Ka Nupepa Kuokoa, Volume XIII, Number 6, 7 February 1874 — Ka Hana a kela a me kela Kamaaina. [ARTICLE]

Ka Hana a kela a me kela Kamaaina.

Iloko o keia wa pihoihoi, o ka mea mua ka malama nui i ka maluhia o ka aina, a o ka hoopau loa aku i na hoohaunaele e hoomakaia mai ana. E noho ana ka Aha Kuhina o ka Moi ma ke ano Aupuni kuloko, oiai e waiho hakahaka ana ke Aupuni aole Moi, no ka wa pokole, a hiki i ka wa e koho hou ia ai ona Moi. He mau kanaka na Kuhina i hilinai ia, a o ko lakou pomaikai hoi ka malama i ke Aupuni no ka pono o ka lehulehu. O na hoala e kukulu i na hana Kumukanawai ole o kela a me keia ano, he mea hoohaunaele wale iho no ia, a he pono e hoopau ia mea. O ka Lahui Hawaii, he poe malama Kanawai lakou, a ke lana nei ko makou manao aole he mea keakea e ulia mai ana no ka inoa maikai a lakou e hauoli nei. He mea kaumaha ka hiki ana mai o ka make o ka Moi me ke koho ole i hope nona ma ka noho Alii; aka, ke hilinai nei makou maluna o ka manao maikai a me ka naauao o ka Lahui, e malama lakou i ka maluhia.