Ka Nupepa Kuokoa, Volume XII, Number 51, 20 December 1873 — Page 4
| This text was transcribed by: | M. Ka?iulani Carvalho |
| This work is dedicated to: | Awaiaulu |
Ka Nupepa Kuokoa
KE KILOHANA POOKELA NO KA LAHUI HAWAII.
KA NUPEPA KUOKOA, ME KE AO OKOA I HUIIA.
Ka Nupepa Kuokoa
Jesus Ever Near.
Oriola p. 105.
1.
He keiki makalii no au,
Aloha nae Iesu ;
Ke ku nei ia ma kuu aoao,
A launa oluolu pu.
Aole au i ike ae
Ka leo paipai ou.
2.
He mea nae iloko o ’ u,
A nana i hai mai,
Eia no oe, kokoke no,
A pa kou lima e
Maluna o ke kino o ’ u,
A paa a malu e;
A mai ke ao a po ae no,
O oe kuu Alakai.
3.
A kulou au e pule ae,
O oe pu me au,
A hele au, a hoi mai,
O oe kuu kiai mau,
A moe au, o oe pu,
A moe maikai no,
A nau e wehe i ke ao,
A ala hou no au.
HAWAII.
A home beyond the Tide.
Oriola, p. 98.
OR The Land of Promise.
Golden Censer, p. 98.
1.
Eia makou e holo ana
Ma ke kai kupikio,
I ka home ao maluna,
Holo, holo, holo mau.
Cho. Ane pau koonei mau ino,
A pae ma ke ao malino.
||: Holo, holo, holo oli
I ka home ao ma o. :||
2.
Ua pae aku no na kini
Ma ia home ao ma o;
Koe nae he wa akea
No na lehulehu hou.
Cho. Ane pau koonei mau ino, etc.
3.
Ee a holo i ka nani;
Wiki, mai lolohi e,
Holo i ka home lani,
Wiki e o haule ae.
Cho Ane pau koonei mai ino, etc.
4.
Aia ilaia no na hoa,
Hoaaloha me Iesu;
Ee a holo pu kakou la,
I pae ae a mele pu.
Cho. Ane pau koonei mau ino, etc.
5.
Kau na pea, pa na ahe,
Holo nahe, mai makau.
Mele oli na ohua
A pae ma ia home ao.
Cho. Ane pau koonei mau ino, etc.
HAWAII.
HAAWINA KULA SABATI.
HELU 52, SABATI DEK., 28.
Kumuhana. Ka Hoi-hope ana.
Pauku Baibala. MATAIO 13:-28:
He Olelo Hoakaka Mua.
[Aole e loihi ana keia haawina, no ka mea, e pai pu ia ana ka Helu 1 o na Haawina Kula Sabati no ka makahiki 1874. Eia ke kumu : I loa a na haawina i na kula Sabati e noho ana ma na wahi loihi, me Hilo, Kau, Kauai. Nolaila e pai e ia’na na haawina i elua pule mamua o ka manawa kula.]
MELE- Hae Hoonani, 1. Kahuhipa Maikai.
PULE hoomaikai i ke Akua no ka haawina ana mai i na hapaha eha o ka makahiki 1873.
NA NINAU.
Na Mahua. Hai mai ke ano o ke kanaka luluhua. 13: 3-8. Hai mai i ke ano. 18-23.
Na Keikikikane. Ehia papa o ka poe lohe i ka ke Akua olelo? Papa 1,2,3,4, hai pakahi mai. No ka papa ehia oukou?
Na Kaikamahine. No ka papa ehia ka waiwai ? Ina he poe lohe wale no oukou, aole malama, waiwai anei oukou ? Hai paanaau ia Iakoba 1: 22. Ekolu papa waiwai ole, owai, owai, no ia mau papa anei oukou? Ina pela, e haalele a komo i ka papa waiwai.
Na Pokii. Ehia pepeiao o ke keiki? no ke aha ka papalua ana? I mahuahua ka lohe. Ina mahuahua ka lohe, a emi ka malama, pomaikai anei oukou? Pomaikai anei oe ke piha kou pakeke i na hapawalu a helelei wale lakou no kou malama ole? Pomaikai anei oe ke nui wale na hua ono ia oe, a pau lakou i ke kikoia e na moa no kou malama ole? Pela, aole oe e pomaikai, ke malama ole oe i na huaolelo au e lohe nei.
MELE. Mai papauaho oe. Hae Hoonani 2.
Na Makua. Hai mai i ko Iesu hele ana maluna o ka wai 11:25-27. Me ko Petero hoao e hele ma ka wai. 29-30. Owai ka poe i like me Petero? A pilikia kakou, e kahea aku ia wai? A aha mai la?
Na Keikikane. Hai mai i ka pono o ka mea makemake e hahai mamuli o Iesu. 16: 24, 25. Me na ninau helu, 26: 27. Heaha na haina?
Na Kaikamahine. Hai mai i ko Iesu hoopahaohaoia'ua. 17: 1-3. Me ka Petero olelo, p. 4. Me ka leo mailoko o ke ao, p. 5.
Na pokii. Hai mai i ka hosana ana ma 21: 9. Owai ka mamo o Davida? Hosana pu anei na kamalii? A ukiuki kekahi poe, pane o Iesu pehea? 16. Pono anei ia oukou ke hosana ia Iesu?
MELE Hosana Kamalii, Hae Hoonani. 14.
Na Makua. Hai mai i ko Iesu kukulu ana i ka Ahaaina a ka Haku. 26: 26-30, me 1 Kor. 11: 23-29. O ka mau ana o keia ahaaina, he mea ia i maopopo ai ke aha? Ko Iesu make a ala hou ana.
Na Keikikane. Hai mai i ko Iesu kaumaha me ka pule ma Getesemane, 26: 36-39, me kana kauoha ma ka pauku 41
Na Kaikamahine Hai mai i ka pane ana o Iesu i kekahi ninau 26: 63, 64. Ua loaa anei na hoike oiaio no ko Iesu hewa? Hewa anei o Iesu? No ke aha ka hookolokoloia'na o Iesu?
Na Pokii. Hai mai i ko Pilato ninau 27: 21-23. Manao anei o Pilato ua hewa o Iesu? Aole.
MELE Kai a naue, Hae Hoonani 21.
Na Makua. Hai mai i ke kaulia'na o Iesu ma ke kea, 27: 45-50; me na hana kupanaha, p, 51-54.
Oukou a pau Hai mai i ke ala hou'na, 28: 6. I Kor. 15: 3-6, 52, 58.
Manao paipai no ka pau ana o ka makahiki.
MELE. Make Iesu no'u, Hae hoonani, 20.
PULE i hoomakaukauia no ka makahiki hou ; a hookuu aku. HAWAII.
HAAWINA KULA SABATI.
KA HAPAHA MUA O 1874.
HELU 1, SABATI IANUARI, 4.
Kumuhana. Ka hooluhiia'na o ka poe Iseraela.
Pauku Baibala. Pukaana 1: 7-14.
7 ¶ Hanau nui iho la na mamo a Iseraela, a laha loa ae la, a kawowo loa : ua nui loa lp lakou ikaika, a ua piha hoi ka aina ia lakou.
8 A ku mai la kekahi alii hou ma Aigupita, aole i ike ia Iosepa.
9 I mai la ia i kona poe kanaka, Aia hoi, ua oi aku ka nui o na kanaka mamo a Iseraela, a me ko lakou ikaika'i ko kakou.
10 E hana maalea kakou ia lakou ; o nui auanei lakou, a hiki mai ke kaua, huipu lakou me ko kakou poe enemi, a e kaua mai hoi ia kakou, a pela lakou e pii aku ai mai ka aina aku.
11 A hoonoho aku la lakou i na luna hooluhi maluna o lakou, i mea e hookaumaha loa ai ia lakou i na hana nui. A hana iho la lakou i na kulanakauhale papaa no Parao, o Pitoma, a o Ramese.
12 E like me ko lakou hooluhi ana mai, pela no hoi ko lakou nei mahuahua. a me ka palahalaha ana aku. A makau loa lakou i na mamo a Iseraela.
13 Hoohana iho la ko Aigupita i na mamo a Iseraela me ka hookoikoi.
14 Hoawahia ihola lakou i ko lakou nei ola'na i ka hana luhi iloko o ka palolo, a ina pohakulepo, a me na hana a pau ma ka mahinaai: a o ka hana a pau a lakou i hoohanaiho ai ia lakou nei, he mea koikoi ia.
Pauku Alakai. Pauku 11. Hoopaa naau.
Mele. Na Ohina Makahiki, Hae Honani 24.
PULE hoomaikai i ke Akua no kona hookomo ana ia kakou iloko o ka makahiki hou.
Mele. Macedonia, Hae Hoonani, 14.
PULE no na Aina.
NA NINAU.
Na Makua. Ua pau o Kinohi iloko o 1873 A ke komo pu nei kakou iloko o Pukaana me na miliona haumana Kula Sabati a ma Amerika Hui, a ma Beretania hoi. Akahi no a huipu o Beretania me Amerika, me Hawaii eni, ma na haawina Kula Sabati hookahi, a ma ka manawa hookahi.
PUKAANA. Ka buke ehia ia o ka Penetetuke? Nohea ka inoa? Nawai i kakau? Mahea i kakau ia'i? I ka manawa hea? Ua ike maka anei o Mose i ka nui o na mea i kakauia ma Pukaana? Nawai i hai iaia i kona hanau ana? etc.
P. 7. Na Keikikane. I ka iho ana o Iakoba i Aigupita e noho malaila, ehia lakou? Ua aha ia ia poe mahope? O ke oki anei ia o na mamo a Iseraela? Aole paha; ua mahuahua loa. Ka wanana a wai ka i hookoiia? Kiuohi 46 : 3.
P. 8 Na Kaikamahine. Ua make o Iosepa, me Parao o kona wa, pehea keia alii hou? No ke aha kona ike ole ia Iosepa? Owai hoi kona inoa p 11. Parao ehia keia maloko o ka Baibala? E huli i akaka.
Owai ka inoa o keia Parao hou ma ka mooolelo kahiko? Amosi 1 paha. Nohea ia? He malihini paha ia no kahi e mai. Ehia makahiki mamua o ko Iesu hanau ana?
P.9. Na Pokii. Owai keia alii? Parao. Owai kona poe kanaka? Ko Aigupita. Olelo oia ua aha na mamo a Iseraela? Ua oi aku ka nui a me ka ikaika i ko wai? Ehia lakou mamua? 70 wale no. ehia i keia wa? Ua miliona paha. Hiki anei ia oukou ke helu i ka miliona? Hiki paha ke hoao; akahi, umi, hanero, tausani, miliona.
P. 10. Na Makua. Heaha ka ke alii olelo? Makau, ea, i na malihini, no ke aha? Makau anei Hawaii i ka nui o na malihini? No ke aha?
P. 11 Na Keikikane. Pehea na luna i hoonohoia maluna o ka poe Iseraela?Pehea ka hooluhi ana? Owai na kulanakauhale a lakou i kukulu ai? Aia mahea o Pitoma, lana me Ramesi? Nana i ka Palapala aina. Nana hoi ia Kinohi 47:11.
P. 12 Na Kaikamahine. Ma keia hana hooluhi, ua ko anei ka makemake o ke alii? Emi anei na mamo a Iseraela? Mahuahua ka ! A pehea ko Aigupita poe? No ke aha ka makau? He mea mau anei ka mahuahua ana o ka poe pono ke hooluhiia, a hoomaauia, a pepehiia ? Ua hoomaauia na haumana a Iesu ; emi anei?
Na Pokii. Pehea keia Parao? He alii aha? Pehea hoi na alii Hawaii mamua? Hooluhi, hookaumaha, auhau nui, auhau i na keiki. Pehea o Lunalilo? Owai ke Alii hooluolu? Mat. 11:28, 30, hoopaa.
P. 13, 14 Oukou a pau. Hai like mai i keia mau pauku. Hai paanaau mai i ka wanana no keia hooluhiia ana. Kin. 15:13 Ehia makahiki mai laila mai? E mau ana anei ka hooluhi ana? Ma na aoao o ko Aigupita, heaha? Ma ka aoao o na mamo a Iseraela heaha?
Ka manao nui e pili ana, hai mai kekahi Owai ke 'Lii hooluhi loa? Mahea?
MELE. Him. 499. Milenio PULE hookuu.
HAWAII.
Hamama ka lani. Heaha? Ma keaha? No keaha?
He hale anei ka lani me ona mau puka komo, a puka aniani? Pela ma ka hoohalike ana. I ka wa i hiki mai ai ke Kaiakahinalii, ua oleloia, ua hamama na puka wai o ka lani, me hela, ua nininiia mai ka wai a nui loa mailoko mai o ua mau puka wai la.
I ka wa bapetizoia'i Iesu, a pii mai, mai ka wai mai, ua oleloia, ua hamama ka lani nona, a pae mai he leo mailuna mai.
Ia Setepano e hailukuia'na, nana aku la ia iluna, a olelo. Ke ike nei au i na lani e hamama ana, a me ke Keiki a ke kanaka e ku ana ma ka lima Akau o ke Akua. Pela hoi o Ezekiela mamua, Ua ike oia i ka lani e hamama ana, wahi ana.
Ike hoi Ioane, wahi ana, i ka lani e hamama ana, e he lio keokeo, me kekahi mea nui weliweli maluna iho. Hoike 19: 11.
Elua lani ma keia mau pauku. O ka lani mua, oia ka lani e pili ana i ka honua, kahi o na ao, na makani, na hekili, me ka uwila, kahi e lele ai na manu, a e pii aku ai na baluna. I ka wa maloo, ua ole, ua like ia lani me ka hale-wai i paniia a paa loa, a hanini ole mai ka wai. I ka manawa ua, a kahe nui ka wai, piha na kahawai, na muliwai, a hu ae iwaho, ua like ka lani me ka halewai i wehe ia na puka a pau, a kahe nui ka wai io ia nei.
Aole he halewai ka lani me ona mau puka. Aohe wai ma ka lani mua i ka wa maloo, a ua ole. Ua lohe oukou, no ka honua aku, no na moana aku ka wai i haule mai ma na wa ua. Pii ae ka mahu, a lilo i ao, a kaumaha na ao, haule mai ka wai ua.
Keia lani mua, me he halewai la ia mamua aku nei, i pani ia, a e aua ana i ka wai.
Maloo loa na aina, na kula, na papu, ma Hawaii. Maloo loa na mea ulu ma kauwahi, panao, papaala, neoneo. Maloo na kahawai, uuku kahi wahi kahe. Pilikia na holoholona. Nui wale na bipi i make i ka ai ole, wai ole. Aumeume kanaka no ka wai. A hookaheaia ka wai ma kauwahi huhu ke.kahi poe, a hele a hookahe i ka wai i kahi e. Nui ka pilikia, nui ka uwe ana.
Heaha ka pono? Pehea la e hoohamama ia'i na puka wai o ka lani? Ke pau nei kakou i ka make. Ina mau keia maloo, elua ole ana ka pilikia. E noho wale ana kakou a pau i ka make? He aha ke ki e wehe ai i na puka wai o ka lani i kahe mai ka wai?
Eia no ke ki, ke ki kahiko a Elia i wehe ai i na puka wai o ka lani a hanii nui loa mai ka wai, a holo Ahaba ma i pakele i ka pulu nui ana. Ka pule, oia ua ki nei. E lawe, e hookomo iloko o ka puka ki, e wili i hemo, i hamama ka puka, i hanini mai ka wai. Pane ka hoomaloka, Lohe anei ke Akua i ka pule, a ninini mai i ka ua? Kainoa, aia no ia ia ka ua, me ka maloo.
Ina i haawi mai oia i ka ua, ua pono ; a haawi ole mai, maloo ka aina, ua pono hoi. Aia no ia ia ka haawi, me ka aua. He mea aha ka pule?
A pane kekahi, Alia pule no ka ua; aole o’u holoholona e make i ka maloo, aole mala ai. He hele ko’u, he elele, he lawe le@a, he holoholo io ianei. Aole o’u pilikia ke ua ole. Ko’u pomaikai no ia.
A pane kekahi, Ua pono no keia maloo, pono ke make na holoholona, no ka nui loa, a piha pono ole ka aina ia lakou, a pau na mea kanu ia lakou, Ua oki pela, mai pule no ka ua; alia a koe kawalawala na holoholona.
A, olelo kekahi, ko ke Akua hoopai keia no ko kakou hewa. Ua hewa kakou, na’lii, na kanaka, na hoahanau e like me Ababa ma i ke kau ia Elia, a wa ole mai no na makahiki ekolu. Ae, ua oiaio no ia, na hewa kakou, a ke hoopai mai nei ke Akua ma ka aua ana i ka ua, a haawi mai i ka maloo loa, me ona mau pilikia.
E mihi nae, a e hoao i ka pule, malia paha e oluolu mai ana ke Akua, a e haliu mai, a kala mai i ka hewa, a haawi hou i ka ua, a hooulu hou mai i weuweu, a hoola i ke koena o na holoholona; a hoopohala mai i na kanaka.
Ae e hoao kakou E hoomau i ka pule i kela la i keia la no ka ua. I ka hoao ana, aole liuliu, elua paha la, a hoomaka ka haule liilii ana o ka ua. Pau koke no nae. A i ka lilo hou ana i ka pule, ua haule hou mai ka ua, a ke haule mai nei no, a nui. Ke kahe nei, ke piha nei na kahawai a hu ae iwaho. A ke piha nei kanaka, holoholona, kula, mala i ka olioli, a me ka hoomaikai aku i ke Akua no ka hooko ana i ka makou pule.
Ka lani mua ka i pau me ka wehewehe ana i kona ano , ka hamama ana, a pela aku.
Ka lani elua i koe. Heaha ia? Ko ke Akua wahi paha ia. Me he la he hale ia me ona mau puka. A i kekahi manawa, ua like ia me ka hale i paniia a paa, a loaa ole main a makana maikai a ka Uhane. Maloo na kihapai uhane, na mala uhane, na naau, na ekalesia, na kula Sabati, na kula nui, na ohana.
No ka auaia o ka Uhane Hemolele, nui ka maloo, ka panoa, ka neoneo o na mahina ai uhane. Ua hapa ka poe hele i na halawai, i na kula Sabati. Ulu ole ka olelo i hai ia aku, i ao ia’ku e na kahuna, na kahu, na kumu. Pua ole na kumu rose, a hua ole na laau hua. Nui ka uwe no ka make o na uhane.
Ua kiia na puka o ka lani, ua paa. Me he hao keleawe la na lani. Ke make nei kakou no ka ua uhane ole.
Heaha ka pono? Heaha ke ki e wehe ia’i ka puka o ka lani e lua, i haule mai ka ua o ka uhane? Oia ki hookahi no, o ka pule. Hiki no ia ke wahe i na puka o ka lani mua, a me ka lani elua. E lawe, e hookomo i ka laka, e wili. Paa anei? Oni ole ke alelo? E hamo i ka aila, pule hou, e pule ikaika, e pule hoomau, a e hemo no ka laka, a e weheia ae a hamama ka puka, a e haule mai ka ua uhane a nui maluna o na kihapai maloo, na mala maloo, na ekalesia, na kula Sabati, na ohana, a uliuli hou lakou, a paapu i na pua aala, me na hua maikai.
Ke kokoke mai nei ka hebedoma hai pule mai ka la 4 a i ka la 11 o Ianuari 1874 E ala e hoomakaukau e, e waele, e uhuki i ka nahelehele, i na mea ino a pau, a hoolei aku iwaho, i hiki i ka uhane ke haule mai ma ka lepo maikai, a kupu ae na hua, a hua nui mai, he pa 30, pa 60, pa 100.
HAWAII.
Ka mana o ke aloha.
Aia no ma Amerika Akau he wahine kane ole, kaulana no kona aloha i ka poe ilihune, ka poe mai, a me ka poe popilikia. Ua maa no oia e hele io ia nei, e hana lokomaikai aku i na hoalauna. Ua ninau ia oia penei ; “ Aole makau anei oe e hele io ia nei i na kau hale, me ke kokoolua ole e malama ia oe?” I mai la ia, makau iki noau, a puiwa no kekahi manawa e like me ka nui o na wahine; aka, i ka hooko ana i ko’u mau manao paa, he pono ia’u ke hoole ia’u iho, a hele iwaena o na pilikia. I ko’u hele ana main a kulanakauhale a iwaena o na kuaaina, ua hoopilikia ia no kekahi manawa.
Eia kekahi; I ko’u noho ana ma Michigana, ua hoolimalima au i kekahi kanaka opio me kona kaa lio e lawe ia’u i kahi loihi e aku, i ke kauhale o na kuaaina. I ko maua hoomakaukau ana e hele, ua ike au ia ia e lawe ana i elua mau pu panapana.
I aku au, no keaha ka lawe ana i na pu panapana? I mai la ia, e lawe ana au ia mau mea a pale aku i na powa; no ka mea, e halawai auanei paha me na powa ma ke alanui.
I aku la au, e haawi mai i na pu panapana ia’u, owau e malama ia laua. A ua haawi mai no.
A i ko maua hele ana iwaena o kekahi ulu-laau, lele koke mai kekahi kanaka iloko o ke alanui, hopu aku la ia i ke kaula waha o ka lio; alaila kauoha mai la ia’u e haawi ia ia i ko’u aa dala
I aku la au ia ia, ea! Aole hilahila anei oe e powa wale mai i ka wahine ilihune? Aole nui ka’u mau dala, a e hele ana au e launa me na kauaka ma ka hale paahao, a me ka poe ma ka hale mai, me ka manao aloha hoi i ka poe ilihune.
Ina ua halawai oe me ka pilikia, a ua olohelohe, a ua polloi, a ua mai, a makemake oe i kekahi dala e pono ai kou kino, e kokua aloha no au ia oe.
I ko’u kamailio ana pela, he ano e kona maka, a keokeo mai la e like me ka mea e make ana.
“E ko’u Akua,” wahi ana, “kela leo!” “Owau no kekahi iloko o ka hale paahao ma Philadelphia; a wa lohe au i kou leo, e ao ana i na hoa paahao iloko o ke keena okoa, a ke hoomaopopo nei au i kou leo.” Alaila, mihi mai la oia no kona manao e powa wale mai, a hookuu i ka lio i hele aku maua me kuu hoa hele. Unuhi au i kuu aa dala, a makana au ia ia i kekahi, i mea e kuai i kekahi ai, a imi oia i kekahi hana e pono ai kona ola ana.
Hoole mai kela, aole pono ia ia ke lawe i wahi mea iki no’u au. Aka, ikaika ko’u manao ia ia e lawe i kekahi dala; o hana ino hou auanei ia hai, mamua o kona loaa ana ka hana hoolimalima e pono ai.
Nani ka mana o ka leo o kela wahine aloha, i ka hoopau ana i ka manao ino o ke kanaka powa. Ua oi aku ia i ka mana o na pu panapana. No ka mea, ina ua law e ke kanaka opio i ua mau pu panapana ia, a ki aku i ka powa i kona hopu ana i kona lio, aole Akaka ka hope; pau pu paha laua me ka wahine i ka make.
Na Nahienaena.
Oahu, Iulai, 1825.
Aloha oukou, e na Misionari a pau loa.
Aloha ke Akua i ka hoomanawanui mai ia kakou. Aloha Iesu ko kakou Haku e ola’i.
Ke hai aku nei au ia oukou i ko’u wahi manao. Ke aloha nei ko’u naau i ke Akua i kona haawi ana mai i kana keiki e make, i ola ka poe kina o neia ao. Ua hanini mai kona koko mana i wai anau no ko’u naau a no ko’u kino e pau ai ko’u naau hewa.
Ke makemake nei ko’u naau e paulele ia Iesu i ko’u Haku e ola’a au. Ke pule nei au i ke Akua e hoohuli main a makaainana, a me na alii a pau loa. Ko’u makemakeia i pule ai au i ke Akua i ko maua aupuni, e haawi ia Iesu i aupuni maikai loa, i nele loa ka diabalo i ke aupuni ole.”
E na kaikamahine Hawaii i aloha nui ia. Pehea la oukou? Lokahi anei ko oukou manao me ko ke alii i olelo ia ma ka leta i kakau ia ma Iulai, 1825-? He wa naaupo kela, a pouli ma keia pae moku, aka, Ua apo no nae na alii a me na makaainana i ke ola nu ii hoomakaukau ia ae e ka Mesia.
Pela no anei oukou i keia wa i kapa ia ka wa malamalama, naauao? Mai hoopaakiki; mai hoopakike; main oho nanea; mai hahai wale mamuli o na mea mae wale; aka, e hoahu aku i ko oukou waiwai ma ka lani, kahi i loaa mai ai ka lei alii, a ka Haku i haawi wale mai ai i ka poe kaikamahine i holoiia ko lakou naau pelapela ma ko na koko mana loa.
Aloha oukou,
F.
Evangelical Alliance.
(HE AHAHUI EUANELIO HAIPULE.)
Nui na kahunapule hoole Pope ma Europa; ma Asia, ma Aferika, ma Amerika Hui, ka i komo iloko o keia Aha. I ka malama o Okatoba i hala ae nei, ua halawai keia Aha ma Nu Ioka. A ua oleloia, he halawai nui, a maikai loa ia. Oia ke ono o kona halawai hui nui, mai kela aina keia aina; a ua mahalo ia ka hana ana, no ka lokahi o ka manao ma na mea e pono ai ko Iesu aupuni.
No keia Aha mai ka manao e malama ia ka hebedoma mua o Ianuari, i hebedoma e haipule nui i ka Haku, e hiki mai kona aupuni iwaena o na lahuikanaka a pau. He aha paha keia e hoomakaukau ana i ke ala no ka milenio.
O ka Baibala ko lakou kumu alakai. Ma keia buke hemolele, ua aoia lakou i ke ano, a me ka hope o ka pule ia Iehova, ma ka inoa o Iesu Kristo.
Eia kekahi, ma I Timoteo, 2:8. "O ko ’ u mana o hoi ia, e pule na kanaka mai ia wahi aku, a ia wahi aku, a hapai ana i na lima hala ole, me ka huhu ole, a me ke kanalua ole."
Eia kekahi, ma Iakobo 5:16. "E hai aku i ko oukou mau hewa kekahi i kekahi. a e pule hoi kekahi no kekahi, i pohala ai oukou. O ka pule ikaika a ke kanaka pono e lanakila nui ia."
Eia ma ka waha a Solomona 8:47. "He aloha ko’u i ka poe e aloha mai ia’u. O ka poe imi pono mai, o lakou ke loaa ia’u."
Eia ka Iesu, Mataio 7:7,8. "E noi, a e haawiia na oukou; e imi a e loaa hoi ia oukou; e kikeke, a e wheia no oukou. No ka mea, o ka mea nui, ua haawi nana; o ka mea imi, ua loaa no iaia; a o ka mea kike e, ua weheia nona."
Eia nae; e noi, e imi, a e kikeke ma ka inoa o Iesu; i ole, e make hewa ka hana ana. No ke mea, o Iesu no ke ala, ka oiaio, a me ke ola. Aole hiki kekahi i ka Makua, ke hele ole ma o Iesu la.
Eia hoi ka Iesu ma Ioane 14:13, 14 “O ka mea a oukou e nonoi ai ma ko’u inoa, oia ka’u e hana mai, i hoonaniia ka Makua me ke keiki. Ina e nonoi oukou i kekahi mea ma ko’u inoa, owau no e hana.”
Eia ka Iehova ma ka waha o Ieremia @9:13 “A e imi mai no oukou a loaa, i ka @a e imi mai ai oukou ia’u me ko oukou @au a pau.”
Pehea oukou, e na kahunapule, a me na ekalesia ma Hawaii nei? Ua makaukau anei oukou e hapai like i keia hana nui, e like me na pauku i waeia mai maluna ae?
Heaha na hua i loaa mai ia oukou no ka malama ana i na hebedoma haipule i keia mau makahiki i hala aenei? Ina aole hua, heaha na mea i keakea ai, a make hewa ai i ka oukou hana ana? E imi koke oukou, i maopopo na pohaku okupe a me na mea e ehaeha ai ka Uhane Hemolele, a launa ole mai
Pilikia loa ko Hawaii nei Ziona, ke launa ole mai ka Uhane o ka Haku, a hoihoi mai ka poe auwana, a alakai hoi i ka mihi ka poe hoomaloka.
Ua kokoke mai ka hebedoma mua o Ianuari 1874.
Pehea oukou, e ka ekalesia ma Kaumakapili? Ua pau anei ko oukou kaumaha i ko oukou kahu, no kona lawe wale ana i hookahi tausani dala a keu, a oukou i lulu aku ai no ka luakini hou? Hiki anei ia oukou ke malama pono i keia Hebedoma Haipule, ke hoihoi ole mai oia i ua mau dala la? E heluhelu oukou i ka Iesu kauoha ma Mataio 5:23, 24, me ka noonoo nui i ke ano. Alaila e heluhelu ma Ioane 14:15, 16.
Pomaikai na ekalesia i makaukau e malama i ka hebedoma Haipule me ka manao lokahi.
Papa Hoike no ka Hebadoma Haipule, Ianuari, 1874.
Sabati, Ianuari 4- NA HAIAO: Ke ano hookahi o ka ekalesia Kristiano, a me ka poe manaoio a pau. Na kumu e komo nei i ka poe manaoio e lokahi, a me na mea keakea ia lokahi ana. Ioane XVII:21,22.23.
Poakahi, Ianuari 5- HOOMAIKAI ANA I KE AKUA: No na pomaikai lahui a me na pomaikai pili kino. o ko ka uhane me ko ke kino. Hai ana i ka hewa: Ka hewa o ka lahuikanaka me ko kakou mau hewa ponoi. Daniela IX:7.
Poalua, Ianuari 6- PULE: No ka ekalesia Kristiano, i hoomahuahuaia ka manaoio, ka hemolele, ke aloha, me ka mana; a i ninini nui ia mai ka Uhane Hemolele. Kolosa I: 9,10,11.
Poakolu, Ianuari 7- PULE NO NA OHANA. Na Home a me na Makua. Na kula. Na keiki mai a pilikia. Ka poe hoolohe ole. Halelu cxv: 12, 13, 14
Poaha, Ianuari 8-PULE: No na lahui kanaka; i malu mawaena o kanaka, i maemae a i pono na lahuikanaka; i hoopauia ka ona, ka hoopunipuni, ka hoomanakii, me na mea oiaio ole a pau; i laha nui na palapala Kristiano. Isaia LX:17, 18
Poalima, Ianuari 9- PULE: I lanakila ka Euanelio ma na aina o Europa; i hoohuli ia ko Iseraela i ka pono; i laha ka Euanelio ma na aina Mahomeda a ma na aina pegana, no ka poe Kristiano i hoomaau ia. Halelu LXVIII : 31; CXXI : 6; Habera XIII : 3.
Poaono, Ianuari. 10- PULE: No na hana o ka makahiki 1873, E ike i na hana o ke Akua. Ka hope maikai o na hana a ke Akua. Isaia XXVI : 8,9.
Sabati, Ianuari 11.- NA HAIAO: Ke aupuni o Kristo, no na mea a pau ia, a he mau loa. Halelu XCVII: 1,2.
NA BUKE
I HOOLAHAIA E KA PAPA HAWAII
--ME KE—
KUMUKUAI O KELA ME KEIA.
BAIBALA HEMOLELE NUI ILI GULA NANI me na kuhikuhi ma na aoao……..$12 00
Baibala Hemolele Nui ili eleele kaekae waigula. 5 00
Baibala Hemolele uuku iki iho kae wai gula… 8 00
Baibala Hemolele pananaiki iho ili eleele… 4 00
Baibala Hemolele ili eleele… 2 00
Kauoha Hou ili gula nani me na kuhikuhi… 3 00
Kauoha Hou ili eleele kaekae wai gula… 1 00
Kauoha Hou ili eleele… 75
Kauoha Hou Hapa Haole… 75
Lira Hawaii 1848 me ke kanawai… 25
Lira Hawaii 1855… 25
Moolelo Ekalesia… 50
Haiao ili lahilahi… 10
Hele Malihini ana… 25
No ko ke Akua ano… 25
Lira Kamalii… 25
Hoike Palapala Hemolele… 25
Moolelo o Heneri Opukahaia… 25
Hoike Akua… 20
Wehewehehala… 20
Ninau Hoike ili manoanoa… 25
Ninau Hoike ili lahilahi… 15
Kumumua Kula Sabati… 15
Buke Lawe Lima… 15
He Buke no ka Pope… 10
Ui Kula Sabati Helu 3… 20
Ui Kula Sabati Helu 4… 05
Ui Kula Sabati Helu 5… 20
Buke Euanelio a Ioane… 15
Himeni Hawaii… 1 00
Himeni Hawaii ili nani… 1 70
Kumu Leo Mele… 15
Kumu Leo Mele ili nani… 50
NA KAUOHA HOU PAKEKE.
Ili gula nani… 1 50
Ili eleele kaekae nani… 50
Ili eleele… 35
KAUOHA HOU PAKEKE ME NA HALELU.
Ili gula nani… 1 75
Ili eleele kaekae wai gula… 60
Ili eleele… 50
Buke Wehewehe Huaolelo Baibala, elua ano…
Buke Wehewehe Ano Mataio…
NA HALELU PAKEKE.
Ili Gula nani… 50
Ili eleele kaekae wai gula… 30
Ili eleele… 20
Ka Hae Hoonani (Buke Mele)… 25
EIA NA BUKE HAAWI WALE.
PALAPALA LIILII-
Helu 4 – Makemake anei oe i ke ola?
Helu 6 – E hele i o Kristo la.
Helu 7 – Ka hoi ana mai o ke Keike Uhauha.
Helu 11 – No ka hoohiki wahahee i ke Akua.
Helu 16 – Ka Eehia ana o ka Ahaaina a ka Ahku a me ka Bapetizo ana.
Helu 17 – Mai hana ino i na holoholona.
Helu 18 – No ka mahi ana, kuai ana a me ka inu ana i ka Awa.
Ka Davida Malo Kumumanao.
Ka Moolelo o Batimea Puaaiki.
Aia ke keena kuai buke o ka Papa Hawaii ma ka huina o Alanui Betela me Alanui Kalapa, e kokoke ana i ka Hale Leta.
J. F. POKUE.
Kakauleta o ka Papa Hooko o ka Ahahui Euanelio o ko Hawaii Pae Aina.
KA NUPEPA “KUOKOA!”
Hoopuka mai ia
I KELA POANO KEIA POAONO.
$2.00 no na mahina Umikumamalua.
$1.00 “ “ “ Eono.
ME KA HOOKAA MUA MAI.