Ka Nupepa Kuokoa, Volume XIII, Number 15, 11 April 1874 — Page 4
| This text was transcribed by: | Patricia Ravarra |
| This work is dedicated to: | Loea Hula Charles Kauhi Ka'upu, Jr. |
Ka Nupepa Kuokoa
Sing, sing, for Christ is King.
Pure Diamonds, p 4.
1.
E hui mai a mele ae,
I ko Iesu aloha,
No kona haawi ana mai,
I kana mau kauoha,
E mele, a e hapai ae,
Na leo me na uhane,
Ia Iesu i ka Lii makai,
A hai i kona nani.
Cho. Hapai e! Iesu ke Lii!
Hapai mililani ;
Hapai! Hapai!
E hapai, a hoonani.
2.
E hui mai a mele ae,
I ko Iesu aloha,
No kona iho ana mai,
A make no kauoha la,
A ala hou a lilo ae,
I kalahala mana,
A hea e lilo na pokii,
I poe haumana nana.
Cho. Hapai e! Iesu ke Lii, &c.
3.
E hui mai a mele ae,
I ko Iesu aloha,
I kona kii i na pokii,
I poe ohua noua,
A noho pono ma ke ao,
A lele ae na uhane,
E lawe a hoonoho mau,
Maluna, ma ka lani.
Cho. Hapai e! Iesu ke Lii, &c.
Hawaii.
Light and Comfort.
Fresh Laurels, p 35.
1
Iesu no ka Lama o’u,
Lama kua alohi mau,
Lama no ka lani mai,
Lama nana e alakai,
Mai ke ao pouli nei,
Ma ke ala ololi,
A i luna i ke ao,
Kahi o ka lama mau.
2
Iesu no ka bama o’u
Bama olu lapaau,
I na eha a palapu,
Olu au a ola no,
Lawe ae i na luuluu,
Na kaumaha me na u––
Ho mai i ka oli mau,
Mai nei ae i ke ao.
3.
Palupalu wale au,
A auwana hewa no,
Iesu kuu ikaika mau,
Apo mai i hoi au,
Lama, Bama, kuu laau,
Hee ka pouli, a ao mau,
Alakai a hiki io,
Kahi maha a mau no.
Hawaii.
HAAWINA KULA SABATI.
Ka Hapaha Elua o 1874.
Helu 4, Sabati Aperila 26.
KUMUHANA––Kukulu ana i ka Halele.
Pauku Baibala––Pok’. 40:17 –30.
17 A i ka malama mua o ka makahiki alua, i ka la mua o ka malama, ua kukuluia ka halelewa.
18 A kukulu o Mose i ka halelewa, a hoopaa iho la kona mau kumu, a kukulu hoi i kona mau papa, a hookomo ae la i kona mau auka e paa ai, a kukulu no hoi i kona mau pou.
19 A haalii ae la oia i ke halelole maluna o ka halelewa, a kau aku la i ka uhi o ka halelole maluna aku ; a like me ka Iehova i kauoha mai ai ia Mose.
20 A lawe oia, a waiho aku la i ke kanawai iloko o ka pahu, a hoonoho i ka noho aloha maluna ma ka pahu.
21 A lawe ae la oia i ka pahu iloko o ka halelewa, a kau aku la maluna i ka paku e uhi ai, a uhi ae la i ka pahu kanawai ; a like me ka Iehova i kauoha mai ai ia Mose.
22 A waiho aku la oia i ka papaaina iloko o ka halelole o ke anaina kanaka, ma ke aoao akau o ka halelewa, mawaho o ka pahu.
23 A hoonohonoho oia i ka berena maluna olaila, imua o Iehova ; e like me ka Iehova i kauoha mai ai ia Mose.
24 A kau aku la oia i ka ipukukui manamana maloko o ka halelewa o ke anaina o ka pono ana i ka papaaina, ma ke aoao hema o ka halelewa.
25 A hoa iho la oia i na kukui imua o Iehova ; e like me ka Iehova i kauoha mai ai ia Mose.
26 A waiho aku .a oia i ke kuahu gula maloko o ka halelole o ka anaina kanka, imu o ka pahu.
27 A puhi iho la eia i ka mea ala maikai maluna olaila ; e like me ka Iehova i kanaka mai ai ia Mose.
28 A kau aku la oia i ka pale o ka puka o ka halelewa.
29 A waiho aku ia oia i ke kuau o ka mohaikuni ma ka puka o ka halelewa o ka halelole o ke anaina kanaka, a kaumaha aku la maluna olaila i ka mohaikuai, a me ke mohaiai ; e like me ka Iehova i kauoha mai ai ia Mose.
30 A kau aku la oia i ka ipuauau mawaena o ka halelole o ke anaina kanaka, a me ke kuahu, a ninini iho la i ka wai iloko, i mea e holoi ai.
Mele Him. 410. Lec-Park. St. C. Sacra p. 59
1.
He nani no ka hale no,
E kuu Alii, kou Haku mau,
I ini au e launa pu
Me na haipule a Iesu.
5.
E naue mele ae makou
Mai nei a i ka hale mau,
Malaila, ma kou alo no
E ku a mele mau makou.
Pule––i hui kakou a pau a kokua i ke kukulu ana i ka halelewa uhane o ke Akua.
Na Ninau a na Kumu i na papa.
P. 17 Ka halelewa heaha ia? Mok. 25:8. Nawai i kauoha o hana? Mahea Mose i ka wa a ke Akua i kauoha mai ai ia ia e hana i wahi nona, a haawi mai i ke kumu hoohalike? 24:18. Nohea mai na mea e hana ia ai? 25:1–7. 36:3, 5–7. Owai na luna hana? 36:1. I ka malama ehia, i ka makahiki ehia i kukulu ia’e? Ehia la mai ka wa i haalele ai i Aigupita? 1 mak. 14 la.351. Owai ka inoa o keia malama?
P. 18. Hai mai i na kumu, i na papa, na auka, na pou, 26:15–29, 37. Ua like na auka me na ki, na pou me na kia.
P. 19. Ka halelole me kona uhi, nana, 36:14–19. Ua akaka, eha mea e pili ana i ke Keena kapu. 1 Ka halelewa ponoi me ona mau paia laau. 2 Ka halelole mawaho ona, he pale hulu kao. 3 Ka uhi no ia hale he mau ili-hipa kane. 4 A he uhi hou mawaho loa, he mau ili-tehaoa.
P. 20. Ka pahu aha keia? Pahu berita; kea no &c, nana 25:10–15. Heaha maloko? p. 16. Ka noho aloha, heaha ia? mahea i kau ai ; 25:17–22.
P. 21. Mahea ka pahu i waiho ai? Pehea ka paku? He paku aha keia? Nana 26:33, 34. Aia ka pahu ma kahi hoano loa.
P. 22. Mahea ka papa aina? Ka halelole o ke anaina kanaka, mahea ia? mok. 26:35, nana no hoi 25:23–30. Aia no ia papa ma kahi hoano mawaena o ka papa o ka pahu berita a me ka pukao ka halelewa.
P 23. Heaha malua o ka papaaina? Ehia popo? Oihk. 24:5–7.
P. 24. Ipukukui, heaha? Mahea o kau ai? Ehia manamana? 25:37.
P. 25. Ua aha i na ipukukui? 25:37.
P. 26, 27. Kuahu gula, heaha? 30:1–9, mahea ia? Aia no ia mawaena o ka papaaina ma ka akau, a me ka ipukukui ma ka hema : Puhiia ke aha maluna? nana, 30:36. No keia kuahu keia mea ala?
P. 28. Ka pale o ka puka, nana 26:36, 37. Ua like ia me ke pani o ka puka?
P. 29 Ke kuahu o ka mohaikuni, heaha? mok. 27:1–8. He kuahu keleawe ia, aia mahea ia?
P. 30. Ka ipu auau, heaha ia? 30:18, 21, mahea ia?
Mele Him. 408, Leo–Harwich C. Sacar p. 186
1: Kuu Haku, kuu Iesu,
E hele oli au
I ko Ziona puu,
Ka hale maikai ou,
Ma kahi mau e hai ia mai
Kou nani, mana, aloha e.
Na ninau a ke Kahu.
Na Makua. Heaha ke kumuhana o keia Haawina Kula Sabati? Heaha ke halelewa? kona loa, kona laula, kona kiekie, kona mau keena, kona mau uhi?
Na keikikane. Elua keena o ka halelewa, Owai na inoa? Heaha maloko o kahi hoano loa? Heaha maloko o kahi hoano? Heaha mawaena? Heaha ka pahu berita? Heaha maloko? Heaha mawaho, a maluna? Heluhelu Hebera 9:2–5.
Na kaikamahine. Ma ke keena hea ka pahu berita? Mahea ka papa hoike berita: Mahea ka papa hoike berena a me ka ipu kukui? Owai ka poe i ae ia e komo iloko o na keena kapu elua? Heluhelu Hebera 9: 6, 7.
Na pokii. Ua ike anei oukou i ka halelewa? Ua like anei ka halelewa a Mose ma i hana’i me ka halelewa a oukou i ike ai? Mahea ka like ole? He hale papa kela, he hale lole ka makou i ike ai?
Nowai ka halelewa? No Iehova. Ua like anei ia me ka luakini? Ae. Ua kapu nae kela halelewa, aole hiki i na kanaka ke komo, na kahunapule wale no ; pehea na luakini i keia wa? Nawai i hoopau i ke kapu? No Iesu i ka wa i make ai oia. Heaha kekahi luakini? O ko makou naau. Ae anei ke Akua e komo iloko? A eke maemae. Heaha ka mea e maemae ai? Ka pahu berita, ilaila na kanawai ehia? Heaha ko oukou pahu berita kahi e paa ai na kanawai &c?
Ke Kula a pau. He wahi a mau wahi paha anei e hoomana 'i ia Iehova mamua o ka wa a Mose ma i hana’i ka halelewa? Aia mahea? No ke aha ko ke Akua kuhikuhi pololei ana ia Mose i kea no o ka halelewa me na mea a pau e pili ’aa ilaila? Pehea ia Mose ina na hana ola me ke no oleia mai? lalau loa paha ea. Pehea na kanaka Hawaii mamua, i ka wa i waiho waleia'i lakou me ke kumu ole? Hele lalau loa paha.
No ke aha ka nui o na uhi o ka halelewa? He hoailona no ke aha? Ka hale o Iehova, ka luakini o ke Akua, oia hoi ka ekalesia, He mea nui anei ka ekalesia? Ehia mea e pono ai ka ekalesia? Hai mai i na papa kanawai, ka noho aloha, ka papa hoike berena, ka ipu kukui, na kuahu me na mohai, ka ipu auau. He mau hoailona no ke aha? Hookoia ma owai la: Iesu ka noho aloha, ka mea uwao, ka mohai kuni, a mohai kalahala, aia hoi ke kuahu, ke kahuna nana i kaumaha i ka mohai Oia ka wa auau, ka berena o ke ola ka malamalama o keia ao. Ka lani kahi hoano loa, a ma o Iesu la e hiki ai ke komo iloko ka poe a pau i mihi, a holoiia ae kona koko, a kalaia ko lakou hewa.
Ua hui ka poe Iseraela a pau, i ka hana i ka halelewa, he mea paipai ia ia kakou a pau e hui pu ma ke kukulu ana i ka ekalesia, i ke aupuni o Iesu, ma ka hana, ma ke kokua, ma ka pule. &c.
Mele Him. 407, Leo-Mehul. C. Sacra p 206.
Pule i ala kakou a kukulu i ka halelewa uhane, i ke aupuni o Iesu ma keia ao.
Haawina Kula Sabati no ka la 3, o Mei. Oihk. 7 ; 37, 38 Hawaii
Moolelo o ka Ahahui Euanelio o Hawaii Komohana.
Halawai ke Aha Euanelio o Hawaii Komohana ma Pukaana, Hookena, Kona Hema Hawaii, i ka la 11–14, o Maraki, M. H. 1874. Hora 11 kakahiaka.
Ekalesia Kahu Elele
Kekaha, Rev. G P Kaonohimaka Simeona,
Kailua, : J. Waiamau Meenui,
Helani, : : : : Kaikai,
Kona-Waena, : O Nawahine, Kapule,
Kealakekua, : S W Papaula Kaholoaa,
Pukaana, : H Manase, Paiea,
Kapailiua ------------------ Kanui,
Waiohinu, ------------------ -------------------
Lala mau.––Rev. J. F. Pogue. Hoakuka.––S. C. Luhiau.
Ma ka Balota ana, ua kohoia o H. Manase i Lunahoomalu, a o S. W. Papaula i Kakauolelo, Pule o J. F. Pogue.
Komite Imihana. Pogue, Simoena, Nawahine. Noi ia mai e lilo keia manawa i wa haipule, i hapalua hora ; ua aponoia.
Noiia mai e hoomaha ka Aha a hiki i ka hora 2, ua aponoia. Pule o Kanui.
Hui hou ka aha i ka pau ana o ka hora hoomaha, pule o Kaikai. Hoike mai ke Komite Imihana i na Kumumanao.
1–Hapalna hora haipule. 2–E hoopau ka L. H. mua i kana haiolelo i ka wanaao o ka la apopo. 3–Hoike Kihapai. 4–Papapala Hoopii. 5–Heluhelu Haawina. 6–Kula Kaikamahine. 7–Nupepa Karistiano 8–Ka Oihana Kuwaho. 9–Koho ana i mau Ele no ka Ahahui nui ma Honolulu ma ka malama o Iune. 10–Komite Hoike Kihapai imua o ka Aha ma Honolulu. 11–Komite Hoike i ka hana o keia aha imua o ka aha ma Honolulu. 12–Na Ekalesia Kahu ole. 13–No ka Ona. 14–Na Hale noho o na Kahu Ekalesia. 15–Ka Hoike a na Komite o keia Aha i kohoia ma Helani. Ua aponoia.
Hapaiia ke Kumumanao 3. Hoike Kihapai. Na G. P. Kaonohimaka, i heluhelu mai no ke kihapai o Kekaha.
Na J. Waiamau no na kihapai o Kailua me Helani. Na S. W. Papula no ke kihapai o Kealakekua.
Heluhelu mai ke Kakauole he mau palapala no ke Kula Kaikamahine no Kohala mai. Noiia mai e hoopanee a hiki mai o Luhiau, na aponoia.
Noiia mai e hoopanee a halawai hou i ka la apopo horo 9. Aponoia. Pule o T. N. Simeona.
Poaha, la 12. Halawai hou keia Aha i ka hora i hoopaneeia, me ka hoolohe ana i ka haiolelo a ka Lunahoomalu mua, J. Waiamau, ma Oihana 20:28. Pauia. Malama ka aha i kapalua hora haipule.
Heluheluia ka moolelo a aponoia. Noi ia mai e apo aku keia Aha ia Rev. S. C. Luhiau i hoa kuka, ua aponoia.
Hapaiia ke koena o na hoike kihapai. Na O. Nawahine i heluhelu mai no ke kihapai o Konawaena. Na H. Manase no ke kihapai o Pukaana. Na D. Kanui ka Elele no ke kihapai o Kapalilua.
Noiia mai e hoomaha ka aha i hookahi hora. Pule o Luhiau.
Hoi mai ka aha i ka pau ana o ka hora hoomaha, pule ke Lunahoomalu.
Hapaiia ke Kumumanao 4. Na Palapala Hoopii. Heluheluia mai ka palapala hoopii a kekahi hapa o ka ekalesia o Pukaana, i ko lakou kahu, e hoopau, a e hookuu loa ia H. Manase mai ia kihapai aku.
Noiia mai e kohoia i Komite ao keia palapala, ua aponoia. Kohoia o J. Waiamau, O. Nawahine, M. Kaholoaa, Meemii a me Mr. Luhiau.
Heluheluia mai he palapala hoopii no ka ekalesia o Kekaha, e aua hou ana ia G. P. Kaenohimaka, i kahu no ia ekalesia. Noi ia mai e apono aku keia Aha i kela palapala, ua aponoia.
Heluhelu ia mai he palapala hoopii no Helani me Kailua, ia J. Waiamau e noho hou no i Kahu no ia mau kipahai. Noi ia mai e apono aku keia Aha, a ua aponoia.
Noi mai o Waiamau, e hooponoponoia na palapala kahea kahu ma kahi o elua makahiki. Noiia mai i Komite a hoike mai i ka la apopo i olelo hooholo ; ua aponoia. Kohoia o Waiamau.
Hapaiia ka Heluhelu Haawina.
Na Papaula i heluhelu mai i kona haawina. “Heaha ka mea i like ai ka olelo a ke Akua me ke ahi a me ka hamare?”
Na H. Manase i heluhelu mai i kona haawina. “Heaha ka hana ma ka poe i okiia mai ka ekalesia aku?”
Hapaiia ka hana no ke Kula Kaikamahine o ka mokupuni o Hawaii.
Heluheluia na palapala e pili ana no ke Kula. A na Mr. Luhiau i wehewehe nui mai no na mea e pili ana ia Kula. A olioli kekahi makua i na mea e pili ana no keia kula ; a e hoouna ana oia i kana kaikamahine i kela kula, a me kona manawalea he $15.00 dala.
Noiia mai e hoopanee keia aha a halawai hou i ka la apopo hora 9, aponoia. Pule o Kapule.
Poalima la 13. Halawi hou keia aha ma ka hora i hoopaneeia. Malamaia ka aha i ka hapalua hora haipule. Heluhelu ia ka moolelo a aponoia.
Hapaiia ka hana no na Elele e hele ai i Honolulu i ka malama o Iune.
Noiia mai i Komite e noonoo i na elele kupono. Kohoia ka Lunahoomalu a me ke Kakauolelo.
Noi ia mai e noonoo keia aha i uku no na elele, a ua hooholoia. O na ekalesia 8 malalo o keia Ahahui, e kau pakahiia na dala elua me hapalua ($250) ua aponoia.
Hoike mai ke Komite i na Elele kupono, oia o Kapule, a me Palea ; ua aponoia.
Hapaiia ka hana i Komite Hoike Kihapai. Ua kohoia o J. Waiamau, apono ia
Hapai ia i Komite e hoike aku ai i ka hana a keia aha i ke Ahahui nui ma Honolulu. Ua kohoia ke Kakauolelo a ua aponoia.
Hapaiia ke Kumumanao 12. Na Ekalesia Kahu ole. Na Pogue i hoike mai i na ekalesia kahu ole he 14 ka nui, mai Hawaii a Kauai. No Fatuhiva 3, no Maikonisia 10. Auhea lakou? E nonoi kakou i ka Haku nona ke kihapai e hoouna i na paahana. A ua waihoia mai he olelo hooholo.
Hooholoia. Ma ka manao o keia Aha ; Ke paipai aloha aku nei i na hoohanau o na ekalesia kahu ole malalo o keia Aha, E huli ikaika me ka nonoi aku i ke Akua e kokua mai e kahea i kahu no lakou ma keia hope aku. noiia mai e apono i ka olelo hooholo. ua aponoia.
Hapaiia ka noonoo ana i Nupepa Kariatiano. A i ka noonoo ana o ka nupepa Ka Lau Oliva ; a ua kohoia i Komite e hoike mai i Olelo Hooholo. No ka mea, ua hoikeia mai e ka makua Pokuea ; Ua hooholo ka Ahahui Euanelio o ka mokupuni o Oahu i ka nupepa Ka Lau Oliva, i Nupepa Karistiano no ia mokupuni ; a ua waiho mai ia Aha i ka manao, no ka pono i na Ahahui e ae o keia mau Pae Moku, e huipu aku me lakou ma keia nupepa, ma ka hoolaha ana, a me ka hoomahuahua hou ae paha i kona kino ; a me ka pono ke hoolilo i nupepa puka hebedoma, a nolaila,
1–Hooholoia. Ma ka manao o keia Aha, Kea e oluolu aku nei e huipu aku me ka mokupuni o Oahu, e hooulu, a e hoolaha’e iwaena o na kihapai malalo a keia Ahahui i keia nupepa.
2–Ke ae aku nei keia Aha i ka lilo ana o na Kahu Ekalesia a me na Kahukula Sabati i mau Luna no keia pepa.
3–Ma ka manao o keia Aha, he pono e hoopukaia keia nupepa i kela a me keia hepedoma, a e hoomahuahua houia ae kona kino, a pela no hoi kona auhau no ka makahiki.
H. Manase,
Komite T.N. Simeona,
S.W. Papaula,
Noiia mai e hoomaha a hoi mai i ka hapalua o ka hora 2. Ua aponoia, pule e Luhiau.
Hoi mai’ka aha i’ka pau ana o ka hora hoomaha. Pule o Palea.
Hoike a ke Komite Imihana no na Palapala Kahea Kahu. Ke nee nei ke ao imua ma ka malamalama, a me ka noho naauao ana, e wehe ae ana i na pani o ka pouli o keia ao naauao ; a ke ao mai nei ia kakou e hele imua ma ka malamalama o ke ao Karistiano Oiaio, e apo ana i na pomaikai he nui o ka noho kuikahi lokahi kaulike palena ole ;–A ke alakaiia nei keia Aha, e nana pono i na mea a pau maloko o kona mau palena, a e hooopololei ae i na mea kekee iloko ona. A no ka mea hoi, ua ike nui ia ka noho mau ana o na ekalesia malalo o keia Aha, e hana i na palapala kahea kahu kue i ka palapala kahea kau i hooholoia e ka Ahahui Euanelio o ka Pae Aina Hawaii ma Honolulu, i hooholoia a paiia ma ka Buke Lawe Lima e waiho nei, a no ia mea hoi, he mea pono i keia Aha e hoopau ae i keia pohihihi, a e ao aku i na ekalesia.
1–Hooholoia. Aole he Oihana hoaua ka kakou e noho ai mamuli o na kauoha a kanaka, aka, he Oihana Lani ka kakou.
2–Hooholoia. Ke hoole nei keia Aha, aole e ae i kona mau Kahu e noho hou malalo o na palapala kahea kahu i kau palena ia ka manawa.
3–Hooholoia. Ke lawe nei keia Aha, a hoapono i ka Palapala Kahea Kahu i hooholo lokahiia a ka Ahahui Euanelio ma Honolulu, a i ikeia ma ka Buke Lawe Lima e wiho nei.
4–Hooholoia. Ke ae aku nei keia Aha i na Ekalesia a pau malalo iho o kona malu, E hoolohe i na olelo ao a keia Aha, i na manawa a me na wahi a pau a lakou e hana ai i na Palapala Kahea Kahu, e hahai lakou mamuli o ke alakai ana o ka buke lawe lima i paiia i ka makahiki 1868 ; a ke haiia aku nei na ekalesia i hana i na palapala kahea mamua aku nei, ua hoopau loa ia ke kau palena ana i ka manawa e noho ai na kahu malona o na ekalesia malalo o keia aha. Ua aponoia ka hoike a ke Komite.
Hoike hou mai ke Komite no ka palapala hoopii o Pukaana, o kekahi hapa e kue ana i ko lakou kahunapule ia Rev. H. Manase.
He mea kaumaha ka ike ana e maalo pinepine ana na palapala hoopii kue a kekahi hapa o na hoahanau o keia ekalesia i ko lakou kahu, a ua noho no ka Aha e hoolohe i ua mau palapala hoopii la, a ua ao aku i ke kahu a me ua hoahanau kue iaia e noho hoahoa imua o ka noho Ahi o Kristo, a ulu ae la ke aloha iwaena o ke kahu a me na hoahanau kue iaia, a o ka pau no ia o keia noho mokuahana ana. Aka, aole nae pela, ke ulu mau nei ke kue ana, a o keia ka palapala hoopii e ike hope ia nei a ma ka nana ana o ko oukou Komite, ua manao lakou, he oiaio ole na mea he nui i ikeia ma ia palapala. O ka lua, aole o na hoahanau wale no kai ikeia ma ia palapala; o ka poe hoahanau ole, a me ka poe i kapaeia kekahi i kakau inoa me ia palapala, no ia mea, ua kanalua ko oukou komite no ka oiaio ole o keia palapala hoopii. Aka, ea! eia na mea nui e noonoo ai keia Aha:
1. Ua hanaia anei keia hana kue, a me kona ekalesia e ke Kahu? Ua hanaia paha me ka manao ino i hoomakaukau e ia ma kahi malo ? He mau pohihihi keia e hiki ole i ko oukou Komite ke wehewehe moakaka lea, koe nae na hooholo manao ana o keia aha i na manawa a pau i hiki mai ai na palapala hoopii, a i hoohioloia e ka Aha no ka oiaio ole.
2. He elua mea a keia Aha e minamina nui ai. (1) O ka Ekalesia o ke Akua. (2) O ke Kahu o ka Ekalesia Ke minamina nei kakou i ka mokuahana o ka Ekalesia o Kristo, a he mea ia e poino nui ai na uhane e noho ana ma keia kihapai. A, he mea hoi e ehaeha ai ka naau i ka noho oluolu ole o ke Kahu me kekahi hapa o ka Ekalesia ; a e ulu mau ana ke kue a me ka mokuahana ; a ina pela, e lilo auanei ka inoa maikai o ke kauwa a ke Akua i mea ino ; a ina paha i hoomauia kona noho Kahu ana no keia kihapai, alaila, e mahuahua ae auanei na ino i hooiliia maluna ona, a o ka lilo no ia o kona mau pomaikai a pau, a pau ae la ia o kona nani.
Nolaila, 1. Ua manao ko oukou Komite, e hoomauia ko H. Manase noho Kahu ana no keia kihapai, a hiki i ka halawai o Sepatemaba. 2. A ke paipai aku nei keia Aha ia Manase, a me na hoahanau, e huli pu i Kahu no keia Ekalesia iloko o keia mau mahina. 3 Aia a noho mai ke Kahu hou, alaila, e pau ae kona noho Kahu ana no keia kihapai.
J. Waiamau,
O. Nawahine,
Komite, G.N. Meemii
M. Kaholoaa,
S.C. Luhiau,
Noiia mai, e apono aku i ka hoike a ke Komite ; ua aponoia.
Hapaiia ke kumu manao,––Ka hale noho a na Kahu. A ua kuka nui ka Aha me na manao momona, a oluolu. A na kauohaia na Ekalesia, e kukulu i na hale kupono ano maemae, a ua kohoia i komite ao keia hana, oia o J. Waiamau, S. W. Papaula, O Nawahine. Ua aponoia.
Noiia mai, e hoopanee keia Aha, a halawai hou ma ka la apopo, hora 8, ua aponoia.
Pule ka Luna Hoomalu.
Poanono la 14. Halawai hou keia Aha i ka hora i hoopaneeia. Malama ka Aha i ka hapalua hora haipule. Heluheluia ka moolelo a aponoia.
Na H. Manase e malama aku i ka Ekalesia o Kapalilua ; a na S. W. Papaula e malama aku i ka Ekalesia o Kona Waena, ke kaawale aku ke Kahu, ke maopopo kona hele ana ; ua aponoia.
E hoouna aku i ke ano nui o ka moolelo, e paiia ma ka nupepa Kuokoa ; ua aponoia.
Olelo Hooholo. Ke haawi aku nei keia Aha i ko lakou aloha nui a me ko lakou mahalo ana i na hoahanau o ka Ekalesia o Pukaana, no ko lakou kokua pono ana mai i na lalo o keia Aha, i na mea e oluolu pono ai ke ola kino.
Noiia mai, e hoopaee keia Aha, a halawai hou ma Kealakekua, i ka la 23 o Sepatemaba, Poakolu Eha, A. D. 1874, hora 10 o ke kakahiaka ; ua aponoia.
Noho iho la ka Aha he manawa haipule, a paipai manao.
Hookuaia ka Aha, me ka pule a ka Lana Hoomalu. S. W. Papaula,
Kakauolelo.
Napoopoo, S. Kona, Mar 17, 1874.
Ka Moolelo o ka Ahahui Euanelio o Hawaii Akau.
Halawai ka Ahahui Euanelio o Hawaii Akau ma ka hale pule Hoole Pope, ma Waipio, Hamakua, ma na la 5 a me 6 of Maraki, M. H. 1874. No ka nui o ka ua ma ia mau la, aole i hiki mai kekahi hapa.
Mahope iho o ka noho ana o Pikanele i Lunahoomalu no ka manawa, ua kohoia o S. Kaawa a me Haae, i mau Komite e hoomaopopo i na hoa e hiki mai ana, a penei ka laua hoike ana:
Kihapai Kahu Elele
Hamakua Hikina S. Kaaua S. Kamelamela
" Waen a Pikanele Kamalimali
" Komohana Haae Mr. Halemanu
Waimea Aole Kahu Z. Paakiki
Kohala Hema Aole Kahu Aole Elele
" Komohana Aole Kahu Kahani
" Akau Aole Kahu Aole Elele
Ma ka balota na kohoia o Haae i Lunahoomalu, a o Z. Paakiki i Kakauolelo. Komite imi hana, o Bicknell, Halemanu, Kahananui. Komite imi haawina, o Bicknell, Kaana, Kamalimali.
Hoike mai ke Komite imi hana. 1. Hapalua hola haipule. 2. Hoike kihapai. 3. Heluhelu haawina. 4. Koho i na elele holo i Honolulu. 5. Na palapala hoopii.
Na Bicknell i heluhelu mai i kana hoike kihapai no Hamakua waena. Na Haae ke kihapai o Hamakua komohana.
Ua kohoia o S. Kaauau i Komite e paipai i na hoahanau no ka hale o ke Kahu. Na ke kakauolelo i heluhelu no ke kihapai o Laiana.
Noi mai o Kaaua e hoopanee a ka hola 10 apopo, aponoia. Pule o Kamalimali.
La Hana Elua.––Hapalua hola haipule. Heluhelu ia ka moolelo o ka la i hala a apono ia, me na hoololi uuku.
Hoike waha mai o S. Kaaua no ke kihapai o Hamakua hikina. No ka ulu nui ana mai o ka hoomana Moremona. Ua haawiia elua pule. A ua hooholoia e hui pu ke Kahu me na hoahanau kupono e haipule.
Heluhelu mai ka haawina a Rev. L. Laiana. 1 Petero 3:18-20. Noi mai o S. Kaaua e hoouna i ka nupepa Kuokoa, ae ia. Heluhelu mai o S. Bicknell i kana haawina. Oihana 3:19 no na manawa hoomaha. Noi ia mai e pai ma ke Kuokoa, a ua hooholoia.
Na C. Haae no kona haawina. Ua like anei ke kanawai o ke Akua me na kanawai o ka aina, e hookaawale ana i na mea mare ke loaa kekahi i ka mai hebera?
Z. Paakiki. Heaha la na mea nui e iini ai i hoopai ia ka poe kalohe? Heluhelu ia.
Heluhelu mai o S. Kamelamela i kana haawina. Pehea ka like ana o ka paakai i oleloia ma Makaio?
Hoike mai ke Komite imi haawina ua makaukau na haawina, a ua aponoia.
Na Haawina.
1. Pehea la e loaa mai ai ke kokua ana o ka Uhane Hemolele i na Aha halawai a kakou?
Laiana.
2. He mau hoike anei e waiho nei e akaka’i ua hanauia o Iesu i ka la 25 o Dekemaba?
Bicknell.
3. Pehea la e lilo ai na Aha halawai haipule a kakou i mea makemake nui ia mai e na kanaka?
Kaaua.
4. Ke nee nei anei na Ekalesia imua ma ka noho maemae ana?
Haae.
5. Pehea la e hiki ai ke hoolilo i na hoahanau hana ole i poe lawelawe na ka Haku?
Kamelamela.
6. Na mea keakea i ka holomua ana o ko ke Akua aupuni?
Welewele.
7. O ka la Sabati, ka la hope anei ia o ka hebedoma, ka la mua paha?
Paakiki.
8. Ka Nupepa a me kona waiwai.
Halemanu.
E mau no na haawina mua.
Kohoia na Elele e holo i Honolulu ma ka halawai o Iune. O Waiohinu, no Hamakua, me J. Welewele kona hope. Z. Paakiki no Kohala, me D. Waiau ka hope.
Ua noi ia mai e ae aku keia Aha ia Waiohinu, e holo i ke Kula Kahunapule e like me ka ae ana o ka Aha Euanelio apana o Hamakua. Aponoia.
Noi ia mai e hoopanee a ka hora 1, ae ia, pule o Ohakee.
Halawai ka Aha ma ke Ahiahi, pule o Waiohinu.
Na Palapala Kahea.
Heluhelu mai ka Lunahoomalu i ka palapala kahea o Kohala Komohana ia Rev. S. C. Luhiau, i Kahu no lakou. Ua ae ka Aha mahope o ke kuka nui ana. Ke ae mai o Rev. S. C. Luhiau.
Palapala kahea no Hamakua Komohana ia C. Haae i Kahu no lakou. Ua aponoia me ka ae mai o C. Haae. Ke paa ka hale o ke Kahu.
Ua kohoia o S Kaaua, G. W. D. Halemanu a me Kahananui i Komite e noonoo ina mea nana e hooko keia hana. A penei ka hoike ana:
1. Rev. E Bond, hai ao.
2. Rev. S. C. Luhiau, olelo ao i ka Ekalesia.
3. Rev. J. Bicknell, Kahu.
4. Rev. S. Kaaua, lima aloha.
Na G. W. D. Halemanu e hoike aku no ka pau o ka hale.
Noi mai o S. Kaaua e lilo o C. Haae i komite e hoike aku i na hana a keia Aha i ka Aha nui ma Honolulu, ma ka halawai o Iune, aponoia.
Noi ia mai e hoopanee a hui hou ma Eleio, Hamakua waena, a mahope o ke kuka nui ana, na ae ia. Hookuu ia ka halawai me ka himeni, a me ka pule a S. Kamelamela.
Z. Paakiki, Kakauolelo.