao lakou i ka pauku Iakobo 2:13 "O ka poe hana me ke aloha ole aku, e hoahewa ia lakou me ke aloha oleia mai."
HAWAII.
Na olelo wehewehe no na Oihana a na Lunaolelo.
MOKUNA XIII.
P. 33. "Oia ka ke Akua i hooko mai nei i ka lakou mau manao, ia makou." Ua haawi ia mai na olelo hoomaikai i na wa kahiko i na kupuna o lakou, a he ake nui ko lakou e ike i ka hooko ia ana. Mataio 13:17, aka, i ka hiki ana mai o ka manawa maopopo, ua hooko mai ke Akua i kana olelo hoopomaikai. Galatia 4:4, 5
"I kona hoala ana mai ia Iesu," mai ka make mai. Pela ka ike a Alford, Hackett, a me na mea e ae i ike i ka wehewehe Baibala. O ka manao hoi a kekahi poe e ae i kaulana like no i ka wehewehe Baibala, elaa o Alexander, Gerok ma, ma ka buke a Lange, a me Kalavina, ke manao nei lakou i pili kēia i ko Kristo hele ana mai i keia ao. Mokuna 2:30, a me 3:22, 26. a me 7:37. E like me ka mea i palapala ia ma ka Halelu elua, p. 7, O oe no ka'u keiki, i keia la wau i hoohanau ai ia oe. I keia la ua lawe mai au ia e iloko ao ke ao nei; ua hoala mai au ia oe e like me ka olelo hoopomaikai a ke Akua. Kanawailua 18:15, 18.
P. 34 me 35. Maanei ke hoike mai nei oia no kekahi hoala hou ana, oia ka hoala ana mai ka make mai. O kona hele ana i ke ao nei, oia ka hooko ana i ka mea i palapala ia ma. Halelu 2:7; a o kona ala ana mai ka make mai, oia ka hooko ana i ka mea i wanana ia ma Isaia 55:3, a me 2 Samuela 7:12-16. I ka wa e make ai kanaka, e hoi ana ke kino i ka palahoa, Kinohi 3:19. Aka, o ka mea nona ke aupuni mua loa. Daniela 7:14, aole oia i ike i ka palaho. Ua hoala ia o Lazaro, a me ke kieki a ka wahine kanemake no Naine, a me kekahi poe e ae mai ka make mai, aole @ no lakou, a hoi ko lakou mau kino i ka lehu; aka, o ka Haku Ieu, ua hoala ia oia mai ka make mai ma ke ano aole e make hou. "Ua i mai no hoi ia (Ke Akua) ma kahi e ae. (Halelu 16:10.) Aole oe e haawi aku i kau mea hoano e ike i ka palaho." Ua lawe mai no hoi o Petero i keia olelo hookahi ma ka Mokuna 2:27.
P. 36 me 37. "O Davida, hookauwa aku la ia na kona hanauna, ma ka manao o ke Akua," ma ka makemake o ke Akua, oia paha ke ano o keia olelo. Ua mahele ia mai e kekahi poe i akamai i ka wehewehe olelo penei. "O Davida mahope o ka hookauwa ana no ka makemake o ke Akua iwaena o kona hanauna. Ma ko Davida hookauwa ana no kona hanauna, ua hookauwa oia no ke Akua. Ua hookauwa oia a pau kona ola, a ua hai ia mai o kona make, he hiamoe ana ia. Ina he makemake ko kakou e hookauwa no ko kakou hanauna, a e hooko i ka makemake o ke Akua, he pono e hana kakou me ke ikaika ; no ka mea, e hiki mai ana ka po, aole kekahi kanaka e hana ilaila. Ioane 9:4. "A hui puia iho la me kona poe kupuna, a ike i ka palaho." Pela kakou i heluhelu ai, ua hui pu ia o Aberahama me kona poe. Kinohi 25:8, pela Isaaka, a me Iakoba, a me na mea e ae he nui. Aole keia e hoike ana ua kanu puia lakou ma ka ilina hookahi. E pili ana keia olelo no ka uhane. A eia ke ano, ua hoohui pu ia me na uhane i hele mua, ma kahi i hookaawale ia no na uhane i hele mailoko aku o na kino. Pela o Iakoba i olelo ai e iho aku au i kuu keiki i Sheol, ka po, me ke kaniuhu. Kinohi 37:35
"Ike i ka palaho." Ua helelei kona kino, ua hoi i ka lehu e like me ia mamua. Kinohi 3:19. "O ka mea a ke Akua i hoala mai ai, aole ia i ike i ka palaho." Aole i ike ke kino o ka Haku Iesu i ka palaho. Mahopo o kona hoala ia ana, he ano uhane kona a he ano ola mau loa. I Korineto 15:44.
P. 38. Mahope iho o kona hoomaopopo ana, o Iesu, ka mea a na kanaka ma Ierusalema i pepehi ai ma ke kea, oia io no ka Mesia i wanana ia e Davida me Isaia, hoopili aku la oia i ka olelo i na kanaka, a hai aku la oia, ua haawi ia mai ke kala ana o na hala ma o ia Iesu hookahi la no. O ka poe enemi ana no i ke Akua ma ko lakou mau hana hewa, he mea hiki ke hoolaulea ia lakou me ke Akua. Kolosa 1:21; no ka mea, ua hookaawale ia na kumu keakea a pau e hiki ole ai i ke kanaka ke launa aku me ke Akua, koe wale no kona hoomaloka.
P. 39. "Ka poe manaoio a pau," —ina paha he Iudaio, a ina o ko na aina e, o lakou a pau— "Ma o na la," ma o ka Haku Iesu la.— "Ua hoaponoia," ua kala ia na hewa a pau. "Na mea aole e hiki ma ke kanawai o Mose" Aole e hiki ke apono ia kekahi ma ke kanawai. Galatia 3:11. O kela mea keia mea i manaoio, ua hoapono ia oia, a ua hoola ia mai na hewa e ka Haku Iesu. Ke kamailio iki nei o Paulo maanei no ka hoaponoia ma ka manaoio iloko o Kristo. Aka, ma kana mau episetole ua hoike nui mai oia i kela mea.
P. 40. "Nolaila, e malama pono oukou, o hiki mai auanei maluna o oukou ka mea i oleloia mai ai e na kaula." He olelo eehia loa keia e papa ana ia lakou i ka hoomaloka. Hebera 2:3.
P. 41. "E ka poe hoowahawaha, e nana mai oukou, e pilihua hoi, a e hoomawale" Ua laweia mai keia mai Habakuka 1:5, i unuhiia a iloko o ka olelo Helene. Oia ka mea e waiho ana i ka lima o na lunaolelo ia wa, a ua lawe pinepine mai lakou i na olelo mai loko mai oia, oiai aole i like loa me ka olelo Hebera. Maanei ua palapalaia, "ka poe hoowahawaha," aole hoi e like me ko Habakuka, "iwaena o na lahuikanaka," pela ka Hebara. Ua manaoia, o ke kumu o keia like ole, no ka like ole o ka heluhelu ana o na hua kakaulima me na palapala Hebera, ka mea i unuhiia a iloko o ka olelo Helene. Pela hoi kakou e ike nei i ka olelo "hoomawale," aole hoi e like me ka mea ma Habakuka, "a e kahaha nui ka naau." No ia kumu hookahi no paha keia, oia hoi ka like ole o ka heluehlu ana i kekahi huaolelo Hebera. O ka hana a ke Akua i hoike ai ma o Habakuka la, ana e hana ai i ka poe Iudaio ; oia ka lawe ana mai i ka poe Kaledea e luku ia Ierusalema, a e lawe pio ia lakou. Aole i manao ka poe Iudaio he oiaio keia; aka, ua wanana na kaula pela. Aka, ua hiki mai no kela poino, a ua ike maka no lakou. A ke ao nei o Paulo ia lakou, aohe make hoomahui i kela poe o lakou, o poino auanei, e like me ko lakou poino ana. He pono e ao pololei aku na kahunapule i kanaka, e papa ana i ka hoomaloka, a me ka hoopaakiki, e like me ka Iesu ao ana ; "I mihi ole oukou, pela e pau ai oukou i ka make." Luka 13: 3 me 5.
( Aole i pau. )
Hookolokolo ano e!
He wahi kamana Tureke ma Constantinople, i kana hana ana maluna o ka hale, pahee kona mau wawae, a haule aku la ia maluna o kekahi kanaka ma ke alanui, a make aku la ua kanaka la. Aka, aole i eha nui ke kamana. Ua kaumaha loa ke keiki kane a ka mea i make ; nolaila, ua hoopii oia, a ua hopuia ke kamana.
I ka hookolokolo ana iaia, ninau mai ka Lunakanawai i kona manao ? I aku la oia, "He oiaio no, e ka Lunakanawai, ua haule no au @ make no oia ; aka, ua ike no ke Akua, aole he ino iloko o ko'u naau. He kanaka ilihune no au, aole paha hiki ke kokua pono aku iaia."
Alaila ikaika ka manao o ua keiki nei, e hoopai nui ia ke kamana. Noonoo iki ka Lunakanawai, a olelo aku la ; "pela io no."
Alaila olelo oia i ke kamana, "E ku oe ma ke alanui, kahi i ku ai ka makuakane o keia kanaka opio i ka wa i haule ai oe ma luna ona."
Alaila olelo oia i ka mea hoopii, "Ina makemake oe, e pii oe iluna o ka hale, a e haule oe maluna iho o keia kamana, e like me kona haule ana maluna o kou makuakane. Mahaloia ka Lunakanawai.
E ka Nupepa Kuokoa. Aloha oe:—
Ke noi pinepine mai nei ia'u na makamaka ili ulaula me ke keokeo no hoi, e hoike aku i na mea ano nui e pili ana i ke Kula Hanai kaikamahine no ka mokupuni o Hawaii, a makou e lawelawe nei.
Nolaila ea, ma ou la wau e kauleo nui aku nei i na mea a pau ; i lohe lakou a hoomaopopo no hoi i na mea ku i ka lakou e ninau mai la.
1. Iloko o ka makahiki i hala aku nei, kukakuka na Aha Euauelio ekolu o keia mokupuni, a hooholo me ka manao lokahi e kukulu i kula hanai kaikamahine no ka mokupuni o Hawaii nei. Ma ka apana o Kohala Akau, Owau hoi kai kauohaia mai ai e hooko i ka hooholo a na Aha Euanelio. $3000 ka waiwai ku paha, i ka hoomaka ana i ua kula nei, ma ka noonoo wale o na Aha. A penei ka haawiana. No ka Aha o Hawaii Hikina, $1000 ; no ka Aha o Hawaii Akau $1000 ; a no ka Aha o Hawaii Komohana $1000. Aole nae i akaka ka ae o ka Aha Komohana i kana. He hapa lua o ia Haawina kana i ae mai ai, no ka ilihune o kolaila mau ekalesia. O kekahi $1000 o ka huina pau o ua mau $3000 nei i olelo ia'i, ua ohiia, a aia no iloko o ka Banako ; Oiai ke kali iki nei makou i mahuahua kahi mea e uku aku ai i ka aie e kau mai la maluna o makou. No ka mea.
2. Ua pau i ka loaa na papa a me na lako a pau no ka hale kula, a eia no, ke waiho mai nei ma ke kahua, ma Iole. A ua holo hoi ka olelo ae like me ke kamana nana ka hale e kukulu.
A o ka hoomaka iloko o keia mau la, oia ka mea i koe. He 50 kapuai ka loa o ka hale. 40 kapuai ka laula a pau. Elua me ka hapa o na hale ke kiekie, a maluna loa he mau aniani moe, ewalu.
He 25 paha na haumana kupono i ka hoomaka ana i ke kula, a ma ka lua o ka makahiki, e aeia aku ana i na haumana he 50.
—He $25 ka uku makahiki i manaoia'i no ka haumana hookahi.
A, ma ka hebedoma mua o Iulai 1874 e weheia ai ke kula, malalo iho o ke kumu kaulana, o Miss. E. W. Lyons, me kekahi mau kumu kokua e aku, ke ai mai ke Akua.
He poe ilihune nae makou, a nolaila ina he manao ko kekahi mau makamaka lako e kokua ia makou, oiai e nauwe aku nei ma keia ala a puupuu, aole no e hooleia ka lakou la. A, malama paha, na ka mea hiaa mau e hoomanao a e hoihoi aku ia wahi hana aloha iloko o ka lakou la poli ma neia mua aku. Me ke aloha no.
BONA.
Ka Aha humuhumu wahine ma Hilo
Ma keia mau makahiki i hala aku la a hiki ia nei, he Aha humuhumu manawalea ma Hilo.
Ha aha wahine ia. Huipu na wahine, a humuhumu a paa na lole. O kekahi humuhumu ana no ka poe pilikia no malaila Aka, o ka nui o ka humuhumu ana, no na wahi e ae no, no na kula hanai kaikamahine, a no na aina e.
Aia paa na lole, alaila kuai aku lakou ia mau lole i ka poe makemake, a o ke dala i loaa mai, oia ke hooili ia'ku i mea e pono ai ka poe pilikia. Noloko mai o keia puu dala i loaa'i kekahi mau haneri dala no ke kula kaikamahine hou e kukuluia ana ma Iole, Kohala Akau.
E ala na wahi e ae ma ka mokupuni Hawaii, e kukulu na wahine, a kaikamahine, i mau aha humuhumu manawalea, i mea kokua i keia kula hou. Aia ke ahu la na papa, na pili, na puka, na mea a pau e paa ai ka hele kula. Ua loaa hoi ke kamana nana e hana. Ua loaa hoi he puu dala, aole nae i lawa.
E ala na ekalesia o Hawaii, na kula Sabati, na aha wahine, e kokua i keia hana maikai loa i paa ka hale, a hoopihaia i na kaikamahine maikai, a holo pono ke kula Hanai kaikamahine o Hawaii.
HAWAII.
Papa Hoike no ka Hebedoma Haipule, Ianuari, 1874.
Sabati, Ianuari 4—NA HAIAO : Ke ano hookahi o ka ekalesia Kristiano, a me ka poe manaoio a pau. Na kumu e kono nei i ka poe manaoio e lokahi, a me na mea keakea ia lokahi ana. Ioane XVII: 21, 22, 23.
Poakahi, Ianuari 5—HOOMAIKAI ANA I KE AKUA : No na pomaikai lahui a e na pomaikai pili kino, o ko ka uhane me ko ke kino. Hai ana i ka hewa : Ka hewa o ka lahuikanaka me ko kakou mau hewa ponoi. Daniela IX:7.
Poalua, Ianuari 6—PULE : No ka ekalesia Kristiano, i hoomahuahuaia ka manaoio, ka hemolele, ke aloha, me ka mana ; a i ninini nui ia mai ka Uhane Hemolele. Kolosa I : 9, 10, 11.
Poakolu, Ianuari 7—PULE NO NA OHANA. Na home a me na Makua. Na Kula. Na keiki e noho kaawale ana me na makua. Na keiki mai a pilikia. Ka poe hoolohe ole. Halelu CXV : 12, 13, 14.
Poaha, Ianuari 8—PULE : No na lahui kanaka ; i malu mawaena o kanaka, i maeake a i pono na lahuikanaka ; i hoopauia ka ona, ka hoopunipuni, ka hoomanakii, me na mea oiaio ole a pau ; i laha nui na palapala Kristiano. Isaia LX : 17, 18.
Poalima, Ianuari 9—PULE: I lanakila ka Euanelio ma na aina o Europa ; i hoohuli ia ko Iseraela i ka pono ; i laha ka Euanelio ma na aina Mahomeda a me na aina pegana, no ka poe Kristiano i hoomaau ia. Halelu IXVIII:31; CXXI : 6 ; Habera XIII : 3
Poaono, Ianuari 10—PULE: No na hana o ka makahiki 1873. E ike i na hana o ke Akua. Ka hope maikai o na hana a ke Akua. Isaia XXVI : 8, 9.
Sabati, Ianuari 11—NA HAIAO : Ke aupuni o Kristo, no na mea a pau ia, a he mau loa. Halelu XCVII : 1, 2.
NA BUKE I HOOLAHAIA E KA PAPA HAWAII
ME KE
KUMUKUAI O KELA ME KEIA
BAIBALA HEMOLELE NUI ILI GULA NANI me na kuhikuhi ma na aoao $12 00
Baibala Hemolele Nui ili eleele kaekae wai gula 5 00
Baibala Hemolele uuku iki iho kae wai gula 3 00
Baibala Hemolele pananaiki iho ili eleele 4 0 0
Baibala Hemolele ili eleele......................................................................................................... 2 00
Kauoha Hou ili gula nani me na kuhikuhi.............................................................................. 3 00
Kauoha Hou ili eleele kaekae wai gula................................................................................... 1 00
Kauoha Hou ili eleele.................................................................................................................... 75
Kauoha Hou Hapa Haole.............................................................................................................. 75
Lira Hawaii 1848 me ke kanawai.............................................................................................. 25
Lira Hawaii 1855............................................................................................................................. 25
Moolelo Ekalesia............................................................................................................................. 50
Haiao ili lahilahi.............................................................................................................................. 10
Hele Malihini ana............................................................................................................................ 25
No ko ke Akua ano.......................................................................................................................... 25
Lira Kamalii...................................................................................................................................... 25
Hoike Palapala Hemolele............................................................................................................. 25
Moolelo o Heneri Opukahaia...................................................................................................... 25
Hoike Akua........................................................................................................................................ 20
Wehewehehala................................................................................................................................ 20
Ninau Hoike ili manoanoa........................................................................................................... 25
Ninau Hoike ili lahilahi................................................................................................................. 15
Kumumua Kula Sabati................................................................................................................... 15
Buke Lawe Lima.............................................................................................................................. 15
He Buke no ka Pope....................................................................................................................... 10
Ui Kula Sabati Helu 3..................................................................................................................... 20
Ui Kula Sabati Helu 4..................................................................................................................... 05
Ui Kula Sabati Helu 5..................................................................................................................... 20
Buke Euanelio a Ioane................................................................................................................... 15
Himeni Hawaii.............................................................................................................................. 1 00
Himeni Hawaii ili nani............................................................................................................... 1 70
Kumu Leo Mele................................................................................................................................ 15
Kumu Leo Mele ili nani................................................................................................................. 30
NA KAUOHA HOU PAKEKE.
Ili gula nani.................................................................................................................................... 1 30
Ili eleele kaekae nani..................................................................................................................... 50
Ili eleele.............................................................................................................................................. 35
KAUOHA HOU PAKEKE ME NA HALELU.
Ili gula nani.................................................................................................................................... 1 75
Ili eleele kaekae wai gula............................................................................................................. 60
Ili eleele.............................................................................................................................................. 50
Buke Wehewehe Huaolelo Baibala, elua ano...
Buke Wehewehe Ano Mataio.................................
NA HALELU PAKEKE.
Ili Gula nani....................................................................................................................................... 50
Ili eleele kaekae wai gula............................................................................................................. 30
Ili eleele.............................................................................................................................................. 20
Ka Hae Hoonani (Buke Mele)...................................................................................................... 25
EIA NA BUKE HAAWi WALE.
PALAPALA LIILII—
Helu 4—Makemake anei oe i ke o'a ?
Helu 6—E hele i o Kristo la.
Helu 7—Ka hoi ana mai o ke Keiki Uhauha.
Helu 11—No ka hoohiki wahahee i ke Akua.
Helu 16—Ka Eehia ana o ka Ahaaina a ka Haku a me ka Bapetizo ana.
Helu 17—Mai hana ino i na holoholona.
Helu 18—No ka mahi ana, kuai ana a me ka inu ana i ka Awa.
Ka Davida Malo Kumumanao.
Ka Moolelo o Batimea Puaaiki.
Aia ke keena kuai buke o ka Papa Hawaii ma ka huina o Alanui Betela me Alanui Kalepa, e kokoke ana i ka Hale Leta. J. F. POKUE.
Kakauleta o ka Papa Hooko o ka Ahahui Euanelio o ko Hawaii Pae Aina.