Ka Nupepa Kuokoa, Volume XIII, Number 27, 4 July 1874 — Page 1
| This text was transcribed by: | Shayvis |
| This work is dedicated to: | Maleah Oku |
Ka Nupepa Kuokoa
KE KILOHANA POOKELA NO KA LAHUI HAWAII.
BUKE XIII. HELEU 27 HONOLULU, POAONO, IULAI 4, 1874.
E PAU NA PUPUPU KAHIKO!
E pani me na Hale Laau!
PAPA! PAPA! PAPA!
O KELA ME KEIA ANO,
---A ME---
NA LAKO KUKULU HALE
O KELA ME KEIA ANO, MA KA
PA-PAPA O S. G. WAILA MA!
---KIHI O---
ALANUI PAPU me ALANUI MOIWAHINE, no ke Kumukuai HAAHAA
LOA! ae like ka nui me ka makemake.
-----
LAAU NOUAIKI!
NA LAAU KAOLA,
NA PAPA MANOANOA,
NA PAPA HELE,
NA KUA,
AAHO,
AAHO LIILI, &c.
LAAU ULAULA!
LAAU KAOLA,
NA PAPA MANOANOA,
NA PAPA HELE,
NA KUA,
AAHO, POU,
AAHO LIILII,
MOLINA, &c.
Pili Cida keokeo, Pili Laau ulaula,
Na Puka Hale, o na ano a pau,
Na puka Aninni, o na ano a pau,
Na Olepelepe Puka, o na ano a pau,
--------
Pepa Hale me na Lihilihi.
--------
NA LAKA PUKA!
NA AMI-PUKA,
NA-AMI PUKA LIILII,
NA KUI NAO.
----- ---
PENA, AILA-PENA, VANIKI,
WAI HOOMALOO.
---------
-PAAKAI Helu 1,
O PUULOA.
-----
E lawe wale ia no na mea i kuaiia
mai keia Pa-papa aku a i kahi o ka mea kuai mai, ina ma ke kaona nei, a ma na Awa
o keia Paeaina e like me ka aelike.
-----
Aia maanei ke Keena o ka
MOKU MAHU "KILAUEA,"
D. TAYLOR, KAPENA.
-----
S G. Waila Ma.
614-3m
HE MOOLELO KAAO
--NO--
ROBIANA LO:
Ka Hiwahiwa, o ke Koa.
HELU AKOLU O KA IKAIKA.
unuhiia mai loko mai o ka Buke Arabia, mai ka Olelo Beritania a ka Olelo Hawaii.
MAHELE III - HELU 122
MA KELA pule aku nei, ua kamailioia e kakou ke komo ana o Lo IIipa iloko o ke ahi a me ka hiki ana aku o kona leo kaniuhu imua o Kauiokalewa, a no ia mea, ua komo welenia ke aloha kaumaha iloko ona, a ua lana ae kona manao e iho mai e hoopakele i kana kano, aka, no kona ae ole ia e puka aku mawaho o na palena kahi ona i hoomaluia ai, nolaila, ua ike iho nei kakou, ua lalau ae oia i kekahi o kona mau manu kiai, a palapala iho la i kona mau manao a pau ma ke alo o ka eheu o ua manu nei, e kuhikuhi ana i ka mea pono a Lo IIipa e hana aku ai, a oia hoi na mea i kamailioia iho nei ia kakou ma kela pule aku nei, a oia mau mea a pau kana i hana ai, a hoouna aku la i ka manu, a lele aku la.
Maanei, e waiho iki ana kakou i ke kamailio ana no ka manu, a nana no ia e lele ae, a e huli ae kakou a nana aku ia Lo IIipa, oiai oia a me kona lio iluna pono o ka welelau o ka ula o ke ahi, a ua hiki ole i ka mana o ka lio ke pale no laua iho, oiai ua paa ae la kona mau wawae i ka nikinikiia me ka ula o ke ahi, a kuoi iho la i kahi hookahi, me he moku la i kuu i kona heleuma, a hiki ole iho la iaia ke nee aku imua aole hoi ke emi aku i hope, a haalele iho i kona kulana mua, oiai ua hamoia aku la ka hulu o kona mau wawae e ke ahi, a o kona mau, mika nae, aole no i hemo, aka, o ka wela nae a me ka hahana o ke ahi, ua hanu ae la ia malalo o ko Lo Hipa mau kapuai, a ia wa oia i pupuu mai ai i kona mau wawae, a noho kikanalei iho la, aka, o kona mau noonoo maikai a pau, ua hala aku ia, me kona manaoio no, aohe palena o ko ola i koe nona.
A oiai nae oia e noho ana me ka hoomanawanui, aia hoi, malu ana ka la, a manao iho la oia, ua paniia aku la e na ao, aka, i kona alawa ana ae a nana aku iluna, iko ae la oia he manu, a e hoolai malie iho ana kaua iho ana ; aia nae iloko ia wa, hu mai la kona aloha i kona mau kupuna manu, a puana ae la oia, Ina no hoi o oe keia e kekahi o ko ʻ u mau kupuna manu, a ya noho mai la oe, a ua ike mai la paha ua pilikia ka oukou pulapula, nolaila, hele mai nei oe e kokua ia ʻ u, a eia io no wau la iloko o ka pilikia e noho nei ; aka, mamua ae nae o ko ʻ u ike ana aku nei ia oe, ua hoomanao mua ae nei no au i ko ʻ u aloha no oukou a me o ʻ u makua, no ka mea, i na la mamua aku nei, a iloko hoi o na wakahiki loihi i hala, ua hele au mamuli o kuu ikaika a me ka mana o ʻ u mau kokua, a ua poina loa ko ʻ u hoomanao ana no oukou a me ua mea a pau, aka, iloko o keia loohia ana iho nei o ʻ u i keia pilikia, ua hiki ole ia ʻ u ke pale ana no 'u iho, a ua hoao iho nei au ma ka mea hiki, nole nae i loaa ia ʻ u ke lanakila ; a nolaila, ua kokoe mai nei oukou a pau imua o ʻ u, aka, o ke kaupale nae mawaena o ka make a me ke ola, na oi loa aku ia mamua o ko ʻ u hoomanao ana no oukou, na ka mea, ua phihihi loa ia ʻ u ko laua mau palena.
O keia mau olelo i kamailioia ae la, he mau olelo houpuupu wale iho no ia na Lo Hipa, oia wale iho, me ka lohe ole mai nae o ka manu, oiai aia no oia i ka lewa kahi i lele mai ai, a o ua manu la no hoi, aole no ia he manu no lokomai o ka ohana manu o kona mau kupuna, aka, o keia manu, oia no kekahi o ko Kauiokalewa mau manu kiai, e like me ka kakou i kamailio ae nei, a o kana mau hana nae ka kakou e nana ae ai ma keia wahi.
No ka mea, i ua manu nei e nee malie iho ana a kokoke i o Lo Hipa la, ua loaa mai la oia i ka wela o ke ahi, nolaila, aole oia i lele pono mai ma ke alo o Lo Hipa, aka, iho pono iho la no oia maluna, a hoopuni ae la ia Lo Hipa me kona mau eheu ; a o ka eheu i kakauia me na hua palapala, paluluia mai la ia mamua pono mai o Lo Hipa. Aia nae i knoa ike ana, aole nae oia i heluhelu i na mea i palapalaia, aka, puiwa e ae la oia, a lele ae la kona hauli, me kona manao ua hiki mai kona hopena, eia ka auanei he ola nona.
Iloko nae o kona wa e pupue ana i ka makau, aia hoi, ike lihi aku la oia i kainoa o Kauiokalewa, e kau ana mahope o na hua i palapalaia, akahi no a kanahai mai kona manao kuhihewa, a lana maikai iho la me ke wai lana malie la. A hala he mau minute mahope iho o kona noonoo ana, heluhelu aka la oia i na hua i palapalaia, a ua akaka loa iaia mai ka mua a i ka hope, nolaila, lalau aku la oia i ka hulu i palapalaia i ka hua mua huhuki ae la oia ia hulu, a kiola aku la ma ka aoao akau, a pio aku la ko laila ahi a me ko laila mau kupua a pau lea ; a o ka hulu i kakauia ma ka hopena o na huaolelo, huhuki ae la keia a kiola aku la ma ke hema, a pio aku la ko laila ahi a me ko laila mau kupua a pau loa ; a o na hulu hoi ma ka mua a me ka hope o ka inoa, kiola ia aku la kekahi ma ka hikina, a o kekahi hoi ma ke komohana.
Mahope iho no o ka pau ana o ka Lo Hipa hana no na hulu, ku ae la ua manu nei a hoi aku la i ka home o kona haku, me ka haawi ole iho i hookahi huaolelo ia Lo Hipa.. A no ko Loh Hipa manao hoi, aia la hoi a nana e hookuu aku i ka manu e hoi, nolaila, aole oia i haawi mua i kana mau huaolelo, e hai aku ana la hoi i kona aloha ia Kauiokalewa a me kona mahalo aku no kana mau hana maikai ana mai. Aka, no kona nanea loa i ka lilo ma ka nana ana i na palapu o na wawae o kona lio, ka mea a ke ahi i hana ai me kona aloha ole, aia hoi, i nana aku auanei ko ia nei hana, e lele ana ua manu nei iloko o ka leaw, ia wa i puana ae ai oia i kana mau huaolelo, O oe hoi e kela manu e lele la, a ina owau kou haku, ina la ua hooliloia oe e a ʻ u i moepuu no ke ahi, no ka mea, he mau wahi huaolelo ka ʻ u i manao ai e makana aku i ko haku ma ou la, me kuu manao ua ao ia la oe i ka hana maikai, eia ka he kauwa ino oe, a o kou hoomaikaiia, aia no ia i kou haku, aole ia ʻ u, no ka mea, ua hana mai oe i ka mea pono ole imua o ʻ u, nolaila, ke haawi iho nei au i kuu mau huaolelo ma ka welelau o ka makani, a nana no e lawe a haawi aku i ko haku, mamua ae o kou hiki ana aku ; a penei na huaolelo i hoounaia :
I KUU HAKU MAIKAI :
Ua hiki mai io ʻ u nei kau makana kookua, ua hoopio koke ia ke ahi, a ua loaa ia ʻ u ka lanakila, a no na mea aku i koe, aole au i hoao. Nolaila, ke waiho aku nei au i hoao. Nolaila, ke waiho aku nei au i ko ʻ u aloha a me ko ʻ u mahalo no kau hana maikai ana mai. Aloha no.
LO HIPA.
A hiki keia mau olelo imua o Kauiokalewa, ua haohao loa oia no ka hiki e ana aku o na huaolelo, aole nae ka manu, nolaila, noonoo iho la oia, a ninau iho la, Heaha la ke kumu o keia?
Iaia nae i aui ae ai a lalau aku la hoi i kana ipu malama lohe, aia hoi na olelo a Lo Hipa, e poala ana iloko o ua ipu nei. Aole hoi he hookahi huaolelo mai ko Lo Hipa waha ae, i nele ke komo aua iloko o ua ipu lohe nei. A iloko o ko Kauiokalewa wa e kaana ana i na huaolelo, alaila, ike iho la oia ua hewa kana manu, a komo iho la ka hilahila iloko ona. A waiho aku la oia i kana olelo kauoha i kona Ilamuku manu. Aole no hoi i liuliu ma ia hope iho, hiki mai la ua manu nei me na maka hoihoi, aka, ua hoopaa koke ia aku la oia me ka hookolokolo ole ia. Aka, ua hoao no oia e ninau mai i ke kumu o kona hoopaaia ana, aka na hao aku la ka Ilamuku i kona mana e like me ke kauoha a ko lakou haku.
E na hoa, ma keia wahi, e kamailio iki hou ana kakou no ka manu a me ke kaikunane o Kauiokalewa, oia hoi o Kekahinoa, ka mea i kapaia ma ka inoa o ke kupunakane, ka mea hou nona ke aupuni ahi - a oiai ua o Keahinoa moopuna e noho aua, me ka haka pono o kona mau maka ia Lo Hipa ma, o ka pau ae la i ke ahi a make iho, aia hoi, malu aua no ka la, a i alawa ae kona hana iluna, aia ka he manu, a o kana hana nae, aole keia i hoomaopopo, aka, ua komo nae ka haohao iloko ona, no ka mea, he mau makahiki loihi no kona o ka noho ana ma ua aupuni la, aole nae oia i ike aku i kekahi manu e lele pono ae ana maluna o ke aupuni, aole no hoi ma kahi e kokoke mai ana i kona mau palena, he ole loa no, a he kamahao hoi keia ike ana ona. A oiai ua manu la e hookokoke iho ana, haupu ae la oia no na olelo a kona kupunakane, a o kona hoomaopopo ana, ua waihoia no ia a hiki i kona ike maka ana.
Aole no i liuliu ma ia hope iho, hiki pololei ae la oia ma kahi a Lo Hipa ma e kau ana, a hoohuiia ae la lakou a lilo i mea hookahi ma ka ia nei ike aku, a kakali aku la keia o ka hopena o ka lakou mau hana. Aole no i liuliu iho, ike aku la keia i kekahi mea e lelo ana i ka akau, a o kona ano, na like no ia me ka Hokuwelowelo ; a i konw haule ana iho, kani ae la ia me he pukuniahi la. Aia nae iloko o ka manawa pokole, pio ilio la ke ahi ma ka aoao akau, a o na mana kupua a pau ma ia aoao, ua lilo ae la lakou i mea ole.
Iloko nae o ia manawa, hooiaio loa iho la oia i na olelo a pau a kona kupunakane, a i ae la paha, "Heaha la hoi kana, nana aku la oe mahope o ke aloha kaawe he kane, a nana maka mai nei oe ia ʻ u i kou pokii, i hoano no hoi au nou, me kuu manao e kokua ana oe mamuli o ʻ u; eia ka ua like pu no kou manao me ko ke kupunawahine o kaua : a heaha la hoi kana, "wehe i ka piko la e ka hoahanau." A iloko o ia wa, nee ae la oia a ma ka aoao hema, hooulu ae la oia i ke ahi a nui, o ka hele ia o ka ula o ke ahi a papale maluna o Lo Hipa ma. A iloko no o ia wa, ike hou aku la no keia i kekahi mea o ka oili ana mai, a iele ae la i ka hema, a o kona ano, ua like no ia me ko ka mea mua, a o ke ahi a me na kupua a pau malaila, ua auhee aku la lakou me he aka la.
A ike nae o Keahinoa 2, ua pio ka hapalua o ke aupuni, hooulu ae la oia i ka hapalua i koe, pii ae la ka ula o ke ahi a papale maluna o Ko Hipa ma, a ina paha he hooulu ana na ka mea hope, o ke ahi no la hoi ia, pau o Lo Hipa ma i kalua ia. Aole no i upuupu iho, oili ana no ua mea lele nei, a lele aku la i ka bikina, a o kona ano a me kana mau hana, ua like no ia me ka kona mau mua. A o ka hulu nae i kiolaia ma ka aoao komohana, aole no ia i like loa, no ka mea, o ko ia nei ano, ua like loa no ia me ka Waipuilani ; a i kona haule ana aku, lilo ae la na mea a pau ma ia wahi i moanawai hohonu.
Mahope iho o ka hala ana o kekahi man minute, hele makaikai ae la o Keahinoa maloko o na palena o kona aupuni, me ke kaumaha a me ke kumakena hoi oia i nana aku i na mea a pau, aole kekahi mea hookahi e kunou mai ana a e haawi mai ana i ko lakou mau hoomaikai ana iaia, no ka mea, o na laau a pau a me na mea kupu, pepee iho la, a o na pua hoi a pau o kela a me keia ano, ua kulou like iho la lakou a pau ilalo ; o ka Halealii nani a me kona pa e hoopni ana, ua lilo iho la ia i mea ole, a o na iwi o ka poe a pau i pio malaila, ku mai ana ke ahua he mau paila kiekie ; a o na kiai ma ua puka i pili ia Lo Jipa, holoholo ae la lakou me ka olioli ; a o ka poe hoi i pili ma ko Keahinoa aoao, e noho hakalalu wale ana no, me ke kali ana i ko lakou hopena.
(Aole i pau).
Koena mai kela pule mai
Huakai Nana i na Lepera
Ia makou i hui aku ai me keia poe ninau aku la makou i ko lakou manao hoohalahala, a pane mai kekahi, a me he ala o ko lakou manao like no ia. Pehea la oukou, he pololei io anei oukou, a nele loa i ka ai? A hai mai la kekahi, ae, ua hele io no makou i ka poi, aka, ua lawa makou i ka raiki, eia nae aole he maona pono iho he ai aku i ka laiki, pela iho la kekahi poe he nui wale, a o kekahi poe hui ua ae mai no he lawa pono no lakou i na mea a pau, a ua apono i ka meai loaa mai ka Papa aku, a me na inea a ka Papa Ola i hoonohonoho e ku ai. Wahi a lakou a pau, i ka hoike ia ana aku he wi no hoi, ke kulanakauhale nei no kekahi mau malama o ka makahiki a he pii lou ke kumukuai, a he ole no hoi ka ike ia o ka poi a po ka la e kekahi poe o kakou, a o ka laiki iho la no hoi ka ui, a o kekahi mau apana e aku no hoi, ua ai i ka launahele, a i ke aa o na mea ulu, -- ae ihe oiaio no ia, a ua ikemaka no hoi makou i ka wa e noho kino kanaka ana, ua hala ka la, a ua ao ka po i ke komo ai ole, a he nele maoli ua hoi i kekahi manawa, a o ke kuhihewa hoi keia manao aenei lie pono ka hoopii, eia ka aole. No keia mea, hoomanao iho la makou, aole no i ku konukonu loa na kumu o ka hoehalahala, oiai ua ikemaka iho la no lakou, a ua pane ae mahope o ka lohe ana, ua oi aku ko lakou pomaikai ma Kalawao, mamua ae o kekahi poe ole ma na wahi e aku ua ai i ka hapau a me na mea e ae e pau ai ka pololi. Ua lawa i ka ia, he nui ka raiki, he loaa no ka berena ke nele i kekahi manawa i ka pi, a no keia nele i ka poi, nolaila ka pilikia nui. E na how heluhelu, he manao nei makou ua oi aku ko kakou wi i ka poi a me na lako e ae, a ua nui ko kakou lihi i ka imi ana i na pono kino mamua o na mai a ka lehulehu e hoolako aku nei i ka ai a me ka ia, a nolaila, elike me ko kakou hoomanawanui, pela ao hoi he kupono i na makamaka o kakou e hoho la ma ia aina paliku, makamaka ole, ke hoomanawanui a uuni iho i ka ono o ka poi, a hoolawa ino ka pololi i ka ai loaa wale mai, ina he raiki a ina he palena paha. A eia hoi kekahi, i ka nana aku i ka aina, he aina momona, a he ʻ ulu na mea kanu, a o ka poe hooikaika, aole no hoi i nele loa, a i noho make a pololi. I ko makou manao, no ke kuhihewa ma ke alakai hewa ia i ulu mai ai ke manao hoopii no ka ai.
O ka lua o na kumu hoopii ana mai, ua hooia ia mai no ia e ka luna hooponopono o lakou, a oia mau mea i hana ia na ke Papa aku no kona mana. O keia kekahi kumu hoohalahala nui a na lepera i ka luna, aka, o kona hooko ana i na kauoho a ka Papa Ola i manao ai he kupono ke hoohanaia maluna o na mai, aole ia he kumu e hoahewa ia ai oia. Me he la i ka nana wale aku i keia hana ana a ka Papa ma ua mea o keia ano, ua ike, a ua maopopo no ia lakou ke kupono. Oiai iloko o na makahiki elua o ke kau i hala, ua nui na mai, a ua oi loa aku ka lilo mamua o ka mea i mauaoia, a e hooia ia mai no hoi ma ka hoike a ka Papa i keia Kau Ahaolelo, e olelo ana, ua hoolilo ia aku kekahi mau dala $27,000, mamua ae o ka haawina i hookaawaleia e ka Ahaolelo o 1872, no na mai lepera. A me he la, oiai no ka Papa Ola ka aina -- no na mai holookoa, ka mea hiki i ka hana a me ka mea hiki ole -- na manao no paha ka Papa Ola he kupono ke loaa mai ke kokua mai ka poe waiwai ma ka mahi ana, a o ka hua oia mea loaa mai, i kokua no ka poe ano nawaliwali, a i lawa pono ai no hoi na pilikia kuikawa ke hiki mai.
O ke kolu a me ka eha o na kumu hoopii, he mau mea hiki wale no ia i ka hooponoponoia e ka Papa, o ka mua, ma ka ninaninau pono ana o ka Papa ma o kona Agena a hoopono ae ; o ka lua, ma ka hoomaopopo ana i ke kapono o ke kua ana mai i na kokua i noho pa me na mai e holo mai a hui iwaena o ka poe i mai ole. O kahi paakiki iki o keia, o na lilo no ka hoolako ana i ka moku no ka pomaikai o ka poe kokua a me ko lakou mai, e ili iho ana maluna o ka haawina holookoa o na mai, a o ke kue no hoi i ka mea i manaoia, oia ka hookaawale loa ana aku i na mea e ulu mai ai keia mai, a e pakele ai ka lehulehu.
O ka lima o ka hoopii, oia ka makou e kokua, no ko makou manao o keia ka hemahema oiaio maoli o na wai, o ka nele i ke kahun alapaau iwaena a lakou, oiai o kahi pono iki o keia ano, aia wale no ia ma ke kuhikahi kakau ana i waihoia ʻku ma ka lima o ka mea haawi laau, o Mr Williams, a he ano ole no hoi na pomaikai e manao ia e loaa ana ma ia mea. Ua oi loa aku ke koua laau a na Kahuna Pope a Rev Father Andrea, e noho la no ka wa pokule ma kahi o Rev Father Damiens. Aole no hoi makou i manao no ka Papa Ola ka hoohemahema ma ia mea, aka no ka nele maoli no i ka mea e hiki ai, a ina paha he mea hiki, aia no ka mana ma ka lima o ka Ahaolelo, i ka pakui ana i haawina e lawa ai ke Kahuna lapaau noho iwaena o na mai a me na lako lapaau.
Na hoopii e ae i ka makou nana aku he mea ole, a ua ulu ae ia mau mea ma ka hoalaala ia e kekahi poe i kuhihewa i ko lakou kulana i hoonohoia aku ai ma ia wahi. Ua lohe iki aku makou i kekahi mau olelo mai ka waha o kekahi poe kino ikaika, oiai ua hoonohoia aku lakou malaila he mai, aole he kupono ia lakou ke lawelawe no lakou iho, a e hilinai no lakou no ko lakou mau pono a pau maluna o ka Papa Ola, -- a ina maluna o ka Papa, ua lilo maluna o ke lehulehu holookoa ka malama ana i ke kino hiki no hoi ke koua iaia iho, -- he mauwele maole no. O ka poe nawaliwali o ke kino ua ae mai no i ko lakou pomaikai mamuli o ka malama ana aku a ke aupuni -- a ke mahalo pu nei no hoi makou i ko kakou wahi aupuni i ka malama lua ole i kona poe ilihune, a poe i loohia i ka pilikia me he la i ka nana ʻ ku aole ona kokoolua ma keia hana.
He mau ninau, Hooulu Lahui
E KA NUPEPA KUOKUA E, ALOHA oe:
E oluolu mai ia ʻ u, e waiho hou aku i keia mau pahoe ninau hoeulu lahui ana. He mau ninau kamaaina loa keia e moalo pinepine nei ma na ipuka hale o ka poe loea kamailio a me ka noiau kalai olelo, a me na puana leu maiau ana. A ke makemake nei kou hoa e haawi i keia mau ninau ma ka poe kalai olelo poweko, iloko o na papa helu i hookaokoaia ; a penei e ninau ai:
1. Ma na kumu hea i emi ai keia lahui?
2. Ma na kumu hea hoi e ulu hou ai keia lahui?
3. Heaha na kumu hana i pili i ka ninau mua?
4. Pehea hoi na hoakaka e pili ana i ka ninau alua?
1. Ke haawiia aku nei keia ninau i ka Moi, ke Alii nui o ko Hawaiia Pae Aina, ka puuawai hemolele a kou lahiu i makia paaia e kou mau kupuna, a e lilo oe i papa mua no ka imi hooulu lahui.
2. Ke haawiia aku nei keia ninau i na ʻ Lii a pan i hanau alii ia no ko Hawaii pae aina, a e kapaia o ka papa elua no ka hooula lahui
3. Ke haawiia aku nei keia mau ninau i na hoa hanohano o ka Ahaolelo Kau Kanawai o ke aupuni o ko Hawaii pae aina, a e kapais o ka papa ekolu o ka imi hooulu lahui
4. Ke haawiia aku nei keia mau ninau i ko ka Moi Aha Kuhina nui o ke aupuni o ko Hawaii pae aina, no ka imi kumu hooulu lahui, a e kapaia o ka papa eha.
5. Ke haawiia aku nei keia mau ninau i ko ka Moi Aha Kukamalu o ke aupuni o ko kiawali pae aina, no ka imi kumu hooulu lahui, a e kapaia o ka papa alima.
6. Ke haawiia aku nei keia mau ninau i ko ka Moi Aha Hookolokolo Kiekie o ke aupuni o ko Hawaii pae aina, a e kapaia o ka papa eono no na kumu hooulu lahui
7. Ke haawiia aku nei keia mau ninau i ka Papa Loio o ke Aupuni o ko Hawaii pae aina, a e kapaia o ka papa ehiku no ka hooulu lahui
8. Ke haawiia aku nei keia ninau i na Kahunapule Hoolepope a pau o ko Hawaii pae aina, a e kapaia lakou, o ka papa ewalu no ka imi kumu hooulu lahui.
9. Ke haawiia aku nei keia ninau i na Kahunapule Katolika a pau o ko Hawaii pae aina, a e kapaia lakou, o ka pupa eiwa no ka imi kumu hooulu lahui.
10. Ke haawiia aku nei keia ninau i na Kahunapule Moremona o ko Hawaii pae aina, a e kapaia o ka papa mi uo ka imi kumu hooulu lahui.
11. Ke haawiia aku nei keia ninau i ka poe kalepa a pau o ko Hawaii pae aina, a e kapaia lakou, o ka papa umikumamakahi no ka imi kumu hooulu lahui.
Ua makemake ka mea nona keia ninau, e hoike pakahimai kela a me keia i na kumu, ma hana a me ua hoakaka ana, a e kakau inoa malalo o kona papa me he inoa la, a e wae au i ka mea oiaio mailoko ae o na hoakaka ana. E aloha auanei.
Ioane K. Hoolale
Hawaii, 1874