Ka Nupepa Kuokoa, Volume XIII, Number 26, 27 June 1874 — Page 4
| This text was transcribed by: | Dawn Oshima |
| This work is dedicated to: | Awaiaulu |
Ka Nupepa Kuokoa
KE KILOHANA POOKELA NO KA LAHUI HAWAII.
Then Hoist the Sails.
Pure Dimonds p 34.
1.
Ninau. Heaha la kou moke e,
Ma keia holo ou?
Pane. Ka halelana paa maikai,
A oia no Iesu.
N. Ke awa aha e holo nei
Kahi e malu ai?
P. Ierusalema pomaikai,
Kauhale ao loa’e.
Cho. E kau na pea i holo lea,
E hoe na sela a pau;
Aui ka po, kokoke no
Ke kahakai mao
2.
N. Heaha la ke panana,
Ke kuhi pololei?
P. Ka Buke oiaio no,
Baibala maikai e.
N. Ka heleuma e hai mai,
Ka mea e paa ai.
P. Ka oli me ka hilinai
I kahi iluna’e.
Cho. E kau na pea, &c.
3.
N. Na kaula huki e hai mai
I hukiia na pea?
P. Ka lelepau, ka nana mau
I ko Iesu la kea.
N. Heaha ka makani e
E holo nahe ai?
P. Ke aloha, pule, hoomaikai,
Ka Uhane mana e.
Cho. E kau na pea, &c.
4.
N. Ehia ohua maluna’e
O ua moku lai?
P. Kausani a kausani hou,
A piha ole nae.
He holo oli nei makou,
Pomaikai wale e!
E ee oukou a holopu
A malu a maha’e.
Cho. E kau na pea, &c.
HAWAII.
HAAWINA KULA SABATI
KA HAPAHA EKOLU O 1874.
HELU 2, SABATI IULAI 12.
KUMUHANA—Ka Mana o Iesu.
PAUKU BAIBALA. Mareko 1: 16–27.
16 I kona hele ana ae mai ka moanawai o Galilaia, ike mai la oia ia Simona, a a me kona kaikaina o Anaderea, e kuu ana i ka upena ma ka moanawai; no ka mea, he mau lawaia laua.
17 I mai la Iesu ia laua, E hahai olua mamuli o’u, a e hoolilo wau ia olua i mau lawaia kanaka.
18 Haalele koke iho laua i ka laua mau upena, a hahai aku la iaia.
19 A hele iki ae la ia, ike mai la oia ia Iakobo a Zebedaio, a me kona kaikaina o Ioane, iluna pu laua o ka moku e hono ana i na upena.
20 Kahea koke mai la ia laua; a haalele iho la laua i ko laua makuakane, ia Zebedaio, iluna o ka moku, me na kanaka puaua, a hahai aku la laua iaia.
21 Hele ae la lakou i Kaparenauma, komo koke ae la ia iloko o ka halehalawai i ka la Sabati, a ao mai la.
22 Mahalo iho la na kanaka i kana ao ana, no ka mea, ao mai la oia ia lakou, me he mea mana la, aole like me ka poe kakauolelo.
23 A maloko o ko lakou halehalawai kekahi kanaka i loohia e ka uhane ino, a walaau ae la ia;
24 I ae la, Ea, heaha kau ia makou, e Iesu no Nazareta? I hele mai nei anei oe e luku mai ia makou? Ua ike no au ia oe, o oe no ka mea hoano a ke Akua.
25 Papa ae la Iesu iaia, i ae la, Hamau, e puka mai oe iwaho ona.
26 Hookaawili iho la ka uhane ino iaia, walaau ae la ia me ka leo nui, a puka mai la iwaho ona.
27 Mahalo aku la lakou a pau, nolaila, nalu lakou ia lakou iho no, i ae la, Heaha la keia? Heaha la hoi keia ao hou ana? No ka mea, me ka leo mana no oia e kauoha aku nei i na uhane ino, a hoolohe io aku no lakou iaia.
PAUKU ALAKAI, pauku 27. Hoopaanaau
MELE Him 101, Leo-Waitland, C. Sacra, p 230,
2 Ke Kaula, Kahuna, Moi,
Ke Ola Akua mau no;
Ma kona inoa maikai
E pelu na kuli a pau;
Ka Mua, ka Hope Iesu,
I make a ola mau no,
I malu mai ai ko ke ao,
I pio mau ai ko ka po.
PULE, i lilo kakeu i poe lewale kanaka, i komo aui na kanaka, na kamalii, iloko o ka upena o ka Euanelio.
NA NINAU A NA KUMU I NA PAPA
P. 16. Mahope o ko Iesu bapetizeia, ua ahaia oia p. 12. “Mai hea aku.” Iesu a i Galilaia? Mahope o ke aha? p 14. Haiolelo Iesu, heeha kana kauoha mua? p 15. I ko Iesu hele ana ma ka moanawaihea? Aia mahea ia? Owai kekahi mau inoa? Luka 5:2. Ioane 21:1. Simona, Anaderea, Owai laua? Owai kekahi mau inoa o Simona? Ioane 1:40, 42 Heaha ka laua oihana? Ua helawai e anei laua me Iesu mamua? Ioau. 1:37-42. Elua wahi e ae i kakauia ai keia halawai ana, Mahea? Mat. 4: 18, 19. Luka 5: 1-3. Heaha ka mea kupanaha i haule ia Mataio laua o Mareko, ua kakauia nae e Luka? Luk. 5: 4-7.
P 17, 18. Ka Iesu kauoha, heaha? Ua hooloheia anei? Ke ano o ka lawaia kanaka, heaha? Pili anei ia oukou?
P 19, 20 Owai na mea hou elua i loaa ia Iesu? E aha ana? Kana kauoha ia laua—Ua ae anei laua? Owai ko laua mau makua? Owai ka makuahine? Mar. 15:40.
P 21, 22. Kaperenauma, heaha? mahea? ka hana malaila. Ua mahaloia ka Iesu ao ana no ke aha? He mana io anei ka Iesu olelo? A pehea ka olelo a ka poe kakauolelo?
P 23-26. Ehia mea iloko o keia mau pauku?
1 He kanaka i loohia e ka uhane ino.
2 Kona walaau a hooho ana, a ninau ana.
Heaha kona ninau ia Iesu? Ua ike anei na daimonio ia Iesu? Makau hoi anei? Nohea mai na ohane ino? A makau o aha Iesu? Pahea Iesu iaia? A me ke aha i puka mai ai ka uhane ino?
P 27. Pehea aku la kanaka? Nana ia Luka 4: 33-36.
MELE, Him. 200. Leo-Vesper, C. Sacra, p 118.
1 Auwe ka poe hoopaanee,
A mihi ole no;
Ua puni i ka wahahee,
A make mau lakou.
3 Alia! alia! mamuli no!
Me e na alalai;
He mau pahele a ka po
E make nui ai.
NA NINAU A KE KAHU.
PAPA MAKUA. Ua ahaia Iesu mahope koke o ko Ioane bapetizo ana iaia? Heaha ka Mareko i kakau ai no ko Iesu hoowalewale ia e Satana, aole i kakau ia e Mataio? Heaha hoi ka i haule ia Mareko i kakauia e Mataio me Luka? Ua’haia hoi Ioane? No ke aha oia i hooleiia’i iloko o ka halepaahao? Mahope o ko Iesu hoowalewaleia ana, a lauakila ana, hele oia ihea? Ma ka moanawai hea kekahi halawai nui o Iesu me kanaka? Pehea kona paipai ana i na kanaka me kamalii? Ua mihi anei kekahi poe, a manaoio i ka eua@elio?
NA KEIKIKANE. Ua paanaau anei ke kumuhana a kela Sabati? Heaha? Owai ka mea nui a Ioane i bapetizo ai? Owai ka i hoowalewale ia Iesu? mahea? pehea ka loihi? Owai ka i lanakila? Iesu? Satana? Nawai i hoolei ia Ioane iloko o ka halepaahao? Owai na haumana mua a Iesu i koho ai?
NA KAIKAMAHINE. Kokua mai, aole paa pono i na keikikane; hai mai ia poe eha, na inoa, na makua, ka oihana. I ko Iesu kahea ana, e hahai mamuli ona, ua ae koke anei lakou? Aole anei oukou i kahea pinepineia e ku, a hahai mamuli o Iesu? Ua ae koke anei oukou? No ke aha ke kanalua ana? Ua mihi anei keia poe mua mahope, a haalele ia Iesu, a hoi hou i ko ke ao nei? Ua ae kekahi poe o oukou mamua e lilo i poe haumana na Iesu, a pehea? Ke hoomau nei anei oukou i ka hahai ana mamuli o Iesu? Ua haalele anei? Ua haalele paha kekahi poe, na komo iloko o ka lealea, ka hulahula, &c. Pono anei ia?
NA POKII. Hai mai i na haumana mua eha. Petero, Auaderea, Ioane, Iakobo. He poe lawaia lakou hoowahawaha anei Iesu i ka poe lawaia, ka poe mahiai, ka poe ilihune, ka poe liilii, e like me oukou? Makemake anei oia e lilo oukou i poe haumana nana? Ahea? He kanaka pupule, loohia i ka uhane ino, a hana ino loa ka uhane ino i na kanaka nei, hookaawili, hoohina, hoolei iloko o ka wai, iloko o ke ahi, nawai i kipaku aku i ka uhane ino? He uhane ino anei iloko o kamalii? Ae, a alakai ia lakou iloko o ka hookuli, a i na wahi ino na wahi inu rama, a hulahula, a iloko o na halepaahao ma keia ao, a iloko o ke ahi ma kela ao; nawai e kipaku aku? Na Iesu? Ae, e noi aku oukou ia Iesu e kipaku aku i ka uhane ino mai loko aku o oukou.
KE KULA A PAU. I ko Iesu kahea ana ia Petero ma, heaha ka hana mana nui a Iesu i hana’i a weliweli loa Petero, a hooho, He kanaka hewa au, e hele aku oe mai o’u aku nei? A ma ia hana mana, ua akaka loa anei ia Petero ko Iesu ano Akua? Owai ka Lawaia kanaka mua? Hoohalike anei Petero ma me Iesu? Ma ka la hea i komo nui mai ai kanaka me kamalii iloko o ka upena a Petero ma i hookuu iho ai iloko o kahi hohonu o ka hoomaloka? Owai na lawaia kanaka i keia wa? na kane, na wahine, na kamalii, na kahuna, na haiolelo, na kumu kula Sabati. He poe lawaia kanaka anei kakou a pau? Heaha na upena? me ke aha hoi e loaa ai? Ina a kulokoe mai ka Uhane Hemolelo, loaa anei na ia, ka poe komo mai, &c? Heaha ka mea keakea nui i ka huli ana mai o kanaka, o kamalii? Pehea e mahikiia ai ua uhane ino mei? Mana anei Iesu ma kana olelo? E paulele nui i kona mana.
MELE. Him. 183, Leo-Oto.
1 E ka Uhane Hemolele,
Me kou mana e iho mai;
Hooauheo i ka pouli
Mai o makou aku nei;
Hooakaka i kau pono,
Pale i ka naaupo,
Kinai i ko makou hewa,
I ole ai e ulu hou.
PULE i kipaku ia aku na uhane ino, i huli nui a hahai nui na kanaka, na kamalii mamuli o Iesu.
Haawina Kula Sabati no Iulai 19 Mareko 1: 38-45. Ka Lepero i hoola ia.
HAWAII.
Halawai Makahiki o ka Ahahui Euanelio o Hawaii nei.
(Koena mai kela pule mai)
HONOLULU, Iune 2d, 1874.
Ka hoike hapa o ke Komite Imi Kumuhana.
1 Ka hapalua hora haipule, i ka hoomaka ana i ka hana i kela la keia la.
2 Heluhelu Haawina a ua makua, mahope o ka pau ana o ka wa haipule o ka po 3, 4, 5, 6, o kela me keia pule.
3 Na Hoike Kihapai o na Aha Mokupuni.
4 Na hoike o na hana a na Aha mokupuni.
5 Na hoike Helu Ekalesia.
6 Ke Ola o na Kula Kaikamahine.
7 Ka hana a na Kahu waiwai o na Ekalesia.
Hooholoia, e hapai ka hana ma ke kumuhana ekolu, na hoike kihapai o na Aha mokupuni.
Na Rev M Kuaea i heluhelu mai no na Kihapai o ka Aha Lunakahiko o na moku o Maui.
Na Rev T. Koana i heluhelu no na Kihapai o ka Aha o Hawaii Hikina.
Na Rev J H Mahoe i heluhelu mai no na Kihapai o ka Aha o Kauai.
Kumuhana 5. Na hoike helu o na ekalesia.
Na Messrs Rev J Hanaloa, J B Hanaike, J H Pahio, T Koana, D Puhi, M Kuaea, G Puuloa, J Manuela, S Waiwaiole, J H Mahoe, heluhelu mai lakou i ka papa helu o ko lakou mau ekalesia ponoi. Hoopanee, apopo hora 9 A M.
Iune 3, 1874
Halawai ka Aha e like me ka hoopanee ana. Malamaia ka hapalua hora haipule.
Hapaiia ke kumuhana elua.
Na Rev T Koana i heluhelu mai i kana Haawina. “KA HEWA O KE KAUA A ME KA MEA E PAU AI.” Ma ke noi e paiia keia palapala ma ka Nupepa Kuokoa.
Ma ke noi, ua hoopaneeia apopo, hora 9 A M. Pule o Rev E Kekoa.
Iune 4, 1874
Halawai ka Aha e like me ka hoopanee ana. Hoomaka ka hana e like me ka hana mau.
Kumuhana 4. Na Hoike o na hana a na Aha mokupuni.
Na Rev T Koana i heluhelu i ka hoike o na hana a na Aha o Hawaii Hikina.
Na ke Kakauolelo i heluhelu i na hoike o na Aha o Hawaii Akau, a me ka Aha Lunakahiko o Maui.
Na Rev J Kekahuna i heluhelu mai i ka hoike o ka Aha o Oahu.
Na Rev J H Mahoe i heluhelu i ka hoike no ka Aha o Kauai.
Na ke Kakauolelo Hawaii i heluhelu i na hoike papa helu o na kihapai o Lihue, Waioli, Waihee, Wailuku.
Na Messrs Rev W P Kaawa o Waianae, S P Heulu o Kaanapali, S Kamakahiki o Keanae me Huelo, D Kekiokalani o Wailupe, heluhelu i na papa helu o keia mau ekalesia. Hoopaane apopo hora 9 A M. Pule o Rev S E Bihopa.
Iune 5, 1874
Halawai ka Aha e like me ka hoopanee ana. Hoomaka na hana e like me ka mau.
Heluhelu mai o Rev s E Bihopa i ka hoike o ke Kulanui o Lahainaluna, a me ka papa helu o ka Ekalesia.
Hoike mai ka Puuku o ka Papa Hawaii i kana Hoike Puuku no ka makahiki hookahi. Kohoia he wahi Komite e nana pono i ua hoike nei. Rev S E Bihopa, Rev. M Kuaea, Rev J H Pahio.
Heluhelu mai o B W Paleka i ka Hoike Makahiki a ke Kakauolelo o ka Papa Hawaii, no ka Oihana Kuloko a me Kuwaho. Koho ka Aha ia Messrs Rev J D Parisa, S Kamakahiki, J N Paikuli, i Komite e nana i ka hoike a ke kakauolelo o ka Papa Hawaii.
Hoopaaneeia ka hana, apopo hora 9 A.M. Pule Rev S Kamakahiki.
Iune 6, 1874
Halawai ka Aha e like me ka hoopanee ana. Hoomaka ka hana e like me ka hana mau.
Heluhelu mai ke Kakauolelo i ka palapala, mai ke kumu kula o na kaikamahine ma Kawaiahao, e ae uku keia Aha, i keia Keena i wahi e hoike ai ke kula kaikamahine? Ua ae ka Aha.
Hoolaha mai ka Lunahoomalu, e halawai akea ana, ka poe haole wai-ona o Honolulu, ma ka hora 3, apopo. P.M. (Sabati.) ma Kawaiahao nei; a e hui pu aku keia Aha ma ia halawai.
Na ke Kakauolelo elua ka i heluhelu i aa hoike helu o na ekalesia o Siloama, Kohula Hema, a me Waimea.
Hooholoia, e koho i ke Puuku a me ke Kukauolelo o ka Papa Hawaii; a me na lala o ka Papa akahi e puka ana i keia makahiki.
Ma ke noi ana o ka Aha, ua kohoia he komite, nana e imi i na lala no ka Papa e puka ana. Rev. H. H. Paleka, Rev. E. Kekoa, Rev. J. B. Hanaike.
Hapaiia ke koho ana ma ka balota, i ka Puuku, a me ke Kakauolelo o ka Papa Hawaii. A ua kohoia E.O. Holo. Esq ka Puuku; a me Rev. J. F. Pogue i Kakauolelo no ka Papa Hawaii.
A ma ka balota ana, ua kohoia Rev. J. D. Parisa, Rev. A. O. Polepe, Rev. S. C. Damon, Rev. J. N. Paikuli, Rev. B. W. Paleka, Rv. J. Waiamau, Rev. H. Manase, Rev. H. Binamu, Hon. W. L. Moehonua, no ka papa e puka ana.
Kohoia o A. F. Judd, i pani hakahaka o Kauka G. P. Judd, ka i make, ma ka papa 2.
Kohoia o Rev. S. Waiwaiole i pani hakahaka, no Rev. S. W. Nueku, i make, ma ka papa 3.
Heluhelu mai Rev. J. Kealoha, o Waikapu, Rev. J. N. Paikuli o Waialua, Rev. S. Paaluhi o Kalihi, Rev. S. W. Papaula o Kealakekua, i ka Papa Hoike helu o ko lakou mau ekalesia.
Ma ke noi, na hoopanee ka Aha, a ka Poakahi, hora 9. A. M. Pule Rev. J. B. Hauaike.
Iune 8, 1874
Halawai ka Aha e like me ka hoopanee ana. Hoomaka ka hana e like me ka haua mau.
O keia mau Kahunapule kai heluhelu i ka Papa hoike helu o ko lakou mau ekalesia; Rev H. H. Paleka o Kawaiahao; Rev. J. Waiamau o Kailua a me Helani; Rev. E. Kekoa o Kahana; Rev. G. B. Kaonohimaka o Kekaha; Rev. L. Kaiwi o Honuaula; Rev. J. Waiamau hoi i ka hoike o ka Aha o Hawaii Komohana.
Kumuhana 6. “Ke ola o na kula kaikamahine.”
Ua kuka nui ka Aha no keia Kumuhana, alaila, kohoia i komite nana e noonoo, a hoopuka mai i ka hana kupono e hana’ku ai no na kula kaikamahine, a hoike auanei mai i keia Aha.
Rev. A. Polepe, Rev. G. B. Laimana, Rev. S. Kamakahiki, Rev. J. N. Paikuli, Rev. J. H. Pahio.
Hooholoia. Ma ke noi a Pehu, ua hookuuia oia e hoi no kona pilikia.
Ua hoopanee ka Aha, i ka hora 1. P. M. Pule o S. W. Papaula.
Halawai hou ka Aha i ka hora I. Heluhelu mai Rev. J. Bicknell i ka papa hoike helu o Hamakua waena.
Na ke Kakauolelo Hawaii i heluhelu i na hoike helu o na ekalesia o Hamakua Hikina, a me Hamakua Komohana, a me ka hoike o na kihapai o ka Aha o Hawaii Akau.
Kumuhana 7. “Ka hana a na kahu waiwai o na ekalesia.” Ua kuka nui ka Aha ma keia Kumuhana, me ke akahele.
A kohoia ke Komite, nana e noonoo, a hoike mai i keia Aha. Rev. B. W. Paleka, Hon. S. N. Kakela, Rev. E. Kekoa.
Hooholoia. A pau ka hapalua hora haipule o ka la apopo, e heluheluia ke Kumumanao o Rev. D. Balauina.
Ma ke noi, ua hoopanee apopo, hora 9. A. M.—Pule G. B. Hanaike.
(Aole i pau).
EMOOLE KA MAE O KA NANI!—Ka nani o ke aha ka i mae emoole? Ka nani o ka hoike kula makahiki ma Imiola. Ma kela Iune mak. 73, he hoike oi ia mamua o na hoike a pau loa mamua aku. He mahalo piha loa ka i haawiia aku ia hoike. No ka nui o na kula, o na hana, o ka naauao, ua lilo elua la okoa ma ia hoike. A ma ia mau la elua ua piha loa ka luakini i na haumana me ka poe makaikai. A ua piha hoi lakou i ka olioli. Ewalu kula i akoakoa ma ia hoike, 7 kula aupuni, 1 kula haole. Oia hoi na kula a pau ma Kohala Hema. Nani ia hoike. Naauao ka papa akahi. Ma ka pau ana, ua hooholoia E hoike hou na kula apana o Kohala Hema maloko o Imiola ma Ione 1876.
I ke kokoke ana mai o Iune, 74 ua ikeia, ua emi na kula, ua emi ua haumana. A o ke kula i oi ma kela Iune, ua emi ia mai ke 50 a i ka 25 haumana. A o ka papa akahi, papa oi a naauao loa o ia kula, ua nalo aku la. He mea mau ia o ka puka ana aku o ka papa akahi iwaho o na kula ma ka hoike makahiki. Eia ka mea kaumaha, ua hemo e aku kei papa akahi mamua o ka hoike makahiki. Hemo maikai kekahi hapa, a hemo maikai ole kekahi hapa. Ina nae he pani no keia papa i hemo aku la, ua maha ka naau o ka poe i minamina, aole nae he pani. Aole paha e loaa ana he pani like me ia ma keia hope aku. Aka, malia paha e loaa ana ke kokua mai ka Haku.
Aole make e hoowahawaha i ka poe uuku. Ma ka akoakoa ana o keia mau kula i koe, me ke kula haole hoi maloko o Imiola ma ka la 3 o Iune nei, ua piha ka luakini i na haumana, me ka poe makaikai. Aole i lele loa uku ka nani, kau mai no kekahi mau kukuna o ka nani o Iune 73. Ua hoikeia no na kula ma na mea e pili ana i na kula aupuni, ma ka heluhelu, a kakau lima, a Palapala aina, a Helunaau, a Arimakika, a haiolelo, a heluhelu manao, a mele &c.
Nui na mele a maikai hoi ke mele ana.
Eia na mele i meleia:
Welcome Anniversary Day olelo maoli
Come on Come on, : haole.
The Farmer. : maoli.
Out on the Prairies, : haole.
Never Say I cant, : maoli.
The Mimic Tailors, : :
Come Dear Teacher : haole
O Say will you come : maoli.
The Snow Storm : haole.
A Group of Happy Children : maoli.
The Gathering : haole.
Now we Happy Children : maoli.
Oh that will joyful be : haole.
The Children are weary : maoli.
Our Beautiful Flag : haole.
By and by : maoli.
The Land of Canaan : haole.
Anniversary Carol : maoli.
Nui ka mahalo ana i na mele, nui hoi ka olioli o ka poe i hele mai e nana i keia hoike makahiki.
HAWAII.
Ka ona, na hale kuai rama, na hana hou e pau ai.
Ka ona ka enemi nui ma keia ao. Na hale kuai i na mea ona, me ka poe kuai hoi, lakou na kokua.
Na hale puhi rama kekahi mau kokua, aka, pau wale lakou ke ole ka poe kuai.
Nui na hana i hanaia mamua aku nei, i mea e pau ai ka ona, me na hale kuai i na mea ona. Ma na puali inu wai, a ma na kanawai hoi ka hooikaika ana i kinaiia keia enemi nui. Ua hoaoia na pule, na himeni, na olelo paipai i mea e pau ai, aole nae i pau.
He wahi hana hou i hoomakaia mamua iki aku ma Ohio, ma Amerika Hui.
He ahahui wahine haipule. Eia ka lakou hana. Ma ke kakahiaka, hui na wahine me na kane ma ka luakini e haipule. A pau ia, puka na wahine mawaho a hele ma ka mahele ana i na hale kuai rama, na hotele kuai rama, na hale laau lapaau kuai rama. Hele kekahi hapa, a komo iloko i kekahi hale kuai rama. Hele me ka pepa kakau inoa o ka poe ae e haulele. I na ae koke ka poe kuai e haalele, a kakau i ka inoa no ka haalele i ke kuai, a me ka inu ana, ka pau no ia o ka hana a na wahine. Ina ae ole, a paakiki i ka hoole, noho na wahine ke ae ia iloko o na hale kuai rama, a paipai, a pule, a himeni, a pau na hora elua; a ae ole ka poe kuai e haalele, hoi aku keia hapa a hele mai kekahi hapa e ae, a noho, a paipai, a pule, a himeni. A pela no e hana mahele ai na wahine a po ka la ke lanakila ole. I kekahi manawa, aole po ka la, a ae no ka poe kuai rama e haalele loa i ka lakou hana ino. I kekahi manawa, aole ae ka poe kuai rama e noho na wahine maloko o ko lakou mau hale e pule, e himeni &c. Ina pela, hele na wahine mawaho,, a noho ma na alanui ma ka hau, ma ke anu, a pule, a himeni ma kahi kokoke loa i na hale kuai rama. Pela lakou e hana’i a hala ka la, a hala ka la, a ae ka poe kuai e haalele. A no ka pilikia o na wahine i ka noho mawaho ma ke anu, kukulu na kane i mau hale lewa no lakou. Kokua hoi na kane ma kapule ana ma na luakini. I na hoopii ia na wahine e ka poe kuai rama, na na kane e kokua, a hookaa ‘ku i na lilo. Aole paha i hoopiiia na wahine mamua aku. Lanakila na wahine; 400 hale kuai rama i paniia. Ua hoohiki na ona o hoopau i ke kuai ana, a me ka inu ana; 400 hale ane i haalele. Ua haalele paha i keia wa. Ane pau na kulanakauhale na kaona ma Ohio i ka hoomaemaeia ma ka hoopaaia’na o na hale kuai rama. A ke ala la ia hana wahine ma Inidiana.
Aole o ka haalele wale i ke kuai, a me ka inu rama o keia poe; aka, ua huli mai kekahi poe paakiki ma ka pono, a lilo i poe haipule.
O kekahi kanaka i huhu loa i na wahine, a hooweliweli ia lakou e oli i na poo me kana koi-lipi, ua huli mai oia mahope me ka mihi nui, a lawe i kona koi-lipi a wawahi i na poo o kona mau barela rama, a ninini iho ilalo i ka lepo.
Heaha ka hana a na wahine haipule ma Hawaii nei, i mea e kinaiia’i ke kuai rama, ka inu rama, ka ona? E hui, a noonoo, a hooholo, a hooko aku.
HAWAII.
Mai ku a hooho wale, heahi! he ahi! he ahi!
A, heaha ka pono ke wela ka hale i ke ahi? E noho ekemu ole anei, a pau wale ka hale i ke ahi? Aole paha. E hele me ka noonoo, me kou bakeke wai paha, e kii i ka wai a ninini iho a kii hou a ninini hou; a pela oe e hana mau ai me ka nana ana i kou, aole i ka hai, me ka olelo paha—molowa oe, ku wale ka, a walaau wale, hawawa; hele wale mai, auhea kau bakeke? E hoe oe i kou waa punoi; e hana mau me kou bakeke ponoi. Malama e pau ana ke ahi ia oe.
Nui paha ke kahea ana, ka hooho anu, o mea, he kanaka hewa loa, he inu rama, ona rama, a pela aku; he kauhale ino mao he Sodoma, pono e pau i ke ahi. E hele malie oe me ke akahai, a me kou bakeke wai, kou naau aloha, a piha i ka Baibala, i na himeni maikai, a @ ninini i ka wai o ke aloha o ka Baibala, o ka himeni, o ka pule, maluna iho o ke poo, a o ka naau o ka poe hewa e iho ana i ke ahi pio ole. Hana mau oe. Mamuli pahe, huli mai lakou a pakele i ke ahi.
HAWAII.
E hele ana oe ma ke ala hea?
He mau hoa elua e hele pu ana ma ke ala hookahi mamua a hiki i kahi i manamana’i ke ala, ma ka lima akau kekahi, a ma ka lima hema kekahi. He luna moku manuwa kekahi; a he kanaka kuai kekahi.
Ninau ka luna moku, i ke kanaka kuai. Ma ke ala hea oe e hele ana? Aole au e hele ana. He la Sabati keia; He mea mau ia’u ka hele ole ma ka la Sabati; wahi a ke kanaka kuai. Oia wale iho la no kana pane ana. He wahi neoneo no ia, he mau hale nae malaila. Ku ke kanaka kuai a hele e ike i na kanaka, a e paipai no ka halawai. Olelo oia, aole au he kahunapule, he hoahanau no nae, he kanaka pono, he kanaka aloha ia Iesu, he kanaka malama i ka la Sabati, a he mea pono no ia e malama i keia la, a e hoomana i ke Akua. Pane na kanaka, maikai no ia, ooe ko makou kahunapule no keia la. Aia ko makou luakini uuku, e halawai kakou malaila. Ae no oia, e halawai, e hai i ka ke Akua olelo. Olioli loa na kanaka, ua keiki i kana wehewehe ana i ka ke Akua olelo.
A pau ia halawai, koi hou mai lakou e halawai hou ma ke ahiahi. Ma ke ahiahi ua piha loa ka luakini i kanaka. Kamailio no oia, a pule, a paipai, a ane pau ka manawa, olelo oia; malama ua makemake kekahi o oukou e pule; ina pela, e kulou iho a pule, kulou no lakou, a hoomaka kekahi e pule, a pule oia me ka ikaika, a haalulu kanaka, a uwe.
Pau kapule, lalau ke kanaka kuai i ka lima o ka mea i pule iho, me ka olelo, olioli loa au i ka ike ana ia oe manuei. Kuhi au ua hele aku oe ma keia la Sabati. Aole ka oe i hele. Pane mai oia, oia hoi kona hoa hele, ka luna moku. Mai hele au, ina aole au i lohe i kela hua au. “Aole au e hele ana ma ka la Sabati? Ua noho au, a ua komo au iloko o kau mau halawai elua, a nani kuu olioli ma keia mau halawai.
Hoopili. E na hoahanau e hele pu ana me na hoomaloka; a hiki i ka la Sabati, a koi ia e hele ma ia la, e pane aku. Aole au e hele ana ma ka la Sabati. A e hoopaa loa malaila.
UNUHIIA E HAWAII.
POMAIKAI ke kanaka i hele ole ma ke aoia o ka poe aia.
I ku ole hoi ma ka aoao o ka poe hewa, I noho ole hoi ma ka noho o ka poe haakei.
2 Aka ma ke kanawai o Iehova kona olioli; A ma kona kanawai oia i manao ai i ke ao a me ka po.
NA BUKE
I HOOLAHAIA E KA PAPA HAWAII
ME KE
KUMUKUAI O KELA ME KEIA
BAIBALA HEMOLELE NUI ILI GULA NANI
me na kuhikuhi ma na aoao $12.00
Baibala Hemolele Nui ili eleele kaekae wai gula 5.00
Baibala Hemolele uuku iki iho kae wai gula 8.00
Baibala Hemolele pananaiki iho ili eleele 4.00
Baibala Hemolele ili eleele 2.00
Kauoha Hou ili gula uani me na kuhikuhi 3.00
Kauoha Hou ili eleele kaekae wai gula 1.00
Kauoha Hou ili eleele 75
Kauoha Hou Hapa Haole 75
Lira Hawaii 1848 me ke kanawai 25
Lira Hawaii 1855 25
Moolelo Ekalesia 50
Haiao ili lahilahi 10
Hele Malihini ana 25
No ko ke Akua ano 25
Lira Kamalii 25
Hoike Palapala Hemolele 20
Moolelo o Heneri Opukahaia 25
Hoike Akua 15
Wehewehehala 10
Ninau Hoike ili manoanoa 20
Ninau Hoike ili luhiluhi 05
Kumumua Kula Sabati 20
Buke Lawe Lima 25
He Buke no ka Pope 15
Ui Kula Sabati Helu 3 20
Ui Kula Sabati Helu 4 15
Ui Kula Sabati Helu 5 25
Buke Euanelio a Ionane 10
Himeni Hawaii 1.05
Himeni Hawaii ili nani 1.75
Kumu Leo Mele 10
Kumu Leo Mele ili nani 50
NA KAUOHA HOU PAKEKE.
Ili gula nani 1. 50
Ili eleele kaekae nani 50
Ili eleele 35
KAUOHA HOU PAKEKE ME NA HALELU.
Ili gula nani 1.75
Ili eleele kaekae wai gula 60
Ili eleele 50
Buke Wehewehe Huaolelo Baibala, elua ano
Buke Wehewehe Ano Mataio
NA HALELU PAKEKE.
Ili Gula nani 50
Ili eleele kaekae wai gula 30
Ili eleele 20
Ka Hae Hoonani (Buke Mele) 25
EIA NA BUKE HAAWI WALE.
PALAPALA LIILII—
Helu 4—Makemake anei oe i ke o’a?
Helu 6—E hele i o Kristo la.
Helu 7—Ka hoi ana mai o ke Keiki Ubauha.
Helu 11—No ka hoohiki wahahee i ke Akua.
Helu 16—Ka Eehia ana o ka Ahaaina a ka Haku a me ka Bapetizo ana.
Helu 17—Mai hana ino i na holoholona.
Helu 18—No ka mahi ana, kuai ana a me ka inu ana i ka Awa.
Ka Davida Malo Kumumanao.
Ka Moolelo o Batimea Puaaiki.
Aia ke keena kuai buke o ka Papa Hawaii me ka kuina o Alanui Betela me Alauui Kalepa, e kokoke ana i ka Hale Leta.
J. F. POKUE.
Kakauleta o ka Papa Hooko o ka Ahahui Euanelio o ke Hawaii Pae Aina.
KA NUPEPA “KUOKOA!”
Hoopuka mau ia
I KELA POANO KEIA POAONO.
$2.00 no na mahina Umikumamalua
$1.00 “ “ “ Eono.
ME KA HOOKAA MUA MAI.